བསེར་བུ་ཞེས་པ་ཡང་དེང་དུས་ཀྱི་གཞན་སྐད་ཟུར་ཆགས་པ་ཞིག་མ་ཡིན་པར་བརྡ་རྙིངས་ཡིན་ཚོད་འདུག་སྟེ།ཏུན་ཧོང་གཏེར་ཡིག་ཏུའང་།ཚ་བ་བྲོ་འཚལ་བའི་སེར་བུ་མ་ཤོར་པར་བགྱིས།།[5]ཞེས་པ་དང་།དེ་ལ་བསང་ཆུ་རྫོང་བོད་སྨན་ཁང་གི་སྨན་པ་འབུམ་རམས་པ་ལྷ་མོ་སྐྱིད་ལགས་ཀྱིས།ཚ་བའི་ནད་ལ་བསེར་བུ་མ་ཤོར་བར་བགྱིས།[6]ཞེས་འགྲེལ་ཡོད་པ་ལྟར་དང་།དགེ་བཤེས་ཆོས་གྲགས་སུ།བསེར་བུ།རླུང་བསིལ་བུའི་བསེར་བུ།[7]ཞེས་དང་།དག་ཡིག་གསར་བསྒྲིགས་དག་བཅོས་མ་རུ།བསེར་བུ།རླུང་གྲང་མོའི་མིང་སྟེ།བསེར་བུ་ལྟ་བུ།[8]ཞེས་བཤད་པ་སོགས་ལས་བསེར་བུ་རླུང་གི་མིང་སྟེ།ངའི་ཕ་སའི་ཡུལ་སྐད་དུ་ཡང་།རླུང་གཡུག་པ་ལ་བསེར་བུ་གཡུག་ཅེས་དེ་གཉིས་དོན་གཅིག་མིང་གི་རྣམ་གྲངས་ཤིག་བྱེད་པ་རེད།ཡིན་ན་ཡང་།རླུང་ལ་བསེར་བུ་ཞེས་པ་དང་།གཅིན་ལམ་གཉན་ཚད་ལ་བསེར་བུ་ཤོར་བ་ཟེར་བ་གཉིས་ཀྱི་གོ་དོན་ཁ་ཁ་སོ་སོར་འདུག་པས་ཕྱིས་སུ་དཔྱོད་ལྡན་དག་གིས་དཔྱད་པར་བྱ།གཞན་ཡུལ་ཕྱོགས་འདིར་ནུ་མའི་གཉན་ཚད་ལ་ནུ་མར་བསེར་བུ་ཤོར་བ་རེད་ཟེར་བ་དང་།སོ་ན་བ་ལའང་སོ་ལ་བསེར་བུ་ཤོར་སོང་ཞེས་ད་ལྟ་ཡང་ནད་པ་རྣམས་ཀྱིས་རྒྱུན་གོམས་ཀྱིས་སྨྲ་བར་འདུག།...

རྩོམ་ཐུང་འདིའི་ནང་བོད་ཀྱི་གསོ་བ་རིག་པའི་ཆུ་ཚན་རིགས་ལྔ་སོ་སོའི་ངོས་འཛིན་དང་ཕན་ནུས།ཆུ་ཚན་ལ་ཞུགས་སྟངས་དང་ཞུགས་དུས་ཀྱི་ནམ་ཟླའི་སྐོར་ལ་རགས་ཙམ་དཔྱད་ཡོད།...

ད་ལྟ་བོད་ལྗོངས་སྨན་རྩིས་ཁང་གིས་གཙོས་པའི་གྲོང་ཁྱེར་དང་ས་ཁུལ།དེ་བཞིན་རྫོང་ཁག་སོགས་མདོ་དབུས་ཁམས་གསུམ་གྱི་བོད་ལུགས་གསོ་བ་རིག་པ་འཛིན་པའི་སྨན་ཁང་དང་།རྒྱ་ཆེའི་སྨན་དོན་པ་དུ་མས་ཐོག་མའི་ཕུགས་འདུན་མ་བརྗེད་པ་དང་།འགན་འཁྲི་བློ་ལ་གཏན་བཅངས་ཐོག་ཏོག་གསར་གློ་ཚད་རིམས་ནད་འགོག་བཅོས་ཀྱི་གཡུལ་ས་མདུན་མར་ཞུགས་ནས་རང་ལུགས་ཀྱི་གསོ་བཅོས་ཐབས་ལམ་བཏོན་པ་དང་།རང་ལུགས་ཀྱི་གཉེན་པོ་བེད་སྤྱོད་གནང་བར་འགོག་བཅོས་གཉིས་ཀའི་ཐད་ནས་དགའ་འོས་པའི་གྲུབ་འབྲས་ཐོབ་དང་ཐོབ་མུས་ཡིན།འོན་ཀྱང་དྲ་ལམ་སོགས་ནས་སྨན་མ་བཏང་ཡང་རང་བཞིན་གྱིས་ཉིང་སྐྱུར་བརྟག་འབྲས་སྲིབ་གཤིས་སུ་འགྱུར་བས་སྨན་བཏང་མ་བཏང་དབར་ཁྱད་པར་ཅི་ཡོད་ཞེས་པ་ལ་སོགས་པའི་དོགས་པ་དང་།ཐེ་ཚོམ་འགའ་ཞིག་འབྱུང་བཞིན་པར་དོགས་སེལ་གྱི་ཚུལ་དུ་ཅུང་ཟད་གླེང་བར།...

ཤ་ནི་བོད་རིགས་མང་ཚོགས་ཀྱི་རྒྱུན་སྤྱོད་ཀྱི་ཁ་ཟས་གཙོ་བོར་གྱུར་ཡོད།བྱེ་བྲག་ཏུ་བཤད་ན་བོད་རིགས་མང་ཚོགས་ཀྱི་ཟ་མའི་ནང་རྒྱུན་པར་ཤ་རིགས་མཐོང་ཐུབ་པ་དང་།ལུག་ཤ་ནི་དྲོད་དང་སྟོབས་རྒྱས་པར་ཕན་པས་ཟས་ཀྱི་ཡི་ག་འབྱེད་པ་དང་ཟས་འཇུ་བར་ཕན།དེས་ལུས་སྟོབས་ཇེ་དྲག་ཏུ་གཏོང་ཐུབ་པར་མ་ཟད།རླུང་ནད་དང་བད་ཀན་གྱི་ནད་བཅོ་བར་ཕན་འབྲས་ལྡན།སྐམས་ཤ་ནི་དྲོད་དང་སྟོབས་རྒྱས་པར་ཕན་པས་གྲང་བའི་ནད་དང་ཕོ་བའི་ནད།མཆིན་པའི་ནད་སོགས་གྲང་བའི་རང་བཞིན་གྱི་རིམས་ནད་འགོག་བཅོས་བྱེད་ཐུབ།...

རྒྱུད་བཞིའི་འབྱུང་ཁུངས་སྐོར་ལ་བཞེད་སྲོལ་མི་འདྲ་བ་མང་དུ་མཆིས་པ་ལས།དེ་དག་ཐམས་ཅད་དགོས་པ་རྒྱུ་མཚན་ཁྱད་པར་ཅན་ལ་དམིགས་ནས་གསུངས་ཡོད་པས།བཞེད་པ་དེ་དག་མཁས་པ་དེ་རྣམས་ཀྱི་མཐར་ཐུག་གི་དགོངས་པ་ཡིན་པའི་ངེས་པ་མི་སྣང་བས།བཞེད་སྲོལ་དེ་དག་ལེགས་པར་བརྟག་ནས་གོ་བ་ལེན་དགོས་པར་ཤིན་ཏུ་གལ་ཆེ་བར་མཐོང་།དེང་དུས་བོད་ཀྱི་མཁས་པ་མང་པོས་རྒྱུད་བཞི་ནི་དུས་རབས་བརྒྱད་པའི་སྐབས་སུ་བྱུང་བའི་གཡུ་ཐོག་རྙིང་མ་ཞེས་པས་མཛད་པར་མཁས་ལེན་བྱས་ན་བོད་ཀྱི་གསོ་རིག་ལོ་རྒྱུས་ཡུན་རིང་ལྡན་པར་སྒྲུབ་ཐུབ་པ་དང་།དེ་ལ་བརྟེན་ནས་བོད་ཀྱི་གསོ་དཔྱད་བསྟན་པ་ལ་ཞབས་འདེགས་རླབས་པོ་ཆེ་ཞུ་ཐུབ་ཀྱི་ཡོད་པ་ངོས་འཛིན་གནང་གི་ཡོད་ཚོད་འདུག།...

གྲ་བ་མངོན་ཤེས་ཅན་ནི་བསྟན་པ་ཕྱི་དར་སྐབས་སུ་འཁྲུངས་པའི་གཏེར་སྟོན་གྲགས་ཅན་ཞིག་ཡིན་ལ།ཁོང་གི་འཁྲུངས་ལོ་དང་ཁུ་བོ་ཞང་སྟོན་ཆོས་འབར་གྱི་ངོས་འཛིན།ཁོང་གིས་རྒྱུད་བཞི་གཏེར་ནས་བཞེས་ཡོད་མེད་སོགས་ཀྱི་སྐོར་ལ་བཞེད་སྲོལ་མི་འདྲ་བ་མང་པོ་ཡོད།དཔྱད་རྩོམ་འདིར་གྲ་པ་མངོན་ཤེས་ཅན་གྱི་རུས་རིགས་མཆིམས་ཞང་གི་སྐོར་དང་།ཁོང་གི་འཁྲུངས་དུས་ངོས་འཛིན་མི་འདྲ་བ་གཉིས།དེ་བཞིན་ཁོང་གི་ཁུ་བོ་ཞང་སྟོན་ཆོས་འབར་དང་འབྲོག་མའི་ཡང་སློབ་སྟེ་བླ་མ་སེ་སྟོན་ཀུན་རིག་གི་སློབ་མ་ཞང་སྟོན་ཆོས་འབར་གཉིས་ནི་གང་ཟག་མི་འདྲ་བ་སོ་སོ་ཡིན་ཚུལ།དེ་མིན་གྲ་པ་མངོན་ཤེས་ཀྱིས་གསོ་རིག་རྒྱུད་བཞི་གཏེར་ནས་བཏོན་ཡོད་མེད་སོགས་ཀྱི་ལོ་རྒྱུས་དོན་གནད་འགའི་སྐོར་ལ་འབྲེལ་ཡོད་ལོ་རྒྱུས་ཡིག་ཆ་དང་།སྨན་དཔྱད་ཡིག་རྙིང་ཁག་རྒྱབ་རྟེན་དུ་བཟུང་ནས་དཔྱད་པ་བྱས་འདུག།...

གསོ་བ་རིག་པའི་གཞུང་གི་བརྗོད་དོན་གཙོ་བོ་གསོ་བྱ་གསོ་བྱེད་ཇི་ལྟར་གསོ་བ་དང་གསོ་བ་བོ་བཅས་ཚིག་གི་འབྲུ་ཉུང་ཞིང་དོན་གྱི་གནད་འདུས་པའི་ཚུལ་གྱིས་བསྟན་འདུག་ལ།དེ་ལས་ང་ཚོས་རྩོད་སྒྲུབ་ཀྱི་སྒོ་ནས་སམ་ལྟོས་བཅས་ཀྱི་སྒོ་ནས་གསོ་བཅོས་བྱེད་ཐབས་སྨྲ་བ(辩证论治)དང་།རྩོད་སྒྲུབ་ཀྱི་སྒོ་ནས་གསོ་བཅོས་བྱེད་པའི(辩证施治)བསམ་བློ་བོད་ལ་དུས་རབས་བདུན་པའི་སྐབས་ནས་དར་ཡོད་པ་རྟོགས་ཐུབ།...

སྒྲོམ་ཚང་སྨན་ཁང་དེས་བོད་ལུགས་གསོ་རིག་དང་བོད་སྨན་སྨན་བཅོས་གཙོ་བོར་བྱེད་པ་དང་།བོད་ལུགས་གསོ་རིག་དང་ཕྱི་རྒྱལ་གྱི་སྨན་བཅོས་བྱེད་ཐབས་ཕྱོགས་བསྡུས་ཐོག་སྤྱོད་པ།བོད་སྨན་གྱི་སྨན་མཛོད་ཁང་སྒྲིག་སྦྱོར་བཅས་བྱས་ཏེ།ཚད་ངེས་ཅན་ཞིག་གི་ཐོག་ནས་རང་གཤིས་ཅན་གྱི་སྨན་སྤྱོད་དགོས་མཁོ་བསྐངས་ཡོད།...

གླིང་གེ་སར་རྒྱལ་པོའི་སྒྲུང་རྟ་རྒྱུག་རྒྱལ་འཇོག་ནི་དོན་དངོས་ལོ་རྒྱུས་དང་མཐུན་པའི་སྒྲུང་དཔེ་གལ་ཆེན་ཞིག་ཡིན་པ་དང་། ད་ལྟའང་རྟ་མགོ་ཀུ་ར་རྫ་དང་རྟ་རྟིང་ཨ་ཡུ་ཏིལ་ཞེས་པའི་ས་ཆ་སྒ་ཡུལ་ཤུལ་སོགས་ནས་ངོས་འཛིན་བྱེད་སླ་བ་དང་། རྟ་རྒྱུག་གི་དམིགས་ཡུལ་ཡང་གླིང་གི་རྒྱལ་པོ་སུ་བྱེད་ཀྱི་འགྲན་རྩོད་ཅིག་ཡིན་ཏེ། རྟ་མགྱོགས་པའི་རྒྱལ་ཁ་སུས་ལོན་ན་དེ་ནི་ཁྲ་མོ་གླིང་གི་རྒྱལ་པོ་དང་། སེང་ལྕམ་འབྲུག་མོའི་སྐྲ་བདག། སྐྱ་ལོ་ཚང་གི་རྒྱུ་བདག་བཅས་ཡིན་པ་རེད། གནས་ཚུལ་འདི་འདྲ་ནི་ཕལ་ཆེར་འཛམ་གླིང་ནས་བཤད་ན་ཡང་བྱུང་དཀོན་པ་ཞིག་ཡིན་ངེས་ལ། ཐེངས་འདིར་ཁོ་བོས་སྒྲུང་ཡིག་འདིར་འཁོད་པའི་གསོ་རིག་གི་ཤེས་བྱ་འགའ་ལ། རང་བློ་དང་འཚམ་པར་རྒྱུད་བཞི་དང་བོད་སྨན་མཁས་པའི་ཉམས་ཡིག་དང་བསྟུན་ཏེ་དཔྱད་པ་ཐན་ཐུན་ཞིག་བྱེད་འདོད་བྱུང་སོང་།...

ལུགས་གསུམ་ཀུན་འདུས་རིན་ཆེན་སྤུངས་པ་ཡི།།དཀར་ཆག་བརྟག་ན་བོད་ལུགས་ཁོ་ནར་མཐོང༌།།བི་ཇིའི་གདམས་པ་བེ་བུམ་བླ་ཡིག་སོགས།།ཞིབ་ཏུ་དཔྱད་ན་ལུགས་གང་མ་ངེས་སོ།།ཕྱི་ལྟར་དམངས་བཅོས་ནང་ལྟར་བློན་བཅོས་དང༌།།གསང་བ་རྒྱལ་པོ་བཅོས་པའི་དམར་ཁྲིད་རྣམས།།རྒྱུད་བཞིའི་གཞུང་དུ་ཐིམས་སམ་ཟུར་དུ་བཞུགས།།གངས་རིའི་ལྷ་རྗེ་རྣམས་ལ་དཔྱད་གཞི་ཕུལ།།དཀར་ནག་རྒྱ་དང་ཁྲོམ་གྱི་སྨན་པ་དང༌།།གངས་ཅན་རྒྱལ་ཁམས་ལྔ་ཡི་མཁས་རྒུ་ལ།།བོན་གྱི་སྨན་རྩིས་ཆོས་ཀྱི་ལུགས་བསྒྱུར་ནས།།གདམས་ངག་སྤེལ་བའི་སློབ་དཔོན་བཻ་རོ་རྗེ།།...