དགེ་ལུགས་པའི་ཆོས་སྤྱོད།

མཎྜལ།

    ཨོྃ་བཛྲ་བྷུ་མི་ཨྰཿཧྰུཾ། དབང་ཆེན་གསེར་གྱི་ས་གཞི། ཨོཾ་བཛྲ་རེ་ང་ཨྰཿཧྰུཾ། ཕྱི་ལྕགས་རི་ཁོར་ཡུག་གིས་བསྐོར་བའི་དབུས་སུ་རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་འཛམ་བུ་གླིང་། ནུབ་བ་གླང་སྤྱོད། བྱང་སྒྲ་མི་སྙན། ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། རིན་པོ་ཆེའི་རི་བོ། དཔག་བསམ་གྱི་ཤིང་། འདོད་འཇོའི་བ། མ་རྨོས་པའི་ལོ་ཏོག། འཁོར་ལོ་རིན་པོ་ཆེ། ནོར་བུ་རིན་པོ་ཆེ། བཙུན་མོ་རིན་པོ་ཆེ། བློན་པོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ། གཏེར་ཆེན་པོའི་བུམ་པ། སྒེག་མོ། ཕྲེང་བ་མ། གླུ་མ། ཉི་མ། ཟླ་བ། རིན་པོ་ཆེའི་གདུགས། ཕྱོགས་ལས་རྣམ་པར་རྒྱལ་བའི་རྒྱལ་མཚན། དབུས་སུ་ལྷ་དང་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་འདི་དག་དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། མཉམ་མེད་ཤྰཀྱའི་རྒྱལ་པོའི་ལྷ་ཚོགས་འཁོར་དང་བཅས་པ་རྣམས་ལ་དབུལ་བར་བགྱིའོ། ། ཐུགས་བརྗེས་འགྲོ་བའི་དོན་དུ་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །ཐོས་པ་རྒྱ་མཚོའི་མཆོད་ཡོན་ཀུན་ནས་འཁྱིལ། །ཡོན་ཏན་མེ་ཏོག་ཚུལ་ཁྲིམས་བདུག་སྤོས་སྤྲིན། །ཤེས་རབ་སྒྲོན་མེ་དད་པ་སྤོས་ཆུའི་མཚོ། །ཏིང་འཛིན་བདུད་རྩིའི་ཞལ་ཟས་དམ་པ་དང་། །བསྟོད་དབྱངས་སྙན་པའི་སིལ་སྙན་སྒྲ་འབྱིན་ཅིང་། །ཀུན་ནས་སྙིང་བརྩེ་རྣམ་སྤྱོད་སྤོབས་པ་ཡི། །གདུགས་དང་རྒྱལ་མཚན་བ་དན་བསྒྲེངས་བྱས་པས། །བདག་ལུས་ཞལ་མེད་ཁང་བརྩེགས་རབ་བརྒྱན་ནས། །སྙིང་དབུས་ཆུ་སྐྱེས་ཐེག་ལེ་འདབ་རྒྱས་ལ། །བརྟན་པར་བཞུགས་པའི་ཆོས་རྗེ་མཆོད་བྱེད་ཅིང་། །ངེས་པར་འདུན་པའི་ཡིད་ཀྱིས་གསོལ་འདེབས་ན། །འགྲོ་བའི་བླ་མ་རྟག་ཏུ་མཉེས་གྱུར་ཅིག །ཆོས་ཀྱི་རྒྱལ་པོ་རྟག་ཏུ་མཉེས་གྱུར་ཅིག །ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉིན་ཟླས་རྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །དེང་ནས་བྱང་ཆུབ་སྙིང་པོའི་བར། །བདག་གི་ལུས་དང་ལོངས་སྤྱོད་དང་། །དུས་གསུམ་དགེ་བའི་དངོས་པོ་རྣམས། །སེམས་ཅན་ཀུན་གྱི་དོན་གྱི་ཕྱིར། །གུས་པས་ཁྱེད་ལ་དབུལ་བར་བགྱི། །ཀུན་ནས་གཟིགས་པའི་སྤྱན་ལྡན་པ། །ཡོན་གནས་དམ་པ་ཁྱེད་རྣམས་ཀྱིས། །བདག་ལ་བརྩེ་བས་ཉེར་དགོངས་ནས། །བདག་གི་འདི་དག་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ།།

ཤམྦྷ་ལའི་སྨོན་ལམ་བཞུགས་སོ། །

     ན་མོ་གུ་རུ། དཔལ་ལྡན་དང་པོའི་སངས་རྒྱས་རིང་ལུགས་ཆེ། །ཤམ་བྷ་ལ་ཡི་གྲོང་དུ་རྒྱས་མཛད་པའི། །རྗེ་བཙུན་བླ་མ་ཁྱེད་ལ་གསོལ་འདེབས་ཀྱི། །བདག་གི་བདེན་པའི་ཚིག་དེ་འགྲུབ་པར་མཛོད། །བྱང་སེམས་དུས་འཁོར་སོགས་ཀྱི་རྟག་བརྟེན་ཅིང་། །དམ་པའི་ཆོས་རྣམས་མཆོག་ཏུ་རྒྱས་པའི་ས། །བྱང་ཕྱོགས་ཀ་ལཱ་པ་ཞེས་བྱ་བའི་གྲོང་། །བརྒྱ་བྱིན་ཁང་བཟང་ལས་ཀྱང་ཆེས་ལྷག་པ། །ཕོ་བྲང་མཆོག་ནི་དཔག་ཚད་བཅུ་གཉིས་ཚད། །གྲུ་བཞིར་ལྷམ་ཞིང་རིན་ཆེན་དུ་མས་བརྒྱན། །བྱེ་བ་ཕྲག་ནི་དགུ་བརྒྱའི་གྲོང་གིས་བསྐོར། །སྐྱེད་མོས་ཚལ་མཆོག་ལྷ་ཡུལ་ལས་ལྷག་པར། །དང་པོའི་སངས་རྒྱས་དཀྱིལ་འཁོར་ཆེ་ཆུང་གཉིས། །མཐོང་བའི་མོད་ལ་དངོས་གྲུབ་མཆོག་སྩོལ་གྱིས། །རྒྱུ་ནི་རིན་ཆེན་རིན་ཐང་བྲལ་ལས་གྲུབ། །དེ་ཡི་གཡས་གཡོན་ཡིད་འོང་མཚོ་ཆེན་ནི། །ནོར་བུས་གང་ཞིང་དཔག་ཚད་བཅུ་གཉིས་པ། །མི་རྣམས་ནོར་ཕྱུག་ཆོས་ཀྱི་དུས་འདའི་དབུས། །བླ་མ་ཁྱེད་གཉིས་དེང་དུས་ནས་བཟུང་བའི། །ལོ་ནི་བདུན་བརྒྱ་ཙམ་ཞིག་རྫོགས་པ་ན། །རིགས་ལྡན་དྲག་པོར་གྱུར་ནས་ཀླ་ཀློའི་དཔུང་། །བཅོམ་ནས་རྫོགས་ལྡན་བཞིན་དུ་མཛད་པའི་དུས། །སྔོན་གྱི་ཞལ་བཞེས་དམ་བཅའ་མ་གཡེལ་བར། །བདག་ཀྱང་འཁོར་གྱི་ཐོག་མར་རྗེས་འཛིན་མཛོད། །རྗེ་བཙུན་བླ་མ་དམ་པ་མཆོག་ཁྱེད་ཉིད། །རླུང་གི་ཤུགས་ཅན་རྡོ་ཡི་རྟར་ཆིབས་ནས། །ཕྱག་གི་མདུང་ཐུང་བྱིས་པའི་བློར་བསྣུན་ནས། །ངེས་པར་འཇོམས་ཚེ་བདག་ཀྱང་རྗེས་སུ་བཟུང་། །དམག་དཔུང་བྱེ་བ་ཁ་དོག་སྣ་ཚོགས་པ། །གླང་ཆེན་རིག་བྱེད་ཆང་དྲེགས་བཞི་འབུམ་དང་། །གླང་ཆེན་མྱོས་པ་འབུམ་ཕྲག་བཞི་འབུམ་དང་། །གསེར་གྱི་ཤིང་རྟ་མཚོན་ལྡན་དཔུང་བུ་ཆུང་། །འཇིགས་རུང་དམག་ཚོགས་དབུས་སུ་རབ་ཞུགས་ནས། །རང་གི་བྱིས་པའི་བློ་ལ་བསྣུན་མཛད་ཅིང་། །རྟར་གནས་ཟླ་བ་ཆེན་བོའི་བུ་ལ་ནི། །ཧ་ནུ་མྰནྡ་རྣོན་པོའི་མཚོན་གྱིས་བསྣུན། །དྲག་པོ་ལ་སོགས་ལྷ་ཆེན་བཅུ་གཉིས་ཀྱིས། །ལྷ་མིན་ལ་སོགས་ཐམས་ཅད་ཚར་གཅོད་ཅིང་། །གླང་པོ་ཆེ་ཡིས་གླང་པོ་རྣམ་པར་འཇོམས། །རྡོ་ཡི་རྟ་ཡིས་རྟ་རྣམས་གསོད་བྱེད་ཅིང་། །གསེར་གྱི་ཤིང་རྟས་ཤིང་རྟ་ཕྱེ་མར་བྱེད། །ས་སྐྱོང་རྣམས་ཀྱིས་ས་སྐྱོང་འདུལ་བར་མཛད། །ཀླ་ཀློའི་རྒྱུན་ནི་རབ་ཏུ་བཅད་བྱས་ནས། །དང་པོའི་སངས་རྒྱས་ཀྱིས་མཚོན་ཆོས་ཚུལ་ཀུན། །རྒྱས་པར་མཛད་ཚེ་བདག་ཀྱང་རྗེས་སུ་བཟུང་། །དེ་ལྟར་ལོ་ནི་མང་པོར་ཆོས་བསྟན་ནས། །རྟ་ཡི་ལོ་ནི་ཧོར་ཟླ་གཉིས་པ་ཡི། །ཉི་ཤུ་གཉིས་ཉིན་དཔའ་བོ་དཔའ་མོ་ཡིས། །རོལ་མོའི་སྒྲ་བཅས་འཁོར་ནི་འབུམ་ཕྲག་བཅས། །བདེ་དུས་ལམ་ལས་འོག་མི་གནས་སུ་ནི། །ལོངས་སྤྱོད་རྫོགས་སྐུ་མངོན་དུ་མཛད་པའི་ཚེ། །བདག་ཀྱང་སངས་རྒྱས་གོ་འཕང་ཐོབ་པར་མཛོད།།ཅེས་པ་ནི་པཎ་ཆེན་བློ་བཟང་དཔལ་ལྡན་ཡེ་ཤེས་ཀྱིས་མཛད་པའོ། །

བྱམས་པའི་སྨོན་ལམ་བྱམས་པའི་སྐུ་གཟུགས་མ།

    བྱམས་པའི་སྐུ་གཟུགས་ཕུལ་བྱུང་བཞེངས་པ་ལ། །མཐུན་རྐྱེན་སྒྲུབ་པར་བྱེད་པའི་ལུས་ཅན་རྣམས། །རྗེ་བཙུན་བྱམས་པ་མགོན་པོའི་ཞབས་དྲུང་དུ། །ཐེག་མཆོག་ཆོས་ཀྱི་དཔལ་ལ་སྤྱོད་པར་ཤོག །ནམ་ཞིག་རྡོ་རྗེའི་གདན་གྱི་རི་བོའི་སྤོར། །བྱམས་མགོན་ཉིན་བྱེད་དབང་པོ་ཤར་བའི་ཚེ། །བདག་གི་བློ་གྲོས་པདྨོ་ཁ་ཕྱེ་ནས། །སྐལ་བཟང་བུང་བའི་ཚོགས་རྣམས་ཚིམ་བྱེད་ཤོག །དེ་ཚེ་རྒྱལ་བ་བྱམས་པ་རབ་ཏུ་དགྱེས། །ཕྱག་གཡས་བདག་གི་མགོ་ལ་བཞག་བཞིན་དུ། །བླ་མེད་བྱང་ཆུབ་མཆོག་ཏུ་ལུང་བསྟན་ནས། །འགྲོ་མགོན་དོན་དུ་སངས་རྒྱས་མྱུར་ཐོབ་ཤོག །བྱང་ཆུབ་སྒྲུབ་པའི་ཚེ་རབས་ཀུན་ཏུ་ཡང་། །དུས་གསུམ་རྒྱལ་བ་སྲས་བཅས་ཐམས་ཅད་ཀྱི། །རླབས་ཆེན་སྤྱོད་པ་ཇི་སྙིད་མཆེས་པ་ཀུན། །གཅིག་ཏུ་བསྡུས་ནས་ཚུལ་བཞིན་འདོམས་པར་ཤོག །ལེགས་བཤད་རི་མོ་བཀྲ་བའི་ལུང་གི་གོས། །རྣམ་དཔྱོད་གསེར་གྱི་ཡུ་བ་ལ་བརྟེན་ཅིང་། །བསླབ་གསུམ་ནོར་བུའི་ཏོག་གི་རབ་མཚན་པའི། །བསྟན་པའི་རྒྱལ་མཚན་ཕྱོགས་བཅུར་ཚུགས་པར་ཤོག །ཕན་བདེའི་འབྱུང་གནསབསྟན་པ་དར་ཞིང་རྒྱས། །བསྟན་འཛིན་སྐྱེས་བུ་ཐམས་བཅད་སྐུ་ཁམས་བཟང་། །ལུས་ཅན་ཀུན་ལ་བདེ་སྐྱིད་འབྱུང་བའི་གནས། །སངས་རྒྱས་བསྟན་པ་རྟག་ཏུ་རྒྱས་གྱུར་ཅིག །རྟག་ཏུ་བྱམས་པ་རྣམ་གསུམ་གོམས་པའི་མཐུས། །བདུད་སྡེ་བྱམས་པའི་དཔུང་གིས་འཇོམས་པ་དང་། །འགྲོ་ཀུན་བྱམས་པའི་སྟོབས་ཀྱིས་སྐྱོང་མཛད་པའི། །རྒྱལ་བ་བྱམས་པ་མགོན་པོའི་བཀྲ་ཤིས་ཤོག །