“འཆམ་མཛེས་གུང་ཧོ”རྟགས་མའི་ཞིང་ཆེན་ཡོངས་ཀྱི་སྡེ་ཆེན་རྩེད་རའི་ལ་གཞས་འགྲན་སྡུར་སྐབས་དགུ་པའི་མཚོ་བྱང་འགྲན་ཁུལ་གྱི་ཐོག་མའི་འགྲན་སྡུར་རྐང་ཚ་རྫོང་དུ་སྤེལ།

       མཚོ་སྔོན་པོའི་བྱང་རྒྱུད་ཀྱི་གཡུ་གཞོང་རྐང་ཚའམ་བོད་མཁར་རྐང་ཚས་འུ་ཅག་ལ་བཞག་པའི་བག་ཆགས་ཟབ་ཤོས་ནི། མཚོ་སྔོན་པོ་དྭངས་ཤ་ཅན་པོ་དང་ས་ཁ་ཞེང་མུ་མཐའ་མེད་པའི་ཡུལ་གྲུ་སྟེ། མཚོ་ངོགས་བོད་མཁར་དུ་འབོད་པ་འདིའི་ཡུལ་ཚོ་རེ་རེ་ལ་གླུ་རྟ་རེ་རེ་ཡོད་ཅེས་པ་བཞིན། འདབ་ཆགས་བྱ་དང་མཚོ་ནང་ཉ་ཡི་ཞིང་ཁམས་གང་ནི་མདོ་སྨད་དམངས་ཁྲོད་རིག་གནས་ཀྱི་གཤིན་ས་སྣུམ་པོ་ཞིག་ཡིན་པར་མ་ཟད། སྒོས་སུ་ཨ་མདོའི་དམངས་གླུ་ཅི་རིགས་མཚོ་ཆེན་ཁྲི་ཤོར་རྒྱལ་མོའི་མཐའ་འཁོར་དུ་དགུང་གི་སྐར་ཚོམ་བཞིན་ལམ་མེར་བཀྲ་བ་ལས་འབྲོག་ཡུལ་སྨུག་པོ་རྐང་ཚ་ནི་དེའི་ཁྲོད་ཀྱི་འོད་དུ་འཚེར་བའི་སྐར་ཆེན་དེ་མ་ཡིན་ནམ། ཡུལ་འདིར“གསེར་གྱི་མིད་ཐག”གླུ་བ་ཚེ་བརྟན་རྒྱལ་དང་ཁམས་རྒྱལ། གླུ་རྒྱལ་སོགས་རྒན་རབས་གླུ་བ་དག་གིས་གཙོས་མི་རབས་གསར་པའི་གཞོན་ནུ་ཁྱུ་དང་ཁྱུས། བསྐལ་པ་ས་ཆགས་ཉིན་ནས་དར་བའི་མེས་པོའི་དབྱངས་རྟ་སྙན་མོས་ཕ་ས་གསེར་གྱི་གཞོང་པ་འདི་བསྲུངས་དང་སྲུང་བཞིན་ཡོད།

       སྤྱི་ཟླ6པའི་ཚེས10ཉིན། “འཆམ་མཛེས་གུང་ཧོ”རྟགས་མའི་ཞིང་ཆེན་ཡོངས་ཀྱི་སྡེ་ཆེན་རྩེད་རའི་ལ་གཞས་འགྲན་སྡུར་སྐབས་དགུ་པའི་མཚོ་བྱང་འགྲན་ཁུལ་གྱི་ཐོག་མའི་འགྲན་སྡུར་བོད་མཁར་སྒྱུ་རྩལ་འཁྲབ་སྟོན་གླིང་ནས་བསྒྲུབས་པ་དང་། མཚོ་བྱང་ཁུལ་གྱིས་ད་རེའི་ལ་གཞས་འགྲན་སྡུར་སྟེང་རྩ་འཛུགས་དང་གྲ་སྒྲིག་བྱས་པ་ཤིན་ཏུ་ལེགས་ཏེ། རྫོང་སོ་སོས་ས་གནས་རང་ནས་སྟ་གོན་རང་བཞིན་གྱི་འགྲན་སྡུར་རབ་དང་རིམ་པ་སྤེལ་ནས་བསལ་འདེམས་ཡང་ཡང་བྱས་པ་བརྒྱུད། གཞི་ནས་གྲངས་ཉུང་སྤུས་ལེགས་ཀྱི་གསར་སྐྱེས་དང་གསར་ཞུགས་གླུ་མ་ཉི་ཤུ་ལྷག་མཚོ་བྱང་ཁུལ་གྱི་ཐོག་མའི་འགྲན་སྡུར་ལ་ཞུགས་སུ་བཅུག་པ་དང་། དེ་ལས་བསྐྱར་འགྲན་ཁྲོད་བདམས་ཐོན་བྱུང་བའི་གླུ་བ་གླུ་མ་ཕལ་ཆེ་བ་གསར་ཞུགས་ཏག་ཏག་གིས་གྲུབ་ཡོད།

       འབྲུག་སིང་སིང་དགུང་སྔོན་གནམ་ནས་གྲགས་ཏེ། ཆར་བསིལ་མས་དབྱར་གྱི་དཔལ་ཡོན་བསུ། གླུ་སྙན་མོ་ས་གྲགས་གནམ་གྲགས་བྱས་ཏེ། གཡུ་གཞོང་བར་དབྱངས་ཀྱི་མཚོ་མོ་འཁྱིལ་བྱུང་། མཚོ་སྔོན་པོ་གནའ་སྔོན་ད་སྔོན་རེད། ཁ་ལ་གཞས་སྣང་མཐུན་ཡང་མཐུན་རེད། སྡེ་ཆེན་པོ་བརྒྱ་འདུས་སྟོང་འདུས་རེད། ས་རྐང་ཚ་རྩེ་ཡུལ་དགོད་ཡུལ་རེད། འགྲན་ཡུན་ཉིན་གཉིས་ལྷག་གི་རིང་ལ། ཡུལ་འདིའི་ལྟད་མོ་བ་རྒན་དར་གཞོན་གསུམ་གྱིས་གོམ་པའི་འདེགས་འཇོག་བོད་མཁར་སྒྱུ་རྩལ་འཁྲབ་སྟོན་གླིང་དུ་བསྒྱུར་ཞིང་། ཁོ་ཚོའི་ཁ་སང་དེ་རིང་གི་གླེང་གཞི་ཡང་སྡེ་ཆེན་རྩེད་རའི་ལ་གཞས་རིག་གནས་ཀྱི་དར་འཕེལ་དང་ས་གནས་རང་གི་ད་ལྟའི་གླུ་བ་གླུ་མ་དག་གི་འཕོ་འགྱུར་གསར་པའི་སྐོར་རེད། ལས་ཀ་བདེ་བླག་ངང་ལེགས་གྲུབ་བྱས་ཏེ་འགྲན་ཁུལ་རེ་རེ་ནས་གླུ་བ་གླུ་མ་ཚོར་བདེ་མོ་འཇོག་སྐབས། ང་ཚོས་ལྷག་བསམ་རྣམ་དག་དང་རྗེས་སུ་ཡི་རང་གི་གུས་པའི་མེ་ཏོག་གི་ཕྲེང་རྒྱན་གྲངས་མེད་ཁོ་ཚོར་ཕུལ་བ་ཡིན་ལ། ཀྲུང་ཧྭ་མི་རིགས་ཀྱི་ཕུལ་བྱུང་སྲོལ་རྒྱུན་རིག་གནས་བང་མཛོད་ཆེན་མོའི་ནང་གི་མུ་ཏིག་རྡོག་པོ་ལྟ་བུའི་རང་རེའི་མདོ་སྨད་ཀྱི་ལ་གཞས་དང་ལ་གཞས་ཀྱི་འབྲུ་དབྱངས་ཟུང་དུས་ཀུན་དགེ་ཞིང་ནམ་ཡང་རྟག་པའི་སྨོན་ལམ་བཏབ་པ་ཡིན།

       འགྲན་ཞུགས་གླུ་བ་རྟ་མགྲིན་དབང་ཕྱུག་དང་འགྲན་ཞུགས་གླུ་བ་འབྲུག་བྷོ། འགྲན་ཞུགས་གླུ་བ་ཁོན་ཐར་རྒྱལ། འགྲན་ཞུགས་གླུ་བ་ནོར་བུ་ཚེ་རིང་། འགྲན་ཞུགས་གླུ་བ་བསམ་འཕེལ། འགྲན་ཞུགས་གླུ་མ་དམ་ཆེན་མཚོ་མོ། འགྲན་ཞུགས་གླུ་མ་འཛམ་དཀར་སྐྱིད། འགྲན་ཞུགས་གླུ་མ་བཙུན་མཚོ་རྒྱལ། འགྲན་ཞུགས་གླུ་མ་ཚེ་ཕྱུག་སྒྲོན་དཀར། འགྲན་ཞུགས་གླུ་མ་དབང་མོ་མཚོ་བཅས་རེད།

བདེ་མོ་གཅིག་ལ་བདེ་མོ་བྱོས། །

སྡེ་ཆེན་པོའི་རྩེ་རོགས་བདེ་མོ་བྱོས། །
ལོ་རྗེས་མར་རྩེ་བ་འཛོམས་དུས་ན། །
ཁ་བགད་ལེར་ཡང་བསྐྱར་རྩེ་རྒྱུ་ཡེད། །
འཛུམ་ཀྲིག་གེར་སྣང་བ་མཐུན་རྒྱུ་ཡེད། །