«ཀྲུང་དབྱང་དམག་ཨུའི་རྒྱས་འཛོམས་གྲོས་ཚོགས་ཐོག་གནང་བའི་གསུང་བཤད།(གནད་བསྡུས།)»

       དམག་དོན་སྦྱོང་བརྡར་དངོས་འཐབ་ཅན་གྱི་ཆུ་ཚད་ཇེ་མཐོར་གཏོང་དགོས། དམག་དོན་སྦྱོང་བརྡར་གྱི་ཆུ་ཚད་མཐོ་རུ་མ་ཕྱིན་ན། དམག་དོན་འཐབ་རྩོད་ཀྱི་གྲ་སྒྲིག་དོན་ཐོག་ཏུ་འཁྱོལ་དཀའ་ལ། དམག་དཔུང་གི་འཐབ་འཛིང་བྱེད་ནུས་ཀྱང་ཆེ་རུ་གཏོང་དཀའ་བས། དམག་འཁྲུག་གི་སྐབས་སུ་གྱོང་གུན་ཆེན་པོ་ཕོག་ངེས་རེད། དམག་ཡོངས་ཀྱིས་དངོས་འཐབ་ཀྱི་དགོས་མཁོར་གཞིགས་ནས་དཀའ་ཞིང་ནན་པའི་སྒོ་ནས་དམག་དཔུང་སྦྱོང་བརྡར་བྱ་རྒྱུ་རྒྱུན་འཁྱོངས་དང་། དམག་ཇི་ལྟར་རྒྱག་དགོས་ན་དམག་སྦྱོང་དེ་ལྟར་བྱེད་དགོས་པ་དང་། དམག་རྒྱག་དུས་ཅི་ཞིག་མཁོ་ན་དེ་སྦྱོང་བརྡར་ཧུར་ཐག་བྱེད་པར་རྒྱུན་འཁྱོངས་བྱེད་པ། དམག་འཐབ་ཀྱི་ལས་འགན་དང་དམག་འཐབ་ཀྱི་འགྲན་ཡར་དམ་པོར་བསྟུན་ནས་འགན་འཁྲིའི་ཞིབ་འཇུག་བྱ་གཞི་སྦྱོང་བརྡར་ཡག་པོ་བྱེད་པ། ཞིབ་བཤེར་རང་བཞིན་དང་འགྲན་རྒོལ་རང་བཞིན་གྱི་སྦྱོང་བརྡར་ལ་ཤུགས་རྒྱག་པ་བཅས་བྱས་ནས་ཉེ་མཚུངས་དངོས་འཐབ་ཀྱི་ཁོར་ཡུག་འོག་དཔུང་སྡེར་སྦྱོང་བརྡར་བྱེད་དགོས། གཙོ་འཛིན་ལས་ཁུངས་ཀྱི་བཀོད་འདོམས་སྦྱོང་བརྡར་དང་དམག་རིགས་དང་དཔུང་རིགས་སྣ་ཚོགས་མཉམ་འབྲེལ་སྦྱོང་བརྡར་བྱེད་པར་ཤུགས་རྒྱག་དགོས། དམག་དོན་སྦྱོང་བརྡར་ནི་དོན་དངོས་ཐོག་མ་འོངས་པའི་དམག་འཁྲུག་གི་གྲ་སྒྲིག་འཁྲབ་སྟོན་ཞིག་ཡིན་པས་གཡེང་བ་དང་གཡོ་ཟོལ་སྤུ་ཙམ་ཡང་བྱེད་མི་རུང་། སྦྱོང་བརྡར་བྱེད་ཚུལ་མི་དྲང་བ་ནི་དཔོན་དམག་གི་ཚེ་སྲོག་དང་མ་འོངས་པའི་དམག་འཁྲུག་ལ་འགན་གཏན་ནས་མ་འཁུར་བ་ཡིན་པ་དང་། གནོད་སྐྱོན་ཧ་ཅང་ཆེན་པོ་ཡོད་པས་ངེས་པར་དུ་བློ་ཐག་རྦད་ཆོད་ཀྱིས་ཁྱད་གསོད་བྱེད་དགོས། རིམ་པ་ཁག་གིས་སྦྱོང་བརྡར་གྱི་སློབ་སྟོན་བསམ་བློ་དྲང་པོ་བྱས་ཏེ། སྦྱོང་བརྡར་ནི་ལྟད་མོ་ཙམ་དང་འཁྲབ་སྟོན་ཙམ་དུ་འཛིན་པ་དང་། འཐབ་འཛིང་བྱེད་ནུས་བློས་གཏོང་བ་རིན་དོད་དུ་བྱས་ཏེ་སྒྱིད་ལུག་ངང་བདེ་འཇགས་སྲུང་བ་སོགས་ཀྱི་སྣང་ཚུལ་ངན་པ་སྔོན་འགོག་དང་ཡོ་བསྲང་མཐའ་གཅིག་ཏུ་བྱེད་དགོས།