ནང་བསྟན་དཔལ་འབྱོར་རིག་པ།༼ཁ༽

   གཉིས་པ།  མི་དང་དཔལ་འབྱོར།

   དང་བོ། མི་སྒེར་དང་དཔལ་འབྱོར།

   ༡. དབུལ་བོ་དང་ཕྱུག་པོ།

   སྦྲང་བོ་ནི་ཚེ་འདིར་གཞན་གྱིས་བཅོམ་པ་མིན་ལ་རང་ལ་དཔལ་འབྱོར་བསྒྲུབ་འདོད་པའི་རེ་བ་མེད་པའང་མིན།རྩོལ་སྒྲུབ་བྱས་ནའང་དཔལ་འབྱོར་ལག་ཏུ་མི་ཡོང་བའམ་ཕྱུག་པོར་མི་ཆགས་པ་ནི་་སྔོན་བསགས་ལས་ཀྱི་རྣམ་སྨིན་ཡིན། མི་སུ་དང་སུ་ཡིན་རུང་ཕྱུག་པོར་ཆགས་རྒྱུ་རེ་བ་ཡོད་ཀྱང་རེ་བ་དེ་མངོན་དུ་འགྱུར་བ་ནི་དེ་འདྲའི་སླ་མོ་ཞིག་ག་ལ་ཡིན་ཏེ་འཇིག་རྟེན་ན་མི་དབུལ་བོ་མང་བ་ལས་ཕྱུག་པོ་དེ་འདྲ་མེད་པ་ལ་ལྐོག་ཏུ་གྱུར་བའི་རྒྱུ་རྐྱེན་མེད་པ་ཞིག་ག་ལ་ཡིན།ནང་བ་སངས་རྒྱས་པའི་ལུགས་ལ་དེའི་རྒྱུ་རྐྱེན་དག་ལ་དབྱེ་ཞིབ་བྱས་ཡོད་ལ་ལྷག་པར་ལྐོག་ཏུ་གྱུར་བའི་རྒྱུ་རྐྱེན་ཞིག་ལྷང་ལ་འཕུད་ཡོད་པ་ནི་ལས་འབྲས་ཀྱི་འབྲེལ་བའི་ཆ་ནས་གཙོ་བོ་ཚེ་སྔོན་མར་འབྲེལ་བ་ཡོད་པ་དེ་ཡིན་ནའང་སྐྱེ་བ་འདི་ལ་གཏན་ནས་འབྲེལ་བ་མེད་པ་ཞིག་གཏན་ནས་མིན།

   དབུལ་བོ་ལ་ཕྱི་ནང་གི་རྐྱེན་གཉིས་ཡོད་དེ་ནང་གི་རྐྱེན་སྐྱེ་བ་སྔ་མར་གཏོང་སྦྱིན་མ་བྱས་པ་ལ་ཐུག་ཡོད་དེ་རྩ་ཤེ་ལས། སྤྱིན་པས་ལོངས་སྤྱོད་ཁྲིམས་ཀྱིས་བདེ།།ཞེས་སྤྱིན་པ་བཏང་བ་ལས་མ་འོངས་པ་ལ་ལོངས་སྤྱོད་འབྱུང་ལ་ཚུལ་ཁྲིམས་སྲུང་བ་ལས་མ་འོངས་པ་ལ་བདེ་བ་འབྱུང་བར་གསུངས།དེ་ཡང་ཡིན་ཏེ་འབྲས་བུ་གང་ཞིག་རྒྱུ་རྐྱེན་ལ་བརྟེན་ནས་བྱུང་བ་ཡིན་ལ་དེ་བཞིན་སྤྲང་བོ་ཡང་ཚེ་རབས་སྔོན་མར་སེར་སྣ་དང་གཞན་གྱི་རྒྱུ་ནོར་རྐུ་འཕྲོག་བྱས་པ་ལས་བྱུང་བ་ཡིན་ནའང་དེ་ནི་གཏན་ནས་བསྒྱུར་བཅོས་བྱེད་མི་ཐུབ་པ་གཏན་ནས་མིན།དེའི་རྒྱུ་རྐྱེན་དབུལ་བོར་འགྱུར་བའི་ལས་བསགས་ཡོད་ནའང་དེའི་རྣམ་སྨིན་འབྱུང་བ་ནི་མི་རང་ཉིད་ལ་ཐུག་ཡོད་དེ།མི་ནི་རང་ཉིད་ཀྱི་བདག་པོ་ཡིན་ལ་འཇིག་རྟེན་གྱི་བདག་པོ་ལས་ཆེས་གོ་གནས་མཐོ་བ་ཞིག་ཡིན་ཏེ།དེའི་གནད་ཡང་རང་ཉིད་ཀྱིས་རང་ཉིད་ལ་བཅོས་བསྒྱུར་བྱེད་ཐུབ་མིན་ལ་ཐུག་ཡོད། དེ་ལ་མཆོད་སྦྱིན་དང་བསོད་ནམས་བསག་པའི་སྦྱོར་བ་གཙོ་བོར་བཟུང་ནས་རང་གི་སྔོན་གྱི་མི་དགེ་བའི་ལས་དེ་སྒྲིབ་སྦྱོང་གནད་དུ་གཟུང་འོས།

   ཕྱུག་པོར་འགྱུར་བ་རང་ཉིད་ཕྱུག་པོར་ཆགས་འདོད་པ་ཞིག་ཡིན་པས་མི་ཆོག་ལ་རང་གི་རྩོལ་སྒྲུབ་བྱས་པ་ཙམ་གྱིས་ཐོབ་པ་ཞིག་ཡིན།དེར་རྒྱུ་རྐྱེན་དུ་མ་ཡོད་པ་ལས་གཅིག་ནི་སྔོན་བསགས་ཀྱིས་དགེ་བའི་ལས་དགོས་ལ་གཉིས་སུ་རང་ལ་ཚེ་འདིར་དགེ་བའི་ལས་གསག་དགོས། གསུམ་དུ་རང་ཉིད་ཀྱི་དཔལ་འབྱོར་གྱི་ཆེད་དུ་རྩོལ་སྒྲུབ་བྱ་དགོས་པ་རེད།དེ་མིན་ཕྱུག་པོར་ཆགས་རྒྱུ་ཆེས་ཤིན་ཏུ་དཀའ། དེ་དག་ནི་གཤམ་དུ་བཤད་འདོད་པས་འདིར་མང་དུ་མི་བརྗོད་དོ།།

   ༢. དཔོན་པོ་དང་དཔལ་འབྱོར།

   ནང་བའི་ལུགས་ལ་དཔོན་པོར་འདུག་དགོས་པའི་དོན་ནི་འགྲོ་བ་གཞན་གྱི་དོན་བསྒྲུབ་པའི་ཆེད་དུ་ཡིན་པ་ལས་རང་དང་གཉེན་ཉེ་ལ་དཔལ་འབྱོར་བསྒྲུབ་པའི་ཆེད་དུ་མིན། ཡིན་ནའང་དཔལ་འབྱོར་ནི་གཞན་དོན་བསྒྲུབ་པའི་ཡན་ལག་ཅིག་ཡིན་པས་དཔོན་པོ་ཞིག་ཡིན་ན་འབངས་ཀྱི་བདེ་ཐབས་སུ་དམངས་ཀྱི་དཔལ་འབྱོར་བསྒྲུབ་དགོས་པ་ནི་བཤོལ་ཐབས་མེད་པ་ཞིག་ཡིན། གཞན་དོན་བསྒྲུབ་པའི་ཡན་ལག་ཅེས་པའང་རང་གིས་དཔལ་འབྱོར་ལོངས་སུ་སྤྱད་ནས་གཞན་དོན་ལ་རེམ་པ་དེ་མིན་པར་འཁོར་འབངས་ལ་དཔལ་འབྱོར་བསྒྲུབ་ནས་དེ་དག་གི་ལོངས་སྤྱོད་ལས་བདེ་བ་རོལ་ཐུབ་པར་བྱེད་པ་དེ་ཡིན། དེ་བས་དཔོན་པོ་ཆོས་པ་ཞིག་ཡིན་ཞིང་ཁོ་རྒྱུ་ནོར་ལ་སྲེད་པ་ཅི་ཡང་མེད་ནའང་རྒྱུ་ནོར་མཐའ་གཅིག་ཏུ་འདོར་བྱར་འཛིན་མི་ཆོག་པ་ཡིན་ཏེ་རྒྱུ་མཚན་ནི་དཔོན་པོར་འདུག་པ་དམིགས་ཡུལ་ནི་འབངས་ཀྱི་བདེ་སྡུག་བསམ་པའི་ཆེད་དུ་ཡིན་ལ་དཔལ་འབྱོར་ནི་དམངས་ཀྱི་བདེ་སྡུག་གི་རྒྱུ་རྐྱེན་གཙོ་བོ་ཞིག་ཡིན། དཔལ་འབྱོར་མེད་ན་མཆོག་གསུམ་ལ་མཆོད་བཀུར་དང་དམན་པར་སྦྱིན་པ་གཏོང་བའི་ལས་དག་ཀྱང་འགྲུབ་ཐབས་མེད་ལ་རང་གི་འཚོ་གནས་ཀྱི་བདེ་སྐྱིད་དང་མི་ཚེའི་གཞི་རྩའི་གནད་དོན་དག་ཀྱང་གཏན་ནས་འགྲུབ་པའི་ཕྱིར་རོ།།

   ༣. ཚོང་བ་དང་དཔལ་འབྱོར།

   ཚོང་བ་ནི་དཔལ་འབྱོར་གཉེར་བའི་ལས་རིགས་ཀྱི་ནང་དུ་ཆེས་དམིགས་བསལ་ཞིག་ཡིན།ནང་བའི་བསྟན་པ་ནི་བདེན་དྲང་དང་ཞི་བདེ་ཡིན་ན་ཚོང་བྱེད་པ་ནི་ནང་བའི་དགོངས་དོན་དང་མཐུན་ནམ་ཞེ་ན་དེ་ནི་གནད་ཤིན་ཏུ་ཆེ་བའི་དྲི་བ་ཞིག་སྟེ་ཚོང་བའི་ལས་རིགས་ཀྱིས་ཚོང་བྱེད་པ་དེ་ནི་ཉོ་མཁན་དང་འཚོང་མཁན་གཉིས་ཀྱི་བར་དུ་ཕན་ཚུན་གྱི་འདོད་མོས་བཞིན་བྱུང་བ་ཡིན་པས་ནང་བའི་དགོངས་དོན་དང་མི་མཐུན་པའི་དོན་ཅི་ཡང་མེད་དོ།།ལྷག་པར་ནང་བའི་ཚོང་བའི་རིགས་ནི་བདེན་དྲང་དང་རང་གཞན་གཉིས་ལ་ཕན་སེམས་གཙོ་ཆེས་དགོས་པ་ནི་རྩ་བའི་རྨང་གཞི་ཡིན་ལ་དེའང་ཆ་རྐྱེན་གསུམ་ཡོད་པའི་དང་བོ་ནི་ཉོ་བདག་ལ་ཡིད་ཆེས་པ་དང༌།གཉིས་པ་ནི་ཚོང་རྫས་ལ་ཡིད་ཆེས་པ།གསུམ་པ་ནི་རང་གི་བདེ