ཚྭ་རྡེའུ་ཡི་སྙན་ངག ང་ཡི་གཡུ་ཐོག་ཟམ་པ།

ཚྭ་རྡེའུ།
 

ཞོལ་དང་སྣང་རྩེའི་བར་ལ། །
གཡུ་ཐོག་ཟམ་པའི་སྒང་ལ། །
འགྲུལ་པ་ཕོ་གཞོན་མོ་གཞོན། །
ལམ་པ་སང་འགྲོ་གནངས་འགྲོ། །

ཟམ་སྟེགས་རྡོ་ལ་ཤན་པའི། །
གཡུ་རྩིའི་རྒྱ་ཕིབས་འོག་ན། །
མི་དཔོན་ཨེར་ཁ་སིང་སིང་། །
མི་གཡོག་རྡོག་པ་སིམ་སིམ། །

ལམ་སྣེ་རྙེད་ས་མ་རེད། །
ཆང་ཁང་ཤོམ་ར་རང་འགྲིག །
ཟམ་སྣེར་ཐོན་ས་མ་རེད། །
ཆང་མ་ཡེ་ཤེས་གསལ་སྒྲོན། །

ཕ་ཡུལ་ཁ་ཐག་རིང་བས། །
འགྲོ་དགོས་ལས་ལ་ཐུག་བྱུང་། །
རྟ་ཁ་གཡོན་སར་འཐེན་པས། །
གཡུ་ཐོག་སྒང་ལ་ཤོར་སོང་། །

ཟམ་མིག་ཤོད་ལ་སྐྱེས་པའི། །
ཚེ་རིང་ལྕང་མའི་མཉེན་ཤ །
བུ་མོའི་ཚིག་ལ་བབས་འདུག །
བུ་མོའི་གཤིས་ལ་རྫོགས་འདུག །

ཆུང་འདྲིས་ཤྭ་བ་སྨུག་ཆུང་། །
ཀླུ་སྒུག་གཞུང་ལ་འཁོར་ན། །
གཡུ་ཐོག་ཟམ་མཐའ་སྲུང་པའི། །
རྔོན་པར་སྐྱེས་ཀྱང་ཆོག་ག །

ར་སའི་ཞོལ་ལ་འཁོར་བའི། །
བྱ་ཞིག་ཡིན་ན་བསམས་བྱུང་། །
གཡུ་ཐོག་ཟམ་ཆུང་འོག་གི །
ཉ་ཞིག་ཡིན་ན་བསམས་བྱུང་། །

ཁ་འབྲས་མཚར་བའི་ཨོ་ལོ། །
ཁ་ཐག་རིང་བའི་གསལ་སྒྲོན། །
ཆུ་དང་ཟམ་པའི་ལས་ལ། །
མཉམ་དུ་སྡོད་དབང་མ་བྱུང་། །

ལས་སྣང་ཡོད་ཡོད་འདྲ་ལེ། །
འུ་གཉིས་སྐྱེས་ས་སོ་སོ། །
ལས་འཕྲོ་མེད་མེད་འདྲ་ལེ། །
འུ་གཉིས་རྒས་ས་སོ་སོ། །