རྒྱལ་ཡོངས་བོད་ཡིག་སྨྱན་སྦྱོར་མཐུན་སྦྱོར་ཚོགས་འདུ་སྐབས་ཉི་ཤུ་བ་ཁྲི་ཀ་ནས་མཇུག་སྒྲིལ།

དུས་ཡུན་ཉིན་བཞིའི་རིང་རང་ཁུལ་དུ་བསྡུས་པའི་རྒྱལ་ཡོངས་བོད་ཡིག་སྨྱན་སྦྱོར་མཐུན་སྦྱོར་ཚོགས་འདུ་སྐབས་ཉི་ཤུ་པ་དེ་ཟླ8པའི་ཚེས6ཉིན་གྱི་ཕྱི་དྲོར་རྨ་ཡུལ་ཁྲི་ཀ་ནས་མཇུག་སྒྲིལ། མཇུག་སྒྲིལ་མཛད་སྒོའི་སྟེང་མཚོ་སྔོན་ཉིན་རེའི་ཚགས་པར་ཁང་གི་སྤྱི་ཁྱབ་རྩོམ་སྒྲིག་པ་གཞོན་པ་ཚེ་མགོན་གྱིས་གཏམ་བཤད་སྤེལ། མཚོ་ལྷོ་ཚགས་པར་ཁང་དང་། མཚོ་ལྷོ་ཁུལ་རྒྱང་སྒྲོག་བརྙན་འཕྲིན་ཁང་། མཚོ་ལྷོ་ཁུལ་བོད་ཡིག་ཆ་འཕྲིན་ལག་རྩལ་ཞིབ་འཇུག་ལྟེ་གནས། མཚོ་ལྷོ་ཁུལ་མི་རིགས་སྐད་ཡིག་བྱ་བའི་ལྟེ་གནས་བཅས་ལས་ཁུངས་གསུམ་གྱིས་ཐེངས་འདིའི་ཚོགས་འདུ་འགན་སྒྲུབ་གནང་ཞིང་། ཚོགས་འདུའི་དུས་ཡུན་ནང་ཡོངས་འཛིནAPPཔར་གཞི་གསར་པ་དང་། གཏག་ཐབས་གསར་བའི་ཁྱབ་སྒྲོག་ཚོགས་འདུ་བསྡུས་པ་མ་ཟད། བརྡ་ཆད་གསར་བའི་ཞིབ་བཤེར་གཏན་འབེབ་དང་། སྨྱན་སྦྱོར་མཐུན་སྦྱོར་ཉམས་མྱོང་བརྗེ་རེས་ཚོགས་འདུ། དེ་མིན། བོད་ཁུལ་གྱི་སྨྱན་སྦྱོར་པའི་སྡེ་མཚོ་ལྷོ་ཁུལ་གྱི་ཆེད་དོན་བཅའ་འདྲི་རུ་བསྐྱོད་པ་སོགས་བྱ་འགུལ་སྤེལ་བ་རེད། འདི་ལས་མཚོ་ལྷོ་ཁུལ་གྱི་བོད་ཡིག་སྨྱན་སྦྱོར་མཐུན་སྦྱོར་འཕེལ་རྒྱས་ཀྱི་གྲུབ་འབྲས་གསར་བ་མངོན་ཐུབ་པ་ཡིན། 
ཐེངས་འདིའི་བྱ་འགུལ་ནི《རྒྱལ་ཡོངས་བོད་ཡིག་སྨྱན་སྦྱོར་མཐུན་སྦྱོར་ཚོགས་འདུ་སྐབས་ཉི་ཤུ་བའི་གསར་འགྱུར་བརྩམ་ཆོས་ལེགས་གདམ་གྱི་བྱ་བ་བཟང་བོར་བསྒྲུབ་པའི་བརྡ་ཁྱབ》ཀྱི་བླང་བྱ་ལྟར། གསར་འགྱུར་དང་། རྒྱང་སྒྲོག་བརྙན་འཕྲིན། དྲ་རྒྱ་བཅས་རིགས་ཆེན་པོ་གསུམ་ནས་འགྲན་ཞུགས་བརྩམ་ཆོས350དང་། བརྡ་ཆད་གསར་བ504འབྱོར་ཡོད།  དུས་མཚུངས་སུ་མིང་ཚིག་རིང་ཐུང་འདྲེས་མ31། དྲ་ངོས་དངAPPཔར་ངོས193བཅས་འབྱོར་བའི་ནང་བོད་ཡིག་བརྡ་ཆད་གསར་པ82ཞིབ་བཤེར་གཏན་འཁེལ་བྱུང་། 
ཐེངས་འདིར“སྨྱན་སྦྱོར་མཐུན་སྦྱོར་འཕེལ་རྒྱས་ལ་སྐུལ་འདེད་བཏང་ནས་སྨྱན་སྦྱོར་ཚང་མའི་བརྒྱུད་སྒྲོག་རྣམ་པ་གསར་འཛུགས་བྱེད”ཅེས་པ་བརྗོད་གཞི་རུ་བཟུང་ནས་སྟོབས་ཤུགས་གཅིག་སྒྲིལ་དང་མཐུན་སྒྲིལ་གྱི་ལག་ཟུང་དམ་པོར་སྦྲེལ་ནས་རྒྱལ་ཡོངས་བོད་ཡིག་སྨྱན་སྦྱོར་གྱི་རྣམ་པ་སྔར་ལས་ལྷག་པའི་གསར་བཏོད་དང་ཐོད་བརྒལ་འབྱུང་བར་ཚང་མས་མཉམ་གཅིག་ཏུ་བརྩོན་ལེན་བྱས་ན་དོན་སྙིང་ཆེན་པོ་ལྡན་པ་རེད། 
མཚོ་སྔོན་ཉིན་རེའི་ཚགས་པར་ཁང་གི་སྤྱི་ཁྱབ་རྩོམ་སྒྲིག་པ་གཞོན་པ་ཚེ་གཞོན་པ་ཚེ་མགོན་གྱིས་རྒྱལ་ཡོངས་བོད་ཡིག་སྨྱན་སྦྱོར་མཐུན་སྦྱོར་རྩ་འཛུགས་ཨུ་ཡོན་མཐུན་ཚོགས་ཀྱི་སྐུ་ཚབ་བྱས་ནས་བསྟན་དོན། རྒྱལ་ཡོངས་བོད་ཡིག་སྨྱན་སྦྱོར་མཐུན་སྦྱོར་མཐུན་ཚོགས་ཀྱིས་སྨྱན་སྦྱོར་ཕན་ཚུན་བར་གྱི་བྱ་བའི་ཉམས་མྱོང་བརྗེ་རེས་བྱེད་པའི་འགན་འཁྲི་ལྕི་མོ་ཁུར་དུ་བླངས་ཡོད་པར་མ་ཟད། བོད་ཡིག་སྨྱན་སྦྱོར་བར་འབྲེལ་ཡོད་ནང་དོན་མཉམ་སྤྱོད་དང་བརྗེ་རེས་བྱེད་པར་གལ་ཆེའི་ནུས་པ་བཏོན་དང་འདོན་བཞིན་ཡོད། མ་འོངས་པར་སྔར་ལས་ལྷག་པའི་བྱ་བ་མང་པོ་བསྒྲུབ་རྒྱུ་ཡོད་ལ། མུ་མཐུད་དུ་རྒྱུན་འཁྱོངས་བྱས་ནས་ད་དུང་དེ་ལས་ལྷག་པའི་གསར་འགྱུར་བརྩམ་ཆོས་འབྲི་བར་ནུས་པ་ཆེན་པོ་འདོན་པ་དང་། གཏན་འཁེལ་བའི་བརྡ་ཆད་གསར་རྣམས་སྨྱན་སྦྱོར་ལས་ཁུངས་ཚང་མར་ཁྱབ་བརྡལ་དུ་གཏོང་དགོས་ཞེས་བསྟན།