ཀྲུང་དབྱང་དམག་ཨུ་ཡི་རྒྱབ་ཕྱོགས་མཁོ་སྒྲུབ་ལས་དོན་ཚོགས་འདུའི་ཐོག་གནང་བའི་གསུང་བཤད།

       རྒྱལ་ཁབ་སྟོབས་ལྡན་དང་དམག་དཔུང་སྟོབས་ལྡན་དུ་གཏོང་བར་ངེས་པར་དུ་རྒྱབ་ཕྱོགས་མཁོ་སྒྲུབ་སྟོབས་ལྡན་དུ་གཏོང་དགོས། རྒྱལ་སྤྱིའི་དམག་དོན་འགྲན་རྩོད་གནས་བབ་ལ་འགྱུར་ལྡོག་གཏིང་ཟབ་བྱུང་བ་དང་བསྟུན་ནས། རྒྱལ་ཁབ་ཀྱི་ཁེ་ཕན་དང་དམག་དཔུང་གི་འགན་འཁྲི་དང་ལས་འགན་རྒྱུན་ཆད་མེད་པར་རྒྱ་བསྐྱེད་བཏང་བས། རྒྱབ་ཕྱོགས་མཁོ་སྒྲུབ་འཛུགས་སྐྲུན་བྱ་རྒྱུ་དེ་དམག་འཁྲུག་གི་རྒྱལ་ཕམ་ལ་ཤུགས་རྐྱེན་ཐེབས་པའི་རྒྱུ་རྐྱེན་གལ་ཆེན་ཞིག་ཏུ་འགྱུར་བཞིན་པ་དང་། ཉིན་རེ་ལས་ཉིན་རེར་འཐབ་ཇུས་འགྲན་རྩོད་ཀྱི་རང་འགུལ་ལོན་པའི་སྟོབས་ཤུགས་གལ་ཆེན་ཞིག་ཏུ་འགྱུར་བཞིན་ཡོད་དེ། རྒྱལ་ཁབ་དང་དམག་དཔུང་སྟོབས་ལྡན་དུ་གཏོང་བའི་འཕེལ་རིམ་ནང་འགན་འཁྲི་ལྕི་ཞིང་། ཏང་དང་། རྒྱལ་ཁབ། དམག་དཔུང་བཅས་ཀྱི་བྱ་གཞག་འཕེལ་རྒྱས་ཁྲོད་གནས་བབ་གལ་ཆེན་བཟུང་ཡོད། འཛམ་གླིང་གི་དམག་དཔུང་རྩེ་གྲ་འཛུགས་སྐྲུན་བྱེད་པར་རྒྱབ་ཕྱོགས་མཁོ་སྒྲུབ་འཛུགས་སྐྲུན་ངེས་པར་དུ་རྗེས་ཟིན་དགོས་ཤིང་། ངེས་པར་དུ་མཆོང་སྐྱོད་ལྟ་བུའི་འཕེལ་རྒྱས་མངོན་འགྱུར་ཡོང་དགོས།