མཚོ་ལྷོ་ཁུལ་གྱིས་འཛམ་གླིང་དཔེ་ཀློག་ཉིན་མོ་བསུས།

       ཟླ4ཚེས22ཉིན། མཚོ་ལྷོ་ཁུལ་དྲིལ་སྒྲོག་པུའུ་དང་ཁུལ་ཐད་གཏོགས་ལས་ཁུངས་ཀྱི་ལས་དོན་ཨུ་ཡོན་ལྷན་ཁང་། ཁུལ་སྤྱི་ཁྱབ་བཟོ་ཚོགས། གུང་གཞོན་ཚོགས་པ་ཁུལ་ཨུ། ཁུལ་སློབ་གསོ་ཅུའུ། ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུས་བཅས་ཀྱིས་གཙོ་གཉེར་བྱས་ཤིང་། ཁུལ་དཔེ་མཛོད་ཁང་གིས་རོགས་སྒྲུབ་གནང་ཏེ་མཚོ་ལྷོ་བོད་རིགས་རང་སྐྱོང་ཁུལ་གྱི2024ལོའི་འཛམ་གླིང་དཔེ་ཀློག་ཉིན་མོ་དང་དམངས་ཡོངས་ཀྱི་དཔེ་ཀློག་ཁྱབ་སྤེལ་ཚོགས་འདུ“དཔེ་མོས་མཚོ་ལྷོ། དམངས་ཡོངས་དཔེ་ཀློག”དང“འཆལ་སེལ་ལོག་རྡུང”(པར་དབང་།)དྲིལ་བསྒྲགས་བྱ་འགུལ་གྱི་མགོ་རྩོམ་མཛད་སྒོ་དེ་ཁུལ་དཔེ་མཛོད་ཁང་ཐང་ཆེན་དུ་བསྡུས།

       འགོ་ཚུགས་མཛད་སྒོའི་ཐོག«དམངས་ཡོངས་ཀྱི་དཔེ་ཀློག་གྲོས་འདོན་ཡི་གེ»སྒྲོག་སྦྱངས་བྱས་པ་དང་དཔེ་དེབ་ཞལ་འདེབས། དེ་མིན“2023ལོའི་ཕུལ་བྱུང་ཀློག་པ་པོ”ལ་ལག་ཁྱེར་སྤྲད་པ་དང་འབྲེལ་མཚོ་ལྷོ་བོད་རིགས་རང་སྐྱོང་ཁུལ་དཔེ་མཛོད་ཁང་གི“རྒྱལ་ཁབ་རིམ་པ་དང་པོའི་དཔེ་མཛོད་ཁང”གི་སྒོ་བྱང་ཡང་བཀལ་པ་རེད།

       རྒྱུས་ལོན་བྱུང་བ་ལྟར་ན། བྱ་འགུལ་སྐབས་སུ་དྲ་ལམ་དྲ་ཕྱི་ཟུང་འབྲེལ་སྒོས་བསམ་བློའི་ཆབ་སྲིད་ཀྱི་སློབ་ཁྲིད་དང་འཆལ་འགོག་ཉེས་རྡུང་བྱེད་པའི་མཉམ་འབྲེལ་ཁྲིམས་འཛིན་ཞིབ་བཤེར་ཆེད་དོན་འགུལ་སྐྱོད་བྱས་ཏེ། དཔེ་ཀློག་མཉམ་རོལ་ཚོགས་འདུ་དང་བརྗོད་དོན་འཆད་ཁྲིད། གཟུགས་འདས་ཤུལ་བཞག་རིག་གནས་འགྲེམ་སྟོན་བཅས་གཅིག་ཅན་དགུ་ཡི་རིམ་སྤེལ་བྱ་འགུལ་འཚོགས། ཟུར་ངོས་མི་འདྲ་བ་མང་པོའི་ལམ་ནས་རང་ཁུལ་གྱི་དམངས་ཡོངས་ཀྱི་ཀློག་འདོན་གྲུབ་འབྲས་མངོན་པ་དང་། འཆལ་འགོག་ཉེས་རྡུང་དང་ཁེ་དབང་སྲུང་སྐྱོབ་ལ་སྐུལ་འདེད་བཏང་སྟེ་རིག་གནས་ཁྲོམ་རའི་ཁོར་ཡུག་བཟང་བོ་ཞིག་བསྐྲུན་པ་རེད།