ནང་དོན་ཡོང་ཁུངས།༢༠༡༢ལོའི་དམངས་སྲོལ་རིག་གནས་ཞིབ་འཇུག་དེབ་དང་པོ།...

གོར་སྐྱ་ནི་མཚོ་སྔོན་གཅན་ཚ་ས་ཁུལ་དུ་སྐྱེས་མ་རྣམས་ཀྱིས་སྤོ་ཐོ་དང་འབུད་ཤིང་སོགས་ཀྱིས་ལས་པའི་ས་འཚིག་མེ་ལ་བསྲེགས་ནས་དུས་ཚོད་གཉིས་གསུམ་ལྷག་འགོར་བའི་རྗེས་སུ།སླར་ཡང་སྐྱུར་སྒྲུང་བ་དེ་ཡང་ཡང་བསྣོས་ཏེ་བཟོ་དབྱིབས་མི་འདྲ་བར་བཟོས་ནས་ས་སྲེག་ཁོལ་མ་རུ་བསྲེགས་ཏེ་བྱུང་བའི་དམངས་ཁྲོད་རང་བཞིན་གྱི་ཟས་རིགས་ཤིག་ཡིན་ལ།འདིར་གོར་སྐྱ་སྲེག་པའི་གོ་རིམ་ཁྲོད་ཀྱི་ཕྱོགས་སོ་སོ་དང་།དེ་ནས་སྲེག་ཚར་བའི་རྗེས་ཀྱི་གོར་སྐྱའི་བཀོལ་སྤྱོད།གོར་སྐྱའི་དབྱིབས་གཟུགས་བཅས་ལ་ས་གནས་མང་ཚོགས་ཀྱི་བཤད་ཚུལ་གཙོར་བཟུང་ནས་བརྗོད་པར་མ་ཟད།གོར་སྐྱ་སྲེག་སྐབས་ཀྱི་ཆོ་ག་དང་།འཛེམ་བྱ།མཐུན་སྒྲིལ།ཀུན་སྤྱོད།རྟེན་འབྲེལ།གཉེན་སྟོན།གཤིན་ཆོས།སྤྱི་ཚོགས་འབྲེལ་འདྲིས་སོགས་བརྗོད་བྱར་བྱས་ནས་མང་ཚོགས་ཀྱིས་ལས་གང་ཞིག་སྤེལ་ཀྱང་དེའི་ནང་དུ་རིག་གནས་ཀྱི་མཚོན་དོན་སྣ་ཚོགས་ཡོད་པ་དེ་དག་ཀྱང་དམིགས་སུ་བཟུང་ནས་གསལ་བཀྲོལ་ལེགས་པར་གནང་འདུག...

བརྩམས་ཆོས་གང་དང་གང་ཞིག་ཡིན་ནའང་དེ་ལ་དུས་སྐབས་དེའི་ལོ་རྒྱུས་ཀྱི་རྒྱབ་ལྗོངས་དང་རྩོམ་པའི་དགོངས་གཞི་ངེས་ཅན་ཞིག་ཡོད་པ་སྨོས་མེད་ཡིན་མོད།དགོངས་གཞི་དེ་དག་རེ་རེའང་ཡུལ་དུས་ཀྱི་ཆ་རྐྱེན་ངེས་ཅན་འོག་ལ་ཐད་ཀར་དུ་སྟོན་ཐབས་བྲལ་བ་ན།དགོས་དབང་གིས་བརྗོད་བྱའི་སྒྲིག་གཞི་ཁག་ངོ་མཚར་བའི་བློས་བསླངས་དང་འཆར་ཡན།དེ་མིན་ཐབས་རྩལ་ཁྱད་པར་བ་དང་བྱུང་རིམ་ཀྱ་ཀྱུའི་སྒོ་ནས་སྟོན་པ་ཡིན་ལ།ལྷག་པར་གོང་དུ་བརྗོད་པ་བཞིན་བྱ་དངོས་གང་དང་གང་ཞིག་ཡིན་ནའང་སྒྲིབ་པའི་ཆ་ན་དོན་དངོས་ཀྱི་ཕྱི་མོ་རེ་ཡོད་པ་ཆོས་ཉིད་ཡིན་པས།ང་ཚོས་གཏམ་རྒྱུད་ཀྱི་བརྗོད་བྱའི་སྒྲིག་གཞི་དང་སྤྱི་ཁོག་འབུབས་ལུགས་ལ་བརྟེན་ནས་གཏམ་རྒྱུད་ཀྱི་བརྗོད་བྱའི་ཤུགས་ན་གབ་སྦས་སུ་ཡོད་པའི་རིག་གནས་ཀྱི་ཕྱི་མོ་ངོ་མ་ཞིག་འཚོལ་རྒྱུ་ཤིན་ཏུ་གལ་ཆེ།...

གློ་གཟར་དང་བཞོ་བཟུང་ནི་རྩིབ་ལོགས་དང་མདུན་ངོས་སུ་འཕྱང་བའི་རྒྱན་ཆ་ཞིག་ཡིན་ལ་གདོད་མའི་དུས་སུ་པགས་པ་སྲ་མོ་གྱོན་པའི་རྗེས་སུ་མཉེས་ནས་མཉེན་མོར་གྱོན་པ་དང་།འཚོ་བའི་བརྒྱུད་རིམ་ལས་རི་དྭགས་ཀྱི་པགས་པས་གྲང་ལྷགས་འགོག་པའི་ནུས་པ་ཆེ་ལ་འཚེམ་བཟོ་སླ་བའི་དགེ་མཚན་དུ་མ་དང་ལྡན་པ་རྟོགས་ནས།རི་དྭགས་ཀྱི་པགས་པ་གྱོན་པའི་སྲོལ་དར་བ་རེད།གནའ་ཤུལ་ཆབ་མདོ་ཁ་རུབ་སོགས་ནས་ཐོན་པའི་གནའ་རྫས་ལས་རུས་ཁབ་དང་རྡོ་ཁབ་སོགས་ལ་བརྟག་ན་མི་ལོ་སྟོང་ཕྲག་དུ་མའི་སྔོན་དུ་འཚེམ་བཟོའི་ལག་རྩལ་དར་ཡོད་པ་གསལ་པོར་ཤེས་ཐུབ།དེ་དག་ནི་ཕྱིང་བ་དང་པགས་པ་དག་ལས་སྣོན་བྱེད་པའི་ཡོ་བྱད་གལ་ཆེན་ཞིག་ཡིན་ལ།དེ་དག་འཇོག་བྱེད་ཀྱི་སྣོད་ཀྱང་ཕྱིང་བ་དང་པགས་པས་བཟོས་པ་ཞིག་ཡིན་པ་གསལ་པོར་ཤེས་ཐུབ་པས།སྣོད་དེ་དག་རིམ་བཞིན་ཇེ་རྒྱས་ཇེ་ལེགས་སུ་བཏང་ནས་སྟབས་བདེར་བཏང་ཡོད་ཅིང་།རང་གི་དགོས་མཁོ་ལ་དམིགས་ནས་ཆེད་དུ་རྩིབ་ལོགས་སུ་འདོགས་པའི་སྲོལ་བྱུང་བས་དེའི་མིང་ལ་ཁབ་ཤུབས་སམ་ལྕུང་མོ་ཟེར།...

འདིར་གཙོ་བོ་རྨོག་རུ་སྡེ་བའི་འབྲོག་མིའི་དུས་རྒྱུན་འཚོ་བའི་ཁྲོད་དུ་བཀོལ་བའི་མིང་བརྡ་སྣ་ཚོགས་ལས་འབྲི་མོ་གཙོ་བྱས་པའི་ནོར་གནག་གི་མིང་འདོགས་སྟངས་དང་།རི་སྤོ་སྐྱས་འགེལ་དང་བལ་འབྲེག་སོགས་དང་འབྲེལ་བའི་འབྲོག་ལས་ཀྱི་མིང་བརྡ་སྐོར་ཞིག་དང་།ད་དུང་ཚེ་ཐར་བཏང་བའི་ཕྱུགས་ཟོག་གི་མིང་འདོགས་ཚུལ་ལ་རགས་བསྡུས་ཤིག་དཔྱད་ཡོད།...

རྡོ་འགྱོག་ནི་བོད་རིགས་དམངས་ཁྲོད་དུ་དར་ཁྱབ་ཆེ་བའི་ལུས་རྩལ་རྣམ་གྲངས་ཤིག་ཡིན། དེའི་འབྲེལ་ཡོད་ཀྱི་དཔྱད་གཞིའི་རྒྱུ་ཆ་མང་ཤོས་ནི་དམངས་ཁྲོད་ངག་ཐོག་ནས་སྲུང་འཛིན་བྱེད་པ་ལས་ཡིག་ཐོག་ཏུ་བཀོད་པ་ཤིན་ཏུ་ཉུང་། ཡིན་ཡང་ཀུན་འདུས་ཀྱི་གླེགས་བམ་ཆེན་མོ་ཞེས་འབོད་པའི་ལོ་རྒྱུས་སྙན་རྩོམ་རིང་མོ་གླིང་སྒྲུང་ལས་རྡོ་འགྱོག་ལུས་རྩལ་སོགས་ཀྱི་དཔྱད་ཡིག་མང་པོ་བཀོད་ཡོད་ཅིང་། དེ་ནི་རིག་གནས་སྒྱུ་རྩལ་སྣ་མང་གི་འབྱུང་ཁུངས་དང་དེ་དག་གི་སྲུང་འཛིན་ཐད་ལ་ནུས་པ་གལ་ཆེན་ཞིག་ཐོན་བཞིན་པས། རྩོམ་འདིར་གེ་སར་སྒྲུང་ལས་བྱུང་བའི་རྡོ་འགྱོག་ལུས་རྩལ་དེ་སྔོག་འདོན་བྱས་ཤིང་། འབྲེལ་ཡོད་ལོ་རྒྱུས་ཡིག་ཚང་དང་འབྲེལ་ནས་དེའི་གོ་དོན་དང་། བྱུང་བ། འགྲན་སྲོལ། རྗེས་ཤུལ་སོགས་ཀྱི་ཐད་ནས་འཚོལ་ཞིབ་བྱས་འདུག...

བྱུ་རུ་ཞེས་པར་ཚིག་མཛོད་དག་ལས་མིང་གི་འགྲེལ་ཚུལ་མི་འདྲ་བ་ཡོད་དེ། ཀློང་རྡོལ་ངག་དབང་བློ་བཟང་གི«རིན་པོ་ཆེ་བརྟགས་ཐབ་མདོར་བསྡུས་ཉུང་གསལ»ལས།“རྒྱུ་དངོས་རྡོ་ཡིན་ཡང་རྒྱ་མཚོའི་འགྲམ་གྱི་བྲག་དང་བྱེ་མ་ལས་ཤིང་ལྟར་སྐྱེས་པ་སྟེ་རིགས་དཀར་དམར་གཉིས་ཡོད”ཚུལ་གསུངས།«སྨོན་ལམ་ཚིག་མཛོད»ལས།“རྒྱ་མཚོར་གནས་པའི་བྱུ་རུའི་འབུའམ་སྲོག་ཆགས་རིགས་འགའ་ཞིག་གི་ལུས་ལས་བྱུང་བའི་རྡོ་ཐལ་གྱི་རྒྱུ་དང་རྭ་སྤྱིན་འདྲེས་པ་ལས་གྲུབ་པའི་རུས་པའི་མིང་།”ཅེས་པ་ལྟ་བུའོ། །...