༄༅། །ལུགས་ལྡོག་གི་ཕྲེང་བར་བསྟར་པའི་དྲན་འཆར། གུ་རུ་རྒྱལ་མཚན།

ཨ་ཡིག་མཚན་མེད་ཡིན་མིན་ཆང་ཁར་རྩོད། །
ཧ་ལམ་ལོས་བདེན་འདོད་སྤྱད་སྒྲུབ་བྱེད་འདྲེན། །
ཨ་ཆུང་ཤད་གོང་ཕྱི་ཚེག་དགོས་མིན་རྩོད། །
ཧ་ལམ་ལུང་གི་རྒྱབ་རྟེན་ངག་སྒྲོན་འཇོག །
ས་གཅོད་བླ་མ་ཞེས་ཏེ་གཤེ་བ་མང་། །
ཤ་ཚས་དཔྱོད་པ་ཉིན་མའི་སྐར་མར་འགྲན། །
ལ་ཡང་སྔ་ཕྱིར་རྩོད་པ་ལན་འགའ་བྱུང་། །
ར་བཟི་ལྟར་བཤད་ཁུངས་མེད་འགའ་ཡང་སྣང་། །
ཡ་ཆུང་གཏམ་གྱི་རོལ་མོ་དཀྲོལ་མཁས་ལ། །
འ་འེབ་བཙལ་ནས་སུན་འབྱིན་སྦྱོར་བ་རྩོམ། །
ཟ་ཟུར་རེ་ནས་རྨག་མེད་རྡོ་བ་བསྒྲུགས། །
ཞ་ཞོར་སྒྲོ་འདོགས་ཙམ་རེ་གཤིས་སུ་ཆགས། །
ཝ་སོགས་མོ་ཡིན་དེ་ལུགས་ཅིའི་ཕྱིར་ན། །
ཛ་ཛོལ་མེད་པར་ཤེས་པ་ཁེགས་ཙམ་གདའ། །
ཚ་ལ་ཚིག་གྲོགས་བཅུ་ཙམ་ད་དགོས་ན། །
ཙ་གེ་ཙིག་གེ་མི་འགོར་དེ་ཡང་དཀོན། །
མ་ནིང་མོ་དང་མོ་གཤམ་ཤིན་ཏུ་མོ། །
བ་སོགས་བདག་སྒྲ་ཡང་ན་མིང་མཐའ་སྟེ། །
ཕ་ཡི་རིག་བཅུད་འདི་དག་བུར་བརྒྱུད་ཚེ། །
པ་སངས་བསམ་པས་སྤེལ་བ་ག་ཙམ་ཡོད། །
ན་ཁུང་སྦལ་བས་མཐོང་བའི་མཁའི་ཁྱོན་དུ། །
ད་རེས་ཚིམ་པས་སྡོད་པ་མི་ལེགས་པས། །
ཐ་མར་ཉེན་ཁའི་སྐད་ཡིག་སྐྱེ་འཆི་ལ། ། 
ཏ་སྟེའུ་བཞིན་དུ་ཡོན་ནས་ག་ལ་འདུག །
ཉ་མོ་ཆུར་འཇུག་ཚུལ་གྱིས་དཔྱད་ལེགས་ན། །
ཇ་ཆང་ཁོ་ནས་འདའ་བའི་སྐབས་ཤིག་མིན། །
ཆ་ལུགས་ཙམ་གྱིས་བསྒྱུར་བ་དཀའ་ན་ཡང་། །
ཅ་རིལ་ལྟ་བུའི་སྲོག་རྩ་ཀ་ཁའོ། །
ང་རང་ཆེན་པོ་སྨྲ་བ་ག་ལ་ཡིན། །
ག་དུས་འཐོམ་སྦྲིད་འགའ་ལ་ཞེ་མེར་ནས། ། 
ཁ་ནས་བཤད་པ་སེམས་ཀྱང་རྗེས་སོང་ནས། ། 
ཀ་ཁ་མི་སྦྱངས་བོད་ལི་ཆ་རེར་སྤྲིངས། ། ཀ་ར་སྤྲི་གོར་མང་ཉོས་ཤིང་། །
ཁ་མལ་གཅིག་ཏུ་འདུས་བྱས་ཏེ། །
ག་ཆད་སྒྲ་དང་བཅས་པ་ཡིས། །
ང་ཚོས་ང་ཡི་སྐྱེས་སྐར་རོལ། །
ཅ་ཅོའི་འདུ་འཛི་རྒོད་པའི་ཁར། །
ཆ་མེད་བུ་མོ་འགའ་ཡང་བོས། །
ཇ་ཆང་བཟི་བའི་མཐའ་མ་ལ། །
ཉ་ཉོག་གཏམ་ཡང་ཇེ་མང་སོང་། །
ཏ་ལེན་བོད་སྐད་ཡིན་མིན་གྱིས། །
ཐ་སྙད་ཚིག་ལ་གུང་བསྒྲིག་སྟེ། །
ད་རེབ་བུ་མོའི་མཐོང་ས་རུ། །
ན་གཞོན་ཤེས་མདོག་ཚ་པོ་བསྟན། །
པ་པོ་བདག་སྒྲར་ཁྱབ་མིན་གྱིས། །
ཕ་མེས་བློ་ཡི་ཟབ་ཚད་གླེང་། །
བ་ཡིག་མིང་མཐའ་ཡིན་མིན་གྱིས། །
མ་བསམ་ས་ནས་སྤོ་ཡང་བསླངས། །
ཙ་ཡིག་སྐྱེ་གནས་ཅི་ཡིན་པ། །
ཚྭ་ཁུའི་ཚུལ་གྱིས་ཡར་མར་བཤད། །
ཛ་ཡའི་གསུང་རབ་འགྲེལ་ཁུལ་གྱིས། །
ཝ་ལེར་བཀུར་ཙམ་ཨེ་འཐོབ་རེ། །
ཞྭ་མོ་ཟུར་གོན་འགའ་ཞིག་ནི། །
ཟ་འཕྲུག་མེད་མདོག་བསྟན་ན་ཡང་། །
འ་འེབ་བཙལ་ནས་མོ་མདུན་བཅར། །
ཡ་ལན་མ་བཏབ་ཐབས་ཟད་གྱུར། །
ར་བཟིར་གྱུར་པའི་གྲོགས་པོ་འགའ། །
ལ་མ་ལངས་ནས་འགྲོ་ཐབས་བྱས། །
ཤ་ཚ་ཆེ་བའི་མོ་ཞིག་གིས། །
ས་རུབ་དེ་ལྟར་མི་རུང་ལབ། །
ཧ་ལས་སྨག་ནག་འདི་འདྲ་ལ། །
ཨ་ཅང་ཉེན་ཁ་ཆེ་སོགས་བཤད། །
ཧ་ཧ་སྔ་མོར་སད་དུས་སུ། །
ཨ་བུ་ང་ཉིད་སྔར་གནས་ལུས། །