ཇོ་བོ་ཡབ་སྲས་ཀྱི་གསང་ཆོས་ཐུན་མོང་མིན་པ་བཀའ་གདམས་ཐིག་ལེ་བཅུ་དྲུག་གི་བརྒྱུད་རིམ།

      ཇོ་བོ་ཡབ་སྲས་ཀྱི་གསང་ཆོས་ཐུན་མོང་མིན་པ་བཀའ་གདམས་ཐིག་ལེ་བཅུ་དྲུག་གི་བརྒྱུད་རིམ་ནི། ཇོ་བོ་ཡབ་སྲས་ཞལ་བཞུགས་དུས་ཤིན་ཏུ་གསང་བར་མཛད་ནས་གསང་ཆོས་འདི་འཛིན་པའི་སྨོན་ལམ་གྱི་མཐུ་གྲུབ་པ་རྗེ་བཙུན་འཇམ་པའི་དབྱངས་ཀྱིས་བྱིན་གྱིས་བརླབས་པའི་བཤེས་གཉེན་ཆེན་པོ་རྔོག་ལེགས་པའི་ཤེས་རབ་གཅིག་པུ་ལ་གནང་སྟེ་བཀའ་རྒྱ་དམ་པོར་བཏབ། ཇོ་བོ་རྗེ་ཞིང་གཤེགས་ནས་འབྲོམ་རིན་པོ་ཆེས་དགེ་བཤེས་ཀ་བ་ལ་འདིའི་དབང་དང་གདམས་ངག་མདོར་བསྡུས་ཤིག་གནང་ནས་བཀའ་རྒྱས་བཏབ། སྲས་ཀྱི་ཐུ་བོ་སྐུ་མཆེད་གསུམ་ལས་ཕུ་ཆུང་བ་ལ་བཀའ་གདམས་སྙིང་གི་ཐིག་ལེའི་མན་ངག་གི་མཛོད་འཛིན་པར་ལུང་བསྟན་མཛད་དོ། །དེས་ན་འབྲོམ་རིན་པོ་ཆེའི་ཐུགས་སྲས་དགེ་བའི་བཤེས་གཉེན་ཕུ་ཆུང་བ་ཞེས་གྲགས་པ་དེ་ནི། འཕན་ཡུལ་རྒྱལ་གྱི་སྐྱི་ར་རྫིང་ཁར་ལྕགས་མོ་ལུག་གི་ལོ་ལ་སྐུ་འཁྲུངས། ཚེ་རབས་མང་པོར་ལམ་ལ་སྦྱངས་པའི་བག་ཆགས་བརྟས་པས་བྱིས་པའི་དུས་ནས་མི་རྟག་པ་རྟོགས་པའི་བློ་རང་འཁྲུངས་བྱུང་སྟེ་སྲིད་པའི་ཕུན་ཚོགས་གང་ལའང་མ་ཆགས་པར་རྒྱལ་བའི་བསྟན་པ་ལ་ཞུགས་ཏེ་ཆོས་རྣམ་དག་ཅིག་མཛད་བཞེད་ནས་རྒྱལ་ལྷ་ཁང་དུ་བྲོས་ཏེ་ཞང་ཆེན་པོ་དང༌། གླན་ཚུལ་བྱང་ལ་རབ་ཏུ་བྱུང༌། མཚན་གཞོན་ནུ་རྒྱལ་མཚན་དུ་བཏགས། དེ་ནས་འདུལ་བའི་བཅས་མཚམས་རྣམས་མིག་གི་འབྲས་བུ་ལྟར་བསྲུང་ཞིང་སྔོན་བྱོན་དམ་པའི་རྣམ་ཐར་བསམས་ཏེ་ཐོས་བསམ་སྒོམ་གསུམ་ཆ་ཚང་བ་ཞིག་མཛད་བཞེད་ནས་མཁས་པ་ཆེན་པོ་ཁུ་སྟོན་ལ་ཕར་ཕྱིན་གྱི་འགྲེལ་ཆུང་ཚར་བཅོ་ལྔ་གསན་པ་སོགས་ཐོས་པ་མང་དུ་མཛད། འདུལ་བ་ལའང་གསན་སྦྱོང་མཐར་ཕྱིན་པར་མཛད། སྙེ་ཐང་དུ་ཇོ་བོའི་ཞལ་མཇལ་ཞིང་ཆོས་ཀྱང་ཅུང་ཟད་གསན། ཇོ་བོ་གཤེགས་ནས་དགེ་བཤེས་སྟོན་པའི་ཕྱགས་ཕྱི ་མཛད་ནས་རྭ་སྒྲེང་དུ་ཕེབས། གདམས་པ་རྫོགས་པར་གསན་ཞིང་ཐུགས་ཉམས་སུ་བཞེས། དགེ་བཤེས་སྟོན་པའི་བཀའ་ལུང་གིས་སློབ་མ་སྐྱོང་བའང་མཛད་དེ། འབྲོམ་རིན་པོ་ཆེའི་ཞབས་དྲུང་དུ་དགེ་སློང་གསར་བུ་བྱུང་བ་རྣམས་ལ་འདུལ་བའི་བསླབ་བྱ་ལེགས་པར་སློབས་ཤིག་ཅེས་བཀའ་གནང་ནས། འདུལ་བའི་ཕྱག་ལེན་ཁྲིད་པར་མཛད།
     དགེ་བཤེས་སྟོན་པ་ལོ་བཅུ་གཅིག་ཏུ་བསྟེན་ནས་ཡོན་ཏན་མ་ལུས་ཐུགས་ལ་མངའ་བར་མཛད། དགེ་བཤེས་སྟོན་པ་འདས་ནས་ཚེ་འདིའི་འཁྲི་བ་ཕྲ་མོའང་མེད་པར་དབེན་པའི་གནས་སུ་མདོ་སྔགས་ཀྱི་ལམ་ཆ་ཚང་ལ་ཉམས་ལེན་མཐར་ཕྱིན་པ་ཞིག་མཛད་བཞེད་པར་བྱུང་སྟེ། དགེ་བཤེས་ཕུ་ཆུང་བ་འདི་ཉིད་ནི། སྐྱེས་ཀྱང་ནགས་སུ་སྐྱེས། དེངས་ཀྱང་ནགས་སུ་དེངས་པ་ལྟ་བུ་ཞིག་ཡིན་ཏེ། ཤ་གཟུག་རང་ཟ་གསུངས་ནས་སྒྲུབ་པ་འབའ་ཞིག་མཛད་དེ། འཕན་ཡུལ་ཡུང་བའི་ཕུ་ཕུ་ཆུང་དུ་སྒྲུབ་ཁང་བརྩིགས་ཏེ་སྒྲུབ་པ་གཙོ་བོར་མཛད། དེའི་ཚེ་སྒྲུབ་ཁང་གི་ནུབ་ན་བྲག་ལ་ཕྱག་མཛུབ་བཙུགས་པར་སྒྲུབ་ཆུ་བྱུང་བའང་ཡོད་དོ། །འདིས་སློབ་མ་དྲུང་དུ་འདུས་པ་དག་ལའང་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་ཀྱི་གདམས་པ་གཙོ་བོར་འདེབས་པར་མཛད་ཅིང༌། ལམ་གྱི་རིམ་པའང་དེའི་ཁོངས་སུ་འཐུས་པར་མཛད་དོ། །བདག་ཉིད་ཆེན་པོ་འདིའི་རི་དྭགས་རྨས་མ་ལྟར་འདུ་འཛི་ལ་ཆེས་འཇིགས་པས་སྐུ་མཆེད་གསུམ་ཚོགས་པའི་སྐབས་མ་གཏོགས་ཚོགས་མི་སྡུད་ཅིང༌། གཅིག་པུ་གཉིས་སུ་མེད་པར་དབེན་པ་ནས་དབེན་པར་འཕོ་བར་མཛད་ཀྱང་ཡོན་ཏན་གྱི་དྲི་བསུང་ལ་ཐམས་ཅད་འཁོར་ཏེ་སྐུ་མཆེད་གཉིས་ཀྱི་སློབ་མ་ཕལ་ཆེ་བས་ཆོས་མ་གསན་པ་མེད་དེ། སྤྱན་སྔ་གཤེགས་ནས་བྱ་ཡུལ་བས་ཕུ་ཆུང་དུ་བྱོན་ཏེ་རྟེན་འབྲེལ་གྱི་ཁྲིད་གསན་ཅིང་བཞུགས་དུས་མང་རའི་ཞལ་ནས། ད་ལྟ་ཕུ་ཆུང་ན་ཉན་ཐོས་ཀྱི་རྫུ་འཕྲུལ་གྱིས་འགྲོ་བའི་བྱང་ཆུབ་སེམས་དཔའ་ཞིག་སྨིན་བདོག་གསུང་སྐད། ཕུ་ཆུང་བའི་ལུགས་ཀྱི་རྟེན་འབྲེལ་གྱི་ཁྲིད་ཉམས་སུ་ལེན་ཚུལ་བྱ་ཡུལ་བའི་བཀའ་རྒྱུད་ལ་དར་ཆ་ཆེ་བར་བྱུང་ངོ༌། །དགེ་བཤེས་ཕུ་ཆུང་བ་དེ་ཉིད་དཀོན་མཆོག་མཆོད་པ་ལ་གཙོ་བོར་མཛད་པས་གཟིམ་ཁང་གི་ཕྱི་རོལ་ཏུ་སྤོས་ཀྱི་དྲི་ངད་ལྡང་བ་ལགས་པར་གདའ། ཞལ་ནས་ངས་དང་པོར་སྤང་སྤོས་སྣ་ཚ་ཏིང་ངེ་བ་ཕུལ། དེ་ནས་རེང་བུ་བཞི་སྦྱོར་མངར་སིང་ངེ་བ་འབུལ་རྒྱུ་བྱུང༌། ད་ལྟ་ཨ་ཀ་རུ་དང་དུ་རུ་ཀ་ལ་སོགས་པ་དྲི་བསུང་ཆིང་ངེ་བ་འབུལ་གསུངས། ལན་ཅིག་ལ་གསེར་སྲང་ཉི་ཤུ་རྩ་གཉིས་ཀྱི་སྤོས་སྦྱར་སྐད། ཡང་ཞལ་ནས། ད་ལྟ་ནས་སྐྱབས་འགྲོ་གོམས་ཙ་ན་ན་བའི་ཚེ་ཨ་ར་ཟེར་བའི་དོད་ལ་སངས་རྒྱས་སོགས་འོང་སྟེ་གསུངས། ཡང་ལན་ཅིག་གཡང་ཤུན་མགོ་ལ་བཀབ་ནས་རྒྱལ་ལྷ་ཁང་གི་ཤི་བ་རྣམས་བགྲང་གིན་སྣང་སྐད།
     ཡང་ལན་ཅིག་ཕུ་ཆུང་བ་དང་ཁམ་ལུང་བ་འཛོམ་དུས་དགེ་བཤེས་པ་ནི་ལས་འབྲས་ཁོ་ན་གལ་ཆེ་བར་གསུངས་པ་ལ། ད་ལྟ་བཤད་རིན་དང་ཉན་རིན་དང་སྒོམ་རིན་མེད་པར་བྱེད་དེ། འདི་ཁོ་ན་ཉམས་སུ་བླངས་དཀའ་སེམས་གསུངས་པས། ཕུ་ཆུང་བ་ཡང་དེ་ཙུག་ལགས་གསུངས་པ་དང༌། ཡང་ཕུ་ཆུང་བའི་ཞལ་ནས། ང་ནི་རྒས་ཁར་མཛངས་བླུན་ལ་ཁ་ལྷན་གྱིས་སོང་གསུང་སྐད། ཡང་ཞལ་ནས། འུ་ཅག་དགེ་བའི་ཚིག་འབྲུ་བཏོན་དང་མི་དགེ་བ་དོན་བཏོན་དུ་འགྲོ་གསུངས། ཡང་ཕུ་ཆུང་བ་ཆེན་པོས་ལན་ཅིག་ནམ་ཕྱེད་ཙ་ན་ཨ་ཙ་མ་གསུངས། ཅི་ནོངས་ཞུས་པས། དེ་རིང་མདོ་སྡེ་བལྟས་པ་ན་དུས་ཀྱི་མཐའི་ཉན་ཐོས་བྱེད་མའི་སྒྲོ་བ་ཁ་སྤུབ་པ་བཞིན་མར་ལ་འགྲོ་བར་བཤད་སྣང༌། དེའི་གསེབ་ན་ནི་ང་ཡང་ཡོད་བླ་ལྷག་པའི་ཆོས་ནི་མ་བྱས། སྲུབ་ཀར་ཆགས་པ་འདྲ་ཡིན་ན་རུང་སྟེ་ཞེས་གསུངས། ཡང་ཞལ་ནས། ཆོས་བྱེ ད་པ་ལ་ཤེས་དགོས། དེ་ལ་གོ་དགོས། དེ་ལ་ཉན་དགོས། ཡང་ཧུར་ཆེན་པོ་ཕྱུང་ནས་བྱེ ད་དགོས། ལུང་པའི་སྲོལ་བསྒྱུར་ནས་ཆོས་བྱེ ད་དགོས་ཏེ། བདག་གཞན་བརྗེ་བའམ། འཇིག་རྟེ ན་དང་མི་མཐུན་པར་བྱེ ད་དགོས། གཏམ་ངན་བླངས་ནས་བྱེད་དགོས། སྙིང་ཁམ་རང་དཔེ་ཐེའུ་ཙམ་དགོས་གསུངས། ཡང་ལན་ཅིག་དགེ་བཤེས་ཤ་བོ་སྒང་པའི་མཚན་ཕྱུང་ནས། ཇོ་བོ་པ་འཆི་བ་འདི་མངོན་སུམ་དུ་མི་རོ་ལུད་བཞིན་སྐྱེལ་བ་འདི་མི་གོ་བར་ཆོས་རྣམས་ཀྱི་གནས་ལུགས་འཇིག་རྟེན་མཐའ་དག་གིས་ཡིད་ཆེས་པར་དཀའ་བ་ལ་བློ་འགྲོ་བ་སྐད་ཟེར་ལ་འདི་ལ་གློ་བ་མི་ཆེས་པར་གདའོ་གསུངས་སྐད། ཡང་ཤ་བོ་སྒང་བ་ལ་ང་དེ་རིང་ཁྱེད་ལ་ཆོས་ཤིག་ཉན་གསུངས་ནས། སླེ་མོ་ཐང་དུ་རོ་བསྲེགས་པ་རྣམས་སྟོན་ཅིག་གསུངས། ཤ་བོ་སྒང་པས་འདིར་འདི་སྐད་བྱ་བ་བསྲེགས་པ་ལགས། འདིར་འདི་སྐད་བྱ་བ་བསྲེགས་པ་ལགས་བྱ་བ་ལ་སོགས་པ་གསུངས་པས། ཉོན་མོངས་པ་ར་ཡོམ་མི་བ། སྒྲོ་ལྡེམ་མེ་བ། རྨིག་པ་ཤ་རེ་བར་བཞག་པའི་ཆོས་བྱེ ད་ཤེས་པ་གསུངས་པ་ལ། ཤ་བོ་པའི་ཞལ་ནས། ཤེས་པ་བས་ཀྱང་མཁས་ཀྱང་མཁས། །མཁས་པ་བས་མང་ཡང་མང་གསུངས་སོ། །ཡང་ལན་ཅིག་ཞལ་ནས་འཆི་བ་མི་རྟག་པ་དང་ལས་དང་འབྲས་བུ་མང་དུ་སྒོམས་ཤིག །ཕས་ཕམ་པ་བཞི་བྱུང་ཡང་སྦྱོང་ནུས་པ་ཞིག་འོང་གི །དེ་ངའི་ཁ་ཆེམས་ཡིན་གསུངས་སོ། །ཡང་ཞལ་ནས། བདག་ཉིད་གང་ལ་མི་དགའ་བ། །གཞན་ལ་ཀུན་ཏུ་ཅི་སྤྱད་དོ། །ཞེས་པ་བྱང་ཆུབ་སེམས་དཔའི་བསླབ་པའི་ཁོག་པ་ཡིན་གསུངས།
     འབྲོམ་རིན་པོ་ཆེའི་ཞབས་དྲུང་དུ་སྐུ་མཆེད་གསུམ་འཚོགས་ནས་འབྲོམ་རིན་པོ་ཆེ་ཞིང་གཤེགས་ཀྱི་བར་དུ་འབྲལ་མེད་དུ་བཞུགས་ཀྱང་ཇོ་བོ་ཡབ་སྲས་ཀྱི་གསང་བའི་ཆོས་རྫོགས་པར་མངའ་བ་ནི་ཕུ་ཆུང་བ་ཉིད་མིན་ཏེ། འབྲོམ་རིན་པོ་ཆེའི་ཞལ་ནས་ཀྱང༌། ཚུལ་ཁྲིམས་འབར་བ་རིན་ཆེན་འོད་གསལ་བ། །རིན་ཆེན་གསལ་བས་ཚུལ་ཁྲིམས་རྒྱན་མཛེས་པ། །ང་ཡི་རྣམ་ཐར་མི་ནུབ་སྐྱོང་བར་མཛོད། །གཞོན་ནུ་རྒྱལ་མཚན་ང་དང་གཉིས་སུ་མེད། །ཐུགས་རྗེ་ཆེན་པོ་ཀུན་ཏུ་སྦས་པའི་བུ། །འཇིག་རྟེན་ཁམས་རྣམས་རྒྱལ་མཚན་འདི་ཡིས་གང༌། །པདྨའི་སུལ་རྣམས་གཞོན་ནུ་འདི་ཡིས་བརྒྱན། །ཅེས་དང༌། འདི་ལ་གྲ་པར་གྱུར་པ་སུ་ཡང་མེད། །སློབ་མར་མ་གྱུར་ཆོས་པ་སུ་ཡང་མེད། །འདི་ལ་གནས་མེད་ཞིང་ཁམས་ཐམས་ཅད་འཛིན། །མི་གྲལ་ནས་བུད་མི་དབང་རྣམས་ཀྱིས་མཆོད། །གཞོན་ནུ་རྒྱལ་མཚན་རྟག་ཏུ་རྒྱལ་གྱུར་ཅིག །ཅེས་གསུངས་ཏེ་ལེགས་པར་བསྔགས་པའི་སེམས་དཔའ་ཆེན་པོ་འདིས་ཇོ་བོ་ཡབ་སྲས་ཀྱི་གསང་ཆོས་བཀའ་གདམས་ཐིག་ལེ་བཅུ་དྲུག་གི་དབང་དང་གདམས་ངག་ཇི་ལྟར་གསན་པ་དང༌། ཉམས་ལེན་ཇི་ལྟར་མཛད་པ་དང༌། བདག་ཉིད་ཆེན་པོ་འདིའི་ཕྱག་ཏུ་སྤྲུལ་པའི་གླེགས་བམ་ཇི་ལྟར་བྱུང་ཚུལ་སོགས་ལོ་རྒྱུས་རྣམ་ཐར་ཅུང་ཟད་བརྗོད་ན། ཇོ་བོ་ཡབ་སྲས་གཉིས་ཡེར་པ་ལྷ་རི་སྙིང་པོའི་མགུལ་ན་བཞུགས་དུས་མདོ་སྔགས་གསུང་རབ་དགོངས་འགྲེལ་དང་བཅས་པ་ཐམས་ཅད་ཀྱི་སྙིང་པོའི་དོན་བྱང་ཆུབ་ལམ་གྱི་རིམ་པའི་གནད་རྣམས་ལ་བཀའ་བགྲོ་བར་མཛད་པའི་ཚེ་རྒྱུད་པ་གསུམ་གྱི་བླ་མ་གོང་མ་ཐམས་ཅད་ཀྱང་དངོས་སུ་བྱོན་ཏེ་ཞལ་འཛོམ། མགོན་པོ་སྤྱན་རས་གཟིགས་དང་རྗེ་བཙུན་མ་སྒྲོལ་མ་སོགས་ལྷག་པའི་ལྷ་རྣམས་ཀྱིས་ཀྱང་དངོས་སུ་ཞལ་བསྟན། དེའི་ཚེ་མགོན་པོ་གསེར་གླིང་པས་བྱང་ཆུབ་ལམ་གྱི་རིམ་པའི་སྙིང་པོ་དང་སྲོག་ཤིང་དང་ལམ་གྱི་རྩ་བ་བྱང་ཆུབ་ཀྱི་སེམས་རིན་པོ་ཆེ་མ་སྐྱེས་པ་བསྐྱེད་པ་དང༌། སྐྱེས་ཟིན་གོང་ནས་གོང་དུ་སྤེལ་བ་དང༌། ཉམས་ལེན་མཐར་ཕྱིན་པར་བྱེད་པ་ལ་སྙིང་རྗེའི་ལྷ་མགོན་པོ་སྤྱན་རས་གཟིགས་ལྷག་པའི་ལྷར་བསྟེན་ནས་གསོལ་བ་གདབ་དགོས་པ་དང༌། མགོན་པོ་སྤྱན་རས་གཟིགས་ཀྱི་སྐུའི་བཀོད་པ་བསམ་གྱིས་མི་ཁྱབ་པ་ཐིག་ལེ་བཅུ་དྲུག་གི་མན་ངག་ལས་འབྱུང་བ་ལྟར་ཡོད་ཚུལ་རྣམས་གསུངས། རྗེ་བཙུན་མ་སྒྲོལ་མས་ཀྱང་གསུང་རབ་དགོངས་འགྲེལ་དང་བཅས་པ་ཐམས་ཅད་སྐྱབས་གནས་བླ་མ་རྗེས་དྲན། རང་ལུས་ལྷ་སྐུར་རྗེས་དྲན། ངག་བཟླས་བརྗོད་དུ་རྗེས་དྲན། འགྲོ་ཀུན་ཕ་མར་རྗེས་དྲན། གནས་ལུགས་སྟོང་པ་རྗེས་དྲན་ཏེ་རྗེས་དྲན་ལྔར་བསྡུས་ནས་ཉམས་སུ་ལེན་ཚུལ་རྒྱས་པར་གསུངས་ཏེ། དེ་ནི་ཐིག་ལེ་བཅུ་དྲུག་གི་གདམས་ངག་འདིའི་ཉམས་ལེན་བྱ་ཚུལ་ཉིད་དོ། །
     དེ་ནས་ཇོ་བོ་རྗེས་འབྲོམ་རིན་པོ་ཆེའི་སྐྱེས་རབས་རྣམ་ཐར་རྣམས་དང་སྤྲུལ་པའི་བཀོད་པ་བསམ་གྱིས་མི་ཁྱབ་པ་རྣམ་མདོར་བསྡུས་གསུངས་ཤིང༌། འབྲོམ་རིན་པོ་ཆེ་ཉིད་ལའང་ཁྱེད་བོད་ཀྱི་མགོན་པོ་ཐུགས་རྗེ་ཅན་ཡིན་པས་ཧ་ཅང་སྦ་བར་མ་མཛད་པར་ཕྱི་རབས་ཀྱི་གདུལ་བྱའི་དོན་དུ་ཅུང་ཟད་གསུངས་ཤིག་ཅེས་བསྐུལ་བ་ན་འབྲོམ་རིན་པོ་ཆེས་ཐ་མལ་པའི་སྣང་ངོར་བསྟན་པའི་སྐུ་དེ་ཡལ་ནས་ཐུགས་རྗེ་ཆེན་པོ་རྒྱལ་བ་རྒྱ་མཚོ་རྟེན་དང་བརྟེན་པར་བཅས་པའི་དཀྱིལ་འཁོར་དུ་དངོས་སུ་བཞེངས་ནས་ཐིག་ལེ་བཅུ་དྲུག་གི་གདམས་པ་ཟབ་མོ་རྣམས་གསུངས། དེ་ཡང་ཇོ་བོ་ཡབ་སྲས་ཀྱིས་གསུངས་པ་ཙམ་མིན་གྱི། མདོ་རྒྱུད་ནས་གསུངས་པའི་མན་ངག་སྟེ་མདོ་སྡེ་ཟ་མ་ཏོག་བཀོད་པར་ཐིག་ལེ་བཅུ་དྲུག་གི་དཀྱིལ་འཁོར་འདི་དང་ཆ་འདྲ་བར་ཐུགས་རྗེ་ཆེན་པོའི་སྐུའི་བ་སྤུའི་བུ་ག་རེར་ཡང་སངས་རྒྱས་ཀྱི་ཞིང་མང་པོ་ཡོད་པ་སོགས་གསུངས། དེ་བཞིན་དུ་འདུས་པ་ཆེན་པོའི་གཟུངས་ལ་སོགས་པ་དང༌། དཔལ་གསང་བ་འདུས་པ་ཡེ་ཤེས་ཞབས་ལུགས་ཀྱི་རྩ་བའི་མན་ངག་འཇམ་པའི་དབྱངས་ཀྱི་ཞལ་ལུང་དང༌། དེའི་མན་ངག་སྒྲུབ་ཐབས་ཀུན་བཟང་དང༌། གྲོལ་བའི་ཐིག་ལེ་རྩ་འགྲེལ་སོགས་ལས་ཐིག་ལེ་བཅུ་དྲུག་གི་ཉམས་ལེན་འདིའི་གནད་རྣམས་གསུངས་ཏེ་དེ་དག་གི་ཚུལ་ཞིབ་པར་བདག་གིས་ཡི་གེ་ལོགས་སུ་བྲིས་ནས་ཡོད་དོ། །
     དེ་ལྟ་བུའི་སྙིང་གི་ཐིག་ལེའི་དཀྱིལ་འཁོར་སྒོམ་ཚུལ་གྱི་གདམས་པ་ཟབ་མོ་ཡིད་ཆེས་ཁུངས་བཙུན་བྱིན་རླབས་ཀྱི་ཚན་ཁ་ཤིན་ཏུ་ཆེ་བ་འདི་ཇོ་བོ་ཡབ་སྲས་གཉིས་ཀྱིས་དགེ་བཤེས་གསང་ཕུ་བ་ལ་གནང་སྟེ། དེ་ཡང་དགེ་བཤེས་གསང་ཕུ་བ་རྔོག་ལེགས་པའི་ཤེས་རབ་ཅེས་བྱ་བ་འདི་ནི་བསྐལ་བ་དཔག་ཏུ་མེད་པ་ནས་ཚོགས་རྒྱ་ཆེན་པོ་བསགས་ཤིང༌། ལྷག་པར་ཇོ་བོ་ཡབ་སྲས་ཀྱི་གསང་བའི་མཛོད་འཛིན་པའི་སྨོན་ལམ་རླབས་པོ་ཆེ་བཏབ་པ། རྗེ་བཙུན་འཇམ་པའི་དབྱངས་ཀྱིས་དངོས་སུ་བྱིན་གྱིས་བརླབས་པས་ཤེས་བྱའི་གནས་ཐམས་ཅད་ལ་མཁྱེན་པ་ཐོགས་པ་མེད་པར་འཇུག་པ་ཞིག་སྟེ། དེ་ལྟ་བུའི་བདག་ཉིད་ཆེན་པོ་དེ་གསང་ཕུ་ན་དགེ་འདུན་ལྔ་བརྒྱ་ཙམ་ལ་གཞུང་ལུགས་རབ་འབྱམས་འཆད་ཅིང་བཞུགས་པ་ན། རྗེ་བཙུན་འཇམ་པའི་དབྱངས་ཀྱི་བཀས་བསྐུལ་ནས་ཚེ་འདིའི་བུན་ལོང་ཐམས་ཅད་དོར་ཏེ་ཕྱི་བཞིན་འབྲང་བ་ཞིག་དང་བཅས་ཡེར་པ་ལྷ་རི་སྙིང་པོར་ཕེབས་ནས་ཇོ་བོ་ཡབ་སྲས་ལ་དངུལ་གྱི་མཎྜལ་མདའ་གང་པ་ཞིག་ལ་དུང་གི་ཚོམ་བུ་བཀོད་པ་སོགས་མཆོད་པའི་དངོས་པོ་ཚད་མེད་པས་མཆོད་དེ་ཡང་དང་ཡང་དུ་གསོལ་བ་བཏབ་ནས་འབྲོམ་རིན་པོ་ཆེའི་སྐྱེས་རབས་རྣམས་དང༌། སྙིང་གི་ཐིག་ལེའི་གདམས་པ་ཡོངས་སུ་རྫོགས་པར་ཞུས། གང་གསུངས་ཐམས་ཅད་ཐུགས་ལ་བཟུང༌། རྗེ་བཙུན་འཇམ་པའི་དབྱངས་ཀྱི་མཐུས་གདམས་པ་ཡོངས་སུ་རྫོགས་པ་ཡི་གེའི་གཟུགས་སུ་ཤར་བའི་བཀའ་གདམས་སྤྲུལ་བའི་གླེགས་བམ་ཆེན་མོ་ཡང་ཕྱག་ཏུ་བཞུགས། དེ་ནས་རྔོག་ལེགས་པའི་ཤེས་རབ་ཀྱིས་གསང་ཕུར་ཕེབས་ནས་བཀའ་གདམས་སྤྲུལ་པའི་གླེགས་བམ་ལ་མཆོད་པ་ཚད་མེད་པས་མཆོད་ཅིང་ཁོར་ཡུག་ཏུ་གསོལ་བ་བཏབ། ནམ་ཞིག་ན་རྗེ་བཙུན་འཇམ་པའི་དབྱངས་ཀྱིས་བསྐུལ་ནས་མངའ་རིས་པ་ཤེས་རབ་རྒྱལ་མཚན་ཞེས་བྱ་བའི་བྱང་ཆུབ་སེམས་དཔའ་ཆེན་པོ་ཞིག་གསང་ཕུའི་ནགས་ཁྲོད་ན་སྒོམ་ཞིང་ཡོད་པའི་སར་གསང་ཕུ་བ་ཆེན་པོ་བྱོན་ནས་སྙིང་གི་ཐིག་ལེའི་གདམས་པ་འདིའི་ལོ་རྒྱུས་ཅུང་ཟད་གསུངས་པ་ན་བྱང་ཆུབ་སེམས་དཔའ་ཤེས་རབ་རྒྱལ་མཚན་གྱིས་ཀྱང་དེ་ལྟ་བུའི་གདམས་པ་ཟབ་མོ་དེ་ཅི་ནས་ཀྱང་གསུང་འཚལ་ཞེས་གསོལ་བ་བཏབ་པ་ན། གསང་ཕུ་བ་ཆེན་པོས་ཀྱང་ཞལ་གྱིས་བཞེས་ནས་འདི་ལ་སྤྱན་རས་གཟིགས་ཀྱི་དཀྱིལ་འཁོར་ལ་མཆོད་པའི་རྒྱུ་ཞིག་དགོས་གསུངས་པ་ན། བྱང་ཆུབ་སེམས་དཔའ་ཤེས་རབ་རྒྱལ་མཚན་གྱིས་ཡོ་བྱད་ཅི་ཡོད་མཆོད་པའི་རྒྱུར་ཕུལ། དེའི་སྟེང་དུ་གསང་ཕུ་བ་ཆེན་པོས་ཀྱང་ཡོ་བྱད་མང་དུ་གནང་སྟེ། ཐིག་ལེའི་དཀྱིལ་འཁོར་བཞེངས་ནས་སྒྲུབ་གྲོགས་དགེ་སློང་བཞི་དང་བཅས་ཞག་སུམ་ཅུའི་རིང་ལ་ཐིག་ལེ་བཅུ་དྲུག་གི་དབང་དང་གདམས་པ་ཡོངས་སུ་རྫོགས་པར་གནང༌། མཐར་སྤྲུལ་པའི་གླེགས་བམ་ཡང་གནང་སྟེ་བཀའ་རྒྱ་དམ་དུ་མཛད། དེ་ནས་བྱང་ཆུབ་སེམས་དཔའ་ཤེས་རབ་རྒྱལ་མཚན་གྱིས་མི་མེད་དབེན་པའི་གནས་དུ་མར་ཉམས་སུ་བཞེས་ཏེ་རྟོགས་པ་མཆོག་བརྙེས་ནས་དགེ་བཤེས་ཕུ་ཆུང་བའི་སར་བྱོན་པ་ན། ཕུ་ཆུང་བས་ཀྱང་ཁོང་ལ་སྙིང་གི་ཐིག་ལེའི་གདམས་པ་ཟབ་མོ་འདི་ཡོད་པར་མངོན་ཤེས་ཀྱིས་མཁྱེན་ནས་དེ་གནང་དགོས་པར་གསོལ་བ་བཏབ། བྱང་ཆུབ་སེམས་དཔའ་ཆེན་པོས་ཀྱང་ཞལ་གྱིས་བཞེས་ནས་འདི་ལ་སྤྱན་རས་གཟིགས་ཀྱི་དཀྱིལ་འཁོར་ལ་མཆོད་རྫས་ཤིག་དགོས་གསུངས་པ་ན། ཕུ་ཆུང་བས་རྣམ་སྲས་ལ་འཕྲིན་ལས་ཀྱི་གྲོགས་བཅོལ་བ་ན་དེ་མ་ཐག་ཏུ་མཆོད་རྫས་ཐམས་ཅད་ཐོགས་པ་མེད་པར་གྲུབ་སྟེ་དཀྱིལ་འཁོར་བཤམས། གཉིས་ཀ་ཀུན་སྤང་བྱ་བྲལ་དུ་སོང་བས་སྒྲུབ་གྲོགས་གཞན་མ་རྙེད་པ་ན་ཕུ་ཆུང་བས་འཕགས་པ་གནས་བརྟན་བཅུ་དྲུག་ལ་གསོལ་བ་བཏབ་ནས་གནས་བརྟན་བཅུ་དྲུག་གིས་སྒྲུབ་གྲོགས་མཛད།
     དེར་བྱང་ཆུབ་སེམས་དཔའ་ཤེས་རབ་རྒྱལ་མཚན་གྱིས་སྙིང་གི་ཐིག་ལེའི་དཀྱིལ་འཁོར་དུ་དབང་བསྐུར་བ་དང་གདམས་ངག་རྣམས་སྤེལ་མར་བྱས་ཏེ་ཟླ་བ་གཅིག་དང་ཞག་བཅོ་བརྒྱད་ཀྱི་རིང་ལ་ཡོངས་སུ་རྫོགས་པ་གནང་ཞིང༌། མཐར་བཀའ་གདམས་སྤྲུལ་པའི་གླེགས་བམ་ཡང་དགེ་བཤེས་ཕུ་ཆུང་བ་ལ་གཏད་ནས་བྱང་ཆུབ་སེམས་དཔའ་ཤེས་རབ་རྒྱལ་མཚན་སྐུའི་སྣང་བ་བསྡུས་ཏེ་འཇའ་ལུས་སུ་གཤེགས་སོ། །དེ་ནས་དགེ་བཤེས་ཕུ་ཆུང་བ་ཆེན་པོས་དབེན་པའི་གནས་དུ་མར་ཐུགས་ཉམས་སུ་བཞེས་ཏེ་ཟུང་འཇུག་གི་གོ་འཕང་བརྙེས་པ་ན་བྱང་ཆུབ་སེམས་དཔའ་རིན་ཆེན་རྒྱལ་མཚན་ཞེས་བྱ་བའི་སར་ཕེབས། དེས་ཀྱང་ཕུ་ཆུང་བ་ཆེན་པོ་ལ་བཀའ་གདམས་བསྟན་པའི་སྙིང་པོ་འདི་གནང་དགོས་པར་གསོལ་བ་བཏབ་པ་ན། གདམས་ངག་འདི་ལ་ཐུགས་རྗེ་ཆེན་པོའི་དཀྱིལ་འཁོར་ལ་མཆོད་རྫས་ཤིག་དགོས་པས་ཁྱོད་རང་ཡང་བསོད་སྙོམས་ཅུང་ཟད་མཛོད། ངས་ཀྱང་གྲོགས་བྱ་གསུངས་ནས་ཕུ་ཆུང་བ་ཆེན་པོས་རྭ་སྒྲེང་སོགས་ནས་ཟས་སྣ་དང་སྨན་སྣ་བཙལ། བྱང་ཆུབ་སེམས་དཔའ་རིན་ཆེན་རྒྱལ་མཚན་གྱིས་བསོད་སྙོམས་བྱས་ཏེ་ཡོ་བྱད་རྣམས་ཚོགས་པ་ན་ཞག་རེ་ལ་ཐིག་ལེ་རེ་མཛད་ནས་ཞག་བཅུ་དྲུག་ལ་ཐིག་ལེ་བཅུ་དྲུག་གི་དབང་རྫོགས་པར་མཛད། མན་ངག་རྣམས་ཟླ་བ་དྲུག་གི་རིང་རྫོགས་པར་བསྟན་ནས་རྒྱུད་སྨིན་ཅིང་གྲོལ་བར་མཛད་དོ། །དེའི་ཚེ་ཕུ་ཆུང་བ་ཆེན་པོས་བཀའ་གདམས་བསྟན་པའི་སྙིང་པོ་འདི་ཉིད་གངས་རིའི་ཁྲོད་འདིར་མི་ནུབ་ཅིང་འཕེལ་བར་བྱ་བའི་ཕྱིར་བཀའ་གདམས་ལྷ་ཆོས་བདུན་ལྡན་སྙིང་གི་ཐིག་ལེའི་མན་ངག་འདི་ཇི་ལྟར་བྱོན་ཚུལ་གཏེར་གྱི་ཁ་བྱང་ལྟ་བུ་ཞིག་ཀྱང་ཡི་གེར་འགོད་པར་མཛད་དོ། །
     དེ་ལྟར་ཕུ་ཆུང་བ་ཆེན་པོས་སེམས་དཔའ་ཆེན་པོ་རིན་ཆེན་རྒྱལ་མཚན་ལ་བཀའ་གདམས་སྙིང་གི་ཐིག་ལེའི་མན་ངག་ཡོངས་སུ་རྫོགས་པར་བསྟན་ནས་མཐར་སྤྲུལ་པའི་གླེགས་བམ་ཡང་གནང་སྟེ་ཕུ་ཆུང་བ་ཆེན་པོ་འཇའ་ལུས་སུ་གཤེགས་སོ། །དེ་ནས་བྱང་ཆུབ་སེམས་དཔའ་རིན་ཆེན་རྒྱལ་མཚན་གྱིས་དབུས་གཙང་མངའ་རིས་བལ་ཡུལ་སོགས་དབེན་གནས་དུ་མར་བྱོན་ནས་ཉམས་སུ་བཞེས་ཤིང་རྟོགས་པ་མཆོག་བརྙེས་པ་ན་རྭ་སྒྲེང་དུ་བྱོན་ཏེ་ཞང་སྟོན་དར་མ་རྒྱལ་མཚན་བཙུན་ཆུང་གཞོན་ནུ་ཞིག་ཡོད་པ་དེ་གདམས་ངག་འདིའི་བདག་པོར་འགྱུར་བར་མཁྱེན་ནས་དེ་རྗེས་སུ་བཟུང༌། དགེ་བཤེས་སྟབས་ཀ་བ་ཆེན་པོས་ཞུ་སྣ་དང་མཆོད་རྫས་ཐམས་ཅད་སྦྱོར་བར་མཛད་ནས་རྭ་སྒྲེང་གི་ཀ་གཉིས་མར་ཐིག་ལེ་བཅུ་དྲུག་གི་དཀྱིལ་འཁོར་རྒྱས་པར་བྲིས་ཏེ། ཇོ་བོ་ཡབ་སྲས་གཉིས་ཀྱང་དངོས་སུ་བྱོན་ནས་བསྙེན་པའི་གྲོགས་མཛད། ཟླ་བ་གཅིག་དང་ཞག་གཉིས་ཀྱི་རིང་ལ་ཐིག་ལེ་བཅུ་དྲུག་གི་དབང་རྒྱས་པ་ཞིག་མཛད། དེ་ནས་ལོ་བཅུ་གཉིས་ཀྱི་རིང་ཞབས་འབྲིང་དུ་བསྟེན་ཏེ་དབེན་བའི་གནས་དུ་མར་གདམས་ངག་ཡོངས་སུ་རྫོགས་པར་བསྟན། མཐར་གླེགས་བམ་ཡང་གནང་སྟེ་ཞང་སྟོན་དར་མ་རྒྱལ་མཚན་ཆོས་འདིའི་བདག་པོར་བྱིན་གྱིས་བརླབས་སོ། །
     དེ་ནས་ཞང་སྟོན་དར་མ་རྒྱལ་མཚན་གྱིས་དབེན་གནས་དུ་མར་ཐུགས་ཉམས་སུ་བཞེས་ཤིང་རྟོགས་པ་མཆོག་བརྙེས་པ་ན་སྟབས་ཀ་བ་བྱང་ཆུབ་བཟང་པོ་རྗེས་སུ་བཟུང༌། བྱང་ཆུབ་བཟང་པོས་ཀྱང་ཞང་སྟོན་དར་མ་རྒྱལ་མཚན་ལ་སྙིང་གི་ཐིག་ལེའི་གདམས་པ་འདི་གསུང་བར་གསོལ་བ་བཏབ་པ་ན་ཞལ་གྱིས་བཞེས་ཏེ་མཆོད་རྫས་རྣམས་བསགས། མཆོད་པའི་ཡོ་བྱད་རྣམས་འཛོམ་པ་ན་འབྲོམ་རིན་པོ་ཆེའི་འཁྲུངས་ཡུལ་ཕུག་རིང་དུ་བྱོན་ནས་ཞག་བཅུ་དྲུག་གི་རིང་ལ་ཐིག་ལེ་བཅུ་དྲུག་གི་དབང་ཚར་བར་མཛད། དེ་ནས་རྭ་སྒྲེང་དུ་བྱོན་ནས་ཟླ་བ་གཅིག་གི་རིང་ལ་ཐིག་ལེའི་སྒྲུབ་པ་མཛད། དེ་ནས་ལོ་དགུའི་བར་དུ་བསྟེན་ནས་གདམས་ངག་རྣམས་རྫོགས་པར་གསན་ནོ། །དེ་ནས་སློ བ་དཔོན་བྱང་ཆུབ་བཟང་པོས་སྙིང་གི་ཐིག་ལེའི་གདམས་པ་ཐུགས་ཉམས་སུ་བཞེས་ཤིང་རྟོགས་པ་མཆོག་བརྙེས་པ་ན་སྟབས་ཀ་བ་ནམ་མཁའ་རིན་ཆེན་རྗེས་སུ་བཟུང་སྟེ། སྟབས་ཀ་ནམ་མཁའ་རིན་ཆེན་གྱིས་སློབ་དཔོན་བྱང་ཆུབ་བཟང་པོ་ལ་བཀའ་གདམས་བསྟན་པའི་སྙིང་པོ་སྙིང་གི་ཐིག་ལེའི་གདམས་པ་གནང་དགོས་པར་ཞུས་པ་ན་འདི་ལ་མཆོད་རྫས་ཅུང་ཟད་ཅིག་དགོས་གསུངས། དེ་འཚོལ་བར་ཞུས་ནས་ཡོ་བྱད་རྣམས་བཙལ་ཏེ་མཆོད་རྫས་རྣམས་ཚང་བར་བཙལ་གྲུབ་པ་ན་ཞག་བཅུ་དྲུག་གི་རིང་ཐིག་ལེ་བཅུ་དྲུག་གི་དབང་མཛད། དེ་ནས་དབེན་པའི་གནས་དུ་མར་ཕེབས་ནས་གདམས་ངག་རྣམས་ཡོངས་སུ་རྫོགས་པར་གནང་སྟེ། ལོ་ཉི་ཤུ་རྩ་བཞིའི་རིང་འབྲལ་མེད་དུ་བསྟེན་ནས་བཀའ་གདམས་ཀྱི་གདམས་ངག་ཡོངས་སུ་རྫོགས་པར་གསན་གསུངས་སོ། །
     འདི་ཡན་ཆད་ནི་ཆིག་རྒྱུད་ཁོ་ན་ཡིན་པ་ལ་སློབ་དཔོན་བྱང་ཆུབ་བཟང་པོས་སྟབས་ཀ་བ་ནམ་མཁའ་རིན་ཆེན་ལ་ད་ཕྱིན་ཆད་ངག་ཅུང་ཟད་ཡངས་སུ་ཐོངས་ཞེས་བཀའ་གནང༌། དེ་ནས་སློབ་དཔོན་ནམ་མཁའ་རིན་ཆེན་གྱིས་བྱང་ཆུབ་སེམས་དཔའི་ནོར་བུའི་ཕྲེང་བ་རྒྱ་ཆེར་སྤེལ་ཞིང༌། བཀའ་གདམས་གླེགས་བམ་ཡང་དོན་གཉེར་ཅན་མང་པོ་ལ་བཤད། སྙིང་གི་ཐིག་ལེའི་གདམས་པ་ནི་འབྲོམ་ཀུ་མ་ར་མ་ཏི་ལ་གནང་སྟེ། མཆོད་པའི་ཡོ་བྱེད་རྣམས་ཚོགས་པར་བྱས་ཏེ་ཐིག་ལེ་བཅུ་དྲུག་གི་དབང་ཞག་བཅུ་གཉིས་ཛལ་རྫོགས་པ་ཞིག་མཛད། གླེགས་བམ་ཡང་ཡོངས་སུ་རྫོགས་པར་བསྟན་ཏེ་ཐུགས་ལ་གཟུང་དུ་བཅུག འབྲོམ་ཀུ་མ་ར་མ་ཏིས་ཀྱང་བཀའ་གདམས་གླེགས་བམ་ཡོངས་སུ་རྫོགས་པ་ཚིག་གཅིག་ཀྱང་མ་ལུས་པར་ཐུགས་ལ་བཟུང་ནས་རྒྱུན་དུ་ཞལ་ཏོན་མཛད། བཀའ་གདམས་སྤྲུལ་པའི་གླེགས་བམ་ཆེན་མོ་ནི་སློབ་དཔོན་ནམ་མཁའ་རིན་ཆེན་གྱིས་སྟབས་ཀའི་མཆོད་རྟེན་གྱི་ནང་དུ་བཞུགས་སུ་གསོལ་ཞེས་འབྱུང་ངོ༌། །དེ་ནས་འབྲོམ་ཀུ་མ་ར་མ་ཏིས་སྣར་ཐང་དུ་ཕེབས་ནས་བཀའ་གདམས་གླེགས་བམ་རྒྱ་ཆེར་སྤེ ལ་ཞིང༌། སྣར་ཐང་མཁན་ཆེན་ཉི་མ་རྒྱལ་མཚན་གྱིས་འབྲོམ་ཀུ་མ་ར་མ་ཏིའི་ཞལ་ནས་ཇི་ལྟར་གསུངས་པ་ལྟར་བཀའ་གདམས་གླེགས་བམ་ཡི་གེར་བཀོད། དེ་ལ་མ་ཕྱི་བྱས་ནས་ཕྱོགས་ཕྱོགས་སུ་འཕེལ་བ་ཡིན་པས་དེང་སང་བཀའ་གདམས་གླེགས་བམ་ཡི་གེར་འཁོད་པ་ལ་བལྟར་ཡོད་པ་ནི་འབྲོམ་ཀུ་མ་ར་མ་ཏིས་བཀའ་གདམས་གླེགས་བམ་ཐུགས་ལ་བཟུང་བ་དེའི་བཀའ་དྲིན་ལས་བྱུང་བ་ཡིན་ནོ། །
     དེ་ནས་རིམ་གྱིས་ཐམས་ཅད་མཁྱེན་པ་དགེ་འདུན་གྲུབ་དང༌། རྒྱལ་བ་དགེ་འདུན་རྒྱ་མཚོ་གཉིས་ཀྱིས་རྒྱ་ཆེར་སྤེལ་བར་མཛད། དེ་ནས་རིམ་གྱིས་བརྒྱུད་དེ་པཎ་ཆེན་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན་དང༌། རྒྱལ་དབང་ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོ་གཉིས་ཀྱིས་སྤེལ་བར་མཛད། རྒྱལ་དབང་ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོ་ལ་ནི་འབྲོམ་རིན་པོ་ཆེས་དངོས་སུ་ཞལ་གཟིགས་ནས་སྙིང་གི་ཐིག་ལེའི་དབང་དང་གདམས་ངག་གནང་བ་ཡིན་ཞེས་བདག་གི་བླ་མ་དམ་པ་གསུངས་སོ། །དུས་ཕྱིས་ནི་བདག་གི་དྲིན་ཅན་རྩ་བའི་བླ་མ་རྗེ་བཙུན་ངག་དབང་བྱམས་པས་སྙིང་གི་ཐིག་ལེའི་དབང་དང་གདམས་ངག་མི་ནུབ་པར་བཟུང་ནས་དོན་གཉེར་ཅན་ཁ་ཤས་ལ་གནང་བ་ལས་ཧ་ཅང་དར་ཆ་ཆེ་བ་མི་སྣང་ལ། བླ་མ་རིན་པོ་ཆེ་དེ་ཉིད་ཀྱི་ཞབས་དྲུང་དུ་བདག་གིས་ཐིག་ལེ་བཅུ་དྲུག་གི་དབང་དང་བཀའ་གདམས་སྙིང་གི་ཐིག་ལེའི་གདམས་ངག་འདིའི་བཀའ་དྲིན་ལེགས་པར་ཐོབ་ལ་ཇོ་བོ་ཡབ་སྲས་ཀྱི་གསང་ཆོས་བཀའ་གདམས་ལྷ་ཆོས་བདུན་ལྡན་གྱི་སྙིང་པོའི་ཡང་སྙིང་པོ་ཐིག་ལེ་བཅུ་དྲུག་གི་གདམས་ངག་འདི་མ་ནུབ་པར་ཡུན་རིང་དུ་གནས་ན་ཅི་མ་རུང་སྙམ་དུ་སྨོན་པས་ཐིག་ལེ་བཅུ་དྲུག་གི་གདམས་ངག་འདིའི་བླ་མ་གོང་མའི་བརྒྱུད་རིམ་རྣམ་ཐར་དང༌། འདིའི་དཀྱིལ་ཆོག་སློབ་མ་རྗེས་སུ་འཛིན་ཚུལ་དང་བཅས་པ་ཆེས་ཞིབ་པར་བཀོད་པ་བཀའ་གདམས་གསལ་བྱེད་ཅེས་བྱ་བ་དང༌། བློ་དམན་རྣམས་ཀྱིས་འདིའི་ཆོ་ག་རྣམས་ངག་འདོན་དུ་བྱ་ཚུལ་དང༌། འདིའི་མན་ངག་ཇི་ལྟར་ཉམས་སུ་ལེན་ཚུལ་གྱི་ཁྲིད་ཡིག་དང༌། བཀའ་གདམས་ལྷ་ཆོས་བདུན་ལྡན་གྱི་རྣམ་ཐར་ལ་སྨོན་ལམ་དུ་བྱ་ཚུལ་ཚིགས་བཅད་དུ་བསྡེབས་པ་བཅས་གདམས་ངག་འདི་ཆ་ལག་དང་བཅས་པའི་ཡི་གེ་བདག་གིས་ལོགས་སུ་བྲིས་ནས་ཡོད་དོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་རྒྱ་ཆེན་སྤྱོད་པའི་རྒྱུད་ཀྱི་བླ་མ་རྣམས་དང༌། ཟབ་མོ་ལྟ་བའི་རྒྱུད་ཀྱི་བླ་མ་རྣམས་དང༌། ཉམས་ལེན་བྱི ན་རླབས་རྒྱུད་ཀྱི་བླ་མ་རྣམས་ལ་གསོལ་བ་འདེབས་ཤིང་ལམ་ཕྱོགས་རེར་མ་སོང་བར་མདོ་སྔགས་གཉིས་ཀའི་ལམ་གྱི་ལུས་ཡོངས་སུ་རྫོགས་པ་ལ་སྒྲུབ་པ་སྙིང་པོར་བྱ་ཞིང་ཐ་ན་སྨོན་ལམ་གྱི་ཡུལ་ཚུན་ཆད་དུ་བྱས་ཏེ་བག་ཆགས་ཅི་ཐེབས་བྱའོ།། །།
     པར་བྱང་སྨོན་ཚིག ༈ ཨོཾ་སྭསྟི། བསྐལ་བཟང་འདི་ལ་རྣམ་འདྲེན་མང་བྱོན་ཡང༌། །མགོན་མེད་སྙིགས་དུས་ཉམ་ཐག་འགྲོ་རྣམས་ལ། །རྒྱལ་བ་གཞན་ལས་ཐུགས་རྗེ་ཆེས་ལྷག་པ། །ཟླ་མེད་སྟོན་པ་ཤཱཀྱའི་རྒྱལ་པོར་འདུད། །སྟོན་པ་མཉམ་མེད་ཐུབ་པའི་དབང་པོ་ཡིས། །མཐའ་ཡས་གདུལ་བྱའི་ཁམས་དང་བསམ་པ་དང༌། །བག་ལ་ཉལ་དང་དབང་པོ་ལ་གཟིགས་ནས། །ཆོས་ཕུང་བརྒྱད་ཁྲི་བཞི་སྟོང་བཀའ་སྩལ་ཏོ། །རྒྱལ་བའི་གསུང་རབ་ཀུན་གྱི་སྙིང་པོའི་དོན། །སྐལ་བཟང་གཅིག་གི་ཉམས་ལེན་རིམ་པ་རུ། །ལེགས་པར་དྲིལ་བ་མ་ཚང་མེད་པའི་ཆོས། །བྱང་ཆུབ་ལམ་གྱི་རིམ་པ་འདི་ཉིད་དོ། །རབ་འབྱམས་ཞིང་གི་རྒྱལ་བ་མ་ལུས་པའི། །གདུང་འཚོབ་ཐེག་པ་མཆོག་གི་དགེ་བའི་བཤེས། །བྱང་ཆུབ་ལམ་གྱི་རིམ་པ་སྟོན་མཛད་པའི། །རྒྱ་བོད་རིམ་བྱོན་བླ་མ་རྣམས་ལ་འདུད། །ས་གསུམ་འགྲོ་བའི་རེ་སྐོང་ཡིད་བཞིན་ནོར། །སྐྱེས་བུ་གསུམ་གྱི་ལམ་བཟང་གསལ་མཛད་པའི། །བླ་མ་རྣམས་ཀྱི་ངོ་མཚར་མཛད་པའི་ཚུལ། །གསལ་བར་སྟོན་པའི་སྔོན་མེད་ལེགས་བཤད་འདི། །གངས་ཅན་འགྲོ་བ་ཡོངས་ཀྱི་མགོན་གཅིག་པུ། །རྗེ་བཙུན་བློ་བཟང་འཇམ་དཔལ་རྒྱ་མཚོ་ཡིས། །མཐའ་དབུས་སྐྱེ་འགྲོ་ཡོངས་ལ་བརྩེར་དགོངས་ནས། །ཆོས་སྦྱིན་འཛད་མེད་དལ་འགྲོའི་རྒྱུན་འདི་སྤེལ། །ཚུལ་འདིར་འབད་ལས་དུང་དང་ཀུནྡ་ལྟར། །རབ་དཀར་དགེ་བ་གང་ཞིག་ཐོབ་པ་དེས། །ཚང་ལ་མ་ནོར་བྱང་ཆུབ་ལམ་རིམ་འདི། །ཕྱོ གས་རྣམས་ཀུན་ཏུ་འཕེལ་ཞིང་རྒྱས་གྱུར་ཅིག། །།སརྦ་མངྒ་ལཾ།།