མཚོ་ལྷོ་བོད་རིགས་རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་སྐབས་བཅོ་ལྔ་བའི་གྲོས་ཚོགས་ཐེངས་དང་པོ་གཟབ་རྒྱས་ངང་འཚོགས།

      ཟླ8པའི་ཚེས24ཉིན་གྱི་སྔ་དྲོར། མཚོ་ལྷོ་བོད་རིགས་རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་སྐབས་བཅོ་ལྔ་བའི་གྲོས་ཚོགས་ཐེངས་དང་པོ་ཁུལ་གྲོས་ཚོགས་ལྟེ་གནས་སུ་གཟབ་རྒྱས་ངང་འཚོགས། ཚོགས་འདུར་ཞུགས་དགོས་པའི་འཐུས་མི252ཡོད་ལ། ཚོགས་འདུར་དངོས་སུ་ཞུགས་ཡོད་པའི་འཐུས་མི246ཡོད་པས། ཁྲིམས་ཀྱིས་གཏན་འཁེལ་བྱས་པའི་མི་གྲངས་དང་མཐུན།      ཚོགས་འདུ་ལ་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞིའམ་ཚོགས་ཆེན་གྱི་ལག་བསྟར་ཀྲུའུ་ཞི་མཱ་ཅན་ཧོང་གིས་མགོ་འཛིན་བྱས་ཤིང་། ཚོགས་ཆེན་ལག་བསྟར་ཀྲུའུ་ཞི་ལིས་ཀང་། ཧྲི་ཅན་ཕིང་། ཀྲང་ཧྲེང་པིའོ། གསེར་མཚོ། དཔལ་ལྡན། ཀེང་ཧྲེང་ཁྲེང་། ཏིང་རུའེ་ཡེས། མཱ་ཧྲའོ་ཧྥུའུ། ལི་སུང་སེན་བཅས་ཀྲུའུ་ཞི་སྟེགས་བུའི་མདུན་གྲལ་དུ་བཞུགས།
     ཚོགས་ཞུགས་དང་ཟུར་ཞུགས་བྱས་ནས་ཀྲུའུ་ཞི་སྟེགས་བུའི་མདུན་གྲལ་དུ་བཞུགས་ཡོད་པ་ནི་ཁུལ་ཨུའི་ཧྲུའུ་ཅི་གཞོན་པའམ་ཁུལ་མི་དམངས་སྲིད་གཞུང་གི་ཁུལ་དཔོན་ཀརྨ་ཕུན་ཚོགས་དང་། དེ་མིན་ཁུལ་ཨུའི་རྒྱུན་ཨུ་སོ་སོ་དང་ཁུལ་མི་དམངས་སྲིད་གཞུང་གི་ཁུལ་དཔོན་གཞོན་པ། ཁུལ་སྲིད་གྲོས་ཀྱི་ཀྲུའུ་ཞི་གཞོན་པ། ཁུལ་འབྲིང་རིམ་མི་དམངས་ཁྲིམས་ཁང་དང་ཁུལ་མི་དམངས་ཞིབ་དཔྱོད་ཁང་གི་འགན་འཁུར་བློ་མཐུན་གཙོ་བོ། ཚོགས་འདུར་ད་དུང་ཁུལ་སྲིད་གྲོས་སྐབས་བཅུ་བཞི་བའི་གྲོས་ཚོགས་ཐེངས་དང་པོའི་ཨུ་ཡོན་དང་ཞིང་ཆེན་གྱི་དམངས་ཆེན་འཐུས་མི་ཁ་ཤས། ཁུལ་ཨུའི་འབྲེལ་ཡོད་པུའུ་ཨུ་དང་མི་དམངས་ཚོགས་པའི་འགན་འཁུར་བ། མཚོ་ལྷོ་ཡན་ལག་དམག་ཁུལ་དང་ཁུལ་མི་དམངས་སྲིད་གཞུང་གི་ཁོངས་གཏོགས་ལས་ཁུངས། ཞིང་ཆེན་གྱི་ལས་ཁུངས་དོ་དམ་འགན་འཁུར་བ། ཁུལ་ལྟ་ཞིབ་ཨུ་ཡོན་ལྷན་ཁང་དང་ཁུལ་འབྲིང་རིམ་མི་དམངས་ཁྲིམས་ཁང་། ཁུལ་མི་དམངས་ཞིབ་དཔྱོད་ཁང་གི་འབྲེལ་ཡོད་འགན་འཁུར་བ། ཁུལ་གཏོགས་འབྲེལ་ཡོད་ཀྱི་ཁེ་ལས་དང་ལས་དོན་སྡེ་ཁག དམངས་གཉེར་ཁེ་ལས་ཁ་ཤས་ཀྱི་འགན་འཁུར་བ་བཅས་ཟུར་ཞུགས་བྱས་ཡོད།     ཚོགས་འདུའི་སྟེང་ཁུལ་དཔོན་ཀརྨ་ཕུན་ཚོགས་ཀྱིས་ཕུལ་བའི་སྲིད་གཞུང་བྱ་བའི་སྙན་ཞུར་ཉན་ལ། སྙན་ཞུར་ཁྱོན་བསྡོམས་ཁག་གསུམ་དུ་བགར་ཡོད་དེ། གཅིག་ནི་འདས་པའི་ལོ་ལྔའི་བྱ་བར་ཕྱིར་མིག་བལྟ་བ། གཉིས་ནི་སླད་ཕྱིན་ལོ་ལྔའི་དམིགས་འབེན་དང་ལས་འགན་གཙོ་བོ། གསུམ་ནི་སྲིད་གཞུང་རང་ངོས་ཀྱི་འཛུགས་སྐྲུན་ལ་ཤུགས་སྣོན་བྱེད་པ།      སྙན་ཞུ་ལས་བསྟན་དོན། ཁུལ་དམངས་ཆེན་སྐབས་བཅུ་བཞི་བའི་གྲོས་ཚོགས་ཐེངས་དང་པོ་འཚོགས་ཚུན་གྱི་ལོ་ལྔ་ནི། མཚོ་ལྷོའི་འཕེལ་རྒྱས་ཀྱི་བརྒྱུད་རིམ་ཁྲོད་དོན་སྙིང་ཧ་ཅང་གལ་ཆེན་ལྡན་པའི་འགག་རྩའི་ལོ་ལྔ་ཡིན།ལོ་ལྔའི་རིང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་། ཁུལ་ཨུ་བཅས་ཀྱི་ཡང་དག་པའི་སྣེ་ཁྲིད་འོག ང་ཚོས་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱེད་པ་རྒྱུན་འཁྱོངས་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བར་བཏོན་པའི་བླང་བྱ་གལ་ཆེན་ལ་སློབ་སྦྱོང་དང་ལག་བསྟར་གཏིང་ཟབ་བྱས་ཐོག བརྟན་ཐོག་ཡར་འཕེལ་གྱི་བྱ་བའི་སྤྱིའི་དགོངས་གཞིར་རྒྱུན་འཁྱོངས་དང་། འཕེལ་རྒྱས་ཀྱི་འདུ་ཤེས་གསར་བ་ཆ་ཚང་ཞིང་གནད་ལ་འཁེལ་བའི་སྒོ་ནས་ལག་བསྟར། “ལྔ་བཞིའི་འཐབ་ཇུས”ལག་བསྟར་གཏིང་ཟབ་དང་།“སྔོན་འགྲོ་གཅིག་དང་སྤུས་ལེགས་གཉིས”ལ་སྐུལ་འདེད་ཧུར་ཐག “ལྔའི་བཅུ་གསུམ་པའི”དམིགས་ཚད་ལས་འགན་བདེ་བླག་ངང་ལེགས་འགྲུབ།“ལྔའི་བཅུ་བཞི་བ”བརྟན་པོའི་ངང་མགོ་རྩོམ་པ་བཅས་བྱས་ཏེ། མཚོ་ལྷོས་འབད་བརྩོན་ཆེན་པོས་རྗེས་སྙེག་དང་སྔོན་ཐོན་བརྩོན་ལེན་གྱི་ལེའུ་གསར་བ་བརྩམས་ཡོད་ལ། དེར་ཁྱད་ཆོས་གཙོ་བོ་ཕྱོགས་དགུ་ནས་འདུ་སྟེ།
    གཅིག་ནི་ཐོག་མཐའ་བར་གསུམ་དུ་འཕེལ་རྒྱས་ནི་ལས་འགན་ཨང་དང་བོར་འཛིན་པ་རྒྱུན་འཁྱོངས་བྱས་ཏེ་བདེན་འཚོལ་གསར་གཏོད་དང་འབད་འབུངས་མདུན་བསྐྱོད་པས་དཔལ་འབྱོར་གྱི་ཕྱོགས་བསྡུས་སྟོབས་ཤུགས་སྐས་རིམ་གསར་བར་སླེབས་པ།
    གཉིས་ནི་ཐོག་མཐའ་བར་གསུམ་དུ་འགག་སྒྲོལ་ཁག་སེལ་གྱི་འགན་འཁུར་སྙིང་སྟོབས་རྒྱུན་འཁྱོངས་བྱས་ཏེ། གནད་འཁེལ་ལག་བསྟར་དང་གནད་འཁེལ་ཤུགས་འདོན་བྱས་ནས། འགག་སྒྲོལ་དམག་འཐབ་ཆེན་པོ་གསུམ་ལ་རྒྱལ་ཁ་གསར་བ་ཐོབ་པ།
    གསུམ་ནི་ཐོག་མཐའ་བར་གསུམ་དུ་སྐྱེ་ཁམས་སྲུང་སྐྱོང་སྔོན་དུ་བསྐྱོད་པའི་འདུ་ཤེས་རྒྱུན་འཁྱོངས་བྱས་ཏེ། བཅོས་སྐྱོང་ལ་ཤུགས་སྣོན་དང་སྐྱེ་ཁམས་མ་ལག་སླར་གསོ་བྱས་ནས། སྐྱེ་ཁམས་དཔལ་ཡོན་གྱི་འཛུགས་སྐྱོང་དུས་རིམ་གསར་བ་ཞིག་ཏུ་སླེབས་པ།
    བཞི་ནི་ཐོག་མཐའ་བར་གསུམ་དུ་ཐོན་ལས་ལ་བརྟེན་ནས་ཁུལ་སྟོབས་ལྡན་དུ་གཏོང་བའི་འཐབ་ཇུས་ཀྱི་ཁ་ཕྱོགས་རྒྱུན་འཁྱོངས་བྱས་ཏེ། གྲུབ་ཚུལ་ལེགས་སྒྲིག་དང་ཕྱོགས་སྒྱུར་བྱེད་ཚད་ཇེ་མགྱོགས་སུ་བཏང་ནས་ལྗང་མདོག་འཕེལ་རྒྱས་རིམ་བཞིན་མཐོ་ས་གསར་བར་སླེབས་པ།
    ལྔ་ནི་ཐོག་མཐའ་བར་གསུམ་དུ་རྨང་གཞིའི་ཞན་ཆ་ཁ་གསབ་དང་། གཅིག་གྱུར་མཐུན་སྦྱོར། མཉམ་ཤུགས་སྐུལ་འདེད་གཏོང་བ་བཅས་རྒྱུན་འཁྱོངས་བྱས་ཏེ། མཁར་གྲོང་མཉམ་འདྲེས་འཕེལ་རྒྱས་ཀྱི་རྣམ་པ་གསར་བ་བཏོད་པ།
    དྲུག་ནི་ང་ཚོས་ཐོག་མཐའ་བར་གསུམ་དུ་སྒྱུར་བཅོས་གསར་གཏོད་སྣེ་ཁྲིད་དུ་བྱེད་པ་རྒྱུན་འཁྱོངས་བྱས་ཏེ་སྦས་ཤུགས་སྔོག་འདོན་དང་བར་སྟོང་གསར་འབྱེད་བྱས་ཏེ། སྒོ་འབྱེད་མཉམ་ལས་རྒྱ་ཆེར་གཏོང་བའི་ཕྱོགས་སུ་རྣམ་པ་གསར་བ་མངོན་པ།
    བདུན་ནི་ང་ཚོས་དམངས་ཚིས་ལེགས་བསྒྱུར་དང་འགན་སྲུང་བརྟན་པོ་ཡོང་བར་རྒྱུན་འཁྱོངས་བྱས་ཏེ། ཐུན་མོང་གི་འཕེལ་རྒྱས་དང་འཚོ་བ་ཇེ་ལེགས་སུ་བཏང་སྟེ། མི་དམངས་ལ་བདེ་སྐྱིད་ལྡན་པའི་འཚོ་བ་གསར་བ་ཞིག་བསྐྲུན་པ།
    བརྒྱད་ནི་ཐོག་མཐའ་བར་གསུམ་དུ་སྤྱི་ཚོགས་བཅོས་སྐྱོང་མ་ལག་འཐུས་ཚང་དུ་གཏོང་བ་རྒྱུན་འཁྱོངས་དང་། གཙོ་གནད་འབུར་ཐོན། ཐུན་མོང་འཛིན་སྐྱོང་བཅས་བྱས་ཏེ་མཚོ་ལྷོའི་བདེ་འཇགས་འཛུགས་སྐྲུན་ཐད་མུ་མཐུད་དུ་གྲུབ་འབྲས་གསར་བ་ཞིག་ལེན་པ།
    དགུ་ནི་ཐོག་མཐའ་བར་གསུམ་དུ་སྲིད་གཞུང་རང་ངོས་འཛུགས་སྐྱོང་ལ་སྐུལ་འདེད་གཏོང་རྒྱུ་རྒྱུན་འཁྱོངས་དང་། སྤྱོད་ཚུལ་ལེགས་བསྒྱུར། འགན་འཁྲི་འཁུར་ཤུགས་ཆེ་རུ་གཏོང་བ་བཅས་བྱས་ནས་སྲིད་སྐྱོང་ནུས་པ་དང་ཞབས་ཕྱིའི་ཆུ་ཚད་མཐོར་འདེགས་སུ་གཏོང་བ།     སྙན་ཞུ་ལས་བསྟན་དོན། ལོ་ལྔའི་རིང་འབད་འཐབ་བྱས་ནས་ཐོབ་པའི་གྲུབ་འབྲས་ནི་ལས་སླ་བོ་ཞིག་མིན་ལ། འཚོལ་ཞིབ་ཁྲོད་གསོག་འཇོག་བྱས་པའི་ཉམས་མྱོང་ནི་ཧ་ཅང་རྩ་ཆེན་ཞིག་ཡིན། ལོ་ལྔའི་ལག་ལེན་གྱི་སྤྱི་བསྡོམས་ལས། མཚོ་ལྷོའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས་ན།
    ཏང་གིས་བྱ་བ་ཐམས་ཅད་ལ་ཕྱོགས་ཡོངས་ནས་མགོ་ཁྲིད་བྱེད་པ་ངེས་པར་དུ་རྒྱུན་འཁྱོངས་བྱེད་པ།
    སྐྱེ་ཁམས་སྲུང་སྐྱོང་སྔོན་ལ་འགྲོ་བའི་འདུ་ཤེས་ངེས་པར་དུ་རྒྱུན་འཁྱོངས་བྱེད་པ།
    མི་དམངས་དཀྱིལ་སྙིང་ཡིན་པའི་འཕེལ་རྒྱས་ཀྱི་བསམ་བློ་ངེས་པར་དུ་རྒྱུན་འཁྱོངས་བྱེད་པ།
    སྒྱུར་བཅོས་གསར་གཏོད་དང་སྒོ་འབྱེད་རྒྱ་སྐྱེད་བྱ་རྒྱུ་ངེས་པར་དུ་རྒྱུན་འཁྱོངས་བྱེད་པ།
    གཞི་རིམ་གྱི་བཅོས་སྐྱོང་ནུས་པ་ཆེ་རུ་གཏོང་བ་ངེས་པར་དུ་རྒྱུན་མཐའ་འཁྱོངས་བྱེད་པ།
    རིགས་སོ་སོའི་མི་དམངས་མཐུན་སྒྲིལ་ཡར་ཐོན་ཡོང་བ་ངེས་པར་དུ་རྒྱུན་འཁྱོངས་བྱེད་པ།     སྙན་ཞུ་ལས་བསྟན་དོན། སླད་ཕྱིན་ལོ་ལྔ་ནི“ལྔའི་བཅུ་བཞི་བའི”འཆར་འགོད་ལག་བསྟར་དང་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་ལམ་ཁ་གསར་བ་ཞིག་བཏོད་དེ། རིགས་སོ་སོའི་མི་དམངས་ཀྱིས་བདེ་སྐྱིད་ཀྱི་འཚོ་བར་བཅངས་པའི་རེ་བ་དོན་སྨིན་ཡོང་བའི་འགག་རྩའི་ལོ་ལྔའང་ཡིན་ལ། རང་ཁུལ་གྱི་སྤུས་མཐོའི་འཕེལ་རྒྱས“ཇེ་མགྱོགས་སུ་འགྲོ་བ”དང་། སྲིད་ཇུས་ཁེ་འབབ“ཇེ་མང་དུ་འགྲོ་བ”། རང་ནུས་སྟོབས་ཤུགས“ཕྱིར་འདོན་པ”། མཉམ་འདྲེས་འཕེལ་རྒྱས“གཏིང་ཟབ་ཏུ་གཏོང་བ”། ཁོངས་ཡོངས་བཅོས་སྐྱོང“ཇེ་ལེགས་སུ་གཏོང་བ”བཅས་ཀྱི་དུས་ཤིག་ཀྱང་ཡིན། སླད་ཕྱིན་ལོ་ལྔའི་སྲིད་གཞུང་བྱ་བའི་སྤྱིའི་བླང་བྱ་ནི། ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རླབས་ཆེན་དགོངས་པའི་དར་ཆ་མཐོན་པོར་བསྒྲེངས་ནས། ཏང་གི་ཚོགས་ཆེན་བཅུ་དགུ་བ་དང་སྐབས་བཅུ་དགུ་བའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་། གསུམ་པ། བཞི་བ། ལྔ་བ་བཅས་ཀྱི་དགོངས་དོན་ལག་བསྟར་གཏིང་ཟབ་བྱེད་པ། ཞིང་ཆེན་ཏང་གི་འཐུས་མི་ཚོགས་ཆེན་ཐེངས་བཅུ་གསུམ་པ་དང་ཞིང་ཆེན་ཏང་ཨུའི་ཚང་འཛོམས་གྲོས་ཚོགས་སྐབས་བཅུ་གསུམ་པའི་རིམ་བྱུང་གི་དགོངས་དོན། དེ་མིན་ཁུལ་གྱི་ཏང་གི་འཐུས་མི་ཚོགས་ཆེན་ཐེངས་བཅུ་བཞི་བའི་དགོངས་དོན་ལག་བསྟར་གཏིང་ཟབ་བྱེད་པ།“ཕྱོགས་ལྔ་གཞི་གཅིག”གི་སྤྱིའི་བཀོད་པ་ལ་གཅིག་གྱུར་གྱིས་སྐུལ་འདེད་གཏོང་བ་དང་།“ཕྱོགས་ཡོངས་བཞིའི”འཐབ་ཇུས་བཀོད་སྒྲིག་ལ་མཐུན་སྦྱོར་ངང་སྐུལ་འདེད་གཏོང་བ། འཕེལ་རྒྱས་ཀྱི་དུས་རིམ་གསར་བར་གཞི་འཛུགས་པ་དང་། འཕེལ་རྒྱས་ཀྱི་འདུ་ཤེས་གསར་བ་ལག་བསྟར། འཕེལ་རྒྱས་ཀྱི་རྣམ་པ་གསར་བར་མཉམ་འདྲེས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལས་དོན་ལ་བཏོན་པའི་བླང་བྱ་གལ་ཆེན་མཛུབ་ཁྲིད་དུ་བཟུང་ནས“ཆེས་ཆེ་བ་གསུམ”གྱི་ཞིང་ཆེན་གྱི་གནས་ཚུལ་དང“བདེ་འཇགས་གསུམ”གྱི་འཐབ་ཇུས་ངེས་གནས་ཁོང་དུ་ཆུད་པ། བརྟན་ཐོག་ཡར་འཕེལ་གྱི་བྱ་བའི་སྤྱིའི་དགོངས་གཞི་རྒྱུན་འཁྱོངས་བྱེད་པ། རིམས་ནད་སྔོན་འགོག་ཚོད་འཛིན་དང་དཔལ་འབྱོར་སྤྱི་ཚོགས་འཕེལ་རྒྱས་ལ་སྤྱི་འདོམས་བྱེད་པ། འཕེལ་རྒྱས་དང་བདེ་འཇགས་ལ་གཅིག་གྱུར་འཆར་འགོད་བྱེད་པ། དུས་བསྟུན་མདུན་སྐྱོད་ཀྱིས་ཞིང་ཆེན་ཏང་ཨུའི“སྔོན་འགྲོ་གཅིག་དང་སྤུས་ལེགས་གཉིས”ཀྱི་འཐབ་ཇུས་བཀོད་སྒྲིག་དངོས་འབེབས་བྱེད་པ། མི་དམངས་ལ་བདེ་སྐྱིད་བསྐྲུན་རྒྱུ་དམིགས་ཡུལ་དུ་འཛིན་པ་དང་། སྤུས་ཚད་མཐོ་བའི་འཕེལ་རྒྱས་ཐབས་ལམ་དུ་བྱེད་པ། སྒྱུར་བཅོས་སྒོ་འབྱེད་སྒུལ་ཤུགས་སུ་བྱེད་པ།“ཐོན་ལས་ཆེན་པོ་བཞི”སྣེ་ཁྲིད་དུ་བྱེད་པ། སྐྱེ་ཁམས་དཔལ་ཡོན་གྱི་མཐོ་ས་གཏོད་པ། ཁྱོན་ཡངས་པའི་གུང་ཧོ་གཤོང་ས་དར་རྒྱས་ཡོང་བར་སྐུལ་འདེད་གཏོང་བ་བཅས་བྱས་ནས་མི་དམངས་ལ་སྔར་བས་བདེ་སྐྱིད་དང་མཛེས་སྡུག་གི་འཚོ་བ་གསར་བ་བསྐྲུན་རྒྱུ་དེ་ཡིན།        སྙན་ཞུ་ལས་བསྟན་དོན། རང་སྐྱོང་ཁུལ་གྱི“ལྔའི་བཅུ་བཞི་བའི”གོང་སྤེལ་འཆར་འགོད་ལྟར། སླད་ཕྱིན་ལོ་ལྔའི་རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྔོན་དཔག་དམིགས་ཚད་གཙོ་བོ་ནི། ས་ཁུལ་གྱི་ཐོན་སྐྱེད་བསྡོམས་ཐང་ལོ་རེར་ཆ་སྙོམས་ཀྱིས5.5%ཡས་མས་འཕར་བ་དང་། སྤྱི་ཚོགས་ཡོངས་ཀྱི་གཏན་འཇགས་རྒྱུ་ནོར་ཐད་ཀྱི་མ་དངུལ་གཏོང་ཚད་ལོ་རེར་ཆ་སྙོམས་ཀྱིས6%ཡས་མས་འཕར་བ། གཞི་ཁྱོན་ཡན་གྱི་བཟོ་ལས་འཕར་ཐང་ལོ་རེར་ཆ་སྙོམས་ཀྱིས6%ཡས་མས་འཕར་བ། ས་གནས་ཀྱི་སྤྱིར་བཏང་གི་སྤྱི་བའི་སྔོན་རྩིས་ཡོང་འབབ་དེ་ས་ཁུལ་གྱི་ཐོན་སྐྱེད་བསྡོམས་ཐང་དང་དུས་མཉམ་དུ་འཕར་བ་དང་། སྤྱི་ཚོགས་འཛད་སྤྱོད་དངོས་རྫས་ཀྱི་སིལ་འཚོང་བསྡོམས་འབོར་ལོ་རེར་ཆ་སྙོམས་བྱས་ན5%ཡས་མས་འཕར་བ། སྡོད་དམངས་མི་རེའི་ཆ་སྙོམས་ཡོང་འབབ་ལོ་རེར་ཆ་སྙོམས་ཀྱིས6%འཕར་བ། རྒྱུན་སྡོད་མི་འབོར་གྲོང་རྡལ་ཅན་དུ་འགྱུར་ཚད55%ལ་སླེབས་པ། གྲོང་རྡལ་གྱི་ལས་ཤོར་ཐོ་འགོད་བྱེད་ཚད3.5%ནང་དུ་ཚོད་འཛིན་བྱེད་པ། སྡོད་དམངས་ཀྱི་འཛད་སྤྱོད་རིན་གོང་འཕར་ཚད་དང་། ནུས་རྒྱུ་གྲོན་ཆུང་དང་ཐཱན་ཉུང་གཏོང་བྱེད་ཚད་ཞིང་ཆེན་གྱིས་གཏན་འཁེལ་བྱས་པའི་དམིགས་ཚད་ནང་ཚོད་འཛིན་བྱེད་པ། ལོ་རེའི་འབྲུ་རིགས་ཐོན་ཚད་བསྡོམས་འབོར་ཏུན་ཁྲི15ཡན་རྒྱུན་འཁྱོངས་བྱེད་པ་བཅས་ཡིན།     སྙན་ཞུ་ལས་བསྟན་དོན། གོང་གསལ་གྱི་དམིགས་ཚད་མངོན་འགྱུར་བྱེད་ཐུབ་པའི་རྨང་གཞིའི་སྟེང་། ཁུལ་ཨུའི་ཏང་གི་འཐུས་མི་ཚོགས་ཆེན་ཐེངས་བཅུ་བཞི་བའི་ཐོག་བཏོན་པའི “དར་རྒྱས་གཅིག་མངོན་འགྱུར་དང་། འགག་སྒྲོལ་གཉིས་བརྩོན་ལེན། དཔེ་མཚོན་གསུམ་བཏོད་པ། མདུན་གྲལ་དུ་བསྐྱོད་པ་གསུམ་ལ་སྐུལ་འདེད། འབུར་ཐོན་ཡིན་པའི་མཐོར་འདེགས་ལྔ་སྐུལ་འདེད་གཏོང་བའི”འཐབ་ཇུས་དམིགས་ཚད་ལྟར། མིག་སྔར་ལ་གཞི་བཙུགས་ནས་མ་འོངས་པར་ཁ་ཕྱོགས་ཏེ།སྒྲུབ་ཕོད་པའི་སྙིང་ཕུར་བརྡབ་ནས་ངེས་ཤུགས་རྒྱུན་འཁྱོངས་དང་རྒྱུན་མཐུད་འབད་བརྩོན་བྱས་ཏེ།ས་ཁུལ་གྱི་ཐོན་སྐྱེད་བསྡོམས་ཐང་གི་འཕར་ཚད་ཞིང་ཆེན་ཡོངས་ཀྱི་ཆ་སྙོམས་ཆུ་ཚད་ལས་བརྒལ་བ་དང་། གཏན་འཇགས་རྒྱུ་ནོར་ཐད་ཀྱི་མ་དངུལ་གཏོང་ཚད་རིམ་རྩིས་ཀྱིས་སྒོར་དུང་ཕྱུར་སྟོང་གི་འགག་སྒོ་ཆེན་པོ་ལས་བརྒལ་བ། སྡོད་དམངས་མི་རེའི་ཆ་སྙོམས་ཡོང་འབབ་དེ་བསྟུད་མར་དཔལ་འབྱོར་འཕར་ཚད་ལས་མཐོ་བ། ས་གནས་ཀྱི་སྤྱིར་བཏང་གི་སྤྱི་བའི་སྔོན་རྩིས་ཡོང་འབབ་དང་། སྤྱི་ཚོགས་འཛད་སྤྱོད་དངོས་རྫས་ཀྱི་སིལ་འཚོང་བསྡོམས་འབོར་ཆེས་ཆེར་འཕར་ཐུབ་པ་བཅས་བརྩོན་ལེན་བྱས་ཐོག ཕྱོགས་བསྡུས་སྟོབས་ཤུགས་སྔར་བས་ཆེ་བ་དང་། སྐྱེ་ཁམས་ཁོར་ཡུག་སྔར་བས་མཛེས་པ། མཁར་གྲོང་འཕེལ་རྒྱས་སྔར་བས་ལུགས་མཐུན་ཡིན་པ། དམངས་ཀྱི་འཚོ་བ་སྔར་བས་བདེ་སྐྱིད་ལྡན་པ། སྤྱི་ཚོགས་སྔར་བས་བརྟན་ལྷིང་ཡོང་བ་བཅས་བྱས་ཏེ། ཁྱོན་ཡངས་པའི་གུང་ཧོ་གཤོང་ས་དར་རྒྱས་ཡོང་བར་སྐུལ་འདེད་གཏོང་བ་དང་། སྔར་བས་དར་རྒྱས་འཆམ་མཐུན་མཛེས་སྡུག་བཅས་ཀྱི་མཚོ་ལྷོ་གསར་བ་འཛུགས་སྐྲུན་བྱེད་པ། རིགས་སོ་སོའི་མི་དམངས་ལ་སྔར་ལས་བདེ་ཞིང་སྐྱིད་པའི་འཚོ་བ་གསར་བ་བསྐྲུན་པ་བཅས་ཀྱི་ཆེད་དུ་འབད་འཐབ་ཧུར་ཐག་བྱེད་དགོས།
    སྙན་ཞུ་ལས་བསྟན་དོན། སླད་ཕྱིན་གྱི་ལོ་ལྔའི་ནང་། ཕྱོགས་དྲུག་གི་བྱ་བ་གཙོ་གནད་དུ་བཟུང་ཡོད་དེ།
    གཅིག་ནས“རྒྱལ་ཁབ་ཀྱི་དོན་དག་ཆེན་པོ”སེམས་ལ་བཅངས་ནས་བློ་བརྟན་འགྱུར་མེད་ཀྱིས་སྐྱེ་ཁམས་དཔལ་ཡོན་གྱི་འཛུགས་སྐྲུན་ལ་སྐུལ་འདེད་གཏོང་དགོས།
     གཉིས་ནས་ཁྱད་ཆོས་ལྡན་པའི་ལེགས་ཆ་བསྐྱང་ནས་བློ་བརྟན་འགྱུར་མེད་གྱིས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།
    གསུམ་ནས་གཅིག་གྱུར་གྱིས་མཐུན་སྦྱོར་བྱེད་པར་མཐོང་ཆེན་བྱས་ཏེ། མཁར་གྲོང་གི་གཞི་གཅིག་འཕེལ་རྒྱས་ལ་བློ་བརྟན་འགྱུར་མེད་ཀྱིས་སྐུལ་འདེད་གཏོང་དགོས།
    བཞི་ནས་དམངས་ཚིས་རྩ་བར་འཛིན་རྒྱུ་འབུར་ཐོན་ཡོང་བ་བྱས་ཏེ་བློ་བརྟན་འགྱུར་མེད་ཀྱིས་སྤུས་ཚད་མཐོ་བའི་འཚོ་བ་བསྐྲུན་དགོས།
    ལྔ་ནས་སྒྱུར་བཅོས་གསར་གཏོད་གཏིང་ཟབ་ཏུ་སྤེལ་བ་དང་། བློ་བརྟན་འགྱུར་མེད་ཀྱིས་ས་ཁོངས་ཆེན་མོ་སྒོ་འབྱེད་མཉམ་ལས་བྱེད་པར་སྐུལ་འདེད་གཏོང་དགོས།
    དྲུག་ནས་འཆམ་མཐུན་བརྟན་ལྷིང་ལ་སྐུལ་འདེད་བཏང་ནས་བློ་བརྟན་འགྱུར་མེད་ཀྱིས་བདེ་འཇགས་འཕེལ་རྒྱས་ཀྱི་ཚད་གཞི་སྲུང་དགོས།     སྙན་ཞུ་ལས། གྲུ་བརྒྱ་ཤུགས་ཀྱིས་རབ་གཅོད་པའི། ། རླབས་གཤགས་མཁན་ནི་དེད་དཔོན་ཡིན། ། གྲུ་གཡོར་བསྒྲེངས་པར་རབ་བྱང་བའི། ། གྲུ་ཤན་པ་ཉིད་ཀུན་ལས་རྒྱལ། ། ང་ཚོས་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མཐའ་འཁོར་དུ་སྔར་བས་མཐུན་སྒྲིལ་དམ་ཟབ་བྱེད་པ་དང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་། ཁུལ་ཨུ་བཅས་ཀྱི་ཡང་དག་པའི་སྣེ་ཁྲིད་དང་། ཁུལ་ཡོངས་ཀྱི་རིགས་སོ་སོའི་མི་དམངས་ལ་བརྟེན་ནས་རྡོག་རྩ་གཅིག་སྒྲིལ་གྱིས་གསར་འབྱེད་ཡར་བརྩོན་བྱས་ཏེ་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་བྱེད་པའི་རྒྱང་བསྐྱོད་ཁྲོད་ཁྱོན་ཡངས་པའི་གུང་ཧོ་གཤོང་ས་ཆེན་པོ་དར་རྒྱས་ཡོང་རྒྱུར་སྐུལ་འདེད་བཏང་ནས་མཚོ་ལྷོའི་མ་འོངས་པ་སྔར་ལས་འོད་སྟོང་ལྡན་པ་ཡོང་བར་བརྩོན་ལེན་བྱ་དགོས་པའི་འབོད་སྐུལ་བཏང་ཡོད།