དགེ་བའི་བཤེས་གཉེན་དོར་ཞིས་མཛད་པའི་དབུ་མའི་ཟབ་གནད་གསལ་བའི་མེ་ལོང་ཞེས་བྱ་བ་བཞུགས་སོ། །

ཆོས་ཀྱི་གནས་ལུགས་གཟིགས་ཤིང་སྟོན་པ་ཡི། །
སྟོན་མཆོག་ཤཱཀྱའི་རྒྱལ་བོ་ཀླུ་སྒྲུབ་ཞབས། །
འགྲེལ་མཛད་མཉམ་མེད་ཟླ་གྲགས་བློ་བཟང་གྲགས། །
གྲགས་པའི་མཚན་ཅན་རྣམ་གཉིས་དད་གུས་བསྟེན། །
ཆོས་ཀྱི་གནས་ལུགས་ཞེས་པའི་ཆོས་དེ་ནི། །
ཤེས་བྱ་ཡོད་པ་གཞི་གྲུབ་ཅེས་པའི་དོན། །
གཟུགས་ནས་རྣམ་མཁྱེན་བར་གྱི་ཆོས་ཐམས་ཅད། །
ཆོས་ཞེས་བྱ་བའི་མིང་གི་བརྗོད་བྱ་ཡིན། །
ཆོས་ཞེས་བྱ་བའི་དངོས་པོ་ཐམས་ཅད་ལ། །
ཤེས་པའི་ཡུལ་དུ་སྣང་བའི་སྣང་ལུགས་དང་། །
དོན་ལ་ཇི་ལྟར་གནས་པའི་གནས་ལུགས་གཉིས། །
སྣང་ལུགས་ཐ་སྙད་ཚད་མའི་སྤྱོད་ཡུལ་དང་། །
གནས་ལུགས་རིགས་ཤེས་ཚད་མའི་སྤྱོད་ཡུལ་ཡིན། །
དབང་ཤེས་ཡུལ་དུ་གྱུར་པ་སྣང་ལུགས་ཏེ། །
གནས་ལུགས་ཡིད་ཤེས་ཁོ་ནའི་སྤྱོད་ཡུལ་ཡིན། །
དེ་ཡང་འཕགས་པའི་མཉམ་བཞག་ཡེ་ཤེས་དང་། །
སོ་སྐྱེས་རྟོག་བཅས་ཤེས་པའི་སྤྱོད་ཡུལ་ཡིན། །
ཆོས་རྣམས་ཆོས་དེར་གྲུབ་ཚུལ་གཉིས་ཡོད་དེ། །
དོན་གྱི་ངོ་བོའི་སྟེང་ནས་གྲུབ་པ་དང་། །
མིང་དང་རྟོག་པས་བཏགས་ཙམ་གྲུབ་པ་གཉིས། །
གྲུབ་ཚུལ་དེ་གཉིས་མ་གཏོགས་གཞན་མེད་པས། །
གྲུབ་ན་དེ་གཉིས་གང་རུང་ལས་མ་འདས། །
དོན་གྱི་སྟེང་ནས་གྲུབ་ཞེས་བྱ་བ་ནི། །
གདགས་གཞིའི་ངོས་ནས་མིང་གིས་བཏགས་དོན་དེར། །
དངོས་པོའི་གཤིས་སམ་རང་གི་མཚན་ཉིད་དང་། །
མ་བཅོས་རང་གྲུབ་ངོ་བོ་རང་བཞིན་གྱིས། །
གྲུབ་པ་ཡོད་པའམ་གནས་པའི་དོན་ཡིན་ཏེ། །
དེ་ལྟར་གྲུབ་ན་རང་ངོས་ནས་གྲུབ་པས། །
རང་མིན་རྒྱུ་རྐྱེན་དག་ལ་བརྟེན་མི་དགོས། །
དངོས་པོ་གང་དང་གང་ཡང་རྒྱུ་རྐྱེན་ལ། །
བརྟེན་ནས་གྲུབ་ཕྱིར་ངོ་བོས་གྲུབ་པ་དང་། །
རང་མཚན་རང་བཞིན་གྱིས་ནི་གྲུབ་པ་མིན། །
དེས་ན་དངོས་རྣམས་མིང་དང་རྟོག་པ་ཡིས། །
བཏགས་ཙམ་དུ་ནི་གྲུབ་པར་དོན་གྱིས་གྲུབ། །
མིང་གིས་བཏགས་ཙམ་ཞེས་པའི་ཙམ་སྒྲ་དེ། །
བཏགས་དོན་ངོ་བོས་གྲུབ་པ་གཅོད་པ་སྟེ། །
མིང་མིན་གདགས་གཞི་ཡོད་པ་གཅོད་པ་མིན། །
མིང་གིས་བཏགས་པ་མིན་པའི་དོན་མེད་ཀྱང་། །
མིང་གིས་བཏགས་ཚད་ཡོད་པའང་མ་ཡིན་ནོ། །
མིང་གིས་བཏགས་ཙམ་གྲུབ་པའི་དངོས་པོ་དེ། །
ཐ་སྙད་ཚད་མའི་ཡུལ་དུ་གྲུབ་པ་ཡི། །
ཡོད་པ་དང་ནི་དངོས་པོ་ཡིན་པའི་ཕྱིར། །
དངོས་པོའི་བྱ་བྱེད་གང་ཡང་བྱེད་ནུས་པས། །
ཀུན་རྫོབ་ཏུ་ཡོད་ཡོད་གོ་ཆོད་ཅེས་གསུངས། །
ཆོས་རྣམས་བཏགས་དོན་རང་གི་ངོ་བོའི་སྟེང་། །
གྲུབ་པ་མེད་ཕྱིར་རང་བཞིན་སྟོང་བར་བཞེད། །
རང་བཞིན་སྟོང་བ་དེ་ནི་ཆོས་ཀུན་གྱི། །
ཆོས་ཉིད་གདོད་ནས་གྲུབ་པའི་གནས་ལུགས་ཡིན། །
གནས་ལུགས་དེ་ནི་ཆོས་དེའི་དོན་དམ་ཡིན། །
སྟོང་ཉིད་རང་བཞིན་བཀག་པའི་མེད་དགག་སྟེ། །
ཆོས་ཉིད་སྟོང་ཡང་ཆོས་ཅན་མི་སྟོང་ཞིང་། །
སྟོང་བའང་ཅི་ཡང་མེད་པའི་དོན་མིན་པས། །
དོན་དམ་དུ་མེད་མེད་གོ་མི་ཆོད་གསུངས། །
ཆོས་ཅན་ཆོས་ཉིད་སྟོང་ཉིད་སྟོང་གཞིར་བརྟེན། །
ཆོས་ཅན་སྟོང་གཞི་ཡོད་པ་གཞིར་བཞག་གིས། །
ཆོས་ཉིད་སྟོང་ཉིད་ཡིན་མིན་དཔྱོད་པ་ཡིན། །
རི་བོང་རྭ་དང་ནམ་མཁའ་ལྟ་བུ་ལ། །
སྟོང་དང་མི་སྟོང་དཔྱོད་པའི་དགོས་པ་མེད། །
གྲུབ་ན་རང་གི་ངོ་བོས་གྲུབ་པ་དང་། །
ངོ་བོས་མ་གྲུབ་པ་དང་མེད་པ་གཉིས། །
དོན་གཅིག་ཡིན་པར་ལྟ་བ་དངོས་སྨྲའི་ལུགས། །
ངོ་བོས་མ་གྲུབ་ན་ཡང་མིང་ཙམ་གྱིས། །
གྲུབ་པའི་རྟེན་འབྲེལ་དངོས་པོའི་གོ་ཆོད་པས། །
ཅང་མེད་ཆད་མཐར་ལྟུང་བའི་འགལ་བ་མེད། །
ངོ་བོས་ཡོད་པའམ་རང་བཞིན་གྱིས་ཡོད་པ། །
བདེན་པའི་དོན་དུ་ཡོད་པ་ཡིན་པའི་ཕྱིར། །
དེ་ལྟར་མེད་པས་བདེན་པར་མེད་པ་དང་། །
མི་བདེན་རྫུན་པ་སྒྱུ་མ་ལྟ་བུར་གསུངས། །
ཀུན་རྫོབ་རྟེན་འབྲེལ་བསླུ་བ་མེད་པའི་ཕྱིར། །
རྫུན་པ་ཞེས་པའང་དངོས་རྣམས་ངོ་བོའི་སྟེང་། །
མ་གྲུབ་བཞིན་དུ་གྲུབ་འདྲར་སྣང་བ་ཡི། །
རྒྱུ་རྐྱེན་རྟེན་འབྲེལ་གྱིས་བཟོས་བཅོས་མའི་དོན། །
ཤེས་པ་འཁྲུལ་ངོར་ཟླ་གཅིག་ཟླ་གཉིས་སུ། །
ཤར་པའི་རྫུན་པ་དེ་དང་གཏན་མི་འདྲ། །
ཀུན་རྫོབ་བདེན་པ་འཇིག་རྟེན་ངོར་བྱས་ཀྱང་། །
ཀུན་རྫོབ་ཙམ་ནི་འཇིག་རྟེར་ངོར་བྱས་མིན། །
སངས་རྒྱས་ས་ནའང་བདེན་གཉིས་ཡོད་པའི་ཕྱིར། །
ཤེས་པའང་ཇི་ལྟ་ཇི་སྙེད་གཉིས་སུ་གྲུབ། །
འཁྲུལ་ཤེས་མེད་པའི་ཇི་སྙེད་མཁྱེན་པའི་ངོར། །
ཀུན་རྗོབ་གཟིགས་ཤིང་གཞན་ངོར་བསྐྱེལ་མི་་དགོས། །
ཀུན་རྫོབ་ཆོས་རྣམས་རྒྱལ་བས་མ་གཟིགས་ན། །
ཤེས་བྱ་ཕྱེད་མི་མཐོང་བའི་སྐྱོན་དེ་འཇུག །
ཀུན་རྫོབ་རྫུན་དང་འཁྲུལ་ཤེས་རྫུན་གཉིས་ཀྱི། །
ཁྱད་པར་མ་ཤེས་ཐ་སྙད་བདེན་པའི་ཆོས། །
རྫུན་ཕྱིར་དགེ་སྡིག་ལས་འབྲས་བཅིང་ཐར་སོགས། །
མེད་པར་ལྟ་བའི་གཡང་ས་ཆེན་པོར་ལྷུང་། །
གཟུགས་ནི་སྟོང་བ་སྟོང་བ་ཉིད་ནི་གཟུགས། །
གཟུགས་ལས་སྟོང་ཉིད་གཞན་མིན་སྟོང་ཉིད་ལས། །
གཟུགས་གཞན་མིན་ཞེས་ཤེར་མདོའི་ཚིག་དེ་དག །
མཁས་པ་མ་ཟད་བླུན་པོའི་ཁ་ནའང་གནས། །
ནེ་ཙོའི་མ་ཎིའི་ཚུལ་དུ་མ་སོང་ན། །
གཟུགས་ནི་གཟུགས་ཀྱིས་སྟོང་བ་རང་སྟོང་དང་། །
ཆད་སྟོང་ཟེར་ནས་སྨྲ་ལྕེ་རྐྱོང་མི་སྲིད། །
ཆོས་ཐམས་ཅད་ཀྱི་ཆོས་ཉིད་སྟོང་བ་ཉིད། །
ཡིན་པར་རྒྱལ་བས་ལན་གཅིག་མིན་པར་གསུངས། །
ཐམས་ཅད་ཅེས་པའི་ནང་དུ་མ་ཐེ་བའི། །
སྟོང་མིན་ཆོས་ཤིག་ཡོད་པ་ངོ་མཚར་ཆེ། །
གཟུང་བ་ཡུལ་མེད་སེམས་ཀྱི་སྣང་ཆ་དང་། །
སེམས་ནི་མི་སྟོང་བདེན་གྲུབ་ཡིན་ཞེས་པའི། །
སེམས་ཙམ་ལུགས་དེར་དབུ་མ་ཆེན་པོ་ཞེས། །
མིང་ཞིག་བཏགས་ཀྱང་དོན་གྱི་ཁྱད་ཆོས་མེད། །
རྟག་་བརྟན་གཤེགས་སྙིང་ཁས་ལེན་རྟག་མཐར་ལྷུང་། །
ཆོས་གཞན་སྟོང་བ་ཅང་མེད་ཆད་མཐར་ལྷུང་། །
དབུ་མ་ཞེས་པ་མཐའ་གཉིས་སྤངས་པའི་དོན། །
མཐའ་ལ་ལྷུང་བཞིན་དབུ་མར་རློམ་པ་མཚར། །
སྟོང་བས་མེད་མཐའ་བཀག་པས་རང་བཞིན་གྱིས། །
གྲུབ་པའི་བདེན་དངོས་དང་ནི་ཆད་མཐའ་བཀག །
སྣང་བས་ཡོད་མཐའ་བཀག་པས་ཐ་སྙད་དུ། །
ཡོད་ཙམ་མི་འགོག་བདེན་དངོས་རྟག་མཐའ་བཀག །
སྣང་བས་སྟོང་བ་མི་འགོག་སྟོང་བས་ཀྱང་། །
སྣང་བ་མི་འགོག་སྣང་སྟོང་གཞི་གཅིག་ཏུ། །
ཆོས་དང་ཆོས་ཉིད་གཤིས་སུ་གྲུབ་པ་ཡི། །
བདེན་གཉིས་ཟུང་འཇུག་དབུ་མ་ཐལ་འགྱུར་ལུགས། །
དཔེར་ན་མིག་གི་སྣང་ངོར་གཟུགས་ཡོད་ཀྱང་། །
ཡིད་ཀྱི་ཤེས་ངོར་གཟུགས་ཀྱི་ངོ་བོས་སྟོང་། །
མིག་ལ་གློག་བརྙན་གཟུགས་དངོས་དང་འདྲ་ཡང་། །
ཡིད་ཀྱིས་དེ་ལ་བདེན་པར་སུ་ཡིས་འཛིན། །
རང་བཞིན་ཞེས་པ་ལྟོས་མིན་འགྱུར་མེད་དོན། །
ལྟོས་མིན་འགྱུར་མེད་དངོས་པོ་ཡོད་མིན་པས། །
རང་བཞིན་གྱིས་གྲུབ་དངོས་པོ་ཡོད་མ་ཡིན། །
རྒྱུ་རྐྱེན་དག་ལ་ལྟོས་མེད་རང་དབང་དུ། །
འབྱུང་བའི་དངོས་བོ་སྲིད་ན་འབྲུ་དྲུག་གི། །
ས་བོན་མ་བཏབ་ལོ་ཏོག་སྐྱེ་བ་དང་། །
ཚོགས་གཉིས་མ་བསགས་སྐུ་གཉིས་ཡོད་པར་འགྱུར། །
ཆོས་ཀྱི་རང་བཞིན་མི་འགྱུར་རྟག་པ་ཞིག །
ཡིན་ན་སྔོན་ནས་ཇི་ལྟར་ཕྱིས་ཇི་ལྟར། །
སྣོད་བཅུད་བཀོད་པ་སྐྱེ་འཇིག་མེད་པ་དང་། །
རྨོངས་པའི་སེམས་ཅན་གྲོལ་ཐོབ་མི་སྲིད་དོ། །
ལྟོས་མེད་མི་འགྱུར་རང་བཞིན་མེད་པའི་ཕྱིར། །
ཅིར་ཡང་བསྒྱུར་རུང་གང་ཡང་སྒྲུབ་པར་ནུས། །
དྲི་བཅས་སེམས་ཀྱི་ཆོས་ཉིད་སྟོང་བའི་ཕྱིར། །
དྲི་མེད་རྒྱལ་བའི་ཆོས་སྐུར་བསྒྱུར་བར་ནུས། །
གང་ལ་སྟོང་བ་ཉིད་རུང་དེ་ལ་ནི། །
ཐམས་ཅད་རུང་ཞེས་གསུངས་པའི་དོན་ཡང་དེ། །
རྟག་གཅིག་རང་དབང་ཅན་གྱི་བདག་དེ་ལ། །
རྟག་བརྟན་བདེ་གཤེགས་སྙིང་བོའི་མཚན་གསོལ་ཞིང་། །
རྒྱུ་མེད་རྐྱེན་མེད་རང་བྱུང་ལྷུན་འགྲུབ་ཀྱི། །
ཆོས་སྐུ་ཀུན་ཏུ་བཟང་བོ་ས་འོག་གི། །
གནའ་རྗས་བཞིན་དུ་སེམས་ཀྱི་རྫ་ཁོག་ནང་། །
བསྐུང་ནས་ཡོད་པ་བླུན་རྨོངས་ལུག་འདྲས་ཀྱང་། །
ཅི་ཡང་མི་བསམ་མི་རྟོག་ཏིང་འཛིན་གྱིས། །
ཤ་མོ་བརྡོལ་བཞིན་ཆོས་སྐུ་འཐོབ་ཅེས་ཟེར། །
ཆོས་ཀུན་ཆོས་ཉིད་མེད་དགག་སྟོང་བ་ཉིད། །
ཡིན་ཕྱིར་དེ་ནི་དངོས་མེད་འདུས་མ་བྱས། །
མ་སྐྱེས་མ་འགག་ནམ་མཁའི་ངོ་བོར་གསུངས། །
མཉམ་བཞག་ཡེ་ཤེས་དངོས་བོ་མ་གཟིགས་པ། །
མེད་པས་མ་གཟིགས་པ་མིན་ཡུལ་མིན་པས། །
མིག་གིས་སྒྲ་མ་མཐོང་བ་ལྟ་བུ་ཡིན། །
མ་མཐོང་བ་དེ་མེད་པར་མཐོང་བ་མིན། །
མིག་གིས་སྒྲ་མ་མཐོང་ཡང་སྒྲ་མེད་མིན། །
ཇི་ལྟ་ཇི་སྙེད་བློ་གཉིས་ཡུལ་གྱི་ངོས། །
གཞི་གཅིག་ན་ཡང་རྣམ་པ་ཐ་དད་པས། །
ཤེས་པ་སོ་སོས་སོ་སོར་མཐོང་བ་ཡིན། །
བདེན་གཉིས་གཅིག་ཅར་མཐོང་བའི་ཚེ་ན་ཡང་། །
ཡུལ་གཉིས་ཤེས་པ་གཅིག་གིས་མཐོང་བ་མིན། །
ཆོས་ཅན་རྟེན་འབྲེལ་སྣང་ཚུལ་ཐ་དད་པས། །
ས་ཆུ་མེ་རླུང་མཚན་ཉིད་མི་གཅིག་ཅིང་། །
མི་དང་དུད་འགྲོ་གཟུགས་ཤེས་མཉམ་ཚུལ་མེད། །
ཆོས་ཉིད་སྟོང་བ་དངོས་ཀུན་ཁྱད་མེད་པས། །
ཆོས་ཀུན་མཉམ་པ་ཉིད་དང་རོ་གཅིག་གསུངས། །
དོན་དམ་པར་ནི་ཡོད་པ་མ་ཡིན་ཞིང་། །
ཀུན་རྫོབ་ཏུ་ནི་མེད་པ་མ་ཡིན་པས། །
ཡོད་མིན་མེད་མིན་ཞེས་པར་གསུངས་པ་ཡིན། །
དོན་དམ་པར་ནི་མེད་པ་མ་ཡིན་ཞིང་། །
ཀུན་རྫོབ་ཏུ་ནི་ཡོད་པ་མ་ཡིན་ཞེས། །
ལྡོག་སྟེ་སྨྲ་ན་ལུང་རིགས་ཉམས་མྱོང་དང་། །
འགལ་བའི་བདེན་གཉིས་སྒྲོ་སྐུར་མཐར་ཐུག་ཡིན། །
ཀུན་རྫོབ་ཏུ་ཡང་མེད་པ་ཆད་ལྟ་སྟེ། །
སེམས་ཡོད་ཕྱི་དོན་མེད་པ་དྲང་བའི་དོན། །
ཐ་སྙད་དུ་ནི་ཡུལ་ཤེས་གཉིས་ཀ་ཡོད། །
དོན་དམ་པར་ནི་གཉི་ག་མེད་པ་ཡིན། །
དངོས་པོ་ཞེས་པའང་བདེན་གྲུབ་ཡིན་མིན་གཉིས། །
ཡོད་པ་ཞེས་པ་བདེན་ཡོད་ཡོད་ཙམ་དང་། །
མེད་པ་ཞེས་པ་རང་བཞིན་མེད་པ་དང་། །
གཏན་མེད་མེད་པ་ཚིག་གཅིག་དོན་ཐ་དད། །
ཡོད་གཉིས་མེད་གཉིས་ཁྱད་པར་མ་ཤེས་པར། །
ཡོད་ན་བདེན་པར་ཡོད་པས་ཁྱབ་པ་དང་། །
མེད་ན་གཏན་མེད་ཡིན་པའི་ཁྱབ་ཟེར་བ། །
ཚིག་གི་ཐ་སྙད་ཙམ་ཡང་མ་ཤེས་རྟགས། །
བདག་མེད་ཅེས་པའི་བདག་དེ་བདག་གཞན་དུ། །
ཕྱེས་བའི་བདག་གི་དོན་མིན་དངོས་རྣམས་ཀྱི། །
གཞན་ལ་རག་མ་ལས་པའི་རང་བཞིན་ཞེས། །
གསུངས་ཕྱིར་ཚུགས་ཐུབ་དང་ནི་རང་བཞིན་དོན། །
དེ་འདྲའི་ཚུགས་ཐུབ་རང་བཞིན་མེད་པའི་ཕྱིར། །
ཆོས་དང་གང་ཟག་རང་བཞིན་མེད་པར་གསུངས། །
རྣམ་བདུན་གྱིས་དཔྱད་ཤིང་རྟ་མི་རྙེད་ཀྱང་། །
ཤིང་རྟ་མེད་མིན་དེ་བཞིན་ཕུང་བོ་ལ། །
དཔྱད་པས་ང་ནི་འདི་ཞེས་མི་རྙེད་ཀྱང་། །
མ་བརྟག་ཕུང་བོར་བརྟེན་ནས་བཏགས་ཙམ་གྱི། །
ང་ཁྱོད་ཅེས་པའི་ང་དེ་མེད་པ་མིན། །
ང་དེ་འཁོར་འདས་རྟེན་དུ་མེད་མི་རུང་། །
སྙིང་གི་ཁོང་ནས་རང་དང་ང་ཞེས་པར། །
བདག་ཏུ་བཟུང་ཞིང་ཞེན་ཆགས་སྐྱེ་བ་ཡི། །
ཞེན་ཡུལ་ང་དེ་བདེན་པར་མ་གྲུབ་པར། །
མཐོང་ནས་རྒུད་པའི་རྩ་བ་བདག་འཛིན་གཅོད། །
རང་བཞིན་གྱིས་གྲུབ་ང་དེ་མ་གྲུབ་ཀྱང་། །
ལྟོས་བཏགས་ང་ཙམ་ཡོད་པ་མི་འགལ་ཞིང། །
ང་དེ་འཁོར་འདས་ཀུན་གྱི་རྟེན་བྱེད་པས། །
རི་རྭ་བཀག་ཀྱང་རི་བོང་གསོད་མི་དགོས། །
རྟོག་པ་ལ་ཡང་དོན་སྤྱི་འཛིན་པ་དང་། །
བདེན་འཛིན་རྟོག་པ་ལོག་རྟོག་ཡང་དག་རྟོག །
སྒྲ་གཅིག་གིས་ནི་དོན་མང་སྟོན་པའི་ཕྱིར། །
ཡང་དག་རྟོག་དང་ལོག་རྟོག་མི་ཕྱེད་ཅིང་། །
སྤང་བྱའི་རྟོག་པ་ཡིན་མིན་མ་ཕྱེ་བར། །
སྐྲ་དང་སྨྲ་ར་མཉམ་བསྲེས་མཉམ་གཅོད་ཀྱིས། །
རྟོག་པ་ཐམས་ཅད་སྤངས་པ་བླུན་པོའི་ལུགས། །
རྟོག་པ་མེད་པ་ཙམ་གྱིས་སངས་རྒྱས་ན། །
རྟོག་མེད་དུད་འགྲོ་དང་ནི་ས་རྡོའི་སྐུ། །
སངས་རྒྱས་ས་ལ་གནས་པར་གོར་མ་ཆག །
ཐོས་བསམ་སྒོམ་གསུམ་རྟོག་པར་བརྟེན་པའི་ཕྱིར། །
སོ་སྐྱེས་ས་ལ་རྟོག་པ་སྤངས་མི་ནུས། །
ཆོས་འཁོར་སྐོར་བ་མིང་ཚིག་ལ་བརྟེན་ཕྱིར། །
སངས་རྒྱས་ལ་ཡང་རྟོག་པ་ཡོད་པར་མངོན། །
མི་རྟོག་ལྷུན་འགྲུབ་སེམས་ཀྱི་བྱེད་རྩོལ་ལ། །
བརྟེན་མི་དགོས་པའི་དོན་ཡིན་སེམས་མེད་པར། །
ཆད་པའི་མྱང་འདས་ལྟ་བུ་ཡིན་ཟེར་ན། །
ཡེ་ཤེས་ཆོས་སྐུ་མེད་པར་ཐལ་བར་འགྱུར། །
སྟོན་པ་འཇིག་རྟེན་བྱོན་པའི་དགོས་པ་གཅིག །
རྟེན་འབྱུང་སྟོང་བའི་དོན་དུ་གསུངས་འདི་ཡིན། །
དོན་དེ་ཀླུ་སྒྲུབ་ཟླ་གྲགས་ཙོང་ཁ་བས། །
བཀྲལ་བ་ཁོ་ན་ཚད་མའོ་ཚད་མར་ཤེས། །
ཤེས་ནས་དད་ཐོབ་ཐོས་དང་བསམ་པ་ཡིས། །
དབུ་མའི་གཞུང་ལ་བག་ཆགས་བཞག་པ་དང་། །
དོན་སྤྱིའི་གོ་བ་རགས་ཙམ་ཆགས་པ་འདི། །
ཡུལ་དུས་མཐུན་རྐྱེན་རྟེན་འབྲེལ་ལེགས་འཛོམས་པས། །
འཇམ་མགོན་བླ་མའི་བསྟན་དང་མཇལ་བའི་དྲིན། །
བྱེ་ཐང་སྐམ་པོར་འཁྱམ་པས་དུབ་རྣམས་ལ། །
སྐོམ་སེལ་བདུད་རྩིའི་མཆོད་སྦྱིན་འགྱེད་པའི་ཕྱིར། །
འཇམ་མགོན་བླ་མའི་ལེགས་བཤད་ཆུ་མཚོ་ལས། །
སྙིམ་པས་བཅུས་འདི་གདོང་དྲུག་སྙེམས་བློའོ། །