ཨ་མདོ་བརྙན་འཕྲིན་གྱི་ལོ་སར་སྤྲོ་ཚོགས་བརྙན་ཕབ་ལེགས་འགྲུབ་བྱས།

       ཨ་མདོ་བརྙན་འཕྲིན་གྱི་བོད་རབ་རྒྱན་ཤིང་མོ་སྦྲུལ་ལོའི་ལོ་སར་རིག་རྩལ་སྤྲོ་ཚོགས་ཆེན་མོ༼བདེ་སྐྱིད་དཔལ་གྱི་གཞིས་ཁྱིམ༽ཞེས་པ་སྤྱི་ཟླ12པའི་ཚེས27ཉིན་གྱི་དགོང་མོར་མཚོ་སྔོན་རྒྱང་སྒྲོག་བརྙན་འཕྲིན་ཁང་གི་འཁྲབ་གཏོང་ཚོམས་ཆེན་ནས་གཟབ་རྒྱས་ངང་བརྙན་ཕབ་བྱས་ཤིང་། ཞིང་ཆེན་ཕྱི་ནང་ནས་ཡོང་བའི་ཆེད་ལས་འཁྲབ་སྟོན་པ་དང་དམངས་ཁྲོད་སྒྱུ་རྩལ་པ་བཅས་ཁྱོན་བསྡོམས་འཁྲབ་སྟོན་པ400ལྷག་ཙམ་གྱིས་རྣམ་པ་མི་འདྲ་བའི་འཁྲབ་སྟོན་ཕུན་སུམ་ཚོགས་པ་ལ་བརྟེན་ནས་རྒྱལ་ཁབ་ཕྱི་ནང་གི་ལྟད་མོ་པ་རྣམས་ལ་མི་རིགས་ཀྱི་ཁྱད་ཆོས་མངོན་པར་གསལ་བའི་རིག་གནས་ཀྱི་དགའ་སྟོན་གཟབ་རྒྱས་ཤིག་བཤམས།

       ཐེངས་འདིའི་སྤྲོ་ཚོགས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་རྟོག་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་དང་། རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གཟེངས་བསྟོད་ཚོགས་ཆེན་སྟེང་གི་གསུང་བཤད་གལ་ཆེན་གྱི་དགོངས་དོན་ལ་སློབ་སྦྱོང་དང་དྲིལ་སྒྲོག་ལག་བསྟར་བྱེད་པ་གཙོ་སྙིང་དུ་བཟུང་ཞིང་། ༼བློ་སེམས་གཅིག་མཐུན་གྱིས་ཁྱིམ་གཞིས་མཉམ་སྐྲུན་བྱེད་པ༽བརྗོད་དོན་གཙོ་བོར་བྱས་ཏེ། རྒྱལ་ཡོངས་རིགས་སོ་སོའི་མི་དམངས་ཀྱིས་ཏང་གི་ཡང་དག་པའི་འགོ་ཁྲིད་འོག་འཆམ་མཐུན་མཉམ་གནས་དང་མཐུན་སྒྲིལ་འབད་བརྩོན་གྱིས་མཉམ་དུ་ཡར་རྒྱས་གོང་འཕེལ་སྙེག་པའི་དུས་རབས་གསར་བའི་སྣང་ཚུལ་ཉམས་དགའ་བ་ལ་བསྟོད་གླུ་བླངས་ཡོད་པ་རེད།

དུས་ཆེན་གྱི་སྤྲོ་དགའི་རྣམ་པ་རབ་ཏུ་མངའ་བའི་ཞབས་བྲོ༼ལོ་གསར་བཀྲ་ཤིས་གཡང་ཆགས༽ཀྱིས་སྤྲོ་ཚོགས་ཀྱི་ཡོལ་བ་ངང་གིས་ཕྱེས་པའི་མོད་ལ། མཚོ་སྔོན་རྒྱང་སྒྲོག་བརྙན་འཕྲིན་ཁང་དང་བོད་ལྗོངས་རྒྱང་སྒྲོག་བརྙན་འཕྲིན་ཁང་། ཟི་ཁྲོན་རྒྱང་སྒྲོག་བརྙན་འཕྲིན་ཁང་བཅས་ནས་ཡོང་བའི་མདོ་དབུས་ཁམས་གསུམ་གྱི་མདོ་འཛིན་པ་བརྒྱད་ཀྱིས་བོད་རྒྱ་སྐད་གཉིས་ཀྱི་ལམ་ནས། རྒྱལ་ཡོངས་ཀྱི་རིགས་སོ་སོའི་མི་དམངས་དང་རི་ཁ་བའི་ལྗོངས་ཀྱི་རིགས་མཐུན་སྤུན་ཟླ་ཡོངས་ལ་གནམ་ལོ་གསར་ཚེས་ཀྱི་འཚམ་འདྲི་དང་བཀྲ་ཤིས་ཁ་གཡང་གི་སྨོན་ཚིག་བརྗོད་ནས་སྤྲོ་ཚོགས་ཀྱི་སྒོ་འཕར་གཞི་ནས་ཕྱེ་ལ། རྒྱལ་ཡོངས་ལ་མིང་དུ་གྲགས་པའི་གླུ་མ་འཇམ་དབྱངས་སྒྲོལ་མ་དང་། བཀྲ་ཤིས་ཕུན་ཚོགས། སྒྲོལ་མ་སྐྱབས། དབྱངས་ཅན་ལྷ་མོ། དམ་པ་ཀླུ་སྒྲུབ། ཚེ་དབང་ལྷ་མོ། ལྷ་སྐྱིད། གོང་པ། གནམ་མཚོ། བསམ་འགྲུབ་ཚེ་རིང་། སངས་རྒྱས་ཚེ་རིང་། རྟ་མགྲིན་ཚེ་རིང་། ཐང་དཀར་རོལ་ཚོགས། སམྦྷོཊ་ཚན་སྡེབ། ཀརྨ་བཀྲ་ཤིས་ཆོས་འབྱོར། བློ་ཆོས་སོགས་མཚོ་སྔོན་དང་། བོད་ལྗོངས། ཟི་ཁྲོན། ཀན་སུའུ། ཡུན་ནན་བཅས་ནས་ཡོང་བའི་སྒྱུ་རྩལ་པ་དང་གླུ་བ་གླུ་མ་སྔ་ཕྱིར་གར་སྟེགས་ལ་བུད་ནས་ཚད་མཐོ་བའི་རིག་གནས་སྒྱུ་རྩལ་གྱི་དགྱེས་སྟོན་ཆེན་པོ་ཞིག་རྒྱལ་ཁབ་ཕྱི་ནང་ཀུན་གྱི་རིགས་སོ་སོའི་ལྟ་མཁན་ཡོངས་ཀྱི་ཁྲ་ཆུང་མིག་གི་དགའ་སྟོན་དང་དར་ལུང་རྣ་བའི་གསོས་སུ་ཕུལ།

       ད་ལོའི་ལོ་སར་སྤྲོ་ཚོགས་དེ་དམངས་གླུ་དང་རྡུང་ལེན། གླུ་གཞས། ཞབས་བྲོ། ཟློས་གར། ཡུལ་སྣང་ཟློས་གར་སོགས་འཁྲབ་ཚན་ཉེར་ལྔ་ཡིས་གྲུབ་ཅིང་། འཁྲབ་ཚན་ཧྲིལ་བོའི་བརྒྱ་ཆའི་བརྒྱད་ཅུ་ལྷག་བརྩམས་ཆོས་གསར་བ་དང་ལོ་སར་སྤྲོ་ཚོགས་ལ་ཆེད་དུ་གསར་རྩོམ་གནང་བ་འབའ་ཞིག་ཡིན་འདུག་ལ། དེ་ལས་མཚོ་སྔོན་དང་བོད་ལྗོངས་ཀྱི་ཆེད་ལས་འཁྲབ་སྟོན་པས་མཉམ་ལེན་བྱས་པའི༼མི་བརྗེད་གཏན་གྱི་འདུན་མ༽དང་། དམངས་གླུ༼སྒེར་རྩེ་འབྲོག་མོ།༽ རྡུང་ལེན༼ཁུ་བྱུག་ལ་གསུང་བའི་མགུར།༽ འབའ་གཞས༼ཕ་རིའི་སྤང་གི་སྟེང་ན།༽ ཞབས་བྲོ༼སྒ་ཡུལ་སྐྱིད་པའི་འཛོམས་བྲོ།༽ རྣམ་ཐར་ཟློས་གར༼རྒྱལ་བློན་རྒྱས་པའི་དགའ་སྟོན༽སོགས་ཀྱིས་སྤྲོ་ཚོགས་ལ་ཡང་ནས་ཡང་དུ་དགའ་བསུའི་ཀི་འབོད་ཀྱི་མཐོ་རླབས་འཕྱུར་དུ་བཅུག་ཅིང་། སྤྲོ་ཚོགས་ཧྲིལ་བོ་དུས་ཆེན་གྱི་ཡོ་ལང་རྣམ་པར་རྒྱས་པའི་སྤྲོ་དགའི་རྣམ་པའི་ཁྲོད་ནས་མཇུག་བསྡུས།

       ལོ་རེར་ཐེངས་རེ་འཚོགས་བཞིན་པའི་ཨ་མདོ་བརྙན་འཕྲིན་གྱི་ལོ་སར་རིག་རྩལ་སྤྲོ་ཚོགས་ཆེན་མོ་ནི་སྤྱི་ལོ་ཆིག་སྟོང་དགུ་བརྒྱ་གྱ་བརྒྱད་ལོར་ཐོག་མར་སྒྲུབ་མགོ་ཚུགས་པ་དང་། ད་ལྟའི་བར་དུ་ལོ་ངོ་སུམ་ཅུ་ལྷག་གི་རིང་ལ་ཏང་དང་རྒྱལ་ཁབ་ཀྱི་ཡང་དག་པའི་ལམ་ཕྱོགས་རྒྱུན་འཁྱོངས་དང་མི་རིགས་སྲིད་ཇུས་དྲིལ་སྒྲོག མི་རིགས་རང་གི་སྲོལ་རྒྱུན་རིག་གནས་རྒྱུད་འཛིན་དར་སྤེལ་སོགས་ཀྱི་ཐད་ལ་ནུས་པ་བླ་ལྷག་ཐོན་ཡོད་པའི་རིག་རྩལ་སྤྲོ་ཚོགས་གལ་ཆེན་ཞིག་ཡིན།

       ཐེངས་འདིའི་ལོ་སར་རིག་རྩལ་སྤྲོ་ཚོགས་ཆེན་མོ་དེ་ད་ལོའི་ལོ་སར་སྐབས་ལ་ཨ་མདོ་བརྙན་འཕྲིན་འཁོར་སྐར་འཕྲིན་ལམ་དང་ཨ་མདོ་བརྙན་འཕྲིན་གངས་ལྗོངས་མེ་ལོང་དྲ་བ་བརྒྱུད་ནས་གཟིགས་འབུལ་བྱ་རྒྱུ་ཡིན་ལ། ཨ་མདོ་བརྙན་འཕྲིན་གྱི་སྐད་འཕྲིན་སྤྱི་སྟེགས་དང་དུས་དབྱངས་འཕྲིན་སྟེགས། ཉིན་རེའི་གངས་ལྗོངས་སྐད་འཕྲིན་སྤྱི་སྟེགས་སོགས་སྨྱན་བྱད་གསར་བའི་རྒྱུད་ལམ་ཁག་ནས་ཀྱང་དུས་མཉམ་དུ་གཏང་རྒྱུ་ཡིན་པས། རྒྱ་ཆེའི་ལྟ་མཁན་རྣམས་ཀྱིས་དུས་ལྟར་གསན་གཟིགས་གནང་བར་དགའ་བསུ་ཞུ།