མཚོ་སྔོན་ཞིང་ཆེན་གྱི་ཁྱིམ་ཚང་སློབ་གསོ་སྐུལ་འདེད་སྲོལ་ཡིག་ཐོག་མ་དེ་ཟླ༦ཚེས༡ཉིན་ནས་ལག་བསྟར་བྱ་རྒྱུ་རེད།

       ཉེ་སྔོན། མཚོ་སྔོན་ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ལྷན་གྱིས་གསར་འགྱུར་ཁྱབ་སྒྲོག་ཚོགས་འདུ་བསྡུས་ཤིང་། ཚོགས་ཐོག་ཏུ་ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ལྷན་ཁྲིམས་ལུགས་ལས་དོན་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ལའེ་ཐིན་དང་། ཞིང་ཆེན་བུད་མེད་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་གཞོན་པ་ཧི་ཧྲེང་ཅའེ་བཅས་ཞུགས་ནས«མཚོ་སྔོན་ཞིང་ཆེན་གྱི་ཁྱིམ་ཚང་སློབ་གསོ་སྐུལ་འདེད་སྲོལ་ཡིག»(གཤམ་དུ«སྲོལ་ཡིག»བསྡུ་རྒྱུ)ད་ལོའི་ཟླ6ཚེས1ཉིན་ནས་ལག་བསྟར་བྱ་རྒྱུ་ཁྱབ་སྒྲོག་བྱས་པ་མ་ཟད། ཁྲིམས་འཛུགས་ཀྱི་རྒྱལ་ལྗོངས་དང་། དོན་སྙིང་། སྤྱི་ཚོགས་ཀྱི་སྙིང་བོ་བཅས་ལ་ཡང་གསལ་འགྲེལ་བརྒྱབ། དེས་མཚོ་སྔོན་གྱི་ཁྱིམ་ཚང་སློབ་གསོ་ཡི་ལས་དོན་དེ་ཁྲིམས་སྐྱོང་ཅན་དང་ཚད་ལྡན་ཅན་དུ་འགྱུར་བའི་དུས་རིམ་གསར་པ་བསླེབས་པ་མཚོན།
       ལའེ་ཐིན་གྱིས“འདི་ནི་མཚོ་སྔོན་ཞིང་ཆེན་གྱིས་ཁྱིམ་ཚང་གི་སློབ་གསོ་ལ་དམིགས་སུ་བཏོན་པའི་ཆེད་སྤྱོད་ཁྲིམས་འཛུགས་ཐོག་མ་ཡིན”ཞེས་ངོ་སྤྲོད་བྱས་བྱུང་། «སྲོལ་ཡིག»དེ་ཧ་ལམ་ལོ་ངོ་གཉིས་རིང་ལ་གཏན་འབེབས་བྱས་ཤིང་། རྒྱུན་ལས་ཨུ་ལྷན་གྱི་གྲོས་ཞིབ་ཐེངས་གསུམ་དང་རྟོག་ཞིབ་བཞུགས་མོལ་ཐེངས20ལྷག་ལ་འཚོགས་པ་དང་། ཚུར་ལན་བསམ་འཆར300ལྷག་འཚོལ་སྡུད་བྱས། ཁྲིམས་འཛུགས་བརྒྱུད་རིམ་ཚང་མ་གོང་ཁྲིམས་ཀྱི་དགོངས་དོན་དང་ས་གནས་ཀྱི་ལག་ལེན་གཉིས་ལེགས་པར་སྦྱར་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁྱིམ་ཚང་གི་སློབ་གསོ་དང་ཁྱིམ་ཚང་གི་ཁྱིམ་སྲོལ་བཟང་པོ་དར་སྤེལ་སྐོར་གྱི་གསུང་བཤད་གལ་ཆེན་དེ་བྱེ་བྲག་གི་དོན་ཚན་ཁག21ལ་བསྒྱུར་བ་དང་། དེ་དང་ཆབས་ཅིག«ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཁྱིམ་ཚང་སློབ་གསོ་སྐུལ་འདེད་བཅའ་ཁྲིམས»སོགས་བཅའ་ཁྲིམས་ཁྲིམས་སྲོལ་བདུན་དང་འབྲེལ་ནས་མཚོ་སྔོན་གྱི་ཁྱད་ཆོས་དང་ལྡན་པའི་དོན་ཚན་ཁག49ཅན་གྱི་ལམ་ལུགས་མ་ལག་ཆགས། ངོ་སྤྲོད་ལྟར་ན། «སྲོལ་ཡིག»ནང་དུ་དངོས་ཡོད་ཀྱི་དཀའ་ངལ་ཆེན་པོ་གསུམ་ཅི་ནུས་ཀྱིས་བསལ་བར་བྱ་རྒྱུ་སྟེ། གྲོང་ཁྱེར་དང་གྲོང་གསེབ་ཀྱི་ཐོན་ཁུངས་དོ་མི་མཉམ་པར་དམིགས་ནས་ནོར་སྲིད་ཀྱི་འགན་སྲུང་ལམ་ལུགས་བཙུགས་ཏེ། ཁྱིམ་ཚང་གི་སློབ་གསོའི་འགྲོ་གྲོན་དེ་ནོར་སྲིད་ཀྱི་སྔོན་རྩིས་ནང་འཇུག་དགོས་པའི་རེ་བ་བཏོན། དམིགས་བསལ་གྱི་ཁྱིམ་ཚང་གི་དགོས་མཁོ་ལ་དམིགས་ཏེ། གཞིས་སྲུང་བྱིས་པ་དང་། ཕ་མ་ཡ་གཅིག་གི་ཁྱིམ་ཚང་སོགས་ལ་རོགས་སྐྱོར་བྱེད་པའི་བྱེད་ཐབས11བཏོན། སློབ་གསོའི་བསམ་བློར་བར་ཁྱད་ཤོར་བར་དམིགས་ཏེ། ཁྱིམ་བདག་གིས“སློབ་གསོའི་ཁྲིད་སྟོན་ཁག་བཅུ”ལག་བསྟར་བྱེད་དགོས་པ་གསལ་འབེབས་བྱས་ནས་ཁྱིམ་ཚང་དུ་གཏུམ་སྤྱོད་སྤེལ་བ་དང་ཕོ་མཆོག་མོ་དམན་གྱི་ལྟ་བ་འཛིན་པར་བཀག་འགོག་བྱ་དགོས་པ་བཏོན་ཡོད།
       «སྲོལ་ཡིག»ནང་ད་དུང“ཏང་ཨུས་མགོ་ཁྲིད་དང་། སྲིད་གཞུང་གིས་གཙོ་ཁྲིད། སྡེ་ཁག་གིས་མཐུན་སྦྱོར། སྤྱི་ཚོགས་ནང་ཞུགས”བཅས་རྩ་བཞིའི་ལས་ཀའི་སྒྲིག་སྲོལ་བཙུགས་ཏེ་དམིགས་སུ་སྲིད་གཞུང་གི་འགན་སྲུང་དང་འགན་ནུས་ཇེ་དྲག་ཏུ་བཏང་ཡོད་པ་ནི། གྲོང་ཁྱེར་དང་གྲོང་གསེབ་ཀྱི་ཁྱིམ་ཚང་སློབ་གསོའི་ཁྲིད་སྟོན་གྱི་ཞབས་ཞུ་མ་ལག་བཙུགས་ཏེ། 2026ལོའི་སྔོན་ལ་རྫོང་རིམ་པའི་ཁྱིམ་ཚང་སློབ་གསོ་ཁྲིད་སྟོན་ལྟེ་གནས་ཡོངས་ལ་ཁེབས་པ་མངོན་འགྱུར་བྱ་དགོས་པའི་བླང་བྱ་བཏོན། ཆེད་ལས་ཅན་གྱི་འཇོན་མི་དཔུང་སྡེ་སྒྲིག་འཛུགས་བྱས་ཏེ། ལོ་གསུམ་ནང་དུ་ཁྱིམ་ཚང་སློབ་གསོའི་ཁྲིད་སྟོན་པ་ཁྲི་གཅིག་ལ་ཟབ་སྦྱོང་བྱ་དགོས། ཆེད་དོན་ཐེབས་རྩ་བཙུགས་ཏེ་དམིགས་བསལ་གྱི་བྱས་རྗེས་འཇོག་མཁན་ལ་གཟེངས་རྟགས་གནང་ནས་ཡར་སྐུལ་བྱ་རྒྱུ་སོགས་བསྟན་ཡོད།
       ཁྱིམ་ཚང་དང་སློར་གྲྭ་མཉམ་འབྲེལ་གྱི་གལ་གནད་ཆེན་པོའི་ཕྱོགས་ནས་ཧི་ཧྲེང་ཅའེ་ཡིས་འདི་སྐད། «སྲོལ་ཡིག»ནང་བྱེད་པོ་ཟུང་གི་མཉམ་འབྲེལ་སྒྲིག་སྲོལ་གསར་པ་ཞིག་བཙུགས་ཡོད་པ་ནི། སློབ་གྲྭས་ངེས་པར་དུ་ཁྱིམ་ཚང་སློབ་གསོ་དེ་སློབ་གསོའི་དཔྱད་ཞིབ་ནང་བཅུག་ནས་སློབ་སྐབས་རེར་ཉུང་མཐའ་ཡང་ཁྱིམ་ཚང་སློབ་གསོར་ཁྲིད་སྟོན་གྱི་བྱེད་སྒོ་ཐེངས་བཞི་སྤེལ་དགོས། སྲིད་གཞུང་གིས་ཁྱིམ་ཚང་སློབ་གསོ་ཆ་འཕྲིན་ཅན་གྱི་འཕྲིན་སྟེགས་བཙུགས་ཏེ། ལས་ཁུངས200ལྷག་གི་ཐོན་ཁུངས་གཅིག་ཏུ་བསྡུས་ནས་སྐར་མ15རིང་གི་ཁྱིམ་ཚང་སློབ་གསོ་ཞབས་ཞུ་ཚོགས་པ་གཟུག་དགོས། སློབ་རའི་བརྙས་བཅོས་ལ་སོགས་ཚ་གནད་ལ་དམིགས་ཏེ། སློབ་གྲྭས་རིམ་བགོས་ཐེ་གཏོགས་ཀྱི་སྒྲིག་སྲོལ་གསལ་བོར་བཙུགས་ནས་ཁྱིམ་བདག་དང་མཉམ་དུ་སློབ་གསོ་བཏང་ནས་སྐྱོན་སེལ་དགོས་པ་བཅས་རེད།
       «སྲོལ་ཡིག»ནང་མི་རིགས་ས་ཁུལ་གྱི་བཅོས་སྐྱོང་ཐབས་ཤེས་བཀོལ་ཏེ། རྒྱལ་ཡོངས་ནས་འདུ་ཤེས་ཟུང་གི་སློབ་གསོ་དོན་ཚན་ཐོག་མར་གསར་དུ་བཏོད་པ་ནི། ཁྱིམ་བདག་གིས་བུ་ཕྲུག་ལ་རྒྱལ་ཁབ་ཀྱི་འདུ་ཤེས་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཡོད་པ་ཞིག་སྐྱེད་སྲིང་བྱེད་དགོས་པ་མ་ཟད། སྐྱེ་ཁམས་དཔལ་ཡོན་ཐད་ཀྱི་སློབ་གསོ་ལ་ཤུགས་སྣོན་དགོས། མཚོ་བོད་མཐོ་སྒང་གི་སྐྱེ་ཁམས་གོ་གནས་ལ་དམིགས་ཏེ། སྐྱེ་ཁམས་སྲོལ་བཟང་གི་ལེའུ་ཆེད་དུ་བཀོད་སྒྲིག་བརྒྱབ་ནས་ཁྱིམ་བདག་གིས་ལོ་ན་མ་སོན་པའི་བུ་ཕྲུག་གིས་ལྗང་མདོག་འཕེལ་རྒྱས་ཀྱི་བསམ་བློ་འདུ་ཤེས་རྒྱུད་ལ་འབྱོར་བར་ཁྲིད་སྟོན་དང་། ཁོར་ཡུག་སྲུང་སྐྱོབ་ཀྱི་ལག་ལེན་ཁྲོད་ཞུསག་སུ་འཇུག་དགོས་པ་གཏན་འཁེལ་བྱས།
       ལའེ་ཐིན་གྱིས་སྲོལ་ཡིག་འདི་ནི་ཁྲིམས་སྐྱོང་ལས་གཞི་ཞིག་ཡིན་ལ། དམངས་ཚིས་ལས་གཞི་ཞིག་ཀྱང་ཡིན་ཞེས་ནན་བཤད་བྱས་བྱུང་། «སྲོལ་ཡིག»གིས་བཙན་ཤེད་སྙན་ཞུ་དང་། ཡིད་རྟོན་ཡར་སྐུལ་ལ་སོགས་ལམ་ལུགས་ཁག8བཙུགས་པ་བརྒྱུད་དེ། ཁྱིམ་ཚང་སློབ་གསོ་དེ་གཅུན་སྡོམ་མཉེན་པོ་ནས་རེ་བ་མཁྲེགས་པོ་རུ་བསྒྱུར་རྒྱུ་རེད། «སྲོལ་ཡིག»འདི་ལག་བསྟར་བྱས་པ་དང་བསྟུན་ནས་མཚོ་སྔོན་གྱི་ཁྱིམ་ཚང་སློབ་གསོ་དེ་ཁྲིམས་སྐྱོང་གིས་སྲུང་སྐྱེལ་བྱེད་པའི་ལེའུ་གསར་པ་ཞིག་དབུ་བརྩམ་རྒྱུའོ། །