བསྒྱུར་རྩོམ། ཐོག་ཁང་ནུབ་མ་ཟླ་བའི་འོད་ཀྱིས་ཁེངས།

དཔའ་རྩེ་ནས་བསྒྱུར།
 

ཆུ་སྐྱེས་དམར་པོའི་འདབ་མ་ལྷུང་ཞིང་དྲི་བསུང་དག་ཀྱང་ངང་གིས་ཡལ།།
གཡུ་ལྟར་འཇམ་པའི་སྨྱུག་གདན་གྱིས་ནི་སྟོན་ཀའི་བསིལ་གྲང་ཚོར་བར་བྱེད།།
དར་ཟབ་སྨད་ཤམ་ལུས་ནས་ཕུད་ཅིང་ཕལ་བའི་གྱོན་གོས་མནབས་ནས་སུ།།
ཁེར་རྐྱང་གིས་ནི་གྲུ་ཆུང་སྟེང་དུ་གྲོགས་མེད་གཅིག་པུར་གནས་པ་དང་།།
མགོ་བོ་བཀྱགས་ནས་ནམ་མཁར་ཅེར་དུས་སྤྲིན་པ་དཀར་པོའི་བང་རིམ་དུ།།
རྒྱང་རིང་ཡུལ་ནས་སེམས་མཐུན་དེས་ནི་མཛའ་འཕྲིན་བསྐུར་གནང་ཡོད་སྲིད་དམ།
ཁྲུང་ཁྲུང་ཁྱུ་རྣམས་སླར་ཡང་ལྡོག་དུས་ཐོག་ཁང་ནུབ་མར་ཟླ་འོད་ཁེངས།།

མེ་ཏོག་འདབ་མ་ངང་གིས་ལྷུང་ཞིང་ཆུ་རྒྱུན་དྭངས་མོ་ལྷོད་ཀྱིས་བཞུར།།
ཕན་ཚུན་དྲན་ཞིང་དྲན་པའི་གདུང་བས་ཉིན་མཚན་ཀུན་ཏུ་གཙེས་ན་ཡང་།།
ལྷན་དུ་གནས་ཤིང་མཛའ་གཅུགས་སྙིང་གཏམ་ཞིབ་ཏུ་བརྗོད་ཐབས་བྲལ་གྱུར་པས།།
རྒྱང་རིང་ཡུལ་ནས་བྲལ་བའི་སྡུག་བསྔལ་གཅིག་པུར་སེམས་ཀྱིས་མྱོང་དགོས་བྱུང་།།
ཤིན་ཏུ་དྲན་པའི་དྲན་གདུང་འདི་ཉིད་སྙིང་ནས་འདོར་ཐབས་མི་འདུག་སྟེ།།
ཐོད་དུ་བསྡུས་པའི་སྨིན་མཚམས་བར་ནས་དོར་ཅིང་མེད་པར་བྱས་ན་ཡང་།།
དེ་མ་ཉིད་དུ་སེམས་ཀྱི་གཏིང་དུ་སླར་ཡང་འཁོར་ཞིང་གཙེས་པར་བྱེད།།