«ཀྲུང་དབྱང་དམག་ཨུའི་རྒྱས་འཛོམས་གྲོས་ཚོགས་ཐོག་གནང་བའི་གསུང་བཤད།(གནད་བསྡུས།)»

       འཐབ་འཛིང་བྱེད་ནུས་ཀྱི་ཚད་གཞི་བརྟན་པོ་འཛུགས་དགོས། ཉེ་ཆར་དུས་སྐབས་ཤིག་རིང་ངས་དམག་དཔུང་ནང་ནན་བཤད་བྱས་པ་མང་ཤོས་ནི། དམག་དཔུང་གིས་དམག་འཁྲུག་རྒྱག་ཐུབ་པ་དང་རྒྱལ་ཁ་ལེན་ཐུབ་པ་སྟེ། འཐབ་འཛིང་བྱེད་ནུས་ཀྱི་རྩ་བའི་ཚད་གཞི་ཉག་གཅིག་དེ་བརྟན་པོར་འཛུགས་དགོས་ཞེས་པ་འདི་ཡིན། འདི་ནི་དམག་དཔུང་ལ་མཚོན་ན་དངོས་གནས་གལ་འགངས་ཤིན་ཏུ་ཆེ་བ་ཞིག་རེད། དམག་དཔུང་ནི་ཐོག་མར་འཐབ་འཛིང་རུ་ཁག་ཅིག་ཡིན་ཞིང་། དམག་རྒྱག་གི་ཆེད་དུ་གནས་པ་ཞིག་ཡིན། རང་དམག་གིས་དུས་སྐབས་སོ་སོའི་ནང་ཕྲག་ཏུ་ཁུར་བའི་ལས་འགན་དངོས་མི་འདྲ་མོད། འོན་ཀྱང་འཐབ་འཛིང་རུ་ཁག་ཡིན་པའི་རྩ་བའི་འགན་ནུས་ལ་ཐོག་མཐའ་བར་གསུམ་དུ་འགྱུར་བ་བྱུང་མེད། དམག་དཔུང་འཛུགས་སྐྲུན་བྱེད་པར་ངེས་པར་དུ་འཐབ་འཛིང་བྱེད་ནུས་ཆེ་རུ་གཏོང་རྒྱུ་དེ་འགོ་རྩོམ་ས་དང་མཐའ་མཇུག་གི་འབབ་སར་བརྩིས་ནས་དམག་འཁྲུག་རྒྱག་ཐུབ་པ་དང་རྒྱལ་ཁ་ལེན་ཐུབ་པའི་བླང་བྱར་དམིགས་ཏེ། དམག་འཁྲུག་བྱུང་ཚེ་དམག་དཔུང་གིས་ངེས་པར་དུ་རྒྱལ་ཕམ་རྟིང་རྩོད་དང་རྒྱལ་ཁ་ཕུ་ཐག་ཆོད་པ་ལེན་དགོས། གལ་ཏེ་དམག་དཔུང་གིས་གཡུལ་སར་རྒྱལ་ཁ་ལེན་མ་ཐུབ་ན་ཆབ་སྲིད་ཀྱི་མཇུག་འབྲས་ཚབས་ཆེན་འབྱུང་ངེས་ཡིན། གནས་ལུགས་འདི་དམག་ཡོངས་ཀྱི་བློ་མཐུན་ཚང་མས་ངེས་པར་དུ་སེམས་ལ་བརྟན་པོར་འཛིན་དགོས།