རྒྱུན་སྲོལ་བོད་ཀྱི་སྨན་པའི་ཀུན་སྤྱོད་སྐོར་གྱི་རྣམ་བཤད་དཔྱོད་ལྡན་ཡིད་གསོས་ཞེས་བྱ་བ་བཞུགས་སོ། །

        ན་མོ་བྷེེ་ཥ་ཛྱེ་རཱ་ཛཱ་ཡ། །ཐུགས་རྗེའི་བདག་གཉིད་འགྲོ་བའི་གཉེར། །རྒྱུ་དང་འབྲས་བུའི་ནད་སེལ་བ། །སྨན་པ་ཆེ་མཆོག་གཙོ་བོ་ལ།   །རབ་ཏུ་གུས་པས་ཕྱག་བགྱིའོ།   །སྡེ་བཞིའི་ཕུན་ཚོགས་དཔལ་ཡོན་ཅན།   །ཕན་བདེའི་འབྱུང་གནས་གསོ་རིག་ཉིད།   །སྔར་ནས་ད་ལྟའི་བར་དག་ཏུ།  །སྐྱེ་རྒུའི་གསོས་སུ་གྱུར་འདི་རྨད།   །འདི་ནི་ནོར་བུ་བེེཌཱུར་ཡ།   །ཡང་ན་བསམ་འཕེལ་དབང་རྒྱལ་བཞིན།   །བདེ་ལེགས་ཀུན་ལ་སྩོལ་བ་ཡིན།   །ཁྱད་འཕགས་གཞན་ན་ཡོད་མ་ཡིན།   །དམ་པའི་ལེགས་བཤད་དཔྱིད་ཀྱི་དཔལ། །སྙིང་ལ་དྲན་པ་ཙམ་གྱིས་ཀྱང་། །དྲི་དང་བསྐུལ་བ་མེད་ནའང་།   །སོར་འདབ་བསྒུལ་འདི་སུ་ཡིས་བཟློག  །ཅེས་སོགས་ཚིགས་བཅད་འགའ་ཡིས་སྐྱབས་ཡུལ་གོང་མ་རྣམས་ལ་ཕྱག་བྱ་བ་དང་། དངོས་པོ་ངེས་བསྟན་གྱི་ཚུལ་མདོར་བསྡུས་ཙམ་བྱས་ནས་གཤམ་ལ་བོད་ཀྱི་གསོ་རིག་གཞུང་ནས་བཤད་པའི་སྨན་པའི་ཀུན་སྤྱོད་སྐོར་གྱི་རྣམ་བཤད་དཔྱོད་ལྡན་ཡིད་གསོས་ཞེས་བྱ་བ་འདི་ལ་ས་བཅད་རྣམ་པ་ལྔ་ལས།

        དང་པོ།  སྨན་པའི་མིང་དོན་བཤད་པ།

        བསིལ་ལྡན་རྭ་བ་དཀར་པོས་ཡོངས་སུ་བསྐོར་བའི་ལྗོངས་འདིར་སྨན་པ་ཞེས་པའི་ཐ་སྙད་ནི་ཧ་ཅང་སྔ་བའི་དུས་ནས་ཡོད་པ་དང་།      དེ་རྗེས་པུར་རྒྱལ་བོད་ཀྱི་རྒྱལ་རབས་རིམ་བཞིན་དར་རྒྱས་བྱུང་ཐོག   ཆབ་སྲིད་དང་།       དཔལ་འབྱོར།       རིག་གནས་གང་ཅི་གོང་འཕེལ་སྔར་ན་མ་གྲགས་པ་ཞིག་བྱུང་བའི་དབང་གིས་བོད་ཀྱི་གསོ་རིག་བྱ་གཞག་མགྱོགས་མྱུར་ཡར་རྒྱས་ཕྱིན་པར་བརྟེན་སྨན་པ་དང་།  འཚོ་བྱེད་སྨན་པ།  ལྷ་རྗེ་ཞེས་པའི་བར་མཚན་སྙན་ཇེ་མཐོར་ཕྱིན་པར་བརྟེན་དེ་ནས་བཟུང་བོད་ཁམས་ཡུལ་གྲུ་ཀུན་ལ་ཚང་མས་གུས་ཞབས་དང་བརྩི་འཇོག་བྱེད་ཡུལ་གྱི་ལས་རིགས་ཤིན་ཏུ་གྱུར།    
      སྤྱིར་རང་ཅག་བོད་ཀྱི་སྐད་དུ་སྨན་ཞེས་པ་ནི་ཕན་པའི་དོན་ཡིན་ལ་ཕན་པར་བྱེད་པ་པོ་ཡིན་པས་སོ། །སྨན་ཞེས་པ་ལ་བདག་པོའི་སྒྲ་སྦྱར་བས་སྨན་པ་ཞེས་པ་སྟེ་དཔེར་ན། ཚོང་བྱེད་པ་པོ་ལ་ཚོང་པ་ཞེས་ཟེར་བ་བཞིན་ནོ།    །ཞེས་༼ བཤད་རྒྱུད་བེེ་སྔོན ༽ལས་གསུངས་པ་དང་།     ཡང་སྒོས་༼ བཤད་རྒྱུད ༽སྨན་པའི་ལེའུར།     ངས་ཚིག་ནད་གསོ་ལུས་ལ་ཕན་ཕྱིར་སྨན།      ནད་སྟེངས་དཔྱད་དཔའ་འགྲོ་ལ་ཕ་ལྟར་སྐྱོབ།      །རྒྱལ་པོ་རྣམས་ཀྱིས་རྗེ་རུ་འཁུར་བར་བྱེད།   །ཅེས་གསུང་པ་ལྟར།  སྨན་པའི་ངེས་ཚིག་ནད་ཀྱི་ཟུག་ངུ་ལས་གསོ་ཞིང་།       ལུས་ལ་ཕན་འདོགས་པའི་ཕྱིར་སྨན་དང་།      ནད་ཚབས་ཆེན་པོའི་སྟེང་དུ་ཐུར་མ་དང་།      འདྲལ་གཅོད་ཀྱི་དཔྱད་བྱེད་པའི་ཚེ་དཔའ་ཞིང་མི་ཞུམ་པས་ན་སྨན་པ་ཞེས་པ།   ཡང་ན་འགྲོ་བ་ནད་པ་རྣམས་ལ་ཕ་ལྟར་སྐྱོབ་པས་སྨན་པ།    གཞན་ཡང་རྒྱལ་པོ་རྣམས་ནི་འཇིག་རྟེན་གྱི་ལྷ་ཡིན་ཅིང་།   དེ་རྣམས་ཀྱིས་ཀྱང་རྗེ་རུ་འཁུར་བར་བྱེད་པས་ལྷ་རྗེ་ཞེས་ཀྱང་ཟེར།       ད་དུང་༼མངོན་བརྗོད་མཁས་པའི་རྣ་རྒྱན༽ནང་།     འཚོ་བྱེད་པའམ་སྨན་པའི་མིང་། །
      གསོ་དཔྱད་པ་དང་འཚོ་བྱེད་པ།     །འཚོ་ཐབས་པ་དང་གསོ་དཔྱད་མཁན།       །སྐྱོན་ཤེས་ཚེ་ཡི་རིག་བྱེད་པ།     །མཁྱུད་དཔྱད་པ་རྣམས་སྨན་པའོ།   ཞེས་གསུངས་སོ།    །འོ་ན་བོད་ཀྱི་ལོ་རྒྱུས་ཐོག་སྨན་པ་ཞེས་པ་དུས་ནམ་གྱི་ཚེ་བྱུང་བ་ཡིན་ནམ་ཞེ་ན།   བཤད་ཚུལ་གཉིས་ལས། གཅིག་ནི་སྔ་རབས་ཞང་ཞུང་གི་ལོ་རྒྱུས་ལྟར་སྨན་དཔྱད་བསྟན་པའི་རྐང་འཛིན་དཔྱད་བུ་ཁྲི་ཤེས་ཞེས་པ་ཡིན་པ་དང་།      གཅིག་ཤོས་ནི་སྤྱི་སྐད་ལྟར་ལྷ་ཐོ་ཐོ་རི་གཉན་བཙན་གྱི་སྐུའི་རིང་ལ་བྱུང་བའི་སྨན་པ་དུང་གི་ཐོར་ཅོག་ཅན་ཞེས་པ་ཡིན་པས་ཇི་ལྟར་ཡང་།    ཞང་བོད་ལོ་རྒྱུས་ཐོག་སྨན་པ་ཞེས་བྱ་བ་ནི་ཆེས་གནའ་བོའི་དུས་ནས་བྱུང་བ་ཚད་ཐུབ་ཀྱི་ཁུངས་དང་བཅས་པ་ཡོད།  
       འཚོ་བྱེད་སྨན་པ་ཞེས་པ་ནི་ཆོས་རྒྱལ་སྲོང་བཙན་གྱིས་བོད་ཀྱི་སྨན་པར་གནང་བའི་ཆེ་བསྟོད་དམ་བསྔཊ་བརྗོད་ཀྱི་མཚན་ཡིན།      དེའི་དུས་སུ་སྔ་ཡོད་བོད་ཀྱི་གསོ་རིག་གི་ཁྱད་ཆོས་ཐུན་མོང་མ་ཡིན་པ་ཡོད་པའི་རྨང་གཞིའི་སྟེང་ཀོང་ཇོས་བསྣམས་པའི་ཀྲུང་དབྱི་སྨན་གཞུང་༼ སྨན་དཔྱད་ཆེན་མོ་ ༽དང་།    དེ་མིན་རྒྱ་གར།   རྒྱ་ནག  སྟོད་ཕྱོཊ་བཅས་ཀྱི་སྨན་པ་གདན་དྲངས་ཏེ་མཉམ་དུ་བརྩམས་པའི་༼མི་འཇིགས་མཚོན་ཆ༽ཞེས་པའི་སྨན་གཞུང་དར་རྒྱས་ཆེ་བ་བྱུང་ཞིང་སྐབས་དེར། ལུགས་ཆེན་གསུམ་པོའི་ཚུལ་དག་མ་རྟོགས་ན།        སྨན་པ་ཆེན་པོའི་གྲངས་སུ་མི་འགྲོ་སྟེ། བདག་དང་གཞན་ལ་ཕན་པར་མི་ནུས་པས། །བར་སྣང་མཁའ་ལ་ལག་པས་མཐོས་བསྙབ་བཞིན། །ཞེས་པ་ལྟར་སྨན་དཔྱད་ཐམས་ཅད་ལུགས་སྡེ་གསུམ་དུ་བསྡུས་ནས་འཆད་པ་དང་བརྒྱུད་འཛིན་བདམས་ཏེ་སྨན་དཔྱད་སློབ་ཏུ་བཅུག         ཁོང་ཚོར་རིགས་བཟང་ངན་དང་མཐོ་དམན་མེད་པར་ནད་བཅོས་པར་བཀའ་བསྒོས་མིང་འཚོ་བྱེད་སྨན་པ་ཞེས་སུ་བཏགས། བྱ་དགའ་ལ་གཙིགས་ཆེན་དགུ་དང་གཙིགས་ཆུང་གསུམ་སྟེ་བཅུ་གཉིས་གནང་བས་སྨན་དཔྱད་གོང་འཕེལ་ཧ་ཅང་ཆེ་བ་བྱུང་།   མ་གཞི་འཚོ་བྱེད་དང་སྨན་པ་དོན་གཅིག་མིང་གི་རྣམ་གྲངས་ཡིན་རུང་།   དེ་གཉིས་མཉམ་དུ་བེད་སྤྱོད་བྱེད་དུས་སྐྱེས་བུའི་ལུས་དང་སྲོག་འཚོ་བར་མཛད་མཁན་གྱི་སྨན་པ་ཞེས་ཟེར་བས་མཚན་སྙན་གཟི་བརྗིད་སྔར་ལས་ལྷག་པའི་གཟེངས་བསྟོད་གནང་།       ལྷ་རྗེ་ཞེས་པའི་མཚན་ནི་ཚངས་པ་ལྷའི་མེ་ཏོག་གམ་ཁྲི་སྲོང་ལྡེའུ་བཙན་གྱིས་རྒྱལ་སྲིད་སྐྱོང་བའི་དུས་སུ་འཚོ་བྱེད་སྨན་པར་གནང་བའི་ཆེས་མཐོ་ཤོས་ཀྱི་མཚན་སྙན་ཞིག་ཡིན།    དེའི་སྐོར་སྐ་བ་ཤཱཀྱ་དབང་ཕྱུག་ཀུན་དགའ་རྒྱ་མཚན་དཔལ་བཟང་པོས་མཛད་པའི་༼ཁོག་འབུགས་ཤེས་བྱ་རབ་གསལ ༽ལས།   ཀྱེ།  བོད་ཀྱི་རྗེ་བློན་འབངས་བཅས་གུས་པས་ཉོན།   །འཚོ་མཛད་སྨན་པར་གྱུར་པ་འདི་རྣམས་ལ།   །བོད་འབངས་མགོ་ནག་ཡོངས་ཀྱིས་བཀུར་བར་གྱིས།   །ཅི་ཕྱི་འདི་ནི་ཚེ་སྲོག་སྟེར་བའི་ཕྱིར།  །མགོ་ནག་ཡོངས་ཀྱི་ལྷ་ནི་བཙན་པོ་སྟེ།  །དེ་ཡིས་བཀུར་བས་མཚན་ཡང་ལྷ་རྗེར་ཐོགས།  །འགྲོ་བའི་མགོན་ཡིན་གྲལ་གྱི་གོང་ལ་འཇོག །འབོལ་གྲུམ་སྟག་གཟིག་ཟ་འོག་དགུ་བརྩེགས་ཐིངས།   །ཞལ་སྐྱེམས་ཇ་ཆང་གསེར་དངུལ་སྐྱོབས་སུ་དྲོངས།   །དར་ཟབ་བེར་བསྐོན་རྩ་ཡི་ཁ་སྨར་ཞུས། །སྐྱེལ་བསུ་བརྟས་ཀྱིས་ཞབས་གླར་གསེར་དངུལ་ཕུལ།  །ས་རྡོའི་སྨན་ལའང་སྨན་ཡོན་སྨར་དུ་ཕུལ།  །ཡིད་འོངས་མཛེས་མ་ཀུན་གྱིས་སྤྱན་ཡང་འཁྲིད།   །བསྙེན་བཀུར་ཟས་སོགས་དུས་མིན་ཀུན་ཏུ་དྲོངས།   །བཅོས་ནོར་ལག་དགྲས་ཤི་ཡང་སྟོང་མ་ལེན།   །ཆོག་པར་མ་འཛིན་འཕྲལ་ཕུགས་ཀུན་ཏུ་གཟོབ།  །སྔར་འདྲིས་མ་བརྗེད་ཡུན་དུ་ཕྱི་ཐག་བསྲིང་། །བདག་གི་ཕུལ་བའི་བླ་གཙིགས་བཅུ་གསུམ་འདི། །གང་གི་འདའ་ཡང་ཆད་པས་གཅད་པར་བྱ།  །ཞེས་གསུངས་པ་དང་། ད་དུང་སྨན་པ་རྣམས་ལ་གཙིགས་སུ་བཟུང་བ་ལྔ་གསུམ་བཅོ་ལྔ་གནང་བ་ནི།   །སྨན་པ་ཁྱིམ་མཚེས་ཡིན་ཀྱང་བསུ་བ་དང་།   ཞབས་གླ་གཉེན་ཚན་ཡིན་ཀྱང་ཕྱག་དཀར་དང་ཞུ་རྟེན།   བྲན་གཡོག་ཡིན་ཀྱང་བཀུར་སྟི་དང་གུས་པ།  དོན་མེད་དུ་འཕྲད་ཀྱང་གདོང་གསོལ་དང་ངོ་དགའ།  དགྲ་ཕྱོགས་པ་ཡིན་ཀྱང་བློ་གཏད་དང་དུང་སེམས་ལྔ།  ཡང་སྨན་པ་ཚུར་འབྱོར་པ་ལ་བསུ་བ།  ཕར་བཞུད་པ་ལ་སྐྱེལ་མ།    །ནད་པ་བལྟ་བ་ལ་ཞུ་འབུལ།  །ཕན་པ་ལ་གཏང་རག    རྟིང་བསྐུལ་སྐྱེས་སུ་འཁྱོལ་བ་དང་ལྔ་སྟེ་བཅུ།   སྨན་པས་ནོར་ལ་མིག་བཙུགས་བྱས་ཀྱང་འདོད་ཅན་དུ་མི་སྨྲ།  བཟའ་བ་ལན་བརྒྱར་བཟའ་ཡང་གྲོད་ཆེར་མི་སྨྲ།  ཐོ་ཅོ་དང་བག་ཡངས་སུ་བྱེད་ཀྱང་ཀོ་ལོང་མི་བྱེད།    སྨན་དང་ཆ་བྱད་བོར་ཡང་ཚབ་དང་སྐྱིན་འཛུགས།    བྱ་བ་ལས་ཀ་ཅི་དགོས་ལ་དུས་བསྙགས་པ་དང་ལྔ་སྟེ་བཅོ་ལྔའོ། །
        རྒྱལ་པོས་སྨན་པ་རྣམས་ལ་བསླབ་བྱ་གནང་སྟེ་བཀའ་སྩལ་པར།   སྨན་པ་ཕ་ཡིན་ནད་པར་སྙིང་རྗེས་སྐྱོང་།  །ནད་པ་བུ་ཡིན་ངན་མཚངས་ཕྱིར་མ་བརྗོད། །བཟང་པོའི་དམའ་འབབ་ཁྱིམ་ནས་ནོར་མ་བརྐུ།     མི་ཆེན་ཁྲེལ་བས་འཚོ་ཟས་ལ་མ་འཕང་། ལག་དགྲས་འཕུང་བས་སྐྱུར་ལ་དད་མ་ཆེ།   །མི་སྲོག་ཐལ་ཆར་མ་ཤོར་དཔྱད་ལ་གཟོབ།  ཁྱད་པར་ནད་པ་དང་ནི་སྨན་པ་ཡི། །བར་དུ་ངོ་ཚ་མ་ཆེ་ནད་ཆེན་འཇུག  །ཅེས་སོགས་བསླབ་བྱ་གསུངས་ནས་སྨན་པའི་མིང་ལ་ལྷ་རྗེ་ཐོགས་པ་དེ་ནས་བྱུང་།
        དུས་ཕྱིས་དབུས་གཙང་སོགས་སུ་སྨན་པའི་མིང་ལ་ཨེམ་རྗེ་ཞེས་འབོད་སྲོལ་ཡོད་པ་འདི་ནི་༧ རྒྱལ་དབང་ལྔ་པ་ཆེན་པོའི་སྐབས་མཚོ་སྔོན་གྱི་སྟོད་སོག་མང་པོ་ལྷ་སར་གཏན་སྡོད་བྱས་པ་དང་། སོག་སྐད་ཁ་རྒྱུན་དུ་འཇགས་པ་ལས། མདོ་སྨད་ལྷོ་བྱང་དང་།  ཁམས་ཕྱོགས།  འབྲོག་ཁུལ་བཅས་པར་སྨན་པ་དང་།   འཚོ་བྱེད།    ལྷ་རྗེ་ཞེས་པའི་འབོད་སྲོལ་ད་དུང་མ་ཉམས་པར་གནས་ཡོད། དེ་མིན་ལྷ་ས་ལྕགས་རི་འགྲོ་ཕན་གླིང་ཚུགས་རྗེས་སེ་འབྲས་དགའ་གསུམ་ལ་གཏན་བཞུགས་མཛད་མཁན་གྱི་སྨན་པར་སྨན་སྤྱིན་པ་ཞེས་པའི་མཚན་ནས་འབོད་པ་བཅས་བོད་ཀྱི་སྨན་པའི་མིང་ཚིག་བྱུང་ཚུལ་ནི་དེ་ལྟར་ཡིན་ནོ། །

   གཉིས་པ།     སྨན་པའི་མཚན་ཉིད། 
 དེ་ཡང་རྗེ་བཙུན་གཡུ་ཐོག་ཡོན་ཏན་མགོན་པོ་རྙིང་མའི་རྣམ་པར་ཐར་པ་༼ བཀའ་རྒྱ་མ་གཟི་བརྗིད་རིན་པོ་ཆེའི་གཏེར་མཛོད༽ལས། རང་གི་ཡབ་ཁྱུང་པོ་རྡོ་རྗེའི་ཞལ་ནས།       མཚན་ཉིད་རྒྱ་ཆེ་མཁས་ན་སྨན་པ་ཡིན།    །མན་ངག་དོན་ལ་མཁས་ན་སྨན་པ་ཡིན།   ཚིག་དོན་འགལ་འཁྲུལ་འབྱེད་ན་སྨན་པ་ཡིན།  གཉེན་པོ་ནད་ཀྱི་ཐོག་འབབ་སྨན་པ་ཡིན།  ལག་ལེན་གནད་དུ་དྲིལ་ན་སྨན་པ་ཡིན། །བྱང་ཆུབ་སེམས་མཆོག་ལྡན་ན་སྨན་པ་ཡིན།  །ཞེས་གསུངས་པ་དང་།   སྨན་གཞུང་༼ཙ་ར་ཀ༽ལས། སྨན་པ་བློ་ལྡན་ཤེས་རབ་ཅན།       །རང་གི་ཡོན་ཏན་ཕུན་སུམ་ཚོགས།    །སྙིང་རྗེའི་སེམས་ཀྱིས་བརླན་པ་ནི།      །སྨན་པ་ཀུན་གྱི་སྤྱི་རྒྱན་ཡིན།   །ཞེས་དང་།   དེ་བཞིན་༼ཙ་ར་ཀའི་རྒྱལ་པོ་ལུགས་ཀྱི་བསྟན་བཅོས༽སུ།  ཚེ་ཡི་རིག་བྱེད་ལ་ལེགས་བསླབས།    །ཐམས་ཅད་ཤེས་ཤིང་ལྟ་ན་སྡུག    །ངང་ཚུལ་བཟང་ལ་བྱ་བ་མཁས།    །འདི་ནི་སྨན་པ་ཡིན་ཞེས་བྱ།   །ཞེས་དང་། ༼ཤ་ལི་ཧོ་ཏྲ༽ལས་ཀྱང་།        ནད་རྣམས་ཞི་བར་བྱེད་པ་དང་།    དེ་བཞིན་ཚོར་བ་གསལ་གྱུར་པ།    འདི་དག་སྨན་པའི་ལས་ཡིན་གྱི།    ཚེ་ཡི་བདག་པོ་སྨན་པ་ཡིན།     །ཞེས་སོཊ་གསུངས་ཡོད།   ཁྱད་པར་༼ བཤད་རྒྱུད༽སྨན་པའི་ལེའུར།      རྒྱུ་དང་ངོ་བོ་ངེས་ཚིག་དབྱེ་བ་དང་།  །ལས་དང་འབྲས་བུ་རྣམ་པ་དྲུག་གིས་བསྟན།   །ཞེས་གསུངས་པ་ལྟར།    སྨན་པའི་རྒྱུ་ལའང་ནང་གསེས་དབྱེ་ན།  །རྒྱུ་ནི་བློ་ལྡན་བསམ་པ་དཀར་བ་དང་། །མ་ཚིག་ལྡན་ཞིང་རྣམ་པ་བཟོ་བ་དང་།   །བྱ་བ་ལ་བརྩོན་མི་ཆོས་མཁས་དང་དྲུག     །ཅེས་མདོར་བསྟན་པ་དང་།   རྒྱས་བཤད།    དེ་ལ་དང་པོ་བློ་དང་ལྡན་པ་ནི།   །བློ་ཆེ་བློ་བརྟན་བློ་གཟེག་གསུམ་ལྡན་པས།   །གསོ་དཔྱད་མདོ་རྒྱས་མ་ལུས་ཁོང་དུ་ཆུད།   །ལག་ལེན་ཀུན་ལ་ཐོགས་རྡུགས་ཉམ་ང་མེད།  །རིག་པས་དཔྱད་ཤེས་མངོན་ཤེས་ཕྲ་མོ་འཆར།   །དེ་ཉིད་རྒྱུ་ཡི་ནང་ནས་མཆོག་ཅེས་བྱ།   །ཞེས་པ་ལྟར་དང་པོ་བློ་དང་ལྡན་པ་ཞེས་པ།    །སྤྱིར་བློ་ཞེས་ཆོས་རབ་ཏུ་རྣམ་པར་འབྱེད་པའི་ཤེས་རབ་དང་བློ་གྲོས་ཞེས་ཀྱང་ཟེར་བས་དོན་དུ་གཙུག་ལག་མཐའ་དག་གི་དོན་ཁོང་དུ་ཆུད་པའི་བློ་ཆེ་བ་དང་།   རྐྱེན་གང་གིས་ཀྱང་བསྐྱོད་པར་མི་ནུས་པའི་བློ་བརྟན་པ་དང་།  གང་ལའང་བརྟག་དཔྱད་སྔོན་དུ་གཏོང་བའི་བློ་གཟེག་པ་སྟེ་འདི་གསུམ་དང་ཡང་དག་པར་ལྡན་པའི་སྒོ་ནས་སྨན་དཔྱད་གཞུང་ལུགས་མདོར་བསྟན་རྒྱས་བཤད་ཀྱི་དོན་མ་ལུས་པ་ཁོང་དུ་ཆུད་པ་ལ་བརྟེན་ནས་དེ་དག་གི་ལག་ལེན་ཀུན་ལ་མི་ཤེས་པས་ཐོགས་པ་དང་རྡུགས་པ། མི་ནུས་པའི་ཉམ་ང་བག་ཚ་ལ་སོགས་པ་མེད་པར་བདེ་བླག་ཏུ་འཇུག་པ་དང་། གཞུང་ནས་མ་བཤད་པའི་དོན་རྣམས་ལའང་རིག་པ་དྲི་མ་མེད་པས་  དཔྱད་ཤེས་པ་ལྟ་བུ་མངོན་ཤེས་ཕྲ་མོ་གང་ལ་གང་འཚམ་པར་འཆར་བ་དེ་ཉིད་ནི་རྒྱུ་དྲུག་པོ་རྣམས་ཀྱི་ནང་ནས་མཆོག་དམ་པ་ཡིན་ནོ།  །
       བསམ་པ་དཀར་བ་ཞེས་པ་ནི་དེ་ཉིད་ལས།     བསམ་པ་དཀར་བ་བྱང་ཆུབ་སེམས་ལྡན་པ།     །སྦྱོར་བ་དངོས་གཞི་མཇུག་ལས་དང་པོ་ནི།   །སྡུག་བསྔལ་མཐོང་དང་ཕན་འདོགས་དད་པ་དང་།     །བཟང་ངན་བྱམས་སྡང་ཞེ་ནས་སྙོམས་པ་ཡིས།  །སྙིང་རྗེ་བྱམས་པ་དགའ་བ་བཏང་སྙོམས་བཞི། །སྨོན་པ་བྱང་ཆུབ་མཆོག་ཏུ་སེམས་བསྐྱེད་དེ། །དངོས་གཞི་འཇུག་པ་ཚད་མེད་ཉམས་སུ་བླངས། །འཇུག་པ་བསྔགས་པར་བལྟ་ཞིང་འཁོན་འཛིན་མེད།   །དེ་ལྡན་གསོ་སླ་འཚོ་མང་གྲོགས་སུ་གྱུར།    །ཞེས་པ་ནི།    སེམས་ཅན་ཐམས་ཅད་ཕ་མར་འདུ་ཤེས་པའི་བྱང་ཆུབ་ཀྱི་སེམས་དང་ལྡན་པ་ཞིག་སྟེ།  འདི་ལ་བསམ་སྦྱོར་དངོས་གཞི་འཇུག་གསུམ་ལས།   དང་པོ་བསམ་སྦྱོར་ཞེས་པ་ཁམས་གསུམ་པོ་འདི་སྡུག་བསྔལ་གྱི་རང་བཞིན་འབའ་ཞིག་ཏུ་མཐོང་བ་དང་།  སེམས་ཅན་ཐམས་ཅད་ལ་ཕན་འདོགས་འདོད་ཀྱི་བློ་རྒྱུན་ཆགས་པ་དང་དཀོན་མཆོག་གསུམ་པོ་ལ་མི་བསླུ་བའི་དད་པ་དང་།  གསེར་དང་བོང་བ་ལ་བཟང་ངན་དང་།    དགྲ་གཉེན་བྱམས་སྡང་སོགས་ཞེ་ཐག་པ་ནས་མཉམ་པའི་སྒོ་ནས་སྡུག་བསྔལ་མི་བཟོད་པའི་སྙིང་རྗེ་དང་།  བུ་གཅིག་པའི་མ་ལྟར་འགྲོ་ལ་བརྩེ་བའི་བསམ་པ་གང་དག་སྡུལ་བསྔལ་དང་བྲལ་བ་ལ་དགའ་བ།  ཉེ་རིང་ཆགས་སྡང་ཐམས་ཅད་དང་བྲལ་བའི་བཏང་སྙོམས་ལ་གནས་པར་བྱས་པ་ནི་སྨོན་པ་བྱང་ཆུབ་མཆོག་ཏུ་སེམས་བསྐྱེད་པ་ཞེས་ཟེར།   
       དེ་ནས་དངོས་གཞི་གཞན་ཕན་འབའ་ཞིག་ལ་འཇུག་པར་དུས་དང་།    གྲངས་དང་།         ཚད་ཀྱི་ངེས་གཟུང་མེད་པར་རིས་སུ་མ་ཆད་པར་ཉམས་སུ་བླང་དགོས།  དེ་ལྟར་བྱས་པའི་མཇུག་ཏུའང་གསོ་དཔྱད་ཀྱི་དོན་ལ་བསྔགས་པར་བལྟ་ཞིང་།          ནད་པ་སོགས་སུ་ལ་ཡང་འཁོན་འཛིན་མེད་པའི་ལྷག་བསམ་དེ་ལྟ་བུ་དང་ལྡན་ན་གང་ལྟ་བའི་ནད་པ་རྣམས་གསོ་སླ་ཞིང་འཚོ་བའི་གྲོགས་སུ་གྱུར་པ་ཞིག་ཡོང་བ་ཡིན་ནོ། །
       དེ་བཞིན་༼བཤད་རྒྱུད༽ལེའུ་ཉེ་དྲུག་པ་སྤང་བླང་མུ་བཞིར་བརྟག་པ་ལས།    སྨན་པ་མཁས་པའི་སྟེགས་ལ་འཛེགས་པ་དང་། །གཞུང་གི་དོན་ཤེས་ལས་རྣམས་མཐོང་ཞིང་གཙང་། །ཞེས་པའང་སྨན་པ་གང་ཞིག་མཁས་པའི་སྟེགས་བུ་ལྟ་བུ་བློ་གྲོས་དང་།  །སྦྱངས་པ།          སྙན་གྲགས།     །ཀུན་གྱིས་བཀུར་བ་དང་བཞི་ལ་འཛེགས་པས་རིག་པའི་གནས་ལྔ་སྤྱི་དང་།  །ཁྱད་པར་དུ་གསོ་བ་རིག་པར་མངོན་པར་མཐོ་བ་དང་།   རྒྱུད་དང་།         བསྟན་བཅོས་དང་།   ལུང་དང་།   མན་ངག་གཞིའི་སྒོ་ནས་གཞུང་གི་དོན་མཐའ་དག་ཤེས་པ་དང་།      བརྟག་པ་དང་།      སྨན་དང་།       དཔྱད་དང་།       ཟས་སྤྱོད་བསླབ་པ་དང་བཞིའི་ལས་རྣམས་མ་ལུས་པ་སློབ་དཔོན་གྱིས་ཉམས་སུ་ལེན་པ་མཐོང་བ་དེ་ཇི་ལྟ་བ་བཞིན་དུ་རང་གིས་གོམས་པ་དང་རིགས་ངན་ཞིང་འཚོལ་བ་དང་།    ནད་པའི་ནོར་ལ་བརྣབ་སེམས་ཀྱི་བློ་དང་།       ཕྱོགས་རིས་ཅན་གྱི་སྙིང་རྗེ་དང་།   སྨན་དཔྱད་ལ་སླ་ཐབས་ཀྱི་ཆོ་ག་ཁྲག་འཁྲུགས་ཡིད་དུ་མི་འོང་བ་བྱེད་པའི་སྐྱོན་རྣམས་དང་བྲལ་བས་གཙང་བ་སྟེ་སྨན་པའི་ཡན་ལག་བཅུ་དྲུག་དང་ལྡན་དགོས་ཞེས་གསུངས།    ༼ཡན་ལག་བརྒྱད་པའི་གླིང་གཞི༽ལས་ཀྱང་།   །སྨན་པ་མཁས་སྟེགས་གཞུང་དོན་ཤེས།   །ལས་རྣམས་མཐོང་ཞིང་གཙང་བ་ཡིན།     །ཞེས་དང་།      ཡང་༼ སྒྲོན་གསལ ༽དུ།       གསོ་བ་པོ་ནི་གཙང་ཞིང་ཤེས་རབ་ཅན།     །རྟོགས་དཔྱོད་བརྩོན་ལ་དབང་པོ་ཞི་ཞིང་དུལ།   །ཐོས་དང་ངང་བཟང་འགྲོ་ལ་སྙིང་རྗེ་ཆེ།།ཡིད་གཞུང་ལག་བཟོ་མཁས་སྟེགས་གཞུང་དོན་ཤེས།   །ཞེས་དང་། གཡུ་ཐོག་ཡོན་ཏན་མགོན་པོའི་༼ཡང་སྙིང་བསྡུས་པར༽ སྨན་པ་གཞུང་དོན་ལ་མཁས་ཤིང་།   །ལུང་ལ་འདྲིས་པའི་བཟང་པོ་དག  །ལས་ལ་གོམས་ཤིང་དག་པ་དང་།      །ཁྱབ་སྟེ་ཡོངས་སུ་གནས་པ་ཡིན།    །ཞེས་པ་ལ་སོགས་པའི་ཡོན་ཏན་དང་ལྡན་པ་ཞིག་དགོས། །གཞན་ཡང་༼འདུལ་བ་བཞི་བམ་པོ་དྲུག་ཅུ་རྩ་གཉིས༽ལས་ཀྱང་།  འཚོ་བྱེད་སྨན་པ་ཟུག་རྡུ་འབྱིན་པ་ཡན་ལག་བཞི་དང་ལྡན་པ་ནི་རྒྱལ་པོ་ལ་འོས་པ།  རྒྱལ་པོ་ལ་མཁོ་བ།    རྒྱལ་པོའི་ཡན་ལག་གི་གྲངས་སུ་འགྲོའོ།     བཞི་གང་ཞེ་ན།     དེ་ལ་སྨན་པ་ཟུག་རྔུ་འབྱིན་པ་ནད་ལ་མཁས་པ་ཡིན།   ནད་ཀུན་ནས་སློང་བ་ལ་མཁས་པ་ཡིན།         ནད་བྱུང་བ་སྤོང་བ་ལ་མཁས་པ་ཡིན།     སྤོང་བ་ཕྱིས་མི་འབྱུང་བ་ལ་མཁས་པ་ཡིན་ཏེ། ནད་ལ་མཁས་པ་ཅི་ལྟ་བུ་ཞེ་ན། དེ་ལ་སྨན་པ་ཟུག་རྔུ་འབྱིན་པས་ནད་ཤེས་ཤིང་།  ནད་འདི་ནི་འདི་ལྟ་བུ་དང་འདི་ལྟ་བུ་ཡིན་ནོ་ཞེས་དེ་ལྟར་ནད་ལ་མཁས་པ་ཡིན་ནོ།  །ནད་ཀུན་ནས་སློང་བ་ལ་མཁས་པ་ཅི་ལྟ་བུ་ཞེ་ན།   དེ་ལ་སྨན་པ་ཟུག་རྔུ་འབྱིན་པས་ནད་ཤེས་ཤིང་།    འདི་ནི་རླུང་གིས་ཀུན་ནས་བསླང་བའམ་མཁྲིས་པས་ཀུན་ནས་བསླང་བའམ་བད་ཀན་གྱིས་ཀུན་ནས་བསླང་བའམ་བདག་ལས་གྱུར་པའམ་གཞན་ལས་གྱུར་པའམ་འདུས་པ་ལས་གྱུར་པའོ་ཞེས་དེ་ལྟར་ནད་ཀུན་ནས་སློང་བ་མཁས་པ་ཡིན་ནོ།  །ནད་བྱུང་བ་སྤོང་བ་ལ་མཁས་པ་ཅི་ལྟ་བུ་ཞེ་ན།    དེ་ལ་སྨན་པ་ཟུག་རྔུ་འབྱིན་པ་ནད་ཤེས་ཤིང་།   ནད་འདི་ནི་མིག་སྨན་ནམ།   བསྐུ་མཉེའམ་སྐྱུགས་སྨན་ནམ།    བཀྲུ་སྨན་ནམ།   སྣར་བླུག་པའམ།  དུ་བས་བདུག་པའམ།    ནན་རྩིས་ལས་ཀྱིས་སྤོང་བར་འགྱུར་རོ།     །ཞེས་དེ་ལྟར་ནད་བྱུང་བ་སྤོང་བ་ལ་མཁས་པ་ཡིན་ནོ། །ནད་སྤངས་པ་ཕྱིས་མི་འབྱུང་བ་ལ་མཁས་པ་ཅི་ལྟ་བུ་ཞེ་ན།    དེ་ལ་སྨན་པ་ཟུག་རྔུ་འབྱིན་པ་ནད་ཤེས་ཤིང་།   ནད་འདི་ནི་འཕྲོད་པའི་ཆོ་ག་འདི་ལྟ་བུ་དང་། འདི་ལྟ་བུ་དག་བྱས་ཏེ་སྤངས་ན་ཕྱིས་མི་འབྱུང་ངོ་ཞེས་དེ་ལྟར་ནད་སྤངས་པ་ཕྱིས་མི་འབྱུང་བ་ལ་མཁས་པ་ཡིན་ཏེ།    དེ་ལྟར་སྨན་པ་ཟུག་རྔུ་འབྱིན་པ་ཡན་ལག་བཞི་དང་ལྡན་པ་རྒྱལ་པོ་ལ་འོས་པ་ཡིན།  རྒྱལ་པོ་ལ་མཁོ་བ་ཡིན། རྒྱལ་པོའི་ཡན་ལག་གི་གྲངས་སུ་འགྲོ་བ་ཡིན་ནོ།  །ཞེས་གསུངས་པ་བཅས་མདོར་ན་སྨན་པའི་ངོ་བོ་ནི།   ཉེས་པ་གནོད་བྱ་གཉེན་པོའི་མཚན་ཉིད་རྣམས།  །ཅི་རིགས་ཁོང་དུ་ཆུད་པ་ངོ་བོར་འདོད།  ཅེས་པ་ལྟར་སྨན་པ་གང་ཞིག་ཉེས་པ་གསུམ་དང་།   །གནོད་བྱ་བཅུ་དང་།   གཉེན་པོ་སྨན་དཔྱད་ཀྱི་མཚན་ཉིད་མཐའ་དག་རྣམས་དབང་པོ་རབ་འབྲིང་ཅི་རིགས་འཐད་པའི་ཚུལ་གྱིས་ཁོང་དུ་ཆུད་ཅིང་ཤེས་པ་དེ་ཉིད་སྨན་པའི་ངོ་བོ་ཡིན། ཞེས་གསུངས་པ་བཅས་སྨན་པའི་མཚན་ཉིད་བཤད་པ་དེ་ཙམ་མོ། །

        གསུམ་པ།      སྨན་པའི་དབྱེ་བ། 
         ༼བཤད་རྒྱུད༽ལེའུ་སོ་གཅིག་ལས།   དབྱེ་བ་སྨན་པ་བླ་ན་མེད་པ་དང་།    །ཁྱད་པར་ཅན་དང་ཕལ་པ་གསུམ་ཡིན་ཏེ།    །ཞེས་པ་ལས།  དུས་གསུམ་རྒྱུ་འབྲས་ནད་སེལ་གོང་ན་མེད། །ཞེས་པ་ནི། འདོད་ཆགས་ཞེ་སྡང་གཏི་མུག་སྟེ་དུག་གསུམ་གྱི་རྒྱུ་མ་རིག་པ་དང་།   དེའི་འབྲས་བུ་རླུང་མཁྲིས་བད་ཀན་གྱི་ནད་རྣམས་སེལ་བའི་སྨན་པ་ནི་སྨན་པ་བླ་ན་མེད་པ་སྟེ།    སྨན་པ་ཆེ་མཆོག་གཙོ་བོ་སྟེ།   །ཟུག་རྔུ་འབྱིན་པ་བླ་ན་མེད།   །ཅེས་སངས་རྒྱས་བཅོམ་ལྡན་འདས་ཡིན། 

       ཁྱད་པར་ཅན་གྱི་སྨན་པ་ནི་དེ་ཉིད་ལས།    གཞན་རིགས་མངོན་ཤེས་བྱམས་ལྡན་དྲང་པོར་སྲོང་།   །ཞེས་པ་ལྟར་ཁྱད་པར་ཅན་གྱི་སྨན་པས་གཞན་རྒྱུད་རིག་པའི་མངོན་པར་ཤེས་པ་དང་བྱམས་པ་དང་སྙིང་རྗེ་ཚད་མེད་དང་ལྡན་པས་སྡུག་བསྔལ་གྱིས་ཉམ་ཐག་པ་རྣམས་བདེ་ལ་སྦྱོར་ཞིང་།   རང་རྒྱུད་དྲང་པོར་བསྲང་བ་སྟེ།  ༼ཙ་ར་ཀ༽ལས།    དྲང་སྲོང་ཆེན་པོ་འདི་ཀུན་ཀྱང་།   །མངོན་ཤེས་ལྔ་དང་ལྡན་གྱུར་ཞིང་།  །རིག་པའི་གནས་མཆོག་བཅོ་བརྒྱད་ཤེས།  །ཞེས་པ་དང་མཚུངས་སོ། །
        སྨན་པ་ཕལ་པ་ལ་གཉིས་ཏེ།  དེ་ཉིད་ལས།  གནང་རིགས་རྗེས་སྦྱངས་ལས་གོམས་འགྲོ་བའི་གཉེན།   །འདོད་པས་འཕྲལ་དུ་ཆ་བཟུང་སྲོག་གི་གཤེད།  །ཅེས་གསུངས་པ་དང་།     དང་པོ་ཆོས་རྒྱལ་རྣམས་ཀྱི་བླའི་སྨན་པར་གནང་བ་རིགས་ནས་རིགས་སུ་བརྒྱུད་པའི་སྨན་པ་དང་།   རྒྱལ་པོའི་བླ་སྨན་གྱི་རིགས་མ་ཡིན་ཀྱང་དེ་དག་གི་རྗེས་སུ་ཞུགས་ནས་གཞུང་ལུགས་ལེགས་པར་སྦྱངས་པའི་སྨན་པ་དང་།    གལ་ཏེ་སྨན་དཔྱད་གཞུང་ལུགས་ལ་སྦྱངས་པའི་ཡོན་ཏན་རྒྱ་ཆེན་པོ་དང་མི་ལྡན་ཀྱང་སློབ་དཔོན་གྱི་ཕྱག་ལེན་དང་མཐོང་བ་བརྒྱུད་པའི་ལས་ལ་གོམས་པའི་སྨན་པ་བཅས་དེ་གསུམ་ནི་འགྲོ་བ་ནད་པའི་སྲོག་གི་དཔུང་གཉེན་ཡིན།   གཉིས་པ་སྨན་དཔྱད་གཞུང་དང་ལག་ལེན་མཐོང་གོམས་ཅི་ཡང་མེད་པར་ལྟོ་གོས་ཀྱི་འདོད་པས་འཕྲལ་དུ་སྨན་པའི་ཆ་ལུགས་བཟུང་སྟེ་སྨན་པའི་མིང་འཛིན་པ་དེ་ནི་མིང་ཙམ་གྱི་སྨན་པ་ལས་དོན་དུ་ནད་པའི་སྲོག་གི་གཤེད་མ་ཁོ་ན་ཡིན།
        དེའི་སྐོར་སུམ་སྟོན་ཡི་ཤེས་གཟུངས་ཀྱིས་མཛད་པའི་བཤད་རྒྱུད་ཀྱི་འགྲེལ་པ་༼ འབུམ་ནག་གསལ་སྒྲོན༽ནང་།   ནད་པ་རྒན་གོམས་ཀྱི་སྨན་པ།    ཤོག་བུ་མཚམས་འབྱེད་ཀྱི་སྨན་པ།    ཡིག་སྣ་བྲུལ་སྒྲུབ་ཀྱི་སྨན་པ།     རྒྱ་པ་ཕྱོགས་ཐོས་ཀྱི་སྨན་པ་དང་བཞིའོ།      །ནད་པ་རྒན་གོམས་ཀྱི་སྨན་པ་ནི།     ནད་པ་ཡུན་རིང་དུ་བྱས་པ་དེའི་རྒན་གོམས་པ་ལ་བརྟེན་ནས་སྨན་པ་བྱེད་པའོ།   །ནད་པ་རྒས་པས་སྨན་པར་འོང་བའོ།   །དེས་རང་ལ་བྱུང་བའི་ནད་དེ་བཅོས་ཤེས་ཀྱང་གཞན་གྱིས་བཅོས་མི་ཤེས་པར་བཅོས་པས་གཤེད་མར་འགྱུར་རོ།   །ཤོག་བུ་མཚམས་འབྱེད་ཀྱི་སྨན་པ་ནི།   ཟ་བས་མིད་པ་རིང་བ་ཁ་ཅིག  ཟླ་བ་རེ་རེ་ལ་དཔེ་ན་འདུག་པ་དེ་ཉིད་ཤེས་པར་བྱས་ནས་བློ་ལ་མ་ལོན་ལག་ལེན་མ་གོམས་པར་དཔེ་ལ་བལྟས་ཤིང་བཅོས་པ་དེས་ཀྱང་། དཔེ་དང་མཐུན་ཞིང་ན་བ་རྣམས་བཅོས་ཤེས་ཀྱང་མི་མཐུན་པ་རྣམས་མི་ཤེས་པས།    དཔེ་དང་ནམ་འབྲལ་ཙ་ན་ཐ་མལ་དུ་ལྷུང་ནས་གཤེད་མར་འགྱུར་རོ། །ཡིག་སྣ་བྲུལ་སྒྲུབ་གྱི་སྨན་པ་ནི།   ཡིག་མཁས་བྱས་ཏེ་དཔེ་རྒྱུན་བསྒྲུབས་པ་དང་ཇག་པ་བྱས་ཏེ་སྨན་པ་བཅོས་པའི་སྨན་དཔེ་འཁྱེར་བ་དང་། ཡི་གེ་དང་དཔེ་རྗེས་བྱས་ནས་བསྒྲུབ་པ་སོགས་ལ་བརྟེན་ནས་ནད་བཅོས་པ་དེ་སློབ་དཔོན་གྱི་གདམས་ངག་མ་ཐོབ་པས་གཤེད་མར་འགྱུར་རོ།     །རྒྱ་པ་ཕྱོགས་ཐོས་ཀྱི་སྨན་པ་ནི།     སྨན་རྒྱ་ཡུན་རིང་དུ་བྱས་པས་སྨན་འདི་ཚོ་ནད་འདི་ཡི་སྟེང་དུ་འགྲོ་བྱས་པས་ཕྱོགས་ཙམ་ཐོས་ནས་སྨན་ངོ་ཤེས་ཏེ་སྨན་པ་བྱེད་དོ། །རོ་ནུས་ཞུ་རྗེས་ནུས་པ་བསྡེབས་མི་ཤེས་པས་དེ་བཞི་ཀ་ནད་པའི་གཤེད་མར་འགྱུར་བའི་ཕྱིར་རོ། །ཞེས་གསུངས་འདུག   སྨན་པའི་དབྱེ་བ་འདིའི་སྐབས་སུ་གནང་རིགས་དང་།   རྗེས་སྦྱངས།   ལས་གོམས་ཀྱི་སྨན་པ་གསུམ་མཆོག་གི་སྨན་པ་དང་།  འདོད་པས་འཕྲལ་དུ་སྨན་པའི་ཆ་ལུགས་བཟུང་བ་སྨན་པ་ཐ་མ་ཞེས་གྲགས་པ་བཅས་མདོར་ན་མཆོག་གི་སྨན་པ་ནི་༼བཤད་རྒྱུད༽སྨན་པའི་ལེའུར། གདུང་བཙུན་བློ་དང་ལྡན་ཞིང་དམ་ལ་གནས།   །གཞུང་གི་དོ་མཁས་མན་ངག་གནད་དུ་བརྡེག །གོམས་ཐོབ་གཙོ་བོར་ཆོས་གཉེར་འདོད་པ་སྤངས།  །དུལ་ཞིང་བཟོ་མཁས་འགྲོ་ལ་བྱམས་སེམས་ཆེ། །གཡེལ་མེད་གཞན་གྱི་དོན་ལ་རང་དོན་སེམས།  །གསོ་དཔྱད་ཀུན་ལ་རྨོངས་མེད་སྨན་པ་མཆོག །འགྲོ་བ་ནད་པ་རྣམས་ཀྱི་མགོན་གཅིག་པུ།   །རིག་འཛིན་དྲང་སྲོང་རྣམས་ཀྱི་རྒྱུད་འཛིན་སྲས།  །འཚོ་མཛད་སྨན་པའི་རྒྱལ་པོའི་སྦྲུལ་པ་བཤད།  ཅེས་གསུངས་པ་དང་། དེ་ལས་ལྡོག་པ་སྨན་པ་ཐ་མ་སྐྱོན་བཅུ་གསུམ་ཅན་ནི།   དེ་ཉིད་ལས།  རིགས་རྒྱུད་མེད་པའི་སྨན་པ་དེ།  །ཝ་ཡིས་རྒྱལ་ས་བཟུང་བ་འདྲ།   ཀུན་གྱིས་སྤྱི་བོར་བཀུར་མི་འགྱུར།     །གཞུང་དོན་མི་ཤེས་སྨན་པ་དེ།  དམུས་ལོང་དག་ལ་རྫས་བསྟན་བཞིན།   །ནད་རིགས་བཅོས་ཐབས་ཤན་མི་ཕྱེད།    །མཐོང་གོམས་མེད་པའི་སྨན་པ་དེ། རྒྱུས་མེད་ལམ་དུ་ཞུགས་པ་བཞིན།  ནད་རྟགས་དཔྱད་ལ་ཐེ་ཚོམ་འགྱུར།  །བརྟག་ཐབས་མི་ཤེས་སྨན་པ་དེ།   །གཉེན་མེད་བྱེས་སུ་འཁྱམས་པ་འདྲ།   །ནད་ངོ་ཤེས་པ་གཅིག་མི་འབྱུང་།   །རྩ་ཆུ་མི་ཤེས་སྨན་པ་དེ།  །བྱ་པས་བྱ་གཏོང་མི་ཤེས་འདྲ།   །ཚ་གྲང་ནད་ཀྱི་སྐད་མི་སྟེར། །ཁ་དམར་མི་ཤེས་སྨན་པ་དེ།  །གཙོ་བོས་སྨྲ་བ་མི་ཤེས་འདྲ།    །རང་སྐྱེངས་གྲགས་པ་ངན་པ་འཕོག    །བཅོས་ཚུལ་མི་ཤེས་སྨན་པ་དེ།   །མུན་ཁུང་འབེན་ལ་བརྡེག་པ་འདྲ། །གཉེན་པོ་ནད་ཐོག་འབབ་མི་འགྱུར། །ཟས་སྤྱོད་མི་ཤེས་སྨན་པ་དེ།    །རང་སྲིད་དགྲ་ལ་ལོག་པ་འདྲ།   །ནད་ཀྱི་སྟོབས་སྐྱེད་ལུས་ཟུངས་འཇོམས།   །ཞི་སྦྱོར་མི་ཤེས་སྨན་པ་དེ།   །སོ་ནམ་མི་ཤེས་ཞིང་པ་འདྲ།  །དམན་ལྷག་ལོག་པས་ནད་སྐྱེད་འགྱུར།   །སྦྱོང་བྱེད་མི་ཤེས་སྨན་པ་དེ། །བྱེ་མའི་རི་ལ་ཆུ་འབེབས་འདྲ། །ནད་དང་ལུས་ཟུངས་མ་རུངས་བྱེད།    །ཆ་བྱད་སྨན་མེད་སྨན་པ་དེ།   གོ་མཚོན་མེད་པའི་དཔལ་བོ་འདྲ།   །ནད་ཀྱི་དགྲ་དཔུང་གཞོམ་མི་འགྱུར།   །གཏར་བསྲེག་མི་ཤེས་སྨན་པ་དེ།  །ནང་ཡན་མེད་པའི་རྐུན་པོ་འདྲ།  །ནད་དང་དཔྱད་དུ་འཛོལ་བར་འགྱུར།  །དེ་ཕྱིར་སྨན་པ་ངན་པ་ནི།   །ཅི་ཡང་ལོག་པར་རྟོག་པ་ཡིས།    །གསོ་བ་ལོག་པ་དག་ཏུ་འགྱུར།    །བདུད་ཉིད་སྨན་པའི་ཆ་བྱད་ཅན། །གཤིན་རྗེའི་ཞགས་པ་ཐོགས་པས་ན།   །སྲོག་གི་གཟུ་བ་ཡིན་པའི་ཕྱིར།  །འབྲེལ་བ་མི་བྱ་འཁོར་རྣམས་འཕུང་།   །ཞེས་གསུངས་པ་དང་།   ༼ཙ་ར་ཀ༽ལས་ཀྱང་། །སྡིག་ཅན་བློ་གྲོས་ངན་པ་ཅན།   །སྨན་པའི་གཟུགས་བརྙན་དེ་དག་དང་།  །གཏམ་འབྲེལ་པར་ཡང་མི་བྱ་ན།  །དངོས་སུ་བརྟེན་པ་སྨོས་ཅི་དགོས།   །ཞེས་དང་།  རྟ་དབྱངས་ཀྱིས།    སྣོད་ངན་གནས་ས་འཕྲལ་དུ་ནི།     །ཧ་ལ་ཧ་ལར་འགྱུར་བ་བཞིན།   ཞེས་དང་། གཡུ་ཐོག་མགོན་པོའི་༼ཡང་སྙིང་བསྡུས་པར༽བསྟན་བཅོས་ངེས་པ་མི་ཤེས་ཤིང་།    །ཚིག་ཙམ་ལ་ནི་རྗེས་གཞོལ་བའི། །གཤིན་རྗེའི་ཞགས་པ་ཐོགས་པ་བཞིན།   །སྨན་པ་ངན་པ་རིང་དུ་སྤང་། །ཞེས་གསུངས་སོ། །

      བཞི་པ།     སྨན་པའི་ལས་བཤད་པ །

      ༼བཤད་རྒྱུད༽སྨན་པའི་ལེའུ་ལས། སྨན་པའི་ལས་ལ་ཐུན་མོང་ཁྱད་པར་གཉིས།  །དང་པོ་ལུས་ངག་ཡིད་ཀྱི་བྱ་བའི་ལས། །ལུས་ཀྱིས་སྨན་དང་ཆ་བྱད་ཚོགས་པར་བསགས།     །ནད་པའི་བྱ་བ་གང་ཡིན་དོན་དུ་གཉེར།  །ངག་གི་ལས་ནི་ཁ་དམར་གདགས་པ་སྟེ། ངག་ཚིག་སྙན་པས་ནད་པ་སྤྲོ་བསྐྱེད་ནུས།  །ཡིད་ལས་མ་འཁྲུལ་བརྩོན་པས་བསམ་ཞིང་གཞིག   །ཅེས་གསུངས་པ་དང་།   གཉིས་པ་སྨན་པའི་ཁྱད་པར་གྱི་ལས་ནི།  །དེ་ཉིདལས།  ཁྱད་པར་ལས་ནི་ལྟ་སྒོམ་སྤྱོད་པ་གསུམ།  ལྟ་བ་ཆོས་རྣམས་ཀུན་ལ་དབུ་མར་རྟོགས།  །དམན་མཐའ་ལྷག་མཐའ་ལོག་པའི་མཐའ་སྤངས་པའི།   །ཡང་དག་དབུ་མར་ལྟ་བ་ལྟ་བའི་མཆོག    །སྒོམ་པ་ཚད་མེད་བཞི་ཡི་ངང་དུ་གནས།    །ལོག་པའི་གོལ་ས་གཞི་རུ་མ་ཤོར་གཅེས།   །སྤྱོད་པ་སྤང་བླང་གཉིས་ལས་མི་དགེ་སྤང་།   །སྨྱོ་འཆམ་ཐོ་ཅོ་སྡིག་པ་ངན་སྤྱོད་དོར།  །སྤྱིན་དང་ཚུལ་ཁྲིམས་བཟོད་པ་བརྩོན་འགྲུས་སྤྱད།    །ཅེས་པ་ལྟར།   །སྨན་པའི་ཐུན་མོང་གི་ལས་ཞེས་པར་ལུས་ངག་ཡིད་གསུམ་དང་། །ཁྱད་པར་གྱི་ལས་ལྟ་སྒོམ་སྤྱོད་གསུམ་གསུངས་པ་ལས། །ཐུན་མོང་གི་ལས་ཞེས་པ་གོ་བ་དེ་བས་སྤྲོད་པ་དར་ཞིང་།   །ལྟ་སྒོམ་སྤྱོད་གསུམ་སྐོར་ལ་ནང་དོན་རིག་པ་དང་སྦྱར་ནས་གསུངས་པ་ལས།   སྨན་པར་དེ་ལྟ་བུའི་བཤད་ཚུལ་ཨེ་ཡོད་སྙམ་ན།   ངེས་པར་ཡོད་དོ། ༧ མི་དབང་པཎྜི་ཏ་སངས་རྒྱས་རྒྱ་མཚོས་༼བཤད་རྒྱུད་པེེ་སྔོན༽ནང་།  དེ་ལྟར་ལྟ་སྒོམ་ཞེས་པར་སྤྲོ་ན་བསམ་ལས་འདས་ཤིང་། ནང་དོན་རིག་པ་དང་སྦྱར་བ་ནི་བེེ་ཌཱུར་དཀར་པོ་མ་བུ་སོགས་གཞན་དུ་བཤད་པ་ལས་ཤེས་པར་བྱ་ཞིང་།  སྐབས་འདིར་སྨན་པ་ཁོ་ན་སྟེ་ཞེས་གསུངས་པ་དང་།   ཡང་དེའི་འཕྲོ་མཐུན་དེ་གསུངས་པར།  ཁྱད་པར་གྱི་ལས་ལྟ་སྒོམ་སྤྱོད་གསུམ་ཡོད་པའི་ལྟ་བ་ནི།  ཉམས་སུ་བླང་བར་བྱ་བའི་ཆོས་རྣམས་མ་ལུས་ཀུན་ལ་དབུ་མ་སྟེ་དྲང་པོ་ཁོ་ནར་རྟོགས་པར་བྱ་སྟེ། དེའང་ནད་ངོས་འཛིན་དང་སྨན་དཔྱད་སོགས་དམན་པའི་མཐའ་དང་།   ལྷག་པའི་མཐའ་དང་།    ལོག་པའི་མཐའ་སྟེ་རྣམ་པ་གསུམ་སྤངས་པའི་ཉམས་སུ་ལེན་ཚུལ་ཡང་དག་པ་དབུས་སུ་དྲང་པོའམ་དབུ་མར་ལྟ་བ་ནི་ལྟ་ཚུལ་རྣམས་ཀྱི་མཆོག་ཏུ་གྱུར་པའོ། །
       སྨན་པ་རྣམས་ཀྱིས་ཉམས་སུ་བླང་བ་ཁྱད་པར་དུ་བྱ་བ་ནི་སྒོམ་པ་སྟེ།   སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག   སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག སྡུག་བསྔལ་མེད་པའི་བདེ་བ་དང་མི་བྲལ་བར་གྱུར་ཅིག      ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ཆེན་པོ་ལ་གནས་ནས་འཇིག་རྟེན་གྱི་ཆོས་བརྒྱད་མགོ་སྙོམས་པར་གྱུར་ཅིག    སྙམ་དུ་ཚད་མེད་བཞིའི་ངང་དུ་གནས་པར་བྱའོ་ཞེས་དང་།    དེའང་ཕྱོགས་རིས་ཅན་དུ་སོང་ན་ལོག་པའི་གོལ་ས་ཡིན་པས་བྱས་པ་མི་གཟོ་བ་རྣམས་ལ་བྱམས་པ་དང་། སེམས་ཅན་ལ་སྡང་བ་རྣམས་ལ་སྙིང་རྗེ་བ་དང་།  སྨན་པ་གཞན་གྱིས་བལྟས་པའི་ནད་པ་ཤི་བ་ལ་དགའ་བ་དང་། ནད་པ་ཤི་གསོན་གང་ལའང་ཇི་མི་སྙམ་པར་བཏང་སྙོམས་སུ་གནས་པ་སྟེ་བཞི་རུ་མ་ཤོར་བ་གཅེས་སོ། །
       སྨན་པ་རྣམས་ཀྱི་ཁྱད་པར་དུ་སྤྱད་པར་བྱ་བའི་སྤྱོད་པ་ལ་སྤང་བར་བྱ་བ་དང་།    བླང་བར་བྱ་བ་གཉིས་ལས།   དང་པོ་ནི་སྲོག་གཅོད་པ་སོགས་ལུས་ངག་ཡིད་གསུམ་གྱི་སྒོ་ནས་མི་དགེ་བ་བཅུ་སྤང་བར་བྱ་ཞིང་། དེར་མ་ཟད་མ་རབས་ཀྱི་རྣམ་ཐར་སྨྱོ་སྤྱོད་དང་། འཆལ་གཏམ་དང་།     ཐོ་ཅོ་དང་།      སྡིག་ལབ་ལ་སོགས་པ་ཡ་རབས་ཡོན་ཏན་ཅན་རྣམས་དང་བསྲེ་མི་རུང་བའི་ངན་སྤྱོད་རྣམས་དོར་བར་བྱའོ། །ཞེས་གསུངས་འདུག

        སྨྱོ་འཆམ་ཐོ་ཅོའི་སྐོར་༼ གཡུ་ཐོག་རྙིང་མའི་རྣམ་ཐར༽ལས།  དུག་ཆུ་ཆང་ལ་དགའ་ན་སྨན་པ་སྨྱོ།  །གཡོ་སྒྱུ་སྡིག་ལ་དགའ་ན་སྨན་པ་སྨྱོ།  །མཐོ་འཇུག་ངན་ལ་སྡང་ན་སྨན་པ་སྨྱོ། །བུད་མེད་གཡེམ་ལ་དགའ་ན་སྨན་པ་སྨྱོ། །དོན་མེད་སྐུར་འདེབས་བྱེད་ན་སྨན་པ་སྨྱོ།  །སྨན་སྦྱོར་སྡེབས་ལ་མི་བརྟེན་སྨན་པ་སྨྱོ། །ཞེས་དང་།  ཡང་དེ་ཉིད་ལས། འཆལ་བ་ནི།       ཁས་བླངས་དོན་ཐོག་མི་རྒྱུག་སྨན་པ་འཆལ།   །བློ་བྲིད་རྫུན་འཕྲུལ་བྱེད་ན་སྨན་པ་འཆལ།  །
        ལེ་ལོ་ཆང་དབང་སོང་ན་སྨན་པ་འཆལ།   །མི་ཤེས་ཤེས་པར་རློམ་ན་སྨན་པ་འཆལ།   །མི་སྲོག་ཚོད་ལེན་བྱེད་ན་སྨན་པ་འཆལ།  ཤེས་མེད་འོ་དོད་འབོད་ན་སྨན་པ་འཆལ།  ཞེས་དང་།   ད་དུང་གསུངས་པར།   མྱོང་མེད་ཁ་ཏ་བྱེད་ན་སྨན་པ་འཁྲུལ།    །ཚ་གྲང་སྡེབས་ལ་མི་མཁས་སྨན་པ་འཁྲུལ།  །བསིལ་དྲོད་ཕྱོགས་ལོག་བྱེད་ན་སྨན་པ་འཁྲུལ།  །ཟས་དང་སྤྱོད་ལམ་མི་མཐུན་སྨན་པ་འཁྲུལ།  ཁ་དམར་གཏར་བསྲེག་མི་ཤེས་སྨན་པ་འཁྲུལ། ཚིག་དང་ཉམས་ལེན་འཛོལ་ན་སྨན་པ་འཁྲུལ། །ཞེས་གསུངས་སོ། ། 
        ཡང་བྱང་པ་རྣམ་རྒྱལ་གྲགས་བཟང་གིས་མཛད་པའི་༼བཤད་པའི་རྒྱུད་ཀྱི་རྒྱ་ཆེར་འགྲེལ་པ་བདུད་རྩིའི་ཆུ་རྒྱུན༽ཞེས་པ་ལས། ངན་སྤྱོད་ལྔ་གསུམ་བཅོ་ལྔ་གསུངས་ཤིང་། དེ་དག་ནང་སྨྱོ་སྤྱོད་གསུམ་དོར་བ་ནི་།  ཕྱི་མའི་རྣམ་སྨིན་འཁུར་ན་སྨན་པ་སྨྱོ། །མཁས་ལ་མཉམ་དུ་རེ་ན་སྨན་པ་སྨྱོ།   །རང་བཅོས་གྲོགས་མགོ་འདོན་ན་སྨན་པ་སྨྱོ། །ཞེས་བྱ་བ་སྟེ་ཕྱི་མ་རྒྱབ་ཏུ་བོར་ནས་ཚེ་འདི་ལ་སྙན་གྲགས་ཅི་ཐོབ་དང་།  །ཟས་ནོར་ཅི་ཐོབ་བྱེད་པ་ནི་སྨྱོ་བ་ཡིན།   །ཚེ་འདི་བས་ཕྱི་མ་ཡུན་རིང་བའི་ཕྱིར་རོ། །
       སྨན་པ་རང་བས་མཁས་པ་གཅིག་བྱུང་བ་ལ་དེའི་འོག་ཏུ་མི་འཛུལ་བར་དྲེགས་པ་སྐྱེད་དེ་མཉམ་དུ་རེ་ནའང་སྨྱོ་བ་ཡིན་ཏེ་མཁས་པ་དེ་ཞེ་ཁྲེལ་སྐྱེ་བའི་ཕྱིར་རོ། །
སྨན་པ་མཉམ་པོ་གཉིས་ནད་པ་དབར་དུ་བཅུག་པ་ལ་ནད་པ་གསོ་བའི་དཀའ་སྤྱད་རང་གིས་འཁུར་ནས་མཁས་ཁྱད་ནོར་ཁྱད་རོགས་ལ་ཤོར་ནའང་སྨྱོ་བ་ཡིན་ཏེ་ཁོས་རང་བསླུས་པའི་ཕྱིར་རོ། །
      འཆལ་སྤྱོད་གསུམ་དོར་བ་ནི། བསླུ་བྲིད་རྫུན་འཕྲུལ་ཆེ་ན་སྨན་པ་འཆལ།   །ཁས་བླངས་དོན་ཐོག་མི་རྒྱུག་སྨན་པ་འཆལ།  །ལེ་ལོ་ཆང་དབང་སོང་ན་སྨན་པ་འཆལ།   །ཞེས་བྱ་བ་ནི།        བསླུ་བྲིད་ཀྱི་རྫུན་གྱིས་རྡེའུ་དང་སྐྲན་འདོན་པ་སོགས་བྱེད་ན་འཆལ་པ་ཡིན་ཏེ་རང་ཉིད་ཕྱིས་མི་བྲིམས་པའི་ཕྱིར་རོ། །ཁས་བླངས་པ་དེ་དོན་ཐོག་ཏུ་མི་རྒྱུག་པར་ཁ་མི་རྟག་ན་འཆལ་བ་ཡིན་ཏེ་རང་ལ་ཚད་མར་མི་འཛིན་པའི་ཕྱིར་རོ། །
      ལེ་ལོ་དང་ཆང་དབང་གིས་ནད་པ་ལ་གཡོལ་ན་འཆལ་བ་སྟེ་ནད་པ་བསླུས་ན་མི་ཡིས་འཕྱ་ཞིང་རང་འགྱོད་པའི་ཕྱིར་རོ། །
      ཐོ་ཅོའི་སྤྱོད་པ་གསུམ་དོར་བ་ནི།  བསླབ་ཤེས་མེད་པའི་དྲེགས་པ་ཐོ་ཅོ་ཡིན།  །རང་ལ་མེད་པའི་དཔལ་ཆོས་ཐོ་ཅོ་ཡིན།     །མཉམ་འགྲོགས་ཁྱད་གསོད་བྱེད་ན་ཐོ་ཅོ་ཡིན།   །ཞེས་བྱ་བ་སྟེ།   རང་ལ་བསླབ་ཤེས་ཀྱི་ཡོན་ཏན་ཅི་ཡང་མེད་པར་དྲགས་པ་ཆེན་པོ་བྱེད་ན་ཐོ་ཅོ་ཡིན་ཏེ་བསོད་ནམས་འགག་པའི་ཕྱིར་རོ། །
      རང་ལ་ནོར་རྫས་མེད་པར་དཔལ་ཆོས་ཀྱིས་འཆོར་བྱེད་ན་ཐོ་ཅོ་ཡིན་ཏེ་འཕྱར་ཁ་གཏོང་དུ་འོང་བའི་ཕྱིར་རོ། །
      སྨན་པ་མཉམ་པོ་གཅིག་ལའང་ཁྱད་གསོད་བྱེད་ན་ཐོ་ཅོ་ཡིན་ཏེ་རང་སྲོག་སྐྱེལ་བའི་ཕྱིར་རོ། །
      དིག་སྤྱོད་གསུམ་དོར་བ་ནི།  བྱས་ལ་རང་མདོ་མེད་ན་དིག་པ་ཡིན།   །ནད་ལ་ཁུ་ཁྲིག་མེད་ན་དིག་པ་ཡིན།  །རོ་ལ་སྨན་དཔྱད་བྱེད་ན་དིག་པ་ཡིན། །ཞེས་བྱ་སྟེ། ནད་པ་ལ་དཀའ་ཐུབ་ཆེར་བྱས་ནས་རང་གི་འདོད་དོན་སྒྲུབ་མ་ཤེས་ན་དིག་པ་ཡིན་ཏེ་རང་དོན་འཆལ་བར་ཤོར་བའི་ཕྱིར་རོ། །
ནད་ངོས་འཛིན་པའམ་གཉའ་གཅོག་པའི་དུས་སུ་ནད་དེ་ཡིན་ནམ་གཞན་དུ་འཁྱོག་གམ་སྙན་པའི་ཁུ་ཁྲིག་མེད་ན་ཆིག་ཚུགས་སུ་འཆོས་ན་དིག་པ་ཡིན་ཏེ་ནད་ཀྱི་འོག་འགྲིམས་མི་ཚོར་བའི་ཕྱིར་རོ། །  
      འཆི་ངེས་པའི་ནད་པ་ལ་སྨན་དཔྱད་བྱེད་ན་དིག་པ་ཡིན་ཏེ་རོ་ལ་ཚབ་བྱས་པའི་ཕྱིར་རོ། །
      ངན་སྤྱོད་གསུམ་དོར་བ་ནི། མཉམ་གཉིས་གོང་དུ་ཤོར་ན་སྨན་པ་ངན།   །སྨན་དང་ཆ་དཔྱད་གཡོར་ན་སྨན་པ་ངན།  །ནད་པ་དཔེ་ཡིས་འཆོས་ན་སྨན་པ་ངན།  །ཞེས་བྱ་སྟེ།    སྨན་པ་ཡོན་ཏན་མཉམ་པོ་གཅིག་ལ་གོང་དུ་ཤོར་ན་ངན་པ་ཡིན་ཏེ་རང་གིས་རང་གི་མགོ་སྨད་པ་ཡིན་པའི་ཕྱིར་རོ། །
      སྨན་དང་ཆ་དཔྱད་རང་ལ་མེད་པར་གཞན་ལ་གཡོར་ཞིང་འཆོས་ན་ངན་པ་ཡིན་ཏེ་མི་ལ་རག་ལུས་པའི་ཕྱིར་རོ། །
      ནད་པ་དཔེ་གཞན་བལྟས་ཀྱིན་འཆོས་ནའང་ངན་པ་ཡིན་ཏེ་ཁོང་དུ་མ་ཆུད་པའི་ཕྱིར་རོ།    །དེ་ལྟར་ངན་པའི་སྤྱོད་པ་བཅོ་ལྔ་པོ་དེ་རྣམས་དོར་ཞིང་སྐྱོན་མེད་པར་བྱའོ།  །ཞེས་གསུངས་སོ། །
      སྨན་པའི་བླང་བྱ་ནི་༼བཤད་རྒྱུད༽སྨན་པའི་ལེའུར།    སྦྱིན་དང་ཚུལ་ཁྲིམས་བཟོད་པ་བརྩོན་འགྲུས་སྤྱད།    །ཅེས་གསུངས་པ་ལྟར་སྨན་པ་དང་སྦྱར་ན།   དང་པོ་རྙེད་པར་དཀའ་བའི་སྨན་རྣམས་རང་གིས་ལེགས་པར་བཙལ་ནས་འགྲོ་བ་ནད་ཀྱིས་ཉམ་ཐག་པ་རྣམས་ལ་སྨན་རིན་ལ་སོགས་པའི་རེ་བ་མེད་ཅིང་ཕངས་པ་སྟེར་བ་སོགས་སྦྱིན་པའི་ཕོ་རོལ་དུ་ཕྱིན་པ་ལ་བསློབ་དགོས་པ་དང་།  དེ་བཞིན་ཚུལ་ཁྲིམས་ནི་དཔལ་ལྡན་རྒྱུད་བཞི་འདི་ཉིད་ལས་བཤད་པའི་མི་དགེ་བཅུ་སྤོང་བ་སོགས་དང་།  ནད་པའི་སྨན་ལ་སོགས་པ་ལ་ཡང་གཙང་སྦྲའི་ཀུན་ཏུ་སྦྱོད་པས་གནས་པར་བྱ་ཞིང་།   གཞན་ཡང་རང་གིས་ཁས་བླངས་པའི་སྡོམ་པ་དམ་ཚིག་མ་ཉམས་པར་མིག་གི་འབྲས་བུ་ལྟར་སྲུང་བའི་ཚུལ་ཁྲིམས་ཕ་རོལ་དུ་ཕྱིན་པ་ལ་བསླབ་དགོས།  བཟོད་པ་ནི་སྤྱིར་སྨན་པས་སེམས་ཅན་ཀུན་དང་།  ལྷག་པར་ནད་པའི་ངག་རྩུབ་མོ་དང་། དྲིན་དུ་མིག་གཟོ་བ་སོགས་ལ་ཁོང་ཁྲོ་ཞིང་རྣམ་པར་ཁྲོ་བ་མེད་པའི་བཟོད་པའི་ཕ་རོལ་དུ་ཕྱིན་པ་ལ་བསླབ་དགོས།   བརྩོན་འགྲུས་ནི་སྨན་པས་སྤྱིར་དགེ་བའི་ཕྱོགས་མཐའ་དག་དང་།  ཁྱད་པར་སྨན་གྱི་གཞུང་འཛིན་པ་དང་།  དཔེ་ཆ་བཟུང་བ།  ཟིན་པ་རྣམས་བསྐྱར་སྦྱོང་ལེགས་བྱ་བ་དང་། གོ་བས་ལྟ་ཞིང་ལྟ་རྟོག་འཐེམ་པར་བྱ་བ་དང་།  བརྗེད་པ་རྣམས་བརྗེད་སོས་བྱ་བ་དང་།    དྭོགས་པ་མ་ཆོད་པ་རྣམས་སློབ་དཔོན་ནམ་ཡོན་ཏན་ཅན་ལ་འདྲི་བ་དང་།   སྨན་སྣ་མ་ཚང་བ་མེད་པ་རྣམས་བཙལ་ཞིང་ལེགས་པར་ཚགས་བྱ་བ་དང་།  ཆ་དཔྱད་རྣམས་ཚོགས་པར་གྲ་སྒྲིག་པ།  ནད་པ་ལ་སྨན་སྟེར་དགོས་པ་དང་།     དཔྱད་བྱ་དགོས་པ་དང་།     ཟས་སྤྱོད་སློབ་དགོས་པ་རྣམས་དུས་ལས་མ་འགྱངས་པར་སྨན་པའི་བྱ་བ་གང་དང་གང་། ཅི་དང་ཅི་ཐམས་ཅད་ཁྲིག་ཁྲིག་ཚར་ཟིན་འགྲོ་བའི་བརྩོན་འགྲུས་མགོ་ལ་མེ་ཤོར་བ་ལྟ་བུ་དུས་ནར་མར་བརྟན་པར་བྱ་བའི་བརྩོན་འགྲུས་ཀྱི་ཕ་རོལ་དུ་ཕྱིན་པ་ལ་བསླབ་དགོས་པའོ། །བསམ་གཏན་ནི་སྨན་པ་དེས་སྤྱིར་ཐམས་ཅད་མཁྱེན་པའི་ལམ་དུ་འགྲོ་བའི་བསམ་གཏན་གྱི་གནས་པའི་རིགས་གང་ཤེས་ལ་སྐབས་སྐབས་སུ་མཉམ་པར་བཞག་པར་བྱི་ཞིང་།   ཁྱད་པར་སེམས་ཀྱི་རྣམ་པར་གསོ་བའི་རྒྱུད་གཞུང་ལ་ལྟ་རྟོག་དང་གཞིག་པ་གཏོང་བའི་ཚེ་དེ་ཁ་མ་གཏོགས་སེམས་རྣམ་པར་རྟོག་པ་གང་གི་ཡང་རྗེས་སུ་མི་འབྲང་བའི་བསམ་གཏན་ཕ་རོལ་དུ་ཕྱིན་པ་ལ་བསླབ་དགོས་པའོ། ཤེས་རབ་ནི།       བདག་མེད་སྟོང་པའི་དོན་ལ་རྒྱུན་དུ་བལྟ།   ཞེས་གསུངས་པ་དང་།  ཡང་ན་ཆོས་རབ་ཏུ་རྣམ་པར་འབྱེད་པའི་བློ་གྲོས་ནི་ཤེས་རབ་ཡིན་པས་དེ་ལ་གཙོ་བོར་ཆོས་ཀྱི་མིང་ལ་དམིགས་པ་ཐོབ་པའི་ཤེས་རབ།    མིང་དོན་མཉམ་དུ་དམིགས་པ་བསམ་པའི་ཤེས་རབ།    དོན་ལ་གཙོ་བོར་དམིགས་པ་བསྒོམ་པ་ལས་བྱུང་བའི་ཤེས་རབ་སྟེ་གསུམ་རྒྱ་ཆེར་བཤད་པ་ལྟར་ཤེས་རབ་ཕ་རོལ་དུ་ཕྱིན་པ་ལ་བསླབ་དགོས་པ་བཅས་སོ། །