ཚེ་རིང་རྣམ་དྲུག་གི་དང་པོ་བྲག་ཚེ་རིང་ནི། སྔོན་གྱི་དུས་སུ་མ་ཧྰ་ཙི་ནའི་ཡུལ་གྲུ་ཆེན་པོའི་རྣམ་དག་བདེ་ཆེན་གྱི་ཚལ་ཞེས་བྱ་བ། དབེན་ཞིང་ཉམས་དགའ་བ་སྤྲུལ་པའི་བཟོ་བོས་བྱས་པ་ལས་ཀྱང་ཆེས་མཛེས་པའི་ཡུལ་དེའི་དབུས་སུ། བསྐལ་བ་ཆགས་པའི་ཐོག་མར་བྱུང་བའི་བྲག་རི་དུང་དཀར་གཡས་སུ་འཁྱིལ་བའི་དབྱིབས་ཅན། སྲིད་པའི་འཇིག་པ་ལའང་ཅི་མི་སྙམ་པ་ལྟར་བརྗིད་ཅིང་རབ་ཏུ་བརྟན་པ། སངས་རྒྱས་ཚེ་དཔག་མེད་ཀྱིས་བྱིན་གྱིས་བརླབས་པའི་གནས། རྩེ་མོ་མཁའ་ལ་བསྙེགས་པ། སྐྱེ་བོ་ཕལ་པ་རྒྱུ་བའི་སྐབས་དང་བྲལ་ཞིང་འཆི་མེད་ཚེའི་སྒྲུབ་ཆུ་རྒྱུན་དུ་འབབ་པ་ཞིག་ཡོད་པ་དེ་ལའོ།། གཉིས་པ་མི་ཚེ་རིང་ནི། གོང་གི་བྲག་དེའི་དྲུང་དུ་འཆི་མེད་ཚེའི་དངོས་གྲུབ་བརྙེས་པ་དབེན་པའི་གནས་དེར་མི་ལོ་སྟོང་ལ་ཉེ་བར་བསྒོམས་པས། འབྱུང་བ་བཞི་ལ་རང་དབང་ཐོབ་པའི་རིག་འཛིན་གྱི་དྲང་སྲོང་ཆེན་པོ་སྨ་ར་དང་སྨིན་མ་དུང་ལྟར་དཀར་ཞིང་དཀར་ལ་དམར་བའི་མདངས་ཆགས་པ། རྒྱ་ནག་གི་རིག་འཛིན་གྱི་ཆས་ལ། ཕྱག་གཡས་ཀ་པེད་ཀྱི་ཚེ་བུམ་དར་གྱི་མགུལ་ཆིངས་ཅན་གྱིས་བརྒྱན་པའི་ཕྱག་མཁར་དང་། གཡོན་དུ་མི་ལོ་སྟོང་ལས་སྨིན་པའི་ལྷའི་ཁམ་བུ་བསྣམས་ཏེ་སྦྱིན་པའི་ཚུལ་དུ་བཞུགས་པའོ།། གསུམ་པ་ཆུ་ཚེ་རིང་ནི། དྲང་སྲོང་དེའི་མཐུ་བྱིན་ལས། རྒྱབ་ཀྱི་བྲག་རི་དུང་དཀར་དབྱིབས་འདྲ་བའི་འཁྱིལ་ཁུག་ནས་རྒ་ཤི་མེད་པའི་བཅུད་ལེན། ཡན་ལག་བརྒྱད་ལྡན་པའི་སྒྲུབ་ཆུ་རྒྱུན་མི་ཆད་པར་སྐྱེ་དགུ་ཚེ་སྲོག་འཚོ་བའི་གཉེན་དུ་འབབ་པའོ།། བཞི་པ་ཤིང་ཚེ་རིང་ནི། ཚེ་རིང་བའི་ལྗོན་པ་མྱ་ངན་མེད་པའི་ཤིང
（རྒྱ་ནག་རང་ལུགས་སུ་སྒྲོན་ཤིང་ངོ
）རྩ་བ་བརྟན་ཅིང་ཡལ་ག་དང་ལོ་འདབ་རྒྱས་པ། མེ་ཏོག་དང་འབྲས་བུ་ཁུར་གྱིས་ལྕི་བ། འགྲོ་ཀུན་ཚ་གདུང་སེལ་བའི་མཆོག་ཏུ་གྱུར་པ། དེའི་གྲིབ་མས་རེག་པ་དང་འབྲས་བུ་མྱང་བ་ཙམ་གྱིས་ཀྱང་ཚེ་བསྲེངས་ཏེ་ཚེ་མཐར་ཕྱིན་པར་གྱུར་པ་དེའོ།། ལྔ་བ་བྱ་ཚེ་རིང་ནི། དྲང་སྲོང་དེའི་ཁྱམས་ཀྱི་ར་བ་ན། རྒྱུན་པར་ཟང་ཟིང་གི་སྦྱིན་པ་དང་མི་འཇིགས་པ་སྐྱབས་ཀྱི་སྦྱིན་པའི་གཡབ་མོ་ལ་བརྟེན་ནས། སྤུ་སྡུག་འདབ་ཆགས་ཚོགས་ཀྱང་འདུ་བར་གྱུར་བ་ལས་ལྷ་བྱ་ཁྲུང་ཁྲུང་གངས་ལ་ཟླ་བའི་འོད་ཀྱིས་ཁྱབ་པ་ལྟར་མཛེས་ཤིང་མགྲིན་པ་དང་རྐང་པ་རིང་བ། དཀར་ནགས་མངོན་པར་བཀྲ་ཞིང་རིན་ཆེན་གྱི་ཏོག་དམར་པོས་གཙུག་བརྒྱན་པ་གཉིས་ཡོད་པ་དེའོ།། དྲུག་པ་རི་དྭགས་ཚེ་རིང་ནི། དྲང་སྲོང་གི་བཞུགས་གནས་དང་ཉེ་བའི་སྤང་གཡུའི་མེ་ལུང་འདྲ་བར་རི་དྭགས་རུ་རུའམ་ཤྭ་བ་རྭ་ལག་ཡོངས་སུ་རྒྱས་པ་ཡུ་མོ་དང་རྩེན་བཞིན་དུ་འགྲོགས་ཤིང་བག་ཕེབས་ཏེ་ཅི་དགར་རང་བྱུང་གི་ཟན་དང་ཆུ་ལ་ལོངས་སྤྱོད་པ་རྣམས་ཀྱང་གནས་དང་སྲང་སྲོང་གི་བྱིན་བརླབས་ལས་རྒ་ཤི་སྤངས་པའི་བདེ་བ་ལ་མངོན་སུམ་དུ་རེག་པར་གྱུར་པས་ཚེ་རིང་རྣམ་དྲུག་ཏུ་བརྗོད་ལ་རྒྱ་ནག་གི་སྐད་དུ་དབང་ཐང་གི་སྲོག་ཡིག་ལུའུ
（禄）དང་ཤྭ་བའི་མིང་ལུའུ
（鹿）ཞེས་པའི་ཡི་གེ་གཉིས་ཀྱི་སྒྲ་གཅིག་པས། རི་དྭགས་གཉིས་དབང་ཐང་རྒྱས་པའི་རྟེན་འབྲེལ་དུ་བྲིས་པ་ཡིན་ཚུལ་ཡང་རྒྱ་ནག་གི་ཡིག་རྙིང་ལས་འབྱུང་ངོ་།།
青公网安备63252102000006号