བོད་རིག་པའི་ཆེད་མཁས་སྡེ་རོང་ཚེ་རིང་དོན་གྲུབ་མཆོག་གི་ངོ་སྤྲོད་མདོར་བསྡུས།

བོད་རིག་པའི་ཆེད་མཁས་སྡེ་རོང་ཚེ་རིང་དོན་གྲུབ་མཆོག

　　　　　　　　　　　　　　གླེང་གཞི།  
　　སློབ་གཉེར་བྱེད་པའི་དུས་སུ་སློབ་དཔོན་དང་རིགས་ཞེན་ཅན་རྣམས་ཀྱི་གསུང་ལས་སྡེ་རོང་ཚེ་རིང་དོན་གྲུབ་ཅེས་གནམ་ལ་འབྲུག་གྲག་གྲག་དང་ས་ལ་ཆར་འབབ་འབབ་ལྟར་དུ་རྣ་བས་ཐོས་མྱོང་། རེད་དེ། རིག་པའི་རྣམ་དཔྱོད་ཕྲ་ལ་མཐོང་ཐོས་མྱོང་གསུམ་ཉུང་བས་མཁས་པ་ཁོང་གི་བགྲོད་ལམ་དང་ཞབས་རྗེས་ལ་བསམ་བློ་འཁོར་མེད། ལས་འབྲས་རྣམ་པར་སྨིན་པ་བསམ་མི་ཁྱབ་ཅེས་པ་ལྟར་ལོ་ངོ་མང་ཙམ་འདས་རྗེས་ཁོང་དང་འཇལ་བའི་སྐལ་བ་ཐོབ་པར་མ་ཟད་ཁ་བརྡ་ལབ་གླེང་དང་བཀའ་དྲིན་ཞུ་བའི་དུས་ཚོད་ཀྱང་མི་ཉུང་བ་ཞིག་ཐོབ། ཁོང་ནི་གཤིས་རྒྱུད་འཇམ་ལ་བབ་ཆགས་པ། རིགས་ལ་ཞེན་ཞིང་སྤྱི་སེམས་ཆེ། དཔྱོད་ལ་མཁས་ཤིང་ཐུགས་རྒྱ་ཡངས་བས་ལས་ལ་བརྩོན་ཞིང་སྤྱང་གྲུང་ལྡན་པ་དང་།བྱམས་སེམས་ཆེ་ལ་དཔའ་ངར་ཅན་གྱི་མི་རིགས་ཞེས་པ་ནི་ཁོང་ལྟ་བུའི་གདུང་རྒྱུད་ལ་ཟེར་བ་ལོས་ཡིན་སྙམ་སྟེ་དགའ་སྤྲོ་ཚད་མེད་སྐྱེས་ནས་འཚོ་བ་དང་ལས་དོན་གྱི་ཐད་ལ་སྡུག་བསྔལ་ཁུར་དུ་བཟོད་པའི་ངར་ཤུགས་ཀྱང་ཐེངས་གཅིག་མིན་པར་ལན་མང་བསྐྱེད་མྱོང་། དེས་ན་ཁོང་གི་འདས་ཟིན་པའི་ཤུལ་ལམ་དང་ད་ལྟའི་བགྲོད་ལམ། མ་འོངས་པའི་བསམ་ལམ་བཅས་ངོ་སྤྲོད་ཙམ་བྱ་རྒྱུ་ཡིན།
　　　　　　　　གཅིག ཉི་སྤྲིན་རླུང་གསུམ་ལས་ས་གཞི་དྲོན་མོར་རྩ་ལག་རྒྱས།
　　དེང་སང་རྒྱལ་ཁབ་ཕྱི་ནང་ཀུན་དུ་མཁས་པ་ཆེན་པོ་དང་ལོ་རྒྱུས་རིག་པ་བ། བོད་རིག་པ་བ། ཡིག་ཚགས་རིག་པ་བ་ཞེས་མཚན་གྱི་སྙན་པ་ཕྱོགས་ཀྱི་བུ་མོའི་རྣ་བའི་རྒྱན་དུ་གྱུར་བའི་སྡེ་རོང་ཚེ་རིང་དོན་གྲུབ་ནི1954ལོའི་ཟླ་བ11པར་དཀར་མཛེས་ཁུལ་སྡེ་རོང་རྫོང་ཟུར་སྣང་ཤང་སྣང་བཟང་གྲོང་སྡེར་ཡབ་བརྩོན་འགྲུས་རྒྱ་མཚོ་དང་ཡུམ་སྐལ་བཟང་ལྷ་མོ་གཉིས་ལས་མི་ལུས་རིན་པོ་ཆེ་རྙེད། 1963ལོ་ནས1968ལོའི་བར་སྡེ་རོང་རྫོང་རི་ཡུས་སློབ་ཆུང་དུ་སློབ་སྦྱོང་བྱས། སྐབས་དེ་དུས་ཁྱིམ་ཚང་གི་ཆ་རྐྱེན་བཟང་རྒྱུ་མེད་མོད། བཀའ་དྲིན་ཅན་གྱི་ཡབ་ཡུམ་དང་བཅས་པའི་ཐུགས་ཁུར་ལ་བརྟེན་ནས་ཁོང་གིས་སྐར་མོས་ཞྭ་མོ་དང་བ་མོས་ལྷམ་བྱས་ཏེ་སློབ་སྦྱོང་ལ་འབད་ལ་ལྷོད་མེད་བྱས་པས་མི་ཚེ་རིང་པོའི་བགྲོད་ལམ་ལ་ཆེས་ཐོག་མའི་ས་བོན་གྲུང་པོ་རྨོ་འདེབས་བྱས། འོན་ཀྱང་ལས་བསམ་སར་མི་འགྲོ་གསེག་ཏུ་འགྲོ་ཞེས་པ་ལྟར་རྒྱུ་རྐྱེན་སྣ་ཚོགས་ཀྱི་དབང་གིས་རེ་ཞིག་སློབ་གཉེར་གྱི་མཚམས་ཆད་དེ1968ལོ་ནས1973ལོའི་བར་ཕ་ཡུལ་དུ་ཞིང་ལས་བྱེད་དགོས་པར་གྱུར། ལས་ལ་བརྩོན་ཞིང་དཔའ་ངར་ལྡན་པའི་ཡུལ་མི་རྣམས་ཀྱི་བལ་ལས་འཇམ་པའི་གཤིས་ཀ་དང་ཆུ་ལས་རིང་བའི་ངང་རྒྱུད་ཀྱིས་ཁོང་ལ་ཡལ་རྒྱུ་མེད་པའི་བག་ཆགས་ཟབ་མོ་བཞག ཕ་ཡུལ་ཉི་མའི་ལུང་པའི་ཀ་བ་གྱེན་དུ་བསླངས་འདྲའི་རི་བོ་དང་དར་དཀར་རིང་དུ་བསྲིངས་པ་ནང་བཞིན་གྱི་ཆུ་བོ་ལས་ཁོང་གིས་དཀའ་ངལ་གྱི་མདུན་དུ་མགོ་བོ་སྒུར་མི་རུང་བ་དང་མི་ཚེའི་ལས་དབང་རང་གི་བསམ་སྤྱོད་ལ་རག་ལས་ཡོད་པའི་ངེས་ཤེས་ཪྙེད། ཁོང་གིས་གསུང་ལྟར་ན་སྐབས་དེ་དུས་ཡབ་ཡུམ་དང་བཅས་པའི་ཡུལ་མི་རྣམས་ཀྱི་རྗེས་སུ་འབྲངས་ཏེ་ལ་རྒྱབ་ཐུར་བབས་བྱས་པས་བསམ་བློའི་མཚོ་མོ་རུ་སྙིང་སྟོབས་ཀྱི་རྦ་རླབས་འཕྱུར་ཞིང་ཡིད་སེམས་ཀྱི་མཁའ་ལམ་དུ་ཕུགས་འདུན་གྱི་འཇའ་འོད་གུར་དུ་ཕུབ་པས་རྙེད་དཀའ་བའི་མི་ལུས་ཀྱི་ལང་ཚོ་ལུང་ཁུག་ཏུ་ཟད་སོང་ན་ཧ་ཅང་ཡིད་ཕངས་དགོས་པ་ཞིག་རེད་སྙམ་ནས་རང་ཉིད་ཀྱི་མི་ཚེའི་ལས་དབང་ལ་བསམ་བློ་བཏང་། 
　　ཇི་སྐད་དུ། བུ་བསམ་གཞིག་ཅན་ལ་བསམ་དོན་འཁོར་ཞེས་པ་ལྟར1973ལོ་ནས1975ལོའི་བར་དུ་དཀར་མཛེས་ཁུལ་ནད་གཡོག་སྨན་པའི་སློབ་གྲྭ་རུ་སློབ་གཉེར་བྱེད་པའི་སྐལ་བཟང་ཐོབ་པས་ལྟོ་འདོད་ཅན་ཟས་དང་འཕྲད་པ་བཞིན་བརྩོན་འགྲུས་ཀྱི་གོ་ཆ་བགོས་ཏེ་མཐར་མི་སྨོན་རང་སྐྱིད་ཀྱི་སྦྱངས་འབྲས་རུམ་གང་ཁྱེར་ནས1980ལོའི་བར་ལ་ཁུལ་མི་དམངས་སྨན་ཁང་དུ་ཕྱག་ལས་གནང་། དེ་ནས་གོང་རིམ་གྱི་བཀའ་དང་བླངས་ཏེ1980ནས་ད་ལྟའི་བར་དུ་དཀར་མཛེས་ཁུལ་ཡིག་ཚགས་ཁང་དུ་དོན་སྙིང་ལྡན་པའི་བྱ་བ་མཛད་བཞིན་མཆིས།
　　　　　　　　གཉིས། ཟུངས་ཁྲགདྲོན་མོ་ལས་སྒང་པའི་ཕང་བ་རུ་ལོ་འབྲས་སྨིན།
　　ཁོང་གི་ཁྲག་རྩའི་སྦུབས་སུ་རང་ཉིད་ཀྱི་ཚེ་སྲོག་རྙེད་པའི་ཕ་ཡུལ་གྱི་རི་ཆུ་ལ་དུངས་པའི་ཟུངས་ཁྲག་བཞུར་ལ་དྲང་ཤིག་གེར་འགྱིང་བའི་བྱང་ཁོག་ཏུ་རིགས་མཐུན་ཡུལ་མི་རྣམས་ལ་གཅེས་པའི་མེ་ལྕེ་གྱེན་དུ་འབར་བས་དུས་ནམ་ཡང་ཕག་འཛུབ་ཀྱིས་མྱུ་གུ་འཆང་སྟེ་དགག་སྒྲུབ་ཀྱི་མདའ་མོ་འབེན་དུ་ཟུག་ཡོད། དཔེ་ཆ་ནི་མིའི་རིགས་ཀྱི་བསམ་པའི་རྒྱགས་ཕྱེ་ཡིན་ལ་དཔེ་ཆར་ལྟ་བར་གོམས་པའི་མི་རིགས་ནི་རེ་བ་ལྡན་པ་ཞིག་ཡིན་ཞེས་པ་ལྟར་དཔེ་དེབ་འདྲ་མིན་སྣ་ཚོགས་མཁོ་འདོན་དང་ཁྱབ་སྤེལ་བྱེད་ཆེད1990ལོར་རྡོ་རྗེ་དོན་གྲུབ་དང་མཉམ་དུ་ཁམས་པའི་དཔེ་ཚོང་ཁང་བཙུགས་པ་རེད།1995ལོར་བོད་ཁུལ་གྱི་སྲིད་འབྱོར་རིག་གསུམ་དོ་དམ་བྱེད་ཐབས་ཀྱི་ཐད་ལ《བདག་གི་རེ་སྨོན》ཞེས་པ་བརྩམས་ཏེ་གོང་རིམ་ལ་ཕུལ་བས་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་མཐོང་ཆེན་གནང་སྟེ་བོད་ཁུལ་གྱི་སྤྱི་ཚོགས་འཕེལ་རྒྱས་འགྲོ་བ་ལ་ནུས་པ་ཆེན་པོ་ཐོན་ཡོད།