ཆོས་ཀྱི་དོན་རྩ་མ་ནོར་བ་ཅིག་ཤེས་དགོས།

     དེ་ཡང་འཇིག་རྟེན་དགེ་བའི་ལས་ཕལ་ཆེར་ཞིག་ལ་ཆགས་སྲེད་ཀྱི་ཀུན་སློང་དང་མ་འདྲེས་པ་མེད་ལ། དཔེར་ན།  དབང་ཆ་ཐོབ་ཕྱིར་དང་རྒྱུ་ནོར་ཐོབ་པའི་དོན་དུ་ལྷ་ལ་ཕྱག་འཚལ་བ་དང་སྤོས་སྒྲོན་པ་ལྟ་བུ། དེའི་སྤོས་ཐུར་ཇི་ལྟར་སྤོམ་ཞིང་རིང་བ་སྒྲོན་པ་དེ་ལྟར་འདོད་ཧམ་ཆེ་བར་བསྟན། དེ་དག་གིས་གྲྭ་རྟགས་འཛིན་པའི་འདོད་ཆེན་ཡི་དྭགས་རྣམས་ཀྱི་འདོད་ཧམ་ཆེར་བསྐྱེད་བྱེད་ཅིང་དམྱལ་བའི་གཏིང་རྡོ་བསྒྲུབ་པ་ལས་དགེ་བའི་ཕྱོགས་སུ་ཇི་ལྟར་འགྲོ། མི་ལ་ལས་བྱ་དགའ་ཐོབ་པའི་ཆེད་དུ་སྡུག་སྐྱོབ་ཀྱི་ཐེབས་དངུལ་འཇོག་པ་དང་། ལ་ལས་རྒྱལ་ཁབ་ཀྱི་དཔྱ་ཁྲལ་བཤོལ་བའི་ཆེད་དུ་སྙིང་རྗེའི་ཐེབས་རྩ་འཇོག་པ་སོགས་དོན་གྱི་དགེ་བར་འགྲོའམ། ཆོས་ཁྲིད་བཀའ་ཆོས་གནང་བ་ནི་དགེ་བ་ཡིན་མོད། ཆོས་ཁྲིད་དང་དབང་སྐུར་བྱེད་པའི་མིང་བཟུང་སྟེ།  དོན་གྱིས་རྒྱུ་ནོར་སྡུད་པའི་ཆོས་ཚོང་རྒྱག་མཁན་དེ་དག་གི་བྱ་སྤྱོད་ཆོས་སྤྱིན་དུ་འགྲོའམ།བཤད་པའི་ཆོས་ལྷད་མེད་ཡིན་ཀྱང་འདོད་ཆགས་དུག་གིས་རྒྱུད་བསླད་པས་ཆོས་མི་གཙང་བར་བྱས།
     དགོན་སྡེ་ནི་དམངས་མང་ལ་དགེ་བའི་སློབ་གསོ་གཏོང་ས་དང་སྡིག་བཤགས་བྱེད་ས་ཡིན་ལ། གྲྭ་བ་རྣམས་ནི་སངས་རྒྱས་ཀྱི་ཆོས་རྒྱུན་སྡོམ་རྒྱུན་འཛིན་ཞིང་དགེ་སྤྱོར་བྱེད་མཁན་ཡིན། དེང་སང་གི་དགོན་པ་མང་བོ་ཞིག་ནི། དངུལ་སྡུད་ས་ཚིགས་དང་། ཚོང་ལོག་རྒྱག་པའི་ཚོང་ཁང་ནག་པོར་གྱུར་ཞིང་།  གྲྭ་རྟགས་འཛིན་པའི་འདོད་ཆེན་ཡི་དྭགས་རིགས་ཀྱི་དངུལ་སྡུད་ལག་ཆ་ཞིག་ཏུ་གྱུར། དཔེར་ན་སྒོར་འཇུག་པའི་སྒོ་ཡིག་ཉོ་དགོས་པ་མ་ཟད། ལྷ་ཁང་སོ་སོ་དང་། ལྷ་སྐུ་སོ་སོའི་རྟེན་མཇལ་གྱི་རིན་གོང་བཅད་དེ་མཇལ་རྟེན་ལེན་པ་དང་། གསོན་པོའི་སྐུ་རིམ་དང་། ཤི་བོའི་དགེ་རྩའི་ཆོས་འདོན་ཆོས་ཀློག་གི་རིན་ཐང་བཅད་ནས་འབུལ་དངུལ་མཐོན་པོ་ལེན་པ་དང་། སྤོས་ཐུར་དང་མཆོད་མེ་གོང་ལོག་ལེན་པ་དང་། མཐའ་ན་སྤོས་སྒྲོན་པ་དང་ཅོང་བརྡུང་བ་ལའང་སྔ་ཕྱིའི་ཨང་གུ་བསྒྲིགས་ཏེ་ཨང་གྲངས་ལྟར་གོང་ལོག་ལེན་པ་སོགས་ཚོད་མེད་བྱེད་ཅིང་། དགོན་པར་མཆོད་མཇལ་བྱས་བས་ཉོན་སྒྲིབ་སྡིག་པ་མ་དག་ཀྱང་། རྟེན་མཇལ་བྱེད་མཁན་གྱི་དངུལ་ཁུག་འཕྲོག་བཅོམ་བྱས་ཏེ་སྟོང་བར་བཏང་བ་ཁོ་ཐག་རེད། དེ་འདྲའི་དགོན་པར་བདུད་ཡོད་ལ་ལྷ་མེད། དངུལ་ཡོད་ལ་ཆོས་མེད། འདྲེ་ཡོད་ལ་གྲྭ་བ་མེད། རྒྱུ་ནོར་སྡུད་ཐབས་སུ་ལྷ་ཁང་བཞེངས་པ་ལྟ་བུ་དགེ་བའི་ལས་སུ་འགྲོའམ་ཅི། དེ་འདྲའི་ལྷ་ཁང་རྣམས་ནི་ཕྱིའི་རྣམ་པ་ལྷ་སྐུ་ཡིན་ཀྱང་། དོན་གྱིས་མི་གསོད་པའི་བདུད་ཀྱི་བཤས་རྭ་ཡིན་ལ། ཕྱིའི་རྣམ་པ་ལྷ་སྐུ་ཡིན་ཀྱང་དོན་གྱིས་གྲྭ་རྟགས་འཛིན་པའི་ཁ་ལ་མེ་འབར་རིགས་ཀྱི་དངུལ་སྡུད་ལག་ཆར་གྱུར་འདུག འདོད་ཆགས་དང་བྲལ་བ་ཆོས་དཀོན་མཆོག་གི་དོན་ཡིན་པས། དགོན་པ་འདིའི་རིགས་ཆོས་སྤེལ་ས་དང་། གྲྭ་བ་འདིའི་རིགས་ཤཀྱའི་དགེ་སློང་ཡིན་ནམ། གནས་ཚུལ་འདིའི་རིགས་ནི། ཅོང་སྒྲ་དང་སྤོས་དུད་འཐིབ་པའི་ཡོལ་བས་བསྒྲིབ་པའི་འོག་གི་སྤྱོད་ངན་བདུད་ལས་ཡིན་པས། མི་རྣམས་རིག་པ་སྒྲིམ་པོ་བྱེད་དགོས་ཤིང་།  རྒྱུ་ནོར་ཕུད་ནས་གླེན་པའི་ཐོབ་ཐང་ཉོ་མི་རིགས་སོ།།
     གཞན་ཡང་སྲོག་གཅོད་པ་ཡང་སྡིག་པ་ཡིན་མིན་བསམ་པའི་ཀུན་སློང་ངོ་བོ་འབྲས་བུ་བཅས་ཀྱི་སྟེང་ནས་འབྱེད་དགོས་ཏེ།  དཔེར་ན་གསུང་རབ་ནང་གི་དེད་དཔོན་སྙིང་རྗེ་ཅན་གྱིས་ཚོང་བ་མང་བོའི་ཚེ་སྲོག་དང་རྒྱུ་ནོར་བསྲུང་བའི་དོན་དུ་མཚོ་ཇག་གི་མི་ནག་མདུང་ཐུང་ཅན་བསད་པའི་ལོ་རྒྱུས་ལྟ་བུ། རྗེས་སུ་དེད་དཔོན་སྙིང་རྗེ་ཅན་སྟོན་པའི་དྲུང་དུ་སྡིག་བཤགས་བྱེད་པར་སོང་བའི་ཚེ། བཅོམ་ལྡན་འདས་ཀྱིས་ཁྱོད་ཀྱི་སྤྱོད་པ་འདི་དགེ་བ་ཡིན་སྡིག་པ་མིན་ཞེས་གསུང་སོ།། བྱང་སེམས་སྡོམ་པར་འགྲོ་བའི་ཕན་དོན་འགྱུར་ན་རྫུན་དང་སྲོག་གཅོད་སོགས་བྱེད་ཆོག་པའི་དམིགས་བསལ་གནང་ཡོད།
     གསང་སྔགས་གི་ནང་དུ་ཞི་རྒྱས་དབང་དྲག་གི་ལས་བཞི་ཡོད། རྭ་ལོས། དམ་ཉམས་བསྒྲལ་བསྔགས་ཀྱི་དམ་ཚིག་ཅེས་གསུངས་པས།  འགྲོ་བའི་ཕན་བདེ་ལ་དམིགས་ནས་ཞིང་བཅུ་ཚང་པའི་དམ་ཉམས་བསྒྲལ་བ་ལྟ་བུ་སྤྱོར་བ་སེམས་མི་དགེ་ཡང་། ཀུན་སློང་དང་ངོ་བོ་དགེ་བ་ཡིན། སེམས་ཅན་གསོད་པ་ཡང་ཀུན་སློང་དང་དམིགས་ཡུལ་སྟེང་ནས་དགེ་སྡིག་འབྱེད་དགོས་ལ་གཏན་ནས་སྲོག་བཅད་མི་ཆོག་པ་མིན། དཔེར་ན་མི་སྐྱ་རྣམས་སེམས་ཅན་གསོད་པ་འགོག་པའི་ཚེ། དེ་དག་འཚོ་བའི་ཆ་རྐྱེན་གནང་སྦྱིན་སྦྱོར་སྒྲུབ་མ་བྱས་པར། འབྲོག་པ་དང་ཉ་བ་རྣམས་ཀྱི་ཐོན་བསྐྱེད་འབྱོར་བ་དང་། འཚོ་བར་གནོད་རྐྱེན་དུ་གྱུར་ན།  མི་དམས་ཀྱི་ཕན་བདེ་གཙོ་བོར་འཛིན་པའི་ཐབས་ཤེས་ཀྱི་སྤྱོད་སྟངས་མིན་ནོ།།
     དེ་ཡང་སངས་རྒྱས་ཀྱི་ཆོས་ལུགས་ཆོས་ལུགས་ཇི་ལྟར་རྒྱ་ཆེ་ཡང་དོན་རྩ་དང་། རྩ་བ་དང་ཡན་ལག་གི་དབྱེ་བ་མེད་པ་ཞིག་མིན་ལ། ཆོས་ཀྱི་རྩ་བ་ནི་སེམས་ཀྱི་དྲི་མ་དག་པར་བྱེད་པ་དང་། གཙོ་བོ་ནི་སེམས་ཀྱི་ནང་དུ་ཤེས་རབ་ཀྱི་སྒྲོན་མེ་སྦར་ནས་མ་རིག་མུན་པ་བསལ་བ་དེའོ།།
     ཟས་གང་ཟ་དང་མི་ཟ། དུ་བ་འཐེན་དང་མི་འཐེན་སོགས་འཇིག་རྟེན་གོམས་གཤིས་སུ་གཏོགས་པའི་རིགས་རྣམས་སྙིང་བོའི་དོན་འགྲུབ་པ་ལ་འབྲེལ་བ་དེ་ཙམ་མི་ཆེ་བར་བསམས་སོ།།
     དེང་སང་ཆོས་ཀྱི་རྗེས་འཇུག་མང་བོ་ཞིག་གིས་ཆོས་ཀྱི་རྩ་བ་བོར་ནས། ཕྱི་ཡི་རྣམ་འགྱུར་དང་བཟོ་ལྟ་སྟེང་ནས་རྒྱས་སྤྲོས་བྱེད་པ་དང་། དོན་ཕྲན་བུར་སྤར་འཛིན་བྱེད་པ་སོགས་ནི། ཚོང་བ་གཡོ་སྒྱུ་ཅན་རྣམས་ཚོང་རྫས་ཀྱི་ཕྱི་ཐུམ་ལ་གང་མཛེས་བཟོས་ཤིང་ནང་གི་དངོས་རྫས་ཀྱི་རྒྱུ་སྤུས་ལ་མཉམ་འཇོག་མི་བྱེད་པ་བཞིན་ནོ།།