རྣམ་གླིང་རིན་ཆེན་གྱི་ཚིགས་བཅད་སྙན་ངག《སྙིང་གི་ན་ཟུག》།

                                                              དང་པོ་བཞུགས་གྲལ་བསྒྲིགས་དུས།། 
                                                              ཁྱིམ་གྱི་བདག་པོ་རེད་ཟེར།།
                                                              ཟླ་གསུམ་མ་ལོན་གོང་ནས།། 
                                                              སྒོ་ཁྱི་བཞིན་དུ་སྤྱུགས་སོང་།།

 

                                                              དང་པོ་བརྩེ་བས་བསྡམས་པས།། 
                                                              ཁྱེད་རང་བསམ་བཞིན་ཡོང་ཡོད།།
                                                              གཉིས་པ་གཡོ་སྒྱུའི་ཝ་མོས།། 
                                                              བྲན་གཡོག་བཞིན་དུ་བཀོལ་བྱུང་།།

 

                                                              བུ་ཆུང་ཚེ་རིང་བསམ་གྲུབ།། 
                                                              ཨ་མའི་སྙིང་གི་ནོར་བུ།།
                                                              ཆུང་དུས་ཕ་མ་བཞག་ནས།།
                                                              རི་དྭགས་རྗེས་ལ་བསྙེགས་སོང་།།

 

                                                              དགའ་དུས་ཕ་མ་མ་དྲན།།
                                                              འདོད་ཆགས་རྙི་ལ་ཚུད་སོང་།།
                                                              ཡིད་ལ་མདའ་མོ་འཕོགས་དུས།།
                                                              ཨ་མ་ཟེར་བཞིན་ངུས་བྱུང་།།

 

                                                              དྲིན་ཆེན་ཡབ་ཡུམ་གཉིས་པོས།།    
                                                              བུ་ཡི་མིང་ནས་འབོད་བཞིན།།
                                                              ཚེ་གཅིག་ལུས་གཅིག་ལང་ཚོ།། 
                                                              རེ་སྒུག་ངང་ནས་ཟད་སོང་།།

 

                                                              བུ་ཆུང་ཨ་མ་དྲན་ནས།། 
                                                              ཡུལ་ལ་ཁ་ལོ་བསྒྱུར་ཡང་།།
                                                              ཕ་མ་མཇལ་བའི་བསྐལ་བ།། 
                                                              མཚོ་ནང་ཟླ་བ་འདོན་འདྲ།།

 

                                                              སྣ་ཁུང་རྡོ་ལ་བརྡབས་དུས།།  
                                                              ད་གཟོད་ཨ་མ་དྲན་སོང་།།
                                                              ཨ་མའི་མིང་ནས་འབོད་བཞིན།། 
                                                              འགྱོད་གདུང་སྨྲེ་ངག་འདོན་གིས།།  

 

                                                             ཨོ་ལོ་ཚེ་རིང་བསམ་གྲུབ།          
                                                              སྡུག་གི་དམྱལ་བར་བརྫངས་སོང་།།
                                                              གླང་ཆེན་སྨྱོན་པ་བཞིན་གྱིས།།    
                                                              སྦི་རག་འཐུང་བར་བྲེལ་སོང་།།

 

                                                              ཐ་མག་ཨ་རག་བདུད་རྩིས།།     
                                                              ཨོ་ལོར་སྙིང་གཏམ་བཤད་སོང་།།
                                                              བུ་ཆུང་ཡིད་ཀྱི་རྟ་ཕོ།།     
                                                              ཆང་ཁང་ཕྱོགས་ལ་ཤོར་སོང་།།

 

                                                               ཨར་ཁང་མགོ་ལ་གྱོན་ནས།།    
                                                              ཤོ་སྦག་རྒྱན་ལ་ཆགས་སོང་།།
                                                              ཀུན་དགའ་དོན་གྲུབ་སྟོང་དུས།།  
                                                              མིག་ཆུས་སེམས་པ་བརླན་སོང་།།