«ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་བརྟན་པོར་འཆང»

       མིག་སྔར་ཏང་ཡོན་དང་ལས་བྱེད་པ་ཉུང་ཤས་ཀྱི་རང་ངོས་གསར་བརྗེའི་སྙིང་སྟོབས་ཆུང་དུ་སོང་ཞིང་། མིག་མདུན་གྱི་གནས་བབ་ལ་ཡིད་ཚིམ་ཞིང་ཉི་མ་འཁྱོལ་ཐབས་བྱེད་པ་དང་། ལ་ལའི་གནད་དོན་ལ་ཞིབ་ལྟ་བྱེད་པའི་ནུས་པ་ཞན་དུ་སོང་བ་དང་། ཐོབ་རེ་ཤོར་དོགས་དང་སྐྱོན་གབ་ནས་བཅོས་འདོད་མེད་པར་བསྡད་ཡོད། ལ་ལའི་སྐྱོན་བརྗོད་བྱེད་པའི་ནུས་པ་ཞན་དུ་གྱུར་པ་དང་། ཐབས་མཁས་ཀྱིས་རང་སྲུང་བྱེད་པ་དང་འོན་པ་དང་ལྐུགས་པའི་ངང་ཚུལ་འཛིན་གྱི་ཡོད། ལ་ལས་རྒྱས་སྤྲོས་རུལ་སུངས་བྱས་ཏེ་སྒྲིག་ཁྲིམས་སྣང་མེད་དུ་སྐྱུར་བ་མ་ཟད་ཐ་ན་བག་མེད་སྒྲིག་འགལ་བྱེད་ཀྱི་ཡོད་པས། ཏང་གི་སྒྲིག་ཁྲིམས་དང་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དང་འགལ་བའི་གནད་དོན་ཡང་ཡང་བཀག་ཀྱང་འགོག་མི་ཐུབ་པ་ཆགས་ཡོད། གནའ་མིའི་གཏམ་ལ“གནམ་འོག་ཏུ་འདུལ་དཀའ་ཤོས་ནི་ནང་སེམས་ཡིན་ལ། གནམ་འོག་ཏུ་བསླུ་སླ་ཤོས་ནི་འདོད་ཆགས་ཡིན”ཞེས་ཟེར། ནམ་ཞིག“ངན་སེམས”སྐྱེས་གྱུར་ཚེ། རང་ངོས་གསར་བརྗེ་བྱེད་པའི་བློ་སྟོབས་ཉམས་པར་འགྱུར་བ་དང་། ཐོག་མའི་བསམ་འདུན་དང་འགལ་ཞིང་འགན་འཁྲི་བརྗེད་པར་འགྱུར་ལ། སྒྲིག་ཁྲིམས་ཀྱི་མཐའ་ཚད་ལས་བརྒལ་བ་དང་ཐ་ན་ཁྲིམས་འགལ་ཉེས་གསོག་ཀྱང་བྱེད་ངེས་རེད།
       ཐོག་མའི་བསམ་འདུན་ཐོབ་སླ་ཡང་ཐོག་མཐའ་བར་གསུམ་དུ་སྲུང་དཀའ་བ་རེད། ཏང་ཡོངས་ཀྱི་བློ་མཐུན་ཚོས་ངེས་པར་དུ་ཐོག་མཐའ་བར་གསུམ་དུ་བླ་ན་མེད་པའི་གསར་བརྗེའི་ཕུགས་བསམ་དང་ངར་ཤུགས་རྒྱས་པའི་གསར་བརྗེའི་འཐབ་སེམས་མཐའ་འཁྱོངས་བྱེད་དགོས། སྐྱོན་བརྗོད་དང་རང་སྐྱོན་རང་བརྗོད་ཀྱི་མཚོན་ཆ་རྣོ་ངར་ཅན་འདི་བེད་སྤྱོད་ཡག་པོ་བྱས་ཏེ། སྤྱོད་ཚུལ་ལེགས་བཅོས་དང་སྒྲིག་ལམ་དག་ཐེར་དང་རུལ་སུངས་ལ་རྒོལ་བ་བཅས་བར་མེད་དུ་དམ་འཛིན་བྱེད་པ་དང་། ཏང་གིས་རང་ངོས་གཙང་སྒྱུར་དང་། རང་ངོས་འཐུས་ཚང་། རང་ངོས་གསར་སྒྱུར། རང་ངོས་གོང་སྤེལ་བཅས་བྱེད་པའི་ནུས་པ་རྒྱུན་ཆད་མེད་པར་ཆེ་རུ་གཏོང་དགོས། ཏང་གི་རྨང་གཞི་གཡོ་འགུལ་གཏོང་སྲིད་པ་དང་ཏང་གི་བྱ་གཞག་ལ་འགོག་རྐྱེན་བཟོ་སྲིད་པའི་སྣང་ཚུལ་མཐའ་དག་ལ་འཐབ་རྩོད་མཐའ་གཅིག་ཏུ་བྱེད་དགོས། ཏང་གི་གཟུགས་གཞིའི་ཐོག་ཏུ་འབྱར་བའི་སྐྱུག་བྲོ་བའི་དྲི་ནག་མཐའ་དག་གཙང་སེལ་བྱས་ནས་ང་ཚོའི་ཏང་འདི་ཉིད་སྔར་བས་ཞུམ་མེད་སྟོབས་ལྡན་ཞིག་ཏུ་འཛུགས་སྐྲུན་བྱེད་དགོས།