བསམ་ཡས་གཡའ་མ་ལུང་ངོ་སྤྲོད་རགས་བསྡུས།

　　དགའ་ལྡན་ནས་ལ་བརྒྱབ་སྟེ་ཕྱིན་ན་ལོ་ཆེན་བེེ་རོའི་སྒྲུབ་གནས་བསམ་ཡས་གཡའ་མ་ལུང་དུ་སླེབས། དེར་སྒྲུབ་ཕུག་དང་ཨོ་རྒྱན་སྐུ་ཚབ་ཚེ་ཆུ་སོགས་ཡོད། དེ་ནས་མཉེད་མགོ་བརྒྱུད་མར་ཕྱིན་པ་ན་བསམ་ཡས་ཀྱི་ལྟག་ཏུ་ཆོས་རྒྱལ་ཁྲི་སྲོང་སྐུ་འཁྲུངས་ས་བྲག་དམར་མགྲིན་བཟང་དུ་ལྷ་ཁང་དང་རྟེན་གསར་བཞེངས་དོངས་གཙང་བཞུགས། བསམ་ཡས་ཆོས་འཁོར་ཆེན་པོར་དབུ་རྩེ་རིམ་གསུམ་གླིང་བཞི་གླིང་ཕྲན། ཡཀྴ་ལྟག་འོག་དཔེ་ཧར་ལྕོག   མཆོད་རྟེན་བཞི། རྒྱབ་ཏུ་ཇོ་མོ་གླིང་གསུམ་སོགས་ཕལ་ཆེར་གྱི་དཀར་ཆག་རགས་རིམ་པད་མ་བཀའ་ཐང་དུ་གསལ་བ་ལྟར་རྟེན་གྱི་གཙོ་བོ་དབུ་རྩེའི་འོག་ཁང་ཇོ་བོ་བྱང་ཆུབ་ཆེན་པོ།  དེའི་ཀ་མདོང་གཡས་གཡོན་དུ་ཆོས་རྒྱལ་མེས་ཨག་ཚོམ་ཅན་གྱི་ཐུགས་དམ་རྟེན་ཐུབ་པ། མཁན་ཆེན་བོ་དྷི་ས་ཏྭའི་དབུ་ཐོད་བུ་མ་རིལ། བསམ་ཡས་རྫོང་དུ་མངའ་བདག་ཉང་རིན་པོ་ཆེའི་གཏེར་བྱོན་གུ་རུ་མཚོ་སྐྱེས་རྡོ་རྗེ་ཞེས་སློབ་དཔོན་གྱི་སྐུ་ཚབ་ཐམས་ཅད་ཀྱི་མཆོག་ཏུ་གྱུར་པ་དེ་དང་། གུང་ཐང་ལ་ཁའི་ཞབས་རྗེས་ངོ་མཚར་ཅན་སོགས་ཡོད། ཧས་པོ་རི་རྩེར་ལྷ་བསང་ཁང་། བསམ་ཡས་ཀྱི་གླིང་གི་ནང་ནས་གཙོ་བོ་རྟ་མགྲིན་གླིང་དེ་ཡིན། དེར་རྟེན་གྱི་གཙོ་བོ་འཕགས་པ་སེམས་ཉིད་ངལ་བསོ། ཇོ་མོ་སྒྲོལ་མ། སྒྱུ་འཕྲུལ་དྲྭ་བའི་ལུགས་ཀྱི་རྟ་མགྲིན་གྱི་སྐུ་གསུང་མང་དུ་འབྱོན་པ་སོགས་ཡོད།