ཨ་མ་ངོ་ཤེས་ཀྱི་བརྫུན་ཚིག་བྲག་ཆའི་སྒྲ་དབྱངས་ཞེས་བྱ་བ་བཞུགས་སོ།།

                      ཟབ་མོ་རྟེན་འབྱུང་གི་དེ་ཉིད་ངོ་མཚར།།
                      ཇི་བཞིན་རྗེན་པ་རུ་སྟོན་པའི་བླ་མ།།
                      བཀའ་དྲིན་འཁོར་མེད་དེ་སྙིང་དབུས་བཞུགས་ཤིག།
                      གང་དྲན་ཐོལ་བྱུང་གི་ཚིག་གསུམ་སྨྲའོ།།
                      ཨ་མ་རྒན་མོ་དེ་ཡུན་རིང་སྟོར་བའི།།
                      བུ་ཆུང་སྨྱོན་པ་ང་ཅི་ཞིག་ལྟར་ཏེ།།
                      ཨ་མ་དྲིན་ཅན་དང་ལྷན་ཅིག་འདུག་པ།།
                      ངོ་མ་ཤེས་པ་དེ་ཤེས་ལ་ཁད་སྣང་ངོ༌།།
                      ཇོ་ཇོ་རྟེན་འབྱུང་དེས་ལྐོག་ཏུ་བསྙད་པས།།
                      ཡིན་ཡིན་མིན་མིན་དེ་ཨེ་ཡིན་སྙམ་མོ།།
                      གཟུང་འཛིན་སྣ་ཚོགས་འདི་ཨ་མའི་འཛུམ་བག།
                      སྐྱེ་འཆི་འཕོ་འགྱུར་འདི་ཨ་མའི་བརྫུན་ཚིག།
                      བསླུ་མེད་ཨ་མ་ཡིས་ཁོ་བོ་བསླུས་སོ།།
                      ཇོ་ཇོ་རྟེན་འབྱུང་དེས་སྐྱོབ་པར་རེའོ།།
                      རྣམ་པ་གཅིག་ཏུ་ན་ཨ་མ་རྒན་མོ།།
                      ཁོ་ནའི་དྲིན་གྱིས་ནི་གྲོལ་པར་རེ་སྟེ།།
                      གཟུང་འཛིན་འདི་ཉིད་ཀོ་འདི་ལྟར་ཡིན་ན།།
                      དུས་གསུམ་རྒྱལ་བས་ཀྱང་སྐྱོབ་ཐབས་མི་འདུག།
                      འགྱུར་བ་སྣ་ཚོགས་འདི་འགྱུར་མེད་ཨ་མའི།།
                      རྣམ་འགྱུར་ཡིན་པས་ན་གྲོལ་རྒྱུར་འདུག་གོ།
                      ཅིར་ཡང་མ་གྲུབ་པའི་བརྗོད་མེད་ཨ་མའི།།
                      ཅིར་ཡང་བརྫུ་བ་ཡི་ཕར་བརྟེན་ཚུར་བརྟེན།།
                      འདི་ག་ཙམ་ཞིག་ལ་གོ་རྒྱུ་འདུག་གོ།
                      ཕ་རྒན་བཙལ་བས་ནི་མ་རྙེད་པ་དེ།།
                      མ་རྒན་རྙེད་པ་ཁོ་ཡིན་པར་འདུག་པས།།
                      ཨ་མའི་པང་ནས་ནི་ཕ་རྒན་རྙེད་པས།།
                      ཕ་མ་དྲིན་ཅན་གྱིས་བུ་ང་སྐྱོབ་སྐད།།
                      གཅིག་མིན་གཞན་མིན་གྱི་ཨ་མའི་བཞིན་རས།།
                      ཇོ་ཇོ་རྟེན་འབྱུང་གི་མེ་ལོང་ནང་ན།།
                      ཟིན་པ་མེད་ཚུལ་གྱིས་ཡོད་ཡོད་འདྲ་སྟེ།།
                      ཡོད་པ་ང་འདྲས་ནི་རྟོག་དཔྱོད་མ་ཞུགས།།
                      ཀླུ་སྒྲུབ་ཟླ་གྲགས་ཀྱིས་ཞལ་ཆེམས་རླུང་བསྐུར།།
                      འཇམ་དཔལ་སྙིང་བོ་ཡིས་བྱ་ཞིག་བཏང་བས།།
                      ཐག་རིང་འཚོལ་བ་ཡི་དཀའ་ལས་བཤོལ་ནས།།
                      ལྷན་ཅིག་མཐོང་བ་ཡི་མ་རྒན་མཐོང་རེ།།
                      ད་ལྟ་རང་རེ་ཡི་བློ་གསལ་འགའ་ཞིག།
                      ཚུགས་ཐུབ་བདེན་གྲུབ་སོགས་བརྡ་ལ་ཞེན་པས།།
                      སྣང་བ་ལིང་ལིང་འདི་རང་སོར་བཞག་ནས།།
                      དགག་རྒྱུ་རྭ་ཅན་ཞིག་འཚོལ་བར་སྣང་སྟེ།།
                      སྒྲིབ་བྲལ་ཨ་མ་ཡི་བཞིན་རས་དེ་ན།།
                      ལང་ལང་ལིང་ལིང་འདི་ཡོད་སྐད་མི་འདུག།
                      གནད་འགག་མ་ཕིགས་པའི་བཤད་བཤད་མང་ཡང༌།།
                      ཨ་མ་རྒན་མོ་དེ་བྲོས་དོགས་འདུག་གོ།
                      ཡོད་ཞིག་ཡོད་མོད་ཀྱང་ད་ལྟའི་འདི་འདྲའི།།
                      རོང་རོང་འགལ་འདུ་ཅན་ཡིན་ཚོད་མི་སྣང༌།།
                      ཕ་མ་མཛའ་གཅུགས་ཀྱི་འབྲལ་མེད་བག་ཕེབས།།
                      འཇམ་འཇམ་སྐྱིད་སྐྱིད་ཅིག་ཡིན་པར་སྣང་ངོ༌།།
                      བྱེ་མདོ་རྣམ་རིག་དང་ཤར་གསུམ་མཁན་པོས།།་
                      ཨ་མ་གླང་ཆེན་གྱི་ཐལ་དཀར་གཟུགས་ལ།།
                      བེམ་པོ་འཛུམ་རིས་ཀྱི་རྒྱ་སྟག་ཁྲ་བོ།།
                      འཛིན་པ་ཀླད་མེད་ཀྱི་སྤྲེའུ་སྨྱོན་པ།།
                      གཉིས་མེད་ཚུགས་ཐུབ་ཀྱི་དོམ་བུ་ངར་མའི།།
                      ཐ་སྙད་སྣ་ཚོགས་ཤིག་འདོགས་པར་བྱེད་ཀྱང༌།།
                      ཨ་མ་རྒན་མོ་དེ་སྟོར་ནས་འདུག་གོ།
                      ས་རྙིང་ཀར་འབྲུག་གི་མཁས་གྲུབ་མང་བོས།།
                      གསལ་སྟོང་འཛིན་མེད་ཀྱི་རང་གི་རིག་པ།།
                      ཀ་དག་ལྷུན་གྲུབ་ཀྱི་ཀུན་བཟང་རང་ཞལ།།
                      མ་བཅོས་ལྷན་སྐྱེས་ཀྱི་ཕྱག་རྒྱ་ཆེན་པོ།།
                      ཡོད་མིན་མེད་མིན་གྱི་ཁས་བླང་བྲལ་སོགས།།
                      སྣ་ཚོགས་ཐ་སྙད་ཀྱི་ཞལ་ཕོ་སྒྲོགས་ཀྱང༌།།
                      གཤིས་ལུགས་ཐིག་པོ་ཞིག་ཡིན་ན་ལེགས་ཏེ།།
                      མཛུབ་མོ་འཛུགས་ས་དེ་ཅི་ཞིག་ཡིན་ཨང༌།།
                      ཕྱི་དོན་མ་བཤིགས་པས་བློ་འཚུབས་མི་དགོས།།
                      དོན་སྨྲ་སྡེ་གཉིས་རྣམས་དགྱེས་དགྱེས་མཛོད་ཅིག།
                      རང་རིག་མ་ཡིན་ཀྱང་ཚད་གཞལ་འཐད་པས།།
                      རྣམ་རིག་སྨྲ་བ་ཀུན་དགྱེས་དགྱེས་མཛོད་ཅིག།
                      རང་མཚན་མ་གྲུབ་ཀྱང་རྟེན་འབྲེལ་བཀྲ་བས།།
                      ཤར་གསུམ་མཁན་པོ་ཀུན་དགྱེས་དགྱེས་མཛོད་ཅིག།
                      གསལ་སྟོང་མི་འགལ་བས་བཟུང་ཡང་ཆོག་གི།
                      སློབ་བཤད་རྒྱུན་འཛིན་རྣམས་དོགས་ཆུང་མི་དགོས།།
                      ཀ་ནས་དག་ན་ཡང་བཟང་ངན་འཐད་པས།།
                      ཛག་འཛིན་ཞིག་པོ་རྣམས་བཟང་ཞེན་མི་དགོས།།
                      བཅོས་ནས་བསྒོམས་ན་ཡང་ལྷན་སྐྱེས་འཆར་བས།།
                      རྟོགས་ལྡན་རྒན་པོ་རྣམས་ཨུ་ཚུགས་མི་དགོས།།
                      ཡོད་མེད་སྤྲོས་བྲལ་དེ་ཁས་བླང་ཆོག་པས།།
                      རྟོག་གེ་མགོ་མཁྲེགས་རྣམས་ཚབ་ཚུབ་མ་བྱེད།།
                      འོན་ཀྱང་གཞུང་ལུགས་ལ་སྦྱངས་པ་ཆུང་རྣམས།།
                      ཐ་སྙད་སྦྱོར་ཚུལ་ཞིག་མ་མཁྱེན་ཡིན་སྲིད།།
                      ཁོ་བོ་ཁྱོད་ཅག་ལ་མི་གུས་མ་ལགས།།
                      ཕོག་ཐུག་བྱུང་ན་ནི་བཟོད་པར་མཛོད་ཅིག།
                      ཁོ་བོ་ཀུན་ཤེས་ཀྱི་ཤར་པོ་མིན་ཡང༌།།
                      ཕ་མེས་གཞུང་ལུགས་ཀྱི་རྟ་ཕོ་བཟང་བོ།།
                      རྟག་སྦྱོར་གུས་སྦྱོར་གྱིས་བཞོན་ཚུལ་མཁས་པས།།
                      གཅིག་རྡུགས་འཕྲང་ལས་ནི་ཐར་པར་རེ་འོ།།
                      འཚོལ་དགོས་མི་འངུག་སྟེ་འཚོལ་མཁན་རང་ཡིན།།
                      བདེན་པར་མི་ཞེན་ཏེ་བརྫུན་པ་ཉིད་ཡིན།།
                      བརྫུན་པ་མི་འགོག་སྟེ་བདེན་པ་རང་ཡིན།།
                      ཆད་མིན་རྟག་མིན་ལ་ངལ་གསོས་ཆོག་གོ།
                      ཨ་མ་མ་མཐོང་ཡང་མིང་ཙམ་ཞིག་གིས།།
                      ཕ་མ་དྲིན་ཅན་དེ་ཡུན་རིང་སྟོར་བ།།
                      གན་ན་འདུག་པ་བཞིན་འཕྲད་པར་སྣང་གི།
                      ཀླུ་སྒྲུབ་ཡབ་སྲས་དེ་བཀའ་དྲིན་ཆེ་འོ།།
                      བློ་བཟང་གྲགས་པ་དེ་བཀའ་དྲིན་ཆེ་འོ།།
                      དྲིན་ཅན་བླ་མ་དེ་བཀའ་དྲིན་ཆེ་འོ།།
                      བཀའ་དྲིན་གཟོ་ཐབས་སུ་ཨ་མ་མཆོད་དོ།།
                      སྐྱེ་མེད་བརྗོད་བྲལ་གྱི་ཨ་མ་རྒན་མོ།།
                      རིག་པའི་བུ་ཆུང་དང་ལྷན་ཅིག་འཛོམས་ནས།།
                      ཀུན་བཟང་སྤྱོད་པ་ཡི་དགའ་སྟོན་ཆེན་པོས།།
                      མ་རྒན་འགྲོ་བ་ཀུན་གཏན་བདེར་འཁྲིད་དོ།།
                      ཨེ་མ་ལ་རོལ་བའི་རྡོ་རྗེ།།
                      ཨ་འོ་ལ་སྐྱིད་པའི་རྐང་བྲོ།།
                      འོ་ན་ལ་འདི་རུ་བརྡུངས་ནས།།
                      ཨ་ཧོ་ཡ་དཀོན་མཆོག་མཆོད་དོ།།ཞེས་ཨ་མ་ངོ་ཤེས་ཀྱི་བརྫུན་ཚིག་བྲག་ཆའི་སྒྲ་དབྱངས་འདི་ཡང་དབུ་མ་ཆེན་པོ་ལ་ལྷག་པར་མོས་པའི༧ལྕང་སྐྱ་རོལ་བའི་རྡོ་རྗེས་སྤྲུལ་བའི་གནས་མཆོག་རི་བོ་རྩེ་ལྔར་སྨྲས་པའི་ཡི་གེ་པ་ནི་དགེ་སློང་དགེ་ལེགས་ནམ་མཁའོ།།ཤྲཱིས་བཀོད་པས་མངྒ་ལཾ་བི་ཛ་ཡནྟུ།།