བོད་ཆེན་པོའི༼༡༽སྲིད་ལུགས་དང་འབྲེལ་བའི་རྒྱལ་རབས་དེབ་ཐེར་དཀར་བོ༼༢༽ཞེས་བྱ་བ་བཞུགས་སོ།།

      བློན་ཆེན་རྣམས་ཀྱང་ཕལ་ཆེར་རྒྱལ་པོའི་ཆས་འདྲ་བ་དང་། དམག་དཔོན་རྣམས་སྟག་ལྤགས་གྱོན་པ་སོགས་འོག་གི་རྒྱལ་རབས་ཀྱི་ཞལ་ལ་གསལ། གཟིམ་འགག ༼༩༣༽ ཚོས་འཁྱེར་བའི་འབོག་ལྕག ༼༩༤༽ གམ། སྟག་གི་ཐོག་བུ་བྱ་བ་འདི་ཡང་ཁྲི་སྲོང་གི་དུས་སུ་དཔའ་བོ་རྣམས་ལ་བསྩལ་བའི་ཆས་སུ་གྲགས། འབངས་བྱིངས་ནི་འབྲོག་སྡེའི་རྣམ་པར་ཡོད་ལ། ཁྱིམ་རེ་རེ་བཞིན་གྱི་སྒོ་སྟེང་དུ་དར་མདུང་རེ་སློང་བ་འདི་ཡང་བོད་ཀྱི་ཐུན་མོང་མ་ཡིན་པའི་སྲོལ་ལྟ་བུ་ཡིན་ཏེ། དེ་ཡང་ཐོག་མར་དམག་གི་རྟགས་སུ་མངོན་ལ། རྗེས་སོར་ཆོས་ཀྱི་ལས་སུ་སོང་བས། སྟོད་ན་རྒྱ་གར་དང་འདྲེས་པའི་བོད་རིགས་རྣམས་ནས། སྨད་ན་རྒྱ་ནག་གི་གྲོང་དཀྱིལ་དུ་ཡོད་པའི་བོད་ཀྱི་མི་ཁྱིམ་གཅིག་ཡིན་ཡང་རུང་། སྒོ་སྟེང་དུ་དར་ལྕོག ༼༩༥༽ སློང་བའི་སྲོལ་དེ་ད་ལྟའི་བར་དུ་ཡོད། ཡུལ་མིའི་ཆས་དང་སྲོལ་ལུགས་གཞན་ནི་བྱང་མཐའ་དང་ལྷོ་མཐའི་ལུང་ཁུག་འགོལ་བོ ༼༩༦༽ དག་ན། ད་ལྟ་ཡང་སྔོན་གྱི་མིའི་སྐུ་བརྙན་གསོན་པོ་མང་དུ་བཞུགས་འདུག་པ་དེ་དག་ལ་དངོས་སུ་མཇལ་བས་ཤེས། ཡུལ་གྱི་ལྷ་དང་སྔོན་གྱི་མི་གཉིས་དཔེ་སྦྱར་ནས་དཔྱད་པ་བྱས་པ་འདི་འདྲ་ལ། མང་བོ་དག་བྱིས་པའི་རིགས་པ་ལྟ་བུར་སེམས་ངེས་མོད་ཀྱི། རྒྱ་གར་གྱི་གང་གཱའི་ལྷ་མོས ༼༩༧༽ རྐང་གདུབ་གྱོན་པ་ནས། ཨ་མདོའི་རྨ་རྒྱལ་སྤོམ་རས ༼༩༨༽ ཕྱིང་ཞྭ། རྒྱ་ནག་གི་ཀོན་ཡིན་ཕུ་སཱས ༼༩༩༽ བེར་སྔོན་གྱོན་པའི་བར་ཞིབ་ཏུ་ལྟོས་དང་། ཡུལ་མིའི་ཆ་ལུགས་སུ་བྱས་མ་བྱས་མངོན་སུམ་དུ་མཐོང་པར་འགྱུར་རོ། །
དུས་གསུམ་རྗེན་པར་གཟིགས་པའི་མངོན་ཤེས ༼༡༠༠༽ དང་།
རློམ་པའི་འོལ་ཚོད ༼༡༠༡༽ སྨྲ་བའི་སྤོབས་པ་གཉིས། །
གང་ལ་མེད་པའི་ཉམས་ཆུང་ང་འདྲ་དག །
ལྐོག་གྱུར ༼༡༠༢༽ ཡུལ་ལ་དཔྱོད་ཚུལ་འདི་ཙམ་ཉིད། །
ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །
ལི་ཡུལ་བོད་ཀྱི་འབངས་སུ་ཚུད་དོ་བྱ་བའི་ལི་ཡུལ་དེ་ཕྱོགས་གར་ཡོད་སོགས་ཀྱང་བར་སྐབས་སུ་ཐམས་ཅད་ཀྱིས་བརྗེད་པ་ལྟར་གྱུར་ཏེ། ལོ་ངོ་བརྒྱ་ཕྲག་དུ་མ་སོང་ཞིང་། དེའི་བར་ལ་འགའ་ཞིག་གིས་འོལ་ཚོད་བྱས་ཏེ། བལ་ཡུལ་དང་ལི་ཡུལ་དོན་གཅིག་པར་བྱས་ནས། གླང་རུ་ལུང་བསྟན ༼༡༠༣༽ གྱི་གནས་ཐམས་ཅད་ཀྱང་དེ་ཕྱོགས་སུ་ངོས་འཛིན་པ་སོགས་བྱས་སོ། །དེ་ནས་ལོ་ཙཱ་བ་ཤམ་བྷ་ལ་པའི་ཞལ་ནས། དིང་སང་བོད་ན་ལི་ཡུལ་ངོས་ཟིན་མཁན་རེད་མདའ་པ༼༡༠༤༽དང་ངེད་གཉིས་ལས་མེད་ཅེས་གསུངས་པར་གྲགས་པ་ཡང་ཕལ་ཆེར་དོན་ལ་གནས་པ་ཡིན་ལ། བལ་ཡུལ་དང་ལི་ཡུལ་མི་གཅིག་པ་ནི་གྲོ་ལུང་པས༼༡༠༥༽། རྒྱ་གར་ཤར་ནུབ་ལི་དང་བལ་པོའི་ཡུལ། །ཞེས་དེ་གཉིས་ཡུལ་སོ་སོར་གསུངས་པས་ཀྱང་ཤེས་ལ། བཅོམ་ལྡན་རིག་རལ༼༡༠༦༽གྱིས་ཀྱང་། ས་ནུས༼༡༠༧༽བཟུང་བའི་ལི་ཡུལ་དེ། །རྒྱ་བོད་མཚམས་ཀྱི་བལ་པོ་མིན། །ཞེས་ཤིན་ཏུ་གསལ་བར་གསུངས་སོ། །དེས་ན་ལི་ཡུལ་དེ་ནི་བོད་ཀྱི་བྱང་རྒྱབ་དང་། ཨུ་རུ་སུའི་ལྷོ་མཐར་ཆགས་པའི་ཡུལ། རྒྱ་གར་སྐད་དུ་ཀཾ་ས་དེ་ཤ ཡུལ་གཞན་དུ་ཏུར་ཀི་སྠཱན་དང་། རྒྱ་ནག་པས་སིན་ཇང་དུ་འབོད་པ་འདི་ཡིན་ཏེ། འདིའི་ཤར་མཐའ་མཚོ་སྔོན་པོའི་བྱང་རྒྱབ་དང་འབྲེལ་ཞིང་། ནུབ་ཀྱི་མཐའ་ནི་མངའ་རིས་བླ་དྭགས་ཕྱོགས་དང་ཚོང་འགྲུལ་ཡོད་པའི་ཡར་ཀན་བྱ་བ་དེ་ཡིན་ལ། སྔར་ཕྱོགས་འདིར་བསྟན་པ་རྒྱ་ཆེར་དར་བ་ལས། སྲོང་བཙན་གྱི་སྐུ་དུས་ཙམ་ན་ཆོས་བསྣུབས་ཏེ། དགེ་སློང་རྣམས་བོད་དང་རྒྱ་གར་དུ་བྲོས། དེ་ནས་བཟུང་ཀླ་ཀློའི༼༡༠༨༽རྒྱལ་ཁམས་ལྟེ་བ་ལྟ་བུར་གྱུར་ཏེ་ཡོད་ཅིང་། ད་དུང་ཡང་གོ་ཤྲངྒ་གླང་རུའི་གཙུག་ལག་ཁང་གི་ཤུལ་དང་། གཞན་ཡང་མཆོད་རྟེན་ཞིག་པོ་དང་སྔོན་གྱི་དགོན་རོ་ཤིན་ཏུ་མང་བ་ཡོད་འདུག ཡུལ་འདིའི་མི་རིགས་རྣམས་སོག་རྒྱུད་ཡིན་པས། ཀུན་མཁྱེན་ཀློང་ཆེན་པས༼༡༠༩༽། ལྕང་རྭ་སྨུག་པོ་ལ་སོགས་པའི་སོག་ཡུལ༼༡༡༠༽ཅེས་གསུངས་པ་ཡིན། ཡུལ་འདི་ལ་མདོ་སྨད་པ་རྣམས་ཡུལ་ལི་ཞེས་འབོད་པ་ཡང་། དོན་ལ་ལི་ཡུལ་བྱ་བའི་ཚིག་མགོ་མཇུག་ལྡོག་པའམ། ཡང་ན་རྒྱ་གར་ཡུལ་བྱ་བ་ལ་སྐབས་འགར་ཡུལ་རྒྱ་གར་ཞེས་བརྗོད་པ་དང་འདྲ། ཡུལ་འདི་ནི་བོད་ལས་ཤིན་ཏུ་ཁད་རིང་བའི་རྒྱུ་མཚན་གྱིས། སྔར་བོད་འབངས་སུ་འདུས་སོ་བྱ་བ་ཡང་ཡིད་ཆེས་དཀའ་བ་ཙམ་ཡིན་མོད། དགྲ་བཅོམ་དགེ་འདུན་འཕེལ་གྱི་ལི་ཡུལ་ལུང་བསྟན་དུ་ཡང་གསུངས་ཏེ། དེ་ལ་མང་བོ་ཞིག་ནི་བོད་ཀྱི་རྒྱལ་པོས་འཛིན་པར་འགྱུར་རོ། །ཞེས་དང་། གླང་རུ་ལུང་བསྟན་གྱི་མདོ་ལས་ཀྱང་། མ་འོངས་པ་ན་ལས་ཀྱི་དབང་གིས་ཡུལ་འདིར་བོད་དང་སུམ་བྷའི ༼༡༡༡༽ དམག་རྣམས་ཀྱང་འོང་བར་འགྱུར་ཏེ། སོགས་གསུངས་སོ། །སུམ་བྷ་དེ་སྔར་བོད་ཁོངས་ཀྱི་རྒྱལ་ཕྲན་ཞིག་གི་ས་ཡིན་པ་ལ། ཁོང་ཚོའི་རིགས་དེ་དིང་སང་ཨ་མདོའི་ཁྲོད་དུ་འདྲེས་ནས་ཡོད།
      གཞན་ཡང་སྔ་རྟགས་འཁྲུལ་མེད་ལྟ་བུར། ཉེ་དུས་འདིར་ཡུལ་དེའི་བྱེ་མའི་གསེབ་ནས་བོད་ཀྱི་རྫོང་གོག ༼༡༡༢༽ མང་པོའི་ཤུལ་གསར་དུ་རྙེད་པ་ལས། སྔ་མའི་བོད་ཀྱི་ཡོ་བྱད་སྣ་ཚོགས་དང་། ཡུལ་མི་ལས་ཁྲལ་བསྡུས་པའི་བྱང་བུ ༼༡༡༣༽ ཆེ་ཆུང་དུ་མ། དམག་དཔོན་སོགས་ཀྱིས་ཕན་ཚུན་བཏང་བའི་ཡི་གེ་ལ་སོགས་པ་ཆེས་མང་བོ་ཞིག་ཐོན་ནས། རྒྱལ་ཁབ་དུ་མར་ཁྱེར་ཏེ་སྔོན་གྱི་ལོ་རྒྱུས་དཔྱོད་པའི་མཁས་པ་ཐམས་ཅད་ཀྱང་ཡིད་ཆེས་པ་ཡིན་ནོ། །འོག་ཏུ་བཀོད་པའི་རྒྱལ་རབས་ཀྱི་དུམ་བུ་དང་པོ་གཉིས་ཀྱང་ཕྱོགས་དེ་ནས་རྙེད་པའི་ཡིག་རིགས་ཀྱི་གྲས་ཡིན་ལ། སྔ་མོའི་ལྷ་ཁང་ཞིག་གི་འདག་ཞལ་གྱི་ལྡེབ་རིས་ཡོངས་རྫོགས་བཀོག་སྟེ། རྒྱ་གར་དུ་འཁྱེར་ནས་ད་ལྟ་རྒྱལ་ས་དྷི་ལི་ན་ཡོད་ཅིང་། དེ་ནས་རྙེད་པའི་དངོས་ཆས་གཞན་མང་པོ་ཞིག་ཀྱང་དེར་ཡོད། རུས་དུམ་དང་བྱང་བུ་སོགས་ལ་ཁྲལ་བསྡུས་པའི་ཐོ་བཀོད་པ་དེ་དག་ཀྱང་ཆེས་གནའ་དུས་ཀྱི་བརྡ་རྙིང་འབའ་ཞིག་ཏུ་བྲིས་པ་དཔེར་ན།
      རྩང་ནན་ཡམ་གསུམ་དང་རན་ཁུར་གཅིག ཆང་བྲེ་གསུམ་དང་རྩྭ་ཁུར་གཅིག བྱ་བ་སོགས་སྣང་། བློན་ཆེན་དང་དམག་དཔོན་ལ་སྙན་འབུལ་གྱི་བཀའ་ལན་གཉིས་ཙམ་ཞིག་ཀྱང་འདིར་དཔེར་མཚོན་དུ་བཀོད་ན། ཨང་༡ ཕོ་བྲང་ལྡན་ཀར ༼༡༡༤༽ ནས། འབྲུག་གྀ་ལོའྀ་དགུན་ཟླ་འབྲིང་པོའི་ངོ་ལ། བཀྱེའི་ཕྱག་རྒྱ་ཕོག་སྟེ། ཤ་ཅུའི ༼༡༡༥༽ རྩེ་རྗེ་ལ་མཆིད་སྩལ་པའ། རྒྱ་ཤ་ཅུ་བའི་འབངས་རྣམས་ཀྱིས་གསོལ་པའ། ཕོ་བྲང་དང་ཁྲོམ་ཆེན་པོར། ལོ་ཐང་དུ་ཤ་ཅུ་ནས། སྤྱན་གཟིགས་ཏོང་ལྀ། དགུང་ལོ་རེ་རེ་ཞིང་། ལན་རེ་ཙམ་ཞིག་རྫོང་བའ། བླའྀ་ལྡུམ་ར་ཁ་དུ་མ་ཞིག་མངའ་བའི་ཐོག་གིས་ལྷག་པར་ཡང་འཚལ་ཏེ། རྗེ་བློན་འཕྲུལ་གྱྀ་བཀའ་དྲིན་ལ། བདག་ཅག་ལྷོ་བལ་མགོ་མཐོ་མཐོས་ཀྱང་། སྒོ་སྒོར་ལྡུམ་ར་རེ་རེ་ཙམ་བསྐྲུན་པའི་ཐོག ལོ་ཐང་བླ་སྐྱེས་ཡེ་མ་བྱུང་བར་རྩེ་རྗེ་དག་གིས་རྟག་ཏུ་ར་མར་གནོན་ཅིང་ཕྲོགས་པ་སྙམས་ལས་འཆད་ཅིང་མཆིས་ན། སླན་ཆད་འབངས་ཀྱི་ལྡུམ་ར་འཕྲོག་ཅིང་འཚེར་མྱི་གནང་བར། ནོན་ཐུར་གྱྀ་ཕྱག་རྒྱ་ཅི་གནང་ཞེས་གསོལ་བ་ལས། འདི་བཞིན་དུ་ཕྱག་རྒྱ་སྩོལ་ཅིག་ཅེས། ཞང་བློན་ཆེན་པོའི་མཆིད། བློན་ཁྲོམ་བཞེར་དང་། བློན་ལྷ་བཟང་གསལ་མཐོང་གི་སུག་རྒྱ་འོག་ནས་གཏད་ཀྱིས། ཕྱག་རྒྱ་ལས་འབྱུང་བ་བཞིན་འཚོལ་ཅིག༼མཆན༽ ཅེས་པའོ། །

མཆན། བཀའ་རྒྱ་དེའི་གཤམ་དུ་འཁོད་པའི་སུག་རྒྱའམ་ཕྱག་རྒྱའི་རི་མོ།

      དེ་ལ་ཕོ་བྲང་ལྡན་ཀར་ནི། སྟོང་ཐང་ལྡན་དཀར་བྱ་བའི་ཕོ་བྲང་བཀའ་འགྱུར་གྱི་དཀར་ཆག་ཐོག་མར་འབྲི་ས་དེ་ཡིན་པར་སེམས། ཤ་ཅུ་ནི་ལི་ཡུལ་མཐོང་ཁྱབ ༼༡༡༦༽ ཀྱི་ནང་ཚན་སྡེ་གཅིག་གི་མིང་དུ་སྣང་། རྩེ་རྗེ་ནི་ཡུལ་དེའི་བློན་ནམ་རྫོང་དཔོན་དུ་འདུག ཁྲོམ་ཆེན་པོ་ནི་དམག་དཔོན་དང་། ལོ་ཐང་བླ་སྐྱེས་ནི་ལོ་དུས་ཀྱི་ཁྲལ་དང་གོང་དུ་འབུལ་རྒྱུའི་སྐྱེས་ཏེ་འདུལ་བ་ན་ཐ་སྙད་ཡོད་པ་དེ་ཡིན། ཏོང་ལི་ནི་ཤིང་འབྲས་ཤིག་གི་མིང་ཡིན་ནམ་སྙམ། རྗེ་བློན་འཕྲུལ་ནི་འཕྲུལ་གྱི་རྗེ་བློན་ཏེ་སྤྲུལ་བའི་རྒྱལ་བློན་བྱ་བ་དང་དོན་གཅིག བདག་ཅག་ལྷོ་བལ་བྱ་བ་འདི། ལི་ཡུལ་མཐོང་ཁྱབ་དུ་བལ་པོའི་རིགས་ཀྱི་སྡེ་ཞིག་ཡོད་དམ་སྙམ་སྟེ། སྔར་བོད་ཀྱིས་བླངས་པའི་ཡུལ་འགའ་ཞིག་གི་མི་རྣམས་ས་གཞན་དུ་སྤོར་བཅུག་པར་འདུག་ཅིང་། བྱང་གི་གྲུ་གུ་རྣམས་ཕམ་ཚེ། གྲུ་གུའི་མི་རྣམས་ལྷོ་མོན་གྱི་ཡུལ ༼༡༡༧༽ དུ་སྤོར་བཅུག་པ་ཐང་ཡིག་ཏུ་ཡང་གསལ་བ་བཞིན། བལ་པོ་མང་པོ་ཞིག་ཀྱང་ལི་ཡུལ་དུ་སྤོར་བཅུག་པ་ཡིན་ནམ་སྙམ།
      དེ་ན་གོང་གི་བཀའ་གཙིགས་དེའི་དོན་ཅུང་ཟད་གསལ་བར་བསྒྱུར་ན་འདི་ལྟར། ཕོ་བྲང་ལྡན་དཀར་ནས། འབྲུག་ལོའི་དགུན་ཟླ་འབྲིང་པོར་གནང་བའི་བཀའ་རྒྱ་ཕབ་སྟེ། ཤ་ཅུའི་རྩེ་རྗེ་ལ་བཀའ་བསྩལ་བ་ནི། ཤ་ཅུའི་འབངས་རྣམས་ཀྱིས་ཞུས་པར། ཕོ་བྲང་དང་དམག་དཔོན་ཆེན་པོ་ལ། ལོ་རེ་རེ་བཞིན། སྤྱན་གཟིགས་ཀྱི་ཏོང་ལི་ལན་རེ་འབུལ་སྲོལ་ཡོད་པར། རྒྱལ་པོའི་ལྡུམ་ར་ཁ་མང་པོ་ཡོད་པའི་འབབ་ཀྱི་སྟེང་ནས་འབུལ་རྒྱུ་འདང་བར་མ་ཟད་ལྷག་པར་ཡང་གྱུར་ལ། སྤྲུལ་བའི་རྒྱལ་བློན་གྱི་སྐུ་དྲིན་ལས། བདག་ཅག་ལྷོ་བལ་ཉམ་དྲག་པ་ཚོས་ཀྱང་ཁྱིམ་རེ་བཞིན་ལྡུམ་རྭ་རེ་རེ་བསྐྱིལ་བར། ལོ་དུས་ཀྱི་ཁྲལ་མ་བྱུང་བར་བརྟེན། ཤ་ཅུའི་རྩེ་རྗེ་དག་ནས་རྟག་ཏུ་དབང་གནོན་བྱེད་ཅིང་འཕྲོག་སྙམ་ནས་བརྗོད་ཀྱིན་འདུག་པས། ཕྱིན་ཆད་འབངས་ཀྱི་ལྡུམ་རྭ་འཕྲོག་ཅིང་གནོད་འཚེ་མི་བྱེད་པར། ནན་ཏན་ཅན་གྱི་བཀའ་རྒྱ་ཞིག་གནང་བར་ཞུས་པ་དེ་བཞིན་བཀའ་རྒྱ་སྩོལ་ཅིག་ཅེས། ཞང་བློན་ཆེན་པོའི་བཀའ། བློན་ཁྲོམ་བཞེར་དང་ལྷ་བཟང་གསལ་མཐོང་གི་སུག་རྒྱས་མནན་ཏེ་བཏང་བས། བཀའ་རྒྱ་ལས་ཅི་ལྟར་འབྱུང་བ་བཞིན་གྱིས་ཤིག ། བྱ་བའོ། །
      ཨང༢བློན་ཆེན་པོས། འདུན་ས་ལོང་ཅུ༼༡༡༨༽ ནས། ཕག་གྀ་ལོའི་དཔྱིད་བཀྱེའི་ཕྱག་རྒྱ་ཕོག་སྟེ། རྒྱ་སྡེ་གཉིས༼༡༡༩༽ ཀྱི་དཔོན་སྣས་གསོལད་པ། རྒྱ་ཤ་ཆུ་བའི་བུ་སྲིང་ལས། སྔོན་ཆད། བོད་སུམ་དང་། ཞང་བློན་ཡ་ཡ་ནས། མཆིས་བྲང ༼༡༢༠༽དུ་འཚལ་པ་སྐད་དུ། བསྙད་བཏགས༼༡༢༡༽ ནས་འཚལ་ཏེ། བྲན་དུ་བགྱིས་པ་ཡང་མང་། རྒྱལ་འབངས་ལས་བླ་ཐབས་ཀྱིས་གསོལད་ཏེ། འདི་འདྲ་བར་འཕྲོག་པ་ཙམ་ཞིག་མཐོང་ཁྱབ་ཀྱི་བུ་སྲིང་ལྟ་བུ། གཞན་དུ་གཉེན་མཚལ་དུ་མྱི་གནང་བ་དང་སྦྱར་ཞིང་། ཁྲི་སྡེའི་ནང་དུ་དགའ་གཅེན་འཚལ་བར། །གཏད་དུ་ཅི་གནང་ཞེས་གསོལ་ལོ། །བུ་བཟངས་ལྟ་བུར་ཕྱག་རྒྱ་དང་གཏད་ཐོགས་ཏེ། སྤུས་འཛིན་དུ་ནི་མྱི་གནང་། དགའ་གཉེན་འཚལ་བར་གནང་སྟེ། ཕྱག་རྒྱ་འཆང་དུ་སྩལད་བའ། ༼མཆན༽ ཞེས་པའོ། །

མཆན། བཀའ་རྒྱ་དེའི་གཤམ་དུ་འཁོད་པའི་སུག་རྒྱའམ་ཕྱག་རྒྱའི་རི་མོ།

      དེ་ལ་བུ་སྲིང་ནི་བུ་མོ་སྲིང་མོ་བྱ་བ་སྟེ། མཚོ་སྔོན་པོའི་ཕལ་སྐད་དུ་བུད་མེད་སྤྱིའི་མིང་ལ་བུ་སྲིང་མར་འབོད། བུ་བཟངས་བྱ་བ་ནི། ཡ་མེད་དམ་ཁྲེལ་མེད་ལ་ཟེར། གཏད་ནི་བཀའ་གཏད་བྱ་བ་སྟེ་བཀའ་ཤོག་གནང་བའི་དོན་ནོ། །
      དེས་ན་དོན་འདི་ལྟར། མདུན་ས་ལོང་ཅུ་ནས། བློན་ཆེན་པོས་ཕག་ལོའི་དཔྱིད་ལ་གནང་བའི་བཀའ་རྒྱ་ཕབ་པ། རྒྱ་སྡེ་གཉིས་ཀྱིས་དཔོན་སྣ་དག་གིས་ཞུ་འབུལ་དུ། སྔར་བོད་སུམ་དང་། ཞང་བློན་ཡ་ཡ་གཉིས་ནས། རྒྱ་ཤ་ཅུ་པའི་བུ་མོ་རྣམས། ཆུང་མར་ལེན་སྐད་དུ་བྱས་ནས་སྙད་བཏགས་ཏེ་འཁྱེར་ཞིང་། དོན་ལ་གཡོག་མོར་བྱས་པ་ཡང་མང་དུ་བྱུང་། རྒྱལ་པོའི་འབངས་ལས་བཙན་ཐབས་ཀྱིས་ཁྱེར་ཏེ། འདི་ལྟར་འཕྲོག་པ་ནི་སྲོལ་མེད་པ་ཙམ་ལགས་ན། ད་ཕན་ཆད་མཐོང་ཁྱབ་ཀྱི་བུ་སྲིང་མ་འདྲ་ཡིན་ཕྱིན། གཞན་ལ་བག་མར་མི་གཏོང་བའི་ཁྲིམས་སྦྱར་ཞིང་། མཐོང་ཁྱབ་ཁྲི་སྡེའི་ནང་དུ་རང་མོས་བཞིན་དགའ་གཉེན་བྱས་ཆོག་པའི་བཀའ་གཏད་གནང་བར་ཞུས་པ་བཞིན། གོང་གི་བཀའ་རྒྱ་དང་བཀའ་ཤོག་བཟུང་སྟེ། ཁྲེལ་མེད་ལྟར་བྱས་ནས། བུད་མེད་བདམས་ཏེ་འཛིན་མི་ཆོག་པ་དང་། དགའ་གཉེན་བྱས་ཆོག་པའི་བཀའ་རྒྱ་འཛིན་དུ་གནང་ངོ་། །ཞེས་པའོ། །རྒྱལ་པོའི་བཀའ་རྒྱ་ཐོགས་ནས་ཁྲེལ་མེད་དུ་བྱས་བྱ་བ། ཞང་བློན་ཡ་ཡ་སོགས་ཀྱིས་བྱེད་ཚུལ་ལྟར་མི་ཆོག་པའི་དོན་ནོ། །
      དེ་ལྟར་ལི་ཡུལ་དེ་ཁྲི་སྲོང་གི་དུས་སུ་འབངས་རྣལ་མར་བཀུག་ཅིང་། མཐོང་ཁྱབ་ཁྲི་སྡེ་ལྔ་བྱ་བ་བཙུགས་ཏེ། བློན་ཁམས ༼༡༢༢༽ གཅིག་གི་ས་གསར་དུ་བསྐྱེད་དོ་ཞེས་འོག་གི་རྒྱལ་རབས་ལ་ཡང་གསལ་ལོ། །
      བལ་ཡུལ་ནི་སྲོང་བཙན་གྱི་སྐུ་ཚེའི་སྨད་ལ་དབང་དུ་ཆུག་ཅིང་། དེ་ནས་བཟུང་ཡུན་ཇི་སྲིད་གཅིག་གི་བར་དུ་བོད་འབངས་སུ་གནས་པའི་ལོ་གྲངས་སོགས་ལ་ཕྱི་རྒྱའི་མཁས་པ་རྣམས་ཁ་མི་མཐུན་ཏེ། འགའ་ཞིག་གིས་འདུས་སྲོང་མང་པོ་རྗེའི་སྐུ་ཚེ་སྨད་ལ་བལ་པོ་ངོ་ལོག་ཅེས་ཟེར། འགའ་ཞིག་གིས་དེའི་ཡང་གོང་ནས་ཡིན་ཟེར། འོན་ཀྱང་ལི་ཡུལ་ནས་འཐོན་པའི་རྒྱལ་རབས་དེར། ཁྲི་ལྡེ་གཙུག་བཙན ༼༡༢༣༽ གྱི་ཁྲི་ལོ་འདྲེན་པའི་སྐབས་སུ་ཡང་། རྟའི་ལོ་ལ་བཙན་ཕོ་བལ་པོ་ན་བཞུགས་སོགས་ལན་དུ་མར་བྱུང་བས། ཕལ་ཆེར་ཁྲི་སྲོང་གི་གོང་རོལ་བར་བོད་འབངས་སུ་ཡོད་དམ་སྙམ། ཡུལ་འདི་བོད་ཀྱི་ཆབ་འོག་ཏུ་ཆུད་པའི་སྔ་རྟགས་ལྟ་བུར་ཡང་། ཁོང་ཚོའི་ཁྲོད་ན་ཙང ༼གཙང་ཡིན་ནམ་སྙམ།༽ དང་། བླ་མ་དང་། རཱ་ཡེ། རྟ་མང ༼རྟ་དམག་བྱ་བ་ཟུར་ཆག་སྙམ་པ།༽ ལ་སོགས་པའི་མིང་ཅན་གྱི་དཔའ་རྩལ་ལྡན་པའི་མི་སྡེ་མང་དུ་ཡོད་པ་འདི་ཀུན། ཆོས་ལུགས་ཀྱང་བོན་དང་འདྲེས་པའི་ནང་པ་བྱེད། སྐད་ཀྱང་བོད་སྐད་བརྡ་རྙིང་འབའ་ཞིག་སྨྲ། རིགས་རྒྱུད་ཀྱང་བོད་ནས་མཆེད་པར་ཁོང་ཅག་རང་ལ་གྲགས། དེར་མ་ཟད་བལ་ཡུལ་མཐིལ་དུ་ཡང་། ཕམ་ཐང་དང་བོད་ཐང་ལ་སོགས་པ་བོད་ཀྱི་ཐ་སྙད་ཆགས་པའི་ས་མིག་མང་བོ་ཡོད། ཆེས་གསལ་བའི་རྟགས་གཞན་ཡང་། བོད་རྗེ་འདུས་སྲོང་སོགས་དང་དུས་མཉམ་པའི་བལ་རྒྱལ་ན་རེནྟྲ་དེ་བ་མི་དབང་ལྷའི་སྲས། ཤཱི་ལ་དེ་བ་ཚུལ་ཁྲིམས་ལྷའི་རྡོ་རིང་ལ་ཡང་། བྷོ་ཊ་བི་ཥྚིཾཧེ་ཏོཿཔྲཏི་བཪྵ་བྷཱ་རི་ཀཛནཱཿཔཉྩ་བྱབསཱཡི་ངྷིརྒཏ་བྱཿ། ༼བོད་ལ་ཁྲལ་འཇལ་བའི་རྒྱུ་མཚན་གྱིས་ལོ་ལྟར་ཁུར་ཙ་པ་རྣམས་ལས་བྱེད་ལྔ་པོར་བཟུང་བར་བྱ་སྟེ།༽ སོགས་བྲིས་པ་ཡོད། གཞན་ཡང་བལ་པོ་རྣམས་ཀྱིས་རང་སྐད་དུ་ཡང་། མིག་ལ་མི་ག སྣ་ལ་སྣེ་པོ། ལག་པ་ལ་ལག་སོགས་བོད་སྐད་ཟུར་ཆག་ཤིན་ཏུ་མང་བོ་འདྲེས་པ་ཞིབ་ཏུ་བརྟག་པས་ཤེས་སོ། །
     རྒྱ་གར་ཏི་ར་ཧི་ཏ་བོད་ཀྱིས་བཟུང་བ་ཡང་ཐོག་མར་སྲོང་བཙན་གྱིས་དུས་ལ་ཡིན་པ་འོག་ཏུ་གསལ་ཞིང་། ཏི་ར་ཧི་ཏ་ནི་གང་གཱའི་བྱང་ནས་རི་ནག་པོའི་རྒྱུད་ལ་ཐུག་གི་བར་ཡུལ་སྤྱི་ལ་ཟེར་ཞིང་ད་ལྟ་ཡང་མིང་དེ་ཀར་གནས། ཡུལ་དེའི་ཁོངས་སུ། གྱད་དང་། ཤཱཀྱ་དང་། ལི་ཙ་བི། བྲི་ཛི། ཀནྱ་ཀུབྫ་ལ་སོགས་པའི་ཡུལ་མིང་ཆེན་དུ་མ་ཡང་འདུས། འོན་ཀྱང་ཕྱོགས་དེ་ཙ་བའི་ཡུལ་དུ་སོང་གཤིས་བོད་དམག་རྒྱུན་སྡོད་བྱེད་པ་སོགས་ཡུན་རིང་དུ་མ་བྱུང་བར་མངོན་ལ། སླར་ཡང་ཁྲི་སྲོང་གི་དུས་སུ་བསམ་ཡས་མཆོད་རྟེན་དཀར་པོའི ༼༡༢༤༽ ནང་རྫོངས་སུ་རིང་བསྲེལ ༼༡༢༥༽ སྤྱན་འདྲེན་པ་སོགས་ཀྱི་ཆེད་དུ་མ་ག་དྷ ༼༡༢༦༽ ལ་བོད་དམག་དྲངས་ཚུལ་རྦ་བཞེད་དུ་གསུངས་ཏེ། རྒྱལ་པོས་བོད་ཀྱི་རྟ་རྔོག་ཆགས་སྒས་མནན་པ་གཅིག་ཀྱང་མ་ལུས་པར་ཆད་ལ་བསྔོས་ཏེ། འགོས་ཀྱིས་ཕག་རིར་དུས་བཏབ༼༡༢༧༽། རྟ་པའི་དམག་རྣམས་དཔའ་མོ་དཔལ་ཐང་དུ་གྲངས་ལ་བཏབ། རྒྱ་གར་ཐང་དུ་བརྟོལ་བ་དང་། ཡུལ་དེའི་རྒྱལ་པོ་བྲེད་ནས། མཐའ་འཁོབ་ཀྱི་རྒྱལ་པོ་དེའི་རྟ་པ་འདི་འདྲ་ན། དཔུང་བུ་ཆུང ༼༡༢༨༽ དང་། ཤིང་རྟ་དང་། གླང་པོ་ཆེའི་ཚོགས་ཇི་འདྲ་ན་ཞེས། ཕོ་བྲང་གི་ཡ་ལད་ལ་བཙན་པོའི་ལྷམ་བཏགས་ཏེ། དེའི་འོག་ན་ཕར་འཁོར་དང་བཅས་པ་འཛུལ་ནས། ངའི་རྒྱལ་ཁམས་འདི་བཙན་པོ་ཁྱོད་ཀྱི་ཞབས་འོག་ཏུ་འཛུལ་བས། ཁྱོད་ཀྱི་ཆབ་སྲིད་བྱེད་དེ། བཅའ་དང་སྐྱེས་ལོ་ཐང་དུ་འཇལ་ལོ་ཞེས་ཁས་བླངས་ནས་མངའ་འོག་ཏུ་འདུས། དེ་ནས་གང་གཱ་བརྒལ་ནས་མ་ག་དྷར་དམག་དྲངས་པ་དང་། མ་ག་དྷ་པ་རྣམས་ཀྱིས་ནོར་ཐམས་ཅད་ཨོ་ཏན་ཏ་པུ་རིར ༼༡༢༩༽ ༼མ་ག་དྷའི་ཡུལ་གྱི་དཀྱིལ་ན་ཨོ་ཏན་ཏ་པུ་རིའི་ཤུལ་ཡོད།༽ བསྐྱལ་ནས། མི་ཐམས་ཅད་རྒྱ་གར་ཤར་ཕྱོགས་སུ་བྲོས་པས་གཡུལ་སྤྲོད་མ་དགོས་པར་བྱང་ཆུབ་ཤིང ༼༡༣༠༽ ལ་མཆོད་པ་ཕུལ། ཞེས་སོགས་ནས། གང་གཱའི་འགྲམ་དུ་བོད་ཀྱི་མི་བསྐོས་ནས། འདི་ཚུན་ཆད་བོད་ཀྱི་ས་བཅད་ཡིན་པས་རྡོ་རིང་གྱིས་ཤིག་ཅེས་བཀའ་བསྩལ་པ་བཞིན་བྱེ་ཁུང་དུ་ལྕགས་ཀྱི་ཀ་བ་བཙུགས་ཏེ། ཕྱིས་བྲུ་ཤའི་དམག ༼༡༣༡༽ གིས་དེ་བཤིག་པས། མ་ཞིག་པར་མེ་ལ་བཞུས་པའི་འཕྲོ་ཡོད་དོ། །དེའི་ལུང་ཁུག་ན་ཀ་བ་སྲུང་བའི་མིའི་རིགས་ལས་མཆེད་པ་འབོ་ཊ་ཐང་གུ་རའི་རིགས་ཞེས་བྱ་བའི་གྲོང་ཁྱེར་གཅིག་ཀྱང་ཡོད་དོ། །སོགས་གསུངས་སོ། །
      འདིར་རྒྱ་གར་གྱི་རྒྱལ་པོ་སུ་ཡིན་གསལ་བར་མ་སྨོས་ཀྱང་། དུས་བསྒྲིགས་ནས་ཟ་ཧོར་གྱི་རྒྱལ་པོ་གོ་པཱ་ལ ༼༡༣༢༽ ཡིན་ནམ་སྙམ། ཐ་གུ་ར་བྱ་བ་སྤྱིར་ལྷ་དང་རྒྱལ་རིགས་ཀྱི་མིང་ཡིན་ཞིང་། དེ་འདྲའི་གྲོང་ཁྱེར་ཡོད་པ་ནི་མ་ཐོས་མོད། ཐ་གུ་ར་བྱ་བའི་རིགས་ནི་རྒྱ་གར་བའི་ཁྲོད་ན་མང་དུ་ཡོད་ལ། དེ་དག་གི་ཐོག་མའི་རུས་ཁུངས་ཀྱང་ཀླ་ཀློ་དང་བྲམ་ཟེ ༼༡༣༣༽ གཉིས་འདུས་པ་ཞིག་ཡིན་ནོ་ཞེས་གྲགས་པས་ངེས་པར་དཔྱད་དགོས་པ་ཞིག་འདུག དུས་འདི་ཙམ་ན་བཙུགས་པའི་ལྕགས་ཀྱི་ཀ་བ་ཞིག་ཀྱང་ད་ལྟ་ངྷི་ལེའི་ཕྱོགས་ན་ཡོད་ཅིང་། སྟེང་གི་ཡི་གེ་རྣམས་ནི་རྒྱལ་པོ་ཙནྡྲ་ཟླ་བ་བྱ་བ་ཞིག་གིས་བཀོད་པ་ཡིན་འདུག་ལ། འོན་ཀྱང་རྒྱ་གར་ན་མྱ་ངན་མེད ༼༡༣༤༽ ཀྱི་རྡོ་རིང་འགའ་ཞིག་གི་སྟེང་ན། ཕྱིས་ཀྱི་ཀླ་ཀློའི་རྒྱལ་པོས་ཡི་གེ་བཀོད་པ་སོགས་ཀྱང་འདུག་པས། འདི་འདྲ་བསམ་ཚེ་ལྕགས་ཀྱི་ཀ་བ་དེ་ཡང་ངོ་བོ་སྔར་བོད་ཀྱིས་བཙུགས་པ་དེ་ཡིན་སྲིད་དམ་སྙམ་སྟེ། འོན་ཀྱང་གཏམ་འདི་འདྲ་ཁྱབ་བརྡལ་དུ་སྒྲོག་པའི་འོས་མ་ཡིན་ནོ། །དེའི་འོག་ཏུ་སླར་ཡང་མུ་ཏིག་བཙན་པོས་སྲིད་འཕྲོ་འཛིན་པའི་སྐབས། རྒྱ་གར་གྱི་རྒྱལ་པོ་དྷརྨ་པཱ་ལ ༼༡༣༥༽ བོད་དུ་འཁྲིད་དེ། བཟང་བཙོན་གྱི་ཚུལ་དུ་བཞག་ལ། དེས་ཕོ་ཡོང་བཟའ་བྱ་བའི་ཇོ་མོ་ཞིག་བཞེས་པ་ལས་འཕྱོང་རྒྱས་ཟ་ཧོར་མའི་རིགས་དེ་མཆེད་དོ་ཞེས་ལྔ་པ་ཆེན་པོས་གསུངས། དེ་ལྟར་རྒྱ་གར་ཏི་ར་ཧི་ཏ་དེ་བོད་ཀྱི་འབངས་སུ་རེས་ཡོད་རེས་མེད་ཀྱི་ཚུལ་དུ་གནས་ཏེ་རྒྱལ་ཐོག་འགའ་ཞིག་སོང་བར་མངོན་ལ། ཕྱོགས་དེ་བོད་ཀྱི་ས་ཁོངས་སུ་བརྩི་བ་གོམས་པའི་དབང་གིས། དུས་ཕྱིས་ཙ་ན་ཡང་། ཆག་ལོ་ཆོས་རྗེ་དཔལ ༼༡༣༦༽ གྱི་ལམ་ཡིག་ཏུ། དེ་ནས་གང་གཱ་བརྒལ་ཏེ་ཕྱི་ཉིན་རྒྱ་གར་དུ་སླེབས། ཞེས་གང་གཱའི་ཚུར་ཕྱོགས་རྣམས་རྒྱ་གར་མིན་པ་འདྲ་བ་ཞིག་གསུངས་སོ། །གཞན་ཡང་བོད་ཀྱི་རྒྱལ་པོའི་དམག་ཀོོ་ཤམ་བྷི ༼༡༣༧༽ བར་དུ་སླེབས་པར་འགྱུར་བ་སོགས་ལི་ཡུལ་ལུང་བསྟན་དུ་ཡང་གསལ་བར་ཡོད་དོ། །
    ཤར་ཕྱོགས་སུ་རྒྱའི་ཡུལ་ཁམས་ཇི་ཙམ་བཟུང་བ་སོགས་ནི། འོག་གི་རྒྱལ་རབས་ཀྱི་ཞར་ལ་གསལ་ཞིང་། མདོར་ན་དེ་དུས་གླིང་ཆེན་ཡོངས་རྫོགས་འདི་ན་བོད་དང་མཉམ་པའི་རྒྱལ་ཁབ་སྟོབས་ཆེ་བ་སུ་ཡང་མེད་པར་ཡོངས་སུ་གྲགས། ལྷག་པར་ཡང་རྗེ་ཁྲི་སྲོང་ལྡེ་བཙན་གྱི་སྐུ་དུས་ཙ་ན། མངའ་ཐང་དར་བའི་རྩེ་མོར་སོན་ཏེ། རྒྱལ་ཁབ་ཀྱི་ས་ཁྱོན་ཀྱང་ཕལ་ཆེར་གླིང་ཧྲིལ་པོའི་སྟེང་དུ་རྒྱ་བསྐྱེད་ཅིང་། བོད་འབངས་མིན་པའི་ཕྱོགས་རྣམས་ན་ཡང་། བླ་སྐྱེས ༼༡༣༨༽ འབུལ་ཞིང་བཙན་པོའི་བཀའ་ལུང་ལེན་པའི་རྒྱལ་ཕྲན་མང་དུ་ཡོད་པ་ཡིན་འདུག་པས། རིག་འཛིན་འཇིགས་མེད་གླིང་པས༼༡༣༩༽། འཛམ་གླིང་རྒྱལ་པོ་ཁྲི་སྲོང་ལྡེའུ་བཙན། །ཞེས་བསྔགས་པ་ཡང་དོན་ལ་གནས་པའི་གསུང་ཡིན་ནོ། །ཚལ་པའི་དེབ་དམར ༼༡༤༠༽ དུ་རྒྱའི་རྒྱལ་རབས་དྲངས་པ་ལས་ཀྱང་། དེ་དུས་བོད་ཀྱི་མཐའ་བཞི་ནི། ཤར་དུ་ལྕེའུ། མུ་ཅིའུ། སུ་ཅིའུ ༼༡༤༡༽ གསུམ་ཡིན། ལྷོར་བྲམ་ཟེའི་ཡུལ ༼༡༤༢༽ དང་། བྱང་དུ་ཧོར་གྱི་ཡུལ ༼༡༤༣༽ ཏེ། དེ་རྣམས་བསྐོར་བ་ལ་དཔག་ཚད ༼༡༤༤༽ སྟོང་ཕྲག་མང་པོ་ཡོད་པས། བོད་ལས་དཔའ་བ་དང་། བརྟུལ་ཕོད་པ། རྒྱའི་གོང་མ་ཧཱན་དང་། གཡུ་དང་། ལྕིའུ ༼༡༤༥༽ ལ་སོགས་པའི་དུས་སུ་ཡང་མ་བྱུང་བ་ཡིན་ནོ་ཞེས་བཤད་པ་ལྟར་རོ། །
ལྷན་གཅིག་སྐྱེས་པའི་གངས་ཀྱི་མུ་ཁྱུད་ལ། །
ལུགས་གཉིས་ཐབས་ཤེས་དུང་གི་མཁར་བསྐྱིལ་པའི། །
རིགས་གསུམ་མགོན་པོས་སྤྲུལ་བའི་རྒྱལ་ཁམས་འདིའི། །
ཕྱོགས་བཞིའི་རྒྱ་ཁྱོན་སུ་ཡིས་འཇལ་བར་ནུས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །    
     ཡིད་བརྟན་འཕེར་བའི་རྒྱལ་རབས་སྨྲ་བ་ལ། སྔ་ཕྱིའི་དུས་ཚིགས་ཤེས་པ་མེད་དུ་མི་རུང་བ་ཡིན་པས། འདིར་ལོ་ཚིགས་ཀྱི་རིམ་པ་གང་ལ་སྦྱོར་བའི་གཞི་བཤད་པར་བྱ་སྟེ། དེ་ཡང་འོག་ཏུ་བཀོད་པའི་བྱུང་བ་འདི་རྣམས་རབ་བྱུང་དང་པོ་སོགས་ཀྱི་ཁོངས་སུ་མི་འདུ་བ་ཡིན ༼༡༤༦༽ ལ། དེའི་ཡན་གྱི་ལོ་རྣམས་བསྣན་པའི་ལུགས་སུ་བརྩི་བ་ཡང་སྟབས་མི་བདེ་ཞིང་། རྒྱ་གར་པ་ལ་གྲགས་པའི་བི་ཀྲ་མའི ༼༡༤༧༽ ལོ་ཚིགས་སོགས་ཀྱང་ཕྱོགས་འདིར་རྒྱུས་མེད་པས་མགོ་འཁྲུག་པའི་རྐྱེན་དུ་འགྱུར་ལ། གཞན་ཕྱི་ལོར་གྲགས་པ་དེ་ཡང་ཡེ་ཤུ་གྲོངས་པའི་ལོ་ནས་བརྩི་བར་འདུག་པར ༼༡༤༨༽ རང་ཅག་ལ་འོས་འགབ་མི་ཆེ་བར་མཐོང་ནས། འདིར་རྒྱལ་རབས་རྣམས་སངས་རྒྱས་མྱ་ངན་ལས་འདས་ནས་དུ་སོང་ལ་སྦྱོར་བར་བྱས་སོ། །
      སྟོན་པ་འདས་པའི་ལོ་གང་ཡིན་ལ་ཡང་མཁས་པ་རྣམས་ཤིན་ཏུ་མི་མཐུན ༼༡༤༩༽ མོད་ཀྱི། འདིར་བཀོད་པ་ནི་ལྷོ་ཕྱོགས་སིང་གཱ་ལའི ༼༡༥༠༽ གནས་བརྟན་པ ༼༡༥༡༽ དག་གི་ལུགས་དེ་ཡིན་ཞིང་། བརྩི་ཚུལ་ཀུན་གྱི་ནང་ན་འདི་ཉིད་ཁོ་ན་རྒྱུ་མཚན་ཆེ་བར་མཐོང་སྟེ། དེ་ཡང་སངས་རྒྱས་འདས་ནས་ཉིས་སྟོང་སུམ་བརྒྱ་ལས་མི་ཉུང་བ་ནི། ཆོས་རྒྱལ་མྱ་ངན་མེད་ཀྱི་ཡབ་མཽརྱའི་རྒྱལ་པོ་ཙནྡྲ་གུབྟ༼ཟླ་བ་སྦས་པ་པའི༽ སྐབས་སུ། ཡཱ་བ་ནའི་བློན་པོ་མེ་གྷསྠཱན་རྒྱ་གར་དབུས་སུ་སླེབས་ཤིང་། སྐྱ་ནར་བུའི་གྲོང་དུ་ཡུན་རིང་བསྡད་པ་དེའི་ལམ་ཡིག་ཏུ། ཡུལ་དབུས་ན་སངས་རྒྱས་པའི་རབ་བྱུང་བཞུགས་པ་མཐོང་ཚུལ་སོགས་བྲིས་པ་འདིས་ཤེས་ལ། བློན་པོ་དེ་དང་ཟླ་བ་སྦས་པའི་དུས་ན་ཅུང་ཟད་ཀྱང་མ་ནོར་བར་བརྩི་ནུས། སྟོན་པ་འདས་ནས་ཉིས་སྟོང་ལྔ་བརྒྱ་ལས་མི་མང་བ་ནི། སྙིང་རྗེ་པད་དཀར ༼༡༥༢༽ དང་། ལྷ་ལས་ཕུལ་བྱུང་གི་འགྲེལ་བར ༼༡༥༣༽ སྟོན་པ་འདས་ནས་ལོ་བརྒྱ་ན་མྱ་ངན་མེད་འབྱུང་བར་གསུངས་ཤིང་། རྟོག་གེ་འབར་བ ༼༡༥༤༽ དང་། བྷ་བྱའི་སྡེ་བ་ཐ་དད་དུ་འབྱེད་པ ༼༡༥༥༽ ལས། བརྒྱ་དང་དྲུག་ཅུ་ན་ཡིན་ཞེས་བཤད། ཀུན་མཁྱེན་བུས ༼༡༥༦༽ བརྒྱ་དང་བཅུ་བ་ལ་མྱ་ངན་མེད་ཀྱིས་སྦྱིན་བདག་བྱས་ནས། བཀའ་བསྡུ ༼༡༥༧༽ གཉིས་པ་བྱས་པར་གསུངས། སིངྒྷ་ལའི་གནས་བརྟན་མིང་ཆེན ༼༡༥༨༽ གྱིས་མཛད་པའི་མ་ཧཱ་བངྴར་ཉིས་བརྒྱ་རེ་གཅིག་པར་མྱ་ངན་མེད་ཁྲི་ལ་འཁོད་དེ། ལོ་བཞི་བཅུར་སྲིད་བསྐྱངས་ནས་གྲོངས་ཞེས་བྲིས་པ་དང་། འགོས་ལོས་གཏད་རབས་ཤོག་འཁྱར་ཞིག་བསྒྱུར་བ ༼༡༥༩༽ ལས། བར་སྐབས་དེར་སངས་རྒྱས་འདས་ནས་ལོ་སུམ་བརྒྱ་ལོན་ཏེ། མྱ་ངན་མེད་ཅེས་བྱ་བའི་རྒྱལ་པོ་ཤི་ནས། ཞེས་གསུངས་པ་གཉིས་ལོ་གཅིག་གིས་ཀྱང་ཆད་ལྷག་མེད་པར་སྙན་གྱིས་མཐུན་ནོ། །དེས་ན་ཇི་ཙམ་ཕྱིས་ཀྱང་སྟོན་པ་འདས་ནས་ལོ་ཉིས་བརྒྱ་ལྔ་བཅུའི་ནང་རོལ་དུ། མྱ་ངན་མེད་འཁྲུངས་ནས་ཡོད་ངེས་པས་སོ། །དེའི་ཕྱིར་ཉན་ཐོས་སྡེ་པའི་བསྟན་རྩིས་འདི་ཁོ་ན་རྒྱུ་མཚན་ཅི་བས་ཀྱང་ཆེ་བ་ཡིན་ཞིང་། གལ་ཏེ་ནོར་ན་ཡང་ལོ་བཅུ་སྐོར་འགའ་ཞིག་གིས་ཆད་ལྷག་འབྱུང་སྲིད་པ་ཙམ་ཡིན་གྱི། སྟོང་གྲངས་ཕར་ཟད་བརྒྱ་གྲངས་ལ་ཡང་ནོར་བའི་གནས་མེད་དོ། །
      སྔར་རྒྱ་བལ་ཁ་ཆེ་ཀུན་ཏུ་ཡང་མཁས་པ་རྣམས་བརྩི་ཚུལ་འདི་ཉིད་ལ་ཆ་འཇོག་པར་འདུག་ལ། སྤྱིར་སྔ་མོའི་དུས་སུ་ཉན་ཐོས་ཀྱི་དགོན་པ་རྣམས་ན། སངས་རྒྱས་འདས་ན་ལོ་ཟླ་ཞག་གྲངས་ཇི་སོང་གི་ཐོ་ཉི་མ་རེ་བཞིན་འདེབས་སྲོལ་ཡོད་འདུག་པས་འདི་འདྲ་ཁུངས་སུ་མི་ཆེ་ན་གཞན་ཅི་ཞིག་ལ་བརྟེན། བོད་ཀྱི་མཁས་པ་འགའ་ཞིག་གིས། ཉན་ཐོས་བཻན་དྷ་པ ༼འདི་ལ་སེན་དྷ་པ་ཞེས་ཡིག་ནོར་རྒྱུན་འབྱམས་སུ་སོང་ཡང་། བཻཎྜ་པ་སྟེ་བསོད་བསྙོམས་པ་བྱའོ། །༽ རྣམས་ཀྱིས་སངས་རྒྱས་འཁྲུངས་པ་དང་། རྡོ་རྗེ་གདན་གྱི་སྐུ་བརྙན་བཞེངས་པ་གཉིས་ནོར་ནས་བརྩིས་པས་ཡིད་བརྟན་མེད་ཅེས་བརྙས་པར་མཛད་ཅིང་། རང་ལུགས་ལ་དེའི་སྟེང་དུ་ལོ་སྟོང་ཙམ་བསྣན་མོད། རྡོ་རྗེ་གདན་གྱི་སྐུ་བརྙན་བཞེངས་པའི་ཚེ། སངས་རྒྱས་མཇལ་མྱོང་བའི་རྒན་མོ་ལོ་བརྒྱ་ལྷག་ལོན་པ་ཞིག་ཀྱང་ཡོད་ཅེས་བཤད། སྐུ་དེ་ལ་ཀུན་དགའ་བོའི་སློབ་མ་ཤུ་ནའི་གོས་ཅན ༼༡༦༠༽ གྱིས་སྤྱན་འབྲས་ཕུལ་ཚུལ་སོགས་ཀྱང་འབྱུང་། དེས་ན་སྐུ་བརྙན་བཞེངས་པ་དང་སངས་རྒྱས་འཁྲུངས་པ་གཉིས་ནོར་བའི་དབང་དུ་བྱས་ན་ཡང་། ལོ་བརྒྱ་སྐོར་ཅིག་ནོར་སྲིད་མོད། སྟོང་ཕྲག་ཙམ་ནོར་བའི་དོན་ཅི་ལ་ཡོད། དེར་མ་ཟད་མ་བྱོན་སངས་རྒྱས་གསུམ་པ་ཁ་ཆེ་བསོད་སྙོམས་པ་ཆེན་པོ ༼༡༦༡༽ བོད་དུ་བྱོན་པའི་ཕྱི་ལོའི་ཤིང་བྱི ༼༡༦༢༽ དེ། གནས་བརྟན་པའི་ལུགས་ཀྱིས་སྟོན་པ་འདས་ནས་ཆིག་སྟོང་བདུན་བརྒྱ་ཞེ་བརྒྱད་པ་ཡིན་ལ། དེ་དུས་ཁོང་གིས་སོལ་ནག་ཐང་བོ་ཆེར ༼༡༦༣༽ བརྩིས་པ་ན། སངས་རྒྱས་འདས་ནས་ཆིག་སྟོང་བདུན་བརྒྱ་ལྔ་བཅུ་སོང་གསུངས་པ་ཡང་། རྩིས་ཀྱི་དབང་གིས་ལོ་གཉིས་མི་མཐུན་པ་ཙམ་ལས། དོན་ལ་པཎ་ཆེན་རང་ཉིད་ཀྱང་གནས་བརྟན་པའི་ལུགས་དེ་ལ་རྩ་བ་བརྟེན་པར་སྣང་ངོ་། །དེས་ན་སྒོ་དུ་མ་ནས་བསམ་ཚེ་གནས་བརྟན་པའི་བསྟན་རྩིས་དེ་ཁོ་ན་ཁུངས་བཙན་པར་མཐོང་ནས། ཁོ་བོས་ཀྱང་འདིར་རྒྱལ་རབས་ཀྱི་གཞི་རྣམས་དེ་ལ་བརྟེན་ཏེ་བརྩིས་སོ། །དེ་ཡང་བརྩི་ཚུལ་འདིའི་དབང་དུ་བྱས་ཚེ། ད་ལྟའི་རབ་བྱུང་བཅུ་དྲུག་པའི་མེ་ཁྱི་འདི་སངས་རྒྱས་འདས་ནས་ཉིས་སྟོང་དང་བཞི་བརྒྱ་དགུ་བཅུ་བ་ཡིན ༼༡༦༤༽ ལ། མེ་མཁའ་རྒྱ་མཚོ་བསྲེས་པའི་འདས་ལོའི་ཐོག་མ་མེ་ཡོས་དེ་ཆིག་སྟོང་ལྔ་བརྒྱ་དོན་གཅིག་པ་ཡིན༼༡༦༥༽། ཀོང་ཇོ་བོད་དུ་བྱོན་པའི་ལོ་དེ་ཆིག་སྟོང་བརྒྱ་དང་གྱ་བརྒྱད་པ་ཡིན ༼༡༦༦༽ པ་སོགས་ཤེས་པར་བྱའོ། །
ཤིན་ཏུ་ཡིད་འཕྲོག་བདེན་པའི་བཞིན་རས་ལ། །
མི་གསལ་རྩིས་ཀྱི་སེང་རས་གཡོགས་པ་འདི། །
དཔྱད་གསུམ ༼༡༦༧༽ སོར་མོས་དུམ་བུར་རལ་བ་ཡི། །
མི་བསྲུན་མཁས་པའི་ཐོ་ཅོ ༼༡༦༨༽ ཁོ་བོས་བྱས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པ་སྟེ་ཐོག་མའི་ཡན་ལག་རྣམས་རྫོགས་སོ། །