མཚོ་སྔོན་གཅན་ཚར་སྲོལ་རྒྱུན་མདའ་རྩེད་བྱེད་སྒོ་ཆེན་པོ་གཉེར་བ།

       ཟླ9པའི་ཚེས5ཉིན2025ལོའི་གཡང་མདའ་རྟགས་མའི་རྒྱལ་སྤྱིའི་མི་རིགས་སྲོལ་རྒྱུན་མདའ་འཕེན་གདན་ཞུ་འགྲན་བསྡུར་དང་མདའ་སྟོན་རིག་གནས་བྱེད་སྒོ་སྐབས་བརྒྱད་པ་དེ་མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་གཅན་ཚ་རྫོང་གི་གཡང་མདའ་ལུས་རྩལ་ཐང་དུ་འགོ་ཚུགས་ཡོད་པ་རེད།

       ཐེངས་འདིའི་བྱེད་སྒོ་དེ་ཟླ9པའི་ཚེས9ཉིན་བར་རྒྱུན་མཐུད་བྱ་རྒྱུ་དང་། རྒྱལ་ཁབ་དང་ས་ཁུལ25དང་དེ་བཞིན་ཞིང་ཆེན་ཕྱི་ནང་གི་འགྲན་བསྡུར་རུ་ཁག145ཡི་ལུས་རྩལ་པ2300གཅན་ཚར་མཉམ་འཛོམས་བྱུང་ཡོད། འགྲན་བསྡུར་པ་ཚོས་སྲོལ་རྒྱུན་གྱི་རྭ་གཞུ་དང་གཞུ་ལེབ། གཞུ་འཁོར་ལོ་མ། སྲོལ་རྒྱུན་གྱི་གཞུ་བཅས་རྣམ་གྲངས་ཆེན་པོ་བཞིའི་ཁྲོད་འགྲན་རྩོད་ཛ་དྲག་བྱས་ཡོད་པ་རེད། འགྲན་བསྡུར་རིང་གཅན་ཚ་རྫོང་གིས་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རྣམ་གྲངས་མདའ་སྟོན་དང་དེ་བཞིན་ཁྲོམ་གཞུང་སྐོར་སྐྱོད་འཁྲབ་སྟོན། གཡང་མདའ་རོལ་དབྱངས་དུས་ཆེན།  སྣམ་བུའི་ཤོམ་ལྭ། ལ་གཞས་འགྲན་བསྡུར། གཅན་ཚའི་སྐོར་བྲོ་སོགས་ཁྱད་ལྡན་བྱེད་སྒོ་རབ་དང་རིམ་པ་སྤེལ་ཡོད་པ་རེད། 

       གཅན་ཚ་རྫོང་ནི་མི་རིགས་ཀྱི་སྲོལ་རྒྱུན་མདའ་འཕེན་ལུས་རྩལ་གྱི་ཕ་ས་དང་གཡང་མདའ་ཞེས་པའི་རིག་གནས་སྒྱུ་རྩལ་གྱི་འབྱུང་གནས་ཡིན། 2007ལོར་འགྲན་བསྡུར་སྐབས་དང་པོ་གཉེར་བ་ནས་ལོ18རིང་འཕེལ་རྒྱས་གཏིང་ཟབ་བཏང་བ་བརྒྱུད། འགྲན་བསྡུར་དེ་ནི་མི་རིགས་རིག་གནས་རྒྱུན་འཛིན་དང་ལུས་རྩལ་སྙིང་སྟོབས་དར་སྤེལ། སྤེལ་རེས་མཉམ་ལས་ལ་སྐུལ་འདེད་གཏོང་བ་བཅས་ཀྱི་སྟེགས་བུ་གལ་ཆེན་ཞིག་ཏུ་རིམ་འཕར་བྱུང་སྟེ། གཅན་ཚའི་མིང་དོན་མཚུངས་པའི་གསེར་གྱི་མིང་བྱང་དང་ཐོན་ལས་འཕེལ་རྒྱས་ཀྱི་སྒུལ་ཤུགས་ལྟ་བུ་ཞིག་ཏུ་གྱུར་ཡོད།

       ཐེངས་འདིའི་བྱེད་སྒོ་འདིས་མདའ་རྩེད་བརྒྱུད་དེ་གཅན་ཚ་རྫོང་གྱིས་རིག་གནས་དང་ལུས་རྩལ།  ཞིང་ལས། ཡུལ་སྐོར། ཚོང་ལས་བཅས་ལས་རིགས་ལྔ་མཉམ་འདྲེས་ལ་སྐུལ་འདེད་གཏིང་ཟབ་གཏོང་རྒྱུར་རོགས་རམ་བྱས་ཏེ་རྨ་ཆུའི་འབྱུང་ཁམས་རིག་གནས་ཡུལ་སྐོར་མཉམ་འདྲེས་འཕེལ་རྒྱས་ཀྱི་དཔེ་སྟོན་ཁུལ་དང་ས་མཐོའི་བདེ་ཐང་གསོ་སྐྱོང་རྟེན་གཞི་ནུས་ཤུགས་ཡོད་རྒུས་བསྐྲུན་ནས“རྒྱུད་གཅིག་ཡུལ་ལྔའི”རྣམ་པ་གསར་པ་འཛུགས་རྒྱུ་རེད།