«གཅན་རོང་སློབ་གསོའི་ལེགས་བཤད»ཀྱི་མྱོང་ཚོར་ཕྲན་བུ།

       ཐོས་པ་དོན་དུ་གཉེར་མཁན་གྱི་སློབ་མ་ཞིག་གི་ངོས་ནས་བརྗོད་ན་དཔེ་དེབ་འདི་ནི་མི་ཚེའི་ལམ་སྟོན་གྱི་སྒྲོན་མེ་ཞིག་ཏུ་འགྱུར་ཐུབ་པར་མ་ཟད། སློབ་སྦྱོང་གི་སྒུལ་ཤུགས་ཤིག་དང་དཔེ་ཀློག་གི་གསེར་གྱི་ཐུར་མ་ལྟ་བུ་ཞིག་ཏུའང་འགྱུར་ཐུབ་པ་རེད། ང་ཚོས་རྒྱུན་པར“དཔེ་དེབ་བྱེ་བ་བཀླགས་གྱུར་ན། །སྨྱུག་རྩེ་ལྷ་ཡི་ཁ་ལོ་བསྒྱུར། །”ཟེར་བ་ནང་བཞིན་དཔེ་ཀློག་གི་མིག་རྒྱང་བསྐྱེད་ཐུབ་པར་མ་ཟད། རང་ཉིད་ཀྱི་རིན་ཐང་ཇེ་མཐོར་གཏོང་ཐུབ་པ་སོགས་ཀྱི་དགེ་མཚན་ཆེན་པོ་ལྡན་ལ། རང་གི་རྩོམ་འབྲིའི་ནུས་པ་ཡང་བསྐྱེད་སྲིང་བྱེད་ཐུབ་པས་རྩོམ་ཡིག་ཆིག་བརྒྱ་མ་འདི་བཀླགས་ན་རྩོམ་རྩལ་མཐོ་རུ་འདེགས་པར་ཡང་ཕན་ནུས་ཡོད། ལེགས་བཤད་འདིའི་མགོ་མཇུག་བར་གསུམ་དུ་རྗོད་བྱེད་ཚིག་རྣ་བར་སྙན་ཞིང་གོ་བདེ་བ། གཏན་ཚིགས་ཀྱི་རང་བཞིན་ལྡན་ལ་ང་དང་ང་ལྟ་བུའི་ཐོས་བསམ་གྱི་རྒྱ་མཚོ་རུ་བསྐྱོད་བཞིན་པའི་གྲུ་གཟིངས་ཆུང་ངུ་ཞིག་ལ་མཚོན་ན་རིགས་ལམ་གསེར་གྱི་ལྡེ་མིག་རེ་རེ་ཡིན་པས། གཅིག་ནས་ཁ་ཕྱོགས་གསལ་སྟོན་བྱེད་པའི་ཁྱད་ཆོས། གཉིས་ནས་བསམ་གཞིག་གི་ནུས་པ་བསྐྱེད་སྲིང་བྱེད་པའི་ཁྱད་ཆོས། གསུམ་ནས་རྒྱལ་ཁམས་ལ་བལྟ་བའི་མེ་ལོང་གི་ཁྱད་ཆོས། བཞི་ནས་དཔེ་ཀློག་གི་ནུས་པ་མཐོ་རུ་གཏོང་བའི་ཁྱད་ཆོས། ལྔ་ནས་བླང་དོར་གྱི་གནས་ལུགས་སྟོན་པ་བཅས་ཁྱད་ཆོས་ལྔ་ལྡན་གྱི་ལེགས་བཤད་གསོན་པོ་ཞིག་རེད།
       བུ་ཕྲུག་ལ་དབྱངས་གསལ་སོ་བཞིའི་ནུ་ཞོ་ལྡུད་མཁན་གྱི་ཁྱིམ་བདག་ཅིག་གི་ངོས་ནས་བརྗོད་ན་ལེགས་བཤད་འདིའི་བརྗོད་བྱ་ནི་སློབ་གསོའི་ཆོས་ཉིད་དང་འབྲེལ་བའི་རྐྱེན་གྱིས་བྱིས་པའི་ལམ་སྟོན་གྱི་མར་མེ་ཚེ་འབར་ལྟ་བུ་ཞིག་ཏུ་འགྱུར་ཐུབ་པ་དང་། ལེགས་བཤད་འདིའི་སློབ་གསོའི་ཐབས་ལམ་ཟིན་ཐོ་དང་ལག་ལེན་ཟིན་ཐོ་ནི་ཁྱིམ་བདག་ལ་སྒོས་སུ་འཚམ་ཞིང་བརྗོད་བྱ་འཚོ་བ་དངོས་དང་འབྲེལ་བ། ལེགས་བཤད་ཟིན་ཐོ་དེ་རུ་ཤེས་ནུས་རྩལ་གསུམ་འཛོམས་པའི་བྱིས་པ་ཞིག་ཇི་ལྟར་བསྐྱེད་སྲིང་བྱེད་དགོས་ཚུལ། བྱིས་པའི་སློབ་གསོ་ནི་ཇི་ལྟ་བུ་ཞིག་ཡིན་པ་སོགས་རྒན་ཁོང་རང་གི་སློབ་གསོའི་ཉམས་མྱོང་དང་གཏམ་རྒྱུད་སོགས་ལ་སྦྱར་ནས་བྲིས་ཡོད།