འབོད་སྲོལ་དེ་འདྲ་ཞིག་མེད་བཞིན་དུ་དེ་ལྟར་བོས་ན།ཁྱེད་ཡ་ཆུང་ཁོག་ན་མདའ་འཕེན་ས་དང་།མ་ཆུང་ཁོག་ན་རྟ་རྒྱུག་ས་ཡོད་པའི་བློ་ཁོག་རྒྱ་ཅན་གྱི་ཀློག་པ་པོ་ཚོས་དེ་ལྟར་འབོད་མི་རུང་དང་འབོད་མི་འོས་ཀྱི་སྐད་ཆ་མི་གསུང་བར་མཁྱེན་ལ།ལྷག་པར་འགྲམ་ཤ་ཐད་ཀྱིས་བརྒྱངས་ཏེ་ཧབ་དགོད་འཕྱ་དགོད་ཅིག་མི་བྱེད་པར་མཁྱེན་ཞེས་ཀྱང་ཞུ།ཞོལ་ནས་ངས་མངོན་སུམ་འཛེམ་མེད་ཀྱིས་ཨ་ཞང་ཆུང་བ་ཞེས་པའི་འབོད་མིང་འདི་སྤྱོད་རྒྱུ་ཡིན།...

ཆོས་སྐྱོང་གིས་ད་རེས་འབུམ་རམས་པར་རྒྱུགས་སྤྲད་པ་ནི་ཁོ་ད་ཡོད་ཀྱི་འབྲས་བུ་དང་ཡོན་ཏན་ལ་མ་ཚིམ་མ་ཁེངས་པར།རང་ཉིད་ཡར་ནས་ཡར་ལ་འགྲོ་བའི་འདུན་པ་ཆེ་ཞིང་།ཐོས་པ་འཚོལ་དུ་སྨད་ནས་དབུས་ལ་ཆས་པའི་སྔ་རབས་དོན་གཉེར་ཅན་དེ་ཚོ་བཞིན་དོན་གྱི་ནོར་བུ་ལེན་འདོད་ཀྱི་སྙིང་སྟོབས་ཤིག་ཀྱང་ཡིན་པས།ཁོས་སྔོན་བྱོན་གསེར་རིའི་ཕྲེང་བས་བྱིན་གྱིས་བརླབས་ཤིང་གནའ་བོའི་རྒྱུན་གྱི་དྲི་བསུང་སྟུག་པའི་སྟོད་ཉི་མ་ལྷ་ས་རུ།སྐྱེས་ཐོབ་ཀྱི་ཤེས་རབ་དང་བརྩོན་འགྲུས་ཀྱི་སྟོབས་ལ་བསྟེན་ནས་ལོ་བཞིའི་རིང་ལ་སློབ་གཉེར་བྱས་ཚེ།གོས་རི་མོ་ཅན་ལ་རྒྱང་ལྟ་དང་བུ་རེ་བ་ཅན་ལ་རེ་བཞག་ཅེས་པ་ལྟར།བསླབ་འབྲས་ཁུར་དུ་དུད་པ་ཞིག་བསྣམ་འོང་བར་ཡིད་ཆེས་ཅི་ནས་ཀྱང་བྱ་ཆོག་གོ་སྙམ།...

དེ་རིང་།ད་དུང་ཨ་མ་ཞེས་འབོད་ས་ཞིག་ཡོད་པ་ནི།ཁྱིམ་གྱི་གཡང་རྟེན་ཡིན།བུ་ཚའི་བསོད་ནམས་ཡིན།ལམ་གྱི་ནོམ་པ་ཡིན།སེམས་ཀྱི་དྲོད་ཁོལ་ཡིན།ཨ་མ་སྐུ་བདེ།...

ཉིན་ཞིགང་མཁའ་རླུང་འཇམ་པོ་ཞིག་དང་མཉམ་དུ་སྒོ་ཆེན་གྱི་བར་སྣང་དུ་འགྲོ་དུས།ནམ་རྒྱུན་སྒོ་འགྲམ་དུ་འོ་མ་འཚོང་མཁན་གྱི་བུད་མེད་དེར་འཕྲད་བྱུང་།མོས་འོ་མ་ཉོ་མཁན་གྱི་མགྲོན་པོ་རེ་རེ་ལ“དྲུག”ཅེས་པའི་བརྡ་དོན་དུ་ལག་པའི་མཐེབ་ཆེན་དང་མཐེབ་ཆུང་གཉིས་ཕྱིར་བགྲང་ནས་སྟོན་པ་ལས་ཁ་མི་གྲགས་པར་འདུགཁ་མི་གྲགས་པའི་ཉམས་སྣང་དེ་ནི་ལྗིད་ཏིག་ཏིག་གི་ཁེར་གདུང་ཞིག་གིས་ནོན་པ་དང་འདྲ་ལ།དེའི་མུར།ང་རང་མོའི་ཁེར་གདུང་གི་རྒྱབ་རོལ་ཏུ་བསྐུངས་པའི་འཇིག་རྟེན་དེར་འགྲིམ་ཐུབ་ན་སྙམ།དེ་ནི་གདོས་ཆེ་བའི་ཕུང་པོ་གང་ཞིག་ཏུ་གཡུག་པའི་རྣམ་ཤེས་ཀྱིས་མ་གཏོགས།སྡིག་ཉེས་གང་མང་གིས་མནན་པའི་ཕུང་པོ་རྗེས་སུ་ཁྲིད་ནས་འགྲོ་མཁན་ཚོས་ནི་འགྲིམ་མི་ཐུབ་པར་འདུག...

གངས་རིའི་སྲས་མོ།སྙིང་རུས་དང་ལ་རྒྱ་ལྡན་པའི་བུ་མོ།ང་ནི་ཁྱེད་ལ་རྩིས་ཐང་ཆེ་ཞིང་།ཁྱེད་ཀྱི་མི་ཚེའི་བཞུད་ལམ་ཐོ་རུ་འགོད་མཁན་ཞིག་ཡིན།ངས་འདིར་སྙིང་ཐག་པ་ནས་ཁྱེད་ལ་རྟེན་འབྲེལ་ཞུ་བ་དང་ལྷན་ཅིག་ཏུ།སང་ལོའིParisལུས་རྩལ་ར་བ་ཆེན་པོའི་འགྲན་རྩོད་ཀྱི་གཡུལ་ལས་ཁྱེད་རང་ཡང་བསྐྱར་རྣམ་པར་རྒྱལ་བར་སྨོན་འདུན་ཞུ།།...

མི་ལོ་དགུའི་རིང་།དེ་ཚོ་དང་ཅུང་ཞིག་མི་འདྲ་བ་ནི།ཤན་པས་ནམ་རྒྱུན་ལྟོ་བཟས་རྗེས།རང་གི་ཁྱི་གཞོང་།དེ་ཚོས་བརླ་བཀྱགས་རུང་མི་བསླེབ་སའི་ལྡེབས་ཤིག་ལ་འགེལ།དེའི་ཕྱིར་དངུལ་ཆུ་མཁར་གྱི་བདག་པོའི་རྡོག་བརྫིས་ཐེབས་པ་བརྩི་ཚོད་མེད།གསད་རྒྱུ་མིན་ན་བཅོས་སུ་མེད་པ་ཤེས་ནས་དེས་ཀྱང་ཁོའི་འདོད་དུ་བཞགམཐར་ཤན་པ་རྒྱལ།དོན་ལ་ཁྱི་རྫིང་འཐུང་ན་ལྕོག་ལྷ་མཚལ་རྩེའི་འཁུ་འཕྲིག་འོང།ལྷག་པར་མི་ལུས་ལན་ཅིག་བླངས་སར་བཤད་རྒྱུ་རྫོགས་མེད་བཞག་འགྲོ།...

སྨུག་པོ།ཀན་སུའུ་མི་རིགས་དགེ་འོས་སློབ་ཆེན་བོད་ཡིག་སྡེ་ཁག་གི་དགེ་རྒན།མཚོ་སྔོན་ཁྲི་ཀ་རྫོང་འཕྲང་དམར་གྲོང་རྡལ་རྐང་ཚ་སྡེ་བ་ནས་སྐྱེས།བོད་ཀྱི་ཟློས་གར་བརྙན་འཕྲིན་གློག་བརྙན་སྐོར་གྱི་སློབ་ཁྲིད་དང་ཞིབ་འཇུག་བྱེད་བཞིན་ཡོད།དུས་དེབ«སྦྲང་ཆར»སོགས་ཀྱི་སྟེང་འཁྲབ་གཞུང་དང་སྒྲུང་གཏམ།སྙན་ངགལྷུག་རྩོམ་དང་དཔྱད་བརྗོད་བཅས་རྩོམ་རིག་བརྩམས་ཆོས་བགྲང་དུ་རི་བ་ཞིག་བཀོད་མྱོང་།...

དོ་ནུབ་གློ་བུར་དུ་ལྷ་སྐྱིད་ཀྱི་སེམས་ལ་སྒྲོལ་མ་དྲན་ཞིང་སྒྲོལ་མའི་བློ་ཐག་ཆོད་པའི་གཤིས་ཀ་ལའང་ཡིད་སྨོན་ཤོར།སྨག་ནག་པའི་མཚན་མོ་འདིར་མིག་ཀོང་གི་ནང་དུ་མཛུབ་མོ་བཙུགས་མཁན་བྱུང་ཡང་མཐོང་མི་ཐུབ་ཅིང་།“ཤག་ཤག་ཤག”ཕྱི་རོལ་ནས་ཆར་པའི་སྒྲ་ཁོ་ན་ལས་གཞན་ཅི་ཡང་ཐོས་རྒྱུ་མེད།ལྷ་སྐྱིད་ཀྱི་མིག་གིས་ད་དུང་ཡང་སྨག་ནག་པའི་མཚན་ལྗོངས་ལ་ཅེར་ནས་འདུག་གོ།...

རྡོ་བ་གསུམ་དང་ཡིག་འབྲུ་དྲུག་གིས།གླིང་དཀར་པོའི་རྒྱབ་དཔུང་བརྟན་པོར་བཅོས་སོང་།ཡུལ་ཆེན་པོའི་འོ་འཛིན་མཐོན་པོ་ལས་བཞུར་པའི།ཤེས་དང་སྟོབས་ཀྱི་གཙང་ཆབ་སྔོན་མོས།དཔའ་རྒོད་སུམ་ཅུའི་དཔུང་པ་ལྕགས་ལ་བཞེངས་སོང་།...

གཤོག་པས་ས་ཆེན་ལ་བསིལ་བ་གནང་བའི་ཁྱུང་ཆེན་གྱི་སྤྲུལ་བ། བརྟན་གཡོའི་རྔམ་ཟིལ་གྱི་མཛེས་སྡུག་ཁུར་བའི་ཡ་གླིང་གི་སེང་གེ། གདོང་ལ་ཉི་དྲེག་ཆགས་པའི་སྒམ་བརླིང་གི་འབྲོག་པ། རུས་པ་རང་བྱུང་ལ་བསྟིམས་ཤིང་།ཤ་ཁྲག་རྒོད་པོར་སྦྱིན་པའི་མགོན་མེད་ཀྱི་ཟས་སྦྱིན། ཁྱེད་ཀྱི་རང་གཤིས་སྲ་བརྟན་ཡིན་པ་ནི་རི་བྲག་ལ་དཔེ་བལྟས་པས་ཡིན།...