གོ་ཁ། རྨོག་རུ་དོན་གྲུབ་ཚེ་རིང་།

འཚག་དྲེག་བསལ་བ་བཞིན“རྐན་ཐུར”དགུ་བཅུ་གོ་དགུའི་རྗེས་སུ།

“ད་ལོའི་ལོ་ལ་སྐྱོ་བྱུང་།
ང་ནི་སྐྱོ་བར་མ་ཟད།
ནམ་མཁའི་བྱ་ཡང་སྐྱོ་བྱུང་།.....”
ཁང་རྩེག་ཅིག་གི་རྐེད་ནས།
དམངས་གཞས་ཤིག་ལ་ཉན་བཞིན།
སྒེའུ་ཁུང་ཕྱི་རོལ་གྱི་ཐང་ལ་ལྷུང་བའི་ཉི་འོད་དང་ཐག་རྡང་ལྟ་བུའི་གཞུང་ལམ་ཞིག་ལ་ཅེར་ཏེ་ཅི་ཞིག་ཡིད་ལ་བྱེད་དམ།
ང་ལ་ཀུ་ཏོ་ཟེར་བའི་བསྒུག་ཡུལ་ཞིག་ཡོད་དམ། ཐབ་ཀ
གོའུ་ཁུང་།
གོ་ཁ།
ཁོག་ལྟིར། ད་དུང་མེ་འབྲུ་ཞིག

ངས་ཁ་སང་ལ་སྒུག་བཞིན་ཡོད་དམ།
ཀུ་ཏོ་མ་སླེབས་གོང་ལ། དེ་དག་སླེབས་བྱུང་།
ཡིད་བརྙན་དེ་དག
དྲན་འཛིན་གྱི་ས་འོག་ནས་ལུད་དེ།
ཡིད་ཀྱི་རྩྭ་ཐང་དུ།
རེ་ལྕག་གི་མེ་ཏོག་བཞིན་བསྟར་འོངས། ས་རུབ་པས་ཐབ་གའི་ནང་གི་མེ་ལྕེ་དེ་ཇེ་གསལ་དུ་འགྲོ།
ཁྱིམ་མི་གང་བོའི་ཁ་ངོ་དག་ཀྱང་ཇེ་གསལ་དུ་འགྲོ།
སྐབས་སྐབས་སུ་སླེབས་པའི་མགྲོན་པོ་དེ་དག་གི་ངོ་གདོང་ཡང་མདང་དགོང་གི་ཁ་བརྡ་བཞིན།
ཐབ་ཀའི་མེ་འོད་ལས་སྣང་འོང་། སྤོ་བོ་དང་རྨོ་མོ་གཉིས་སྔར་ནས་འདས།
མགྲོན་པོ་ཁ་ཤས་ཀྱང་སྔར་ནས་འདས་པ་ཐོས།
བདག་དང་བདག་གི་སྐྱ་ཡ་གཉིས་ཀྱང་།
སྔར་ནས་སྤོ་བོ་དང་རྨོ་མོར་གྱུར་ཚར།
བདག་གིས་ཕྱི་རོལ་གྱི་ཉི་འོད་ལ་ལྟ་ཞོར་དུ།
གོ་ཁ་ཡོད་པའི་ཐབ་ཀ་ཞིག་ལ་བློས་བསླངས་བྱེད་ཀྱིན་ཡོད། དེ་རེད། བློས་བསླངས་བྱེད་དུས།
སྟག་འབུམ་རྒྱལ་གྱིས་བློས་བསླངས་བྱས་པའི་མི་སྣ་ཞིག་གི་བྱིས་དུས་ཀྱི་སྣང་བརྙན་ཞིག་ཀྱང་ཡིད་ལ་ཤར།
བློས་བསླངས་བྱེད་ཞོར་ཐ་མག་ཅིག་ལ་མེ་བསྒྲོན།
སྙན་ངག་པ་ཞིག་གི་སྙན་ངག་ཅིག་ཀྱང་ཡིད་ལ་འཁོར། གློ་བུར་བའི་ཁ་པར་གྱི་སྒྲ་དབྱངས།
སྒྲ་དབྱངས་དེ་རླུང་དང་འདྲ།
བསེར་བུ་ཙམ་ཡང་མེད་པའི་ཁང་བའི་ནང་དུ་བརྟོལ་ཏེ།
ངའི་རྣ་ལམ་དུ་ལྡང་བས།
བློས་བསླངས་ཀྱི་དུད་སྨུག་ཕྱོགས་ནས་ཕྱོགས་སུ་བདས།

ཁང་ཁྱིམ་དྲོན་མོ་འདི་ནས།
ཁོ་བོ་ཡང་བསྐྱར་ལྷིང་འཇགས་ཀྱི་འོབས་དོང་ཞིག་ཏུ་ལྷུང་། གློ་བུར་དུ།
གནམ་གྲུ་འཕུར་བ་ལྟ་བུའི་མེ་འཁོར་རྒྱུག་པ་ལྟ་བུའི་འབར་མདེལ་འཕངས་པ་ལྟ་བུའི།
དུག་སེལ་སྨན་ཆབ་གཏོར་བྱེད་ཀྱི་འཕྲུལ་འཁོར་དེས།
ངའི་སྐྲ་ཞོགས།
བ་སྤུ་རེ་རེའི་བུ་གར་ཁ་བ་སག་སག་ཏུ་བབས།
སྦྲུལ་ལྟར་སིབ་སིབ་ངང་ཤ་གསེང་ལ་འཛུལ།

ལྷིང་འཇགས་ཀྱང་དེ་འདྲའི་འཇིགས་སུ་རུང་བ་དང་བཟོད་གླགས་བྲལ་བ་ཞིག་ཡིན་པ་ནི།
ད་སྔོན་ངས་ཀླད་པའི་རྒྱ་རུའང་མ་དྲན། ལོ་དེར་ངེད་ཚང་གི་མཚེར་ས་ལ་ཁངས་ཆག་ཆེན་པོ་ཞིག་ལྷུང་།
ཁངས་ཆག་ཀློང་གི་ནོར་ལུག་གིས་སྐྱུག་ལྡད་བྱེད་པ་ལས་འགུལ་ཙམ་ཡང་མི་བྱེད།
ངེད་ཚང་གི་མགོ་སྦྲ་དེས་ཀྱང་འགུལ་ཙམ་ཡང་མི་བྱེད།
མགོ་སྦྲའི་དཀྱིལ་དབུས་སུ་ས་ཡི་ཐབ་ཀ་ཡོད།
དེ་ཡི་མཐའ་སྐོར་དུ་ངེད་ཚང་གི་བཟའ་མི་གོ་ར་གང་བོ་ཡོད།
བྱིས་པ་རེ་རེའི་མིག་ལམ་ནས།
ཕ་མ་གཉིས་ཀའི་འཛུམ་ཞལ་དང་གསུང་སྐད་དག
ཐབ་ཀའི་མེ་འོད་ཀྱི་བཞིན་ལག་ཏུ་ཤར་ནས།
སྦྲ་ཁྱིམ་གྱི་གྲུ་ཟུར་རེ་རེ་ནས།
ང་ཚོའི་མི་ཚེའི་བཞུད་ལམ་རིང་མོར་བསྡོངས་ཏེ།
ཉིན་མཚན་དབྱེར་མི་ཕྱེད་པའི་དུས་སྐབས་དུས་སྐབས་ཀྱི།
ཡོལ་བ་ལྷང་ངེར་ཕྱེ་མྱོང་ཨང་། སྒེའུ་ཁུང་ནས་ཕྱི་རོལ་ཏུ་ཅེར་ནའང་།
ད་ལོའི་ཁ་བ་ད་དུང་མ་བབས།
ནད་ཡམས་འདིའི་ཚ་དྲོད་ཀྱིས།
ནམ་མཁའི་བྱ་ལའང་གོ་ལོག་ཐེབས་འདུག

ད་ལོའི་ཁ་བ་ད་དུང་མ་བབས་ནའང་།
སེམས་ཀྱི་རི་ལུང་ཐང་གསུམ་ཁ་བས་གཡོགས་ཚར།
ཁ་བ་རྣམས་བལ་འདབ་ཙམ། འཕང་ལོ་ཙམ། ཡུངས་འབྲུ་ཙམ།
བྱ་ལྟར་ལྡིང་ཞིང་བུང་བ་ལྟར་འཁོར། ཁུ་འཕངས་བཞིན་དྲིལ་ཏེ།
ངའི་ཁ་པར་གྱི་འཆར་ངོས་ལས་མར་མར་བབས།
མར་མར་བབས། ཁ་ལག་བསྲོས་པའི་རྗེས་ལ།
ཨོང་མེ་དང་རིལ་མེ་གང་ཞིག་ཡིན་རུང་ཐལ་བར་གྱུར་འགྲོ།
ཐལ་བ་དེ་གོ་ཁ་ནས་སྤུང་གསོག་བརྒྱག་རྒྱུ་ཞིག་མིན།
དེ་ཐལ་ཕུང་དུ་དབོ་དགོས།
རློན་ནུའི་རློན་ཤ་བཞིན་འཇམ་རུང་དབོ་དགོས།
ཐལ་བར་གྱུར་རྗེས་མེ་མེད་པའི་ཐལ་བ་དེ་ཐལ་ཕུང་དུ།
སེམས་ཆུང་དང་དལ་ལྷོད་ཀྱིས་དབོ་དགོས།
ཐལ་བ་འབོ་བའི་བརྒྱུད་རིམ་ལ་ལྷོད་ཅིག་དགོས་ཟེར་བ་ད་དུང་ཡང་བརྗེད་མེད།

རྔུབ་འཐེན་གྱིས་ཤུལ་དུ་བཞག་པའི།
ངའི་ཐ་མག་གི་ཐལ་བ་ཤེལ་གཞོང་གང་།
ད་ལྟ་གང་ཞིག་ཏུ་ཇི་ལྟར་དབོ་དགོས་སམ།
དུས་དེ་ཤེད་ཙམ་ལ་ངས་གོ་ཁ་དྲན་པ་ནི།
དེ་ཁོ་ནས་ཡིན་ནམ། སྔོན་ཆད་སྔོན་ཆད་ཅིག་ལ།
ལྷ་ས་ནས་ཆབ་ཆ་ལ་ལོག་རྗེས།
ཁ་བའི་སྐོར་གྱི་གསར་འགྱུར་ཞིག་བྲིས་མྱོང་།
ཁ་བའི་སྐོར་གྱི་གསར་འགྱུར་ད་དུང་ཡང་མཇུག་རྫོགས་མེད་ཅེས་བྲིས་ཡོད།
ད་ལྟ་ང་ཟི་ལིང་གི་ཁང་རྩེག་ཅིག་ཏུ་བསྡད་དེ།
གོ་ཁའི་སྐོར་གྱི་ཕྱིར་དྲན་ཞིག་འབྲི་བཞིན་ཡོད།
གོ་ཁའི་སྐོར་གྱི་ཕྱིར་དྲན་ཡང་། ད་དུང་མཇུག་རྫོགས་མེད། གོ་ཁ་ནི་ཁོ་བོས་ཐོག་དང་པོར་ངོ་ཤེས་ཤིང་རྒྱུས་ཡོད་དུ་གྱུར་པའི་ས་དེ་ཡིན།
མ་མོའི་བྲང་དང་འདྲ་བའི་ས་དེ་ཡིན།
ཞིབ་ཏུ་བསམས་ན། གོ་ཁའི་སྐོར་གྱི་ཕྱིར་དྲན་ཡིན་པས།
མཇུག་རྫོགས་པར་མི་སྲིད་སྙམ། བར་སྐབས་སུ་དལ་ཅག་གེར་འདུག་པའི་ཁ་པར་དེ།
རང་ཤུགས་ཀྱིས་ལག་ཏུ་བླངས།
ཇི་ལྟ་བུ་ཞིག་ཏུ་འགྱུར་སྲིད་དམ།

ཤེལ་དང་འདྲ་བའི་རྡོ་གཅལ་སྟེང་གི
མཐིལ་ལྷམ་ཆ་གཅིག་ཕར་ལ་སོང་ཞིང་ཕྱིར་ལ་ལོག
གློ་བུར་གོམ་མཚམས་བཞག་ཅིང་རྒྱང་ལ་ལྟ་དུས།
ཕྱོགས་གཞན་ཞིག་གི་དྲ་མིག་ལས།
ཙོང་ཁའི་སྐྱེས་རི་ཡང་བསྐྱར་མིག་ལམ་དུ་སྣང་འོངས།
མིག་ཡུལ་དུ་ལྷམ་མེར་ལྷང་ངེར་ལྷན་ནེར.....