ཨ་མདོ་རེབ་གོང་རོང་བོ་དགོན་ཆེན་དུ2011ལོའི་འཇང་དགུན་ཆོས་ཆེན་མོ་ཚད་མའི་ཆོས་ཐོག་ཚོགས་པ།

རེབ་གོང་རོང་བོ་དགོན་ཆེན་དུ2011ལོའི་འཇང་དགུན་ཆོས་ཚོགས་པའི་རྣམ་པ། 

             2011ལོའི་འཇང་དགུན་ཆོས་ཆེན་མོ་ཚད་མའི་ཆོས་ཐོག་དེ་ཨ་མདོ་རེབ་གོང་རོང་བོ་དགོན་ཆེན་བདེ་ཆེན་ཆོས་འཁོར་གླིང་ནས་བོད་ཟླ་བརྒྱད་པའི་ཚེས་ལྔ་ཉིན་ཚོགས་མགོ་བརྩམས་ཤིང་། ཐེངས་འདིར་བོད་ཁམས་ཀྱི་དགོན་པ་བཅུ་གཅིག་ལྷག་གི་འཐུས་ཚབ་པ་ཕེབས་ཡོད་དེ།   རེབ་གོང་རོང་བོ་དགོན་པ་གཙོ་བྱས་པའི་ཀིརྟི་དགོན་པ་དང་། སྤྲེལ་རྫོང་དགོན་པ། གསེར་ལག་དགོན་པ། ལྷ་མོ་རྩེ་དགོན་པ། མཐོ་ལས་དགོན་པ། གཙོས་དགོན་པ། རྭ་རྒྱ་དགོན་པ། བུ་དགུ་དགོན་པ། གཙང་དགོན་པ། ལྷ་མོ་ཀིརྟི་དགོན་པ།  ཆབ་ཆ་དགོན་གསར་བཀྲ་ཤིས་ཐེག་ཆེན་གླིང་ངམ་དགོན་པ་སོ་མ།  རྫོང་དཀར་དགོན་པ་བཅས་ཡིན་ལ། རྩིས་གྲངས་གསལ་བོ་ཞིག་ལག་ཏུ་མ་སོན་ནའང། ཕལ་ཆེར་དགེ་འདུན་པ་སྟོང་ཕྲག་གསུམ་ལྷག་འདུས་ཡོད་སྐད། དེ་རིང་ནི་ཚོགས་ཆེན་གྱི་ཉིན་ལྔ་བ་ཡིན་ལ། ཚེས་བཅོ་ལྔའི་ཉིན་ནི་ཆེས་མཐའ་མཇུག་གི་ཉི་མ་རེད།

རེབ་གོང་རོང་བོ་དགོན་ཆེན་དུ2011ལོའི་འཇང་དགུན་ཆོས་ཚོགས་པའི་རྣམ་པ། 

ཚད་མའི་རྩོད་པ་བྱེད་བཞིན་པ།  

ཨ་མདོ་རེབ་གོང་རོང་བོ་དགོན་ཆེན་དུ2011ལོའི་འཇང་དགུན་ཆོས་ཚོགས་པའི་སྒྲིག་ཡིག

             འཇང་དགུན་ཆོས་ཞེས་པའི་ཆོས་ཐོག་ཆེན་པོ་འདི་ནི་ཆེས་སྔ་མོ་ཞིག་ནས་བོད་དུ་དར་བར་བཤད་ལ།  རི་བོ་དགེ་ལྡན་པའི་ཐུན་མོང་མ་ཡིན་པའི་ཕྱག་སྲོལ་ཞིག་ཏུ་ངེས། ལ་ལས་འཇམ་དབྱངས་དགུན་ཆོས་ཞེས་ཟེར་ཡང་དེ་ནི་འཇང་དགུན་ཆོས་ཞེས་པ་སྒྲ་མ་དག་པའི་དབང་གིས་ཡིན་པར་འདོད།  གང་ལྟར་འཇང་དགུན་ཆོས་ཀྱི་དུས་ཡུན་ཟླ་ཕྱེད་ཀྱི་རིང་འདིར།  དགེ་འདུན་པ་རྣམས་ཀྱིས་གྲྭ་ས་དང་དགོན་པ་ཕན་ཚུན་བར་ཆེས་གྲ་སྒྲིག་ཡོད་པའི་སྒོ་ནས་བློ་སྦྱོང་བྱས་པ་རྣམས་རྟགས་གསལ་གྱི་དཔྱད་པ་གཏོང་བའི་ཐབས་ལ་རྟེན་ཏེ་ཚད་མ་རིག་པའི་གཞུང་ལ་རྩོད་པ་བྱེད་པའི་སྲོལ་ཞིག་ཆགས་ཡོད་པ་ཡིན།