འཕེལ་རྒྱས་ཀྱི་དུས་རིམ་གསར་པ་ནི་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པ་དང་།ལོ་བརྒྱ་གཉིས་པའི་འབད་འཐབ་དམིགས་འབེན་གྱི་ཕྱོགས་སུ་དཔུང་འཇུག་བྱེད་པའི་དུས་མཚམས་ཡིན།འདི་ལ་རང་རྒྱལ་གྱི་འཕེལ་རྒྱས་བརྒྱུད་རིམ་ཁྲོད་ལམ་ཚད་རྡོ་རིང་ལྟ་བུའི་དོན་སྙིང་ཡོད།...

དུས་ཡུན་ངེས་ཅན་ཞིག་གི་རིང་ལ།ང་ཚོས་ད་དུང་སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་སྤེལ་མིན་དང་།“བློ་བརྟན་འགྱུར་མེད་གཉིས”རྒྱུན་འཁྱོངས་བྱེད་མིན་ཐད་ལ་ཡང་དག་མིན་པ་དང་ཐ་ན་ནོར་འཁྲུལ་གྱི་གླེང་ཕྱོགས་ཁ་ཤས་ཐོན་ཡོད།ང་ཚོས་ངེས་པར་དུ་རྣམ་འགྱུར་གསལ་སྟོན་ལས་ཟ་ཟི་གཏན་ནས་བྱེད་མི་རུང་ལ།ཐོག་མཐའ་བར་གསུམ་དུ་སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་བསྒྱུར་བཅོས་བྱེད་པའི་ཁ་ཕྱོགས་རྒྱུན་འཁྱོངས་དང་།“བློ་བརྟན་འགྱུར་མེད་གཉིས”རྒྱུན་འཁྱོངས་བྱེད་དགོས།...

སློབ་གསོ་ནི་མི་དམངས་ཀྱི་ཕྱོགས་བསྡུས་བྱང་ཚད་མཐོ་རུ་གཏོང་བ་དང་།མི་ཕྱོགས་ཡོངས་ནས་འཕེལ་རྒྱས་ཡོང་བར་སྐུལ་འདེད་གཏོང་བའི་ཐབས་ལམ་གལ་ཆེན་ཞིག་དང་།མི་རིགས་དར་རྒྱས་དང་སྤྱི་ཚོགས་ཡར་ཐོན་ཡོང་བའི་རྨང་རྡོ་གལ་ཆེན་ཞིག་ཡིན་ལ།ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་ཐག་གཅོད་རང་བཞིན་གྱི་དོན་སྙིང་ལྡན་པའི་བྱ་གཞག་ཅིག་ཀྱང་ཡིན།...

ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དུས་རབས་གསར་པར་སླེབས་ཡོད་ལ།རང་རྒྱལ་གྱི་དཔལ་འབྱོར་འཕེལ་རྒྱས་ཀྱང་དུས་རབས་གསར་པར་སླེབས་ཡོད།དུས་རབས་སགར་པར་རང་རྒྱལ་གྱི་དཔལ་འབྱོར་འཕེལ་རྒྱས་ཀྱི་ཁྱད་ཆོས་ནི་ངས་ཏང་གི་ཚོགས་ཆེན་བཅུ་དགུ་པའི་སྙན་ཞུ་ལས་ནན་བཤད་བྱས་པ་ནང་བཞིན་ཏེ།རང་རྒྱལ་གྱི་དཔལ་འབྱོར་ནི་མྱུར་ཚད་མགྱོགས་པོའི་ངང་འཕར་སྣོན་ཡོང་བའི་དུས་རིམ་ནས་སྤུས་ཚད་མཐོ་བའི་འཕེལ་རྒྱས་འགྲོ་བའི་དུས་རིམ་ལ་སླེབས་ཡོད་པ་རེད།འདི་ནི་བརྡར་གཅོད་གནད་ཆེན་ཞིག་ཡིན་པས།ང་ཚོས་ངེས་པར་དུ་གནད་ཆེའི་ད་ཡོད་ཀྱི་དོན་སྙིང་དང་ཟབ་ཡངས་ཀྱི་ལོ་རྒྱུས་ཀྱི་དོན་སྙིང་ངོས་འཛིན་ཟབ་མོ་བྱེད་དགོས།...

རང་རྒྱལ་གྱི་དཔལ་འབྱོར་འཕེལ་རྒྱས་རྒྱུན་རྣམ་གསར་པར་སླེབས་པ་ནི་རང་རྒྱལ་གྱི་དཔལ་འབྱོར་འཕེལ་རྒྱས་ཀྱི་དུས་རིམ་རང་བཞིན་གྱི་ཁྱད་ཆོས་ཀྱི་མཚོན་ཚུལ་ཟློག་ཏུ་མེད་པ་ཞིག་ཡིན་ལ།མིའི་འདོད་བློ་ལྟར་སྒྱུར་ཐུབ་པ་ཞིག་མ་རེད།རྒྱུན་རྣམ་གསར་པ་ངོས་འཛིན་དང་།རྒྱུན་རྣམ་གསར་པར་འཚམ་པ།རྒྱུན་རྣམ་གསར་པ་སྣེ་ཁྲིད་བཅས་བྱ་རྒྱུ་ནི་མིག་སྔ་དང་འབྱུང་འགྱུར་དུས་སྐབས་ཤིག་རིང་གི་རང་རྒྱལ་གྱི་དཔལ་འབྱོར་འཕེལ་རྒྱས་ཀྱི་གཏན་ཚིགས་ཆེན་པོ་དེ་རེད།...

རང་རྒྱལ་སྤྱི་ཚོགས་ཀྱི་འགལ་བ་གཙོ་བོའི་འགྱུར་ལྡོག་དང་བསྟུན་ནས་མི་དམངས་ཀྱི་དགའ་སྐྱིད་ལྡན་པའི་འཚོ་བའི་དགོས་མཁོ་ཉིན་བཞིན་ཆེ་རུ་འགྲོ་བ་དེ་སྔར་ལས་ལྷག་པའི་སྐོང་དགོས་ན།ངེས་པར་དུ་མི་དམངས་ཡོངས་རྫོགས་ཐུན་མོང་ཐོག་ཕྱུག་འགྱུར་ཡོང་བར་སྐུལ་འདེད་གཏོང་རྒྱུ་དེ་མི་དམངས་ལ་བདེ་སྐྱིད་སྐྲུན་པའི་ཤུགས་འདོན་ས་བྱེད་དགོས་པ་དང་།ཏང་གིས་དུས་ཡུན་རིང་པོར་སྲིད་དབང་སྐྱོང་བའི་རྨང་གཞི་རྒྱུན་ཆད་མེད་པར་སྲ་བརྟན་གཏོང་དགོས།...

ཐུན་མོང་ཐོག་ཕྱུག་པོར་འགྱུར་བར་བྱ་རྒྱུ་དེ་ཉིད་མ་གཞི་ནས་སྤྱི་ཚོགས་རིང་ལུགས་དེང་རབས་ཅན་གྱི་དམིགས་འབེན་གལ་ཆེན་ཞིག་ཡིན།ང་ཚོས་ཐོག་མཐའ་བར་གསུམ་དུ་མི་དམངས་ཀྱིས་དགའ་སྐྱིད་ལྡན་པའི་འཚོ་བར་བཅངས་པའི་རེ་སྒུག་གསར་པ་སྐོང་རྒྱུ་དེ་འགོ་རྩོམ་ས་དང་མཐའ་མཇུག་གི་འབབ་སར་བྱེད་དགོས་པ་ལས།དེང་རབས་ཅན་མངོན་འགྱུར་བྱས་རྗེས་གཞི་ནས་ཐུན་མོང་ཐོག་ཕྱུག་པོར་འགྱུར་བའི་གནད་དོན་ཐག་གཅོད་བྱས་ན་མི་འགྲིག་སྟེ།དེང་རབས་ཅན་དུ་འགྱུར་བའི་བརྒྱུད་རིམ་ནང་དུ་གནད་དོན་འདི་རྒྱུན་ཆད་མེད་པར་རིམ་བཞིན་ཐག་གཅོད་ལེགས་པོ་བྱེད་དགོས།...

ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་ཚར་བར་བྱེད་པར་གཅིག་ཀྱང་ལུས་མི་རུང་ལ།ཐུན་མོང་ཐོག་ཕྱུག་པོར་འགྱུར་བའི་འགྲོ་ལམ་ཐོག་གཅིག་ཀྱང་གྲལ་གཞུག་ཏུ་ལུས་མི་རུང་བ་ཡིན།—«དུས་རབས་གསར་པར་རྣམ་པ་གསར་པ་གཏོད་དགོས་ལ།དེ་བས་ཀྱང་བྱས་རྗེས་གསར་པ་འཇོག་དགོས།»(༢༠༡༧ལོའི་ཟླ༡༠ཚེས༢༥ཉིན།) «ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ།»པོད་གསུམ་པ།ཕྱི་ཡིག་དཔེ་སྐྲུན་ཁང་གི༢༠༢༠ལོའི་རྒྱ་ཡིག་པར་གཞི།ཤོག་ངོས༦༦པ།...

ཐུན་མོང་ཐོག་ཕྱུག་པོར་འགྱུར་བ་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རྩ་བའི་རྩ་དོན་ཡིན་པས།ངེས་པར་དུ་འཕེལ་རྒྱས་ཀྱི་གྲུབ་འབྲས་ཉིད་སྔར་ལས་མང་བ་དང་སྔར་ལས་དྲང་སྙོམས་ཀྱི་སྒོ་ནས་མི་དམངས་ཡོངས་རྫོགས་ལ་ཕན་པའི་གསོས་སུ་འགྱུར་བར་བྱས་ཏེ།ཐུན་མོང་ཐོག་ཕྱུག་པོར་འགྱུར་བའི་ཕྱོགས་སུ་གོམ་སྟབས་བརྟན་པོས་མདུན་སྐྱོད་བྱེད་དགོས།...

མི་དམངས་ལ་འཚོ་བ་ཡག་པོ་སྐྱེལ་དུ་འཇུག་རྒྱུ་ནི་ང་ཚོའི་ལས་དོན་མཐའ་དག་གི་ཀུན་སློང་དང་དམིགས་ཡུལ་ཡིན།...

རྒྱ་ཆེའི་མི་དམངས་མང་ཚོགས་ལ་བསྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་མཉམ་དུ་ལོངས་སུ་སྤྱོད་དུ་འཇུག་རྒྱུ་ནི་སྤྱི་ཚོགས་རིང་ལུགས་ཀྱི་ངོ་བོའི་བླང་བྱ་ཡིན་པ་དང་།ང་ཚོའི་ཏང་གིས་བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བའི་རྩ་བའི་དམིགས་ཡུལ་རྒྱུན་འཁྱོངས་བྱེད་པའི་གལ་ཆེའི་མངོན་ཚུལ་ཡིན།ང་ཚོས་དོན་གཉེར་བྱེད་པའི་འཕེལ་རྒྱས་ནི་མི་དམངས་ལ་བདེ་སྐྱིད་སྐྲུན་པའི་འཕེལ་རྒྱས་ཡིན་པ་དང་།ང་ཚོས་དོན་གཉེར་བྱེད་པའི་འབྱོར་ཕྱུག་ནི་མི་དམངས་ཡོངས་རྫོགས་ཐུན་མོང་ཐོག་ཕྱུག་འགྱུར་ཡོང་བར་བྱ་རྒྱུ་དེ་ཡིན།བསྒྱུར་བཅོས་དང་འཕེལ་རྒྱས་ལེགས་འགྲུབ་བྱུང་ཡོད་མེད་ཀྱི་མཐར་ཐུག་གི་བརྡར་ཤ་གཅོད་པའི་ཚད་གཞི་ནི་མི་དམངས་ཀྱིས་བསྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་མཉམ་དུ་ལོངས་སུ་སྤྱོད་ཐུབ་ཡོད་མེད་ལ་བལྟ་དགོས།...

ང་ཚོའི་ཏང་གིས་མི་དམངས་ལ་སྣེ་ཁྲིད་དེ་ཕྱོགས་ཡོངས་ནས་འབྱོར་འབྲིང་སྤྱི་ཚོགས་འཛུགས་སྐྲུན་དང་།བསྒྱུར་བཅོས་སྒོ་འབྱེད།སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་བཅས་བྱེད་པའི་རྩ་བའི་དམིགས་ཡུལ་ནི་སྤྱི་ཚོགས་ཀྱི་ཐོན་སྐྱེད་ནུས་ཤུགས་འཕེལ་རྒྱས་གཏོང་བར་བརྟེན་ནས་མི་དམངས་ཀྱི་དངོས་པོ་དང་རིག་གནས་ཀྱི་འཚོ་བ་རྒྱུན་ཆད་མེད་པར་མཐོ་རུ་གཏོང་བ་དང་།མི་ཕྱོགས་ཡོངས་ནས་འཕེལ་རྒྱས་ཡོང་བར་སྐུལ་སྤེལ་གཏོང་རྒྱུ་དེ་རེད།ང་ཚོའི་ལས་དོན་མཐའ་དག་གི་ཕན་འབྲས་ཆེ་ཆུང་ལ་ཞིབ་དཔྱད་བྱ་རྒྱུ་ནི་མཐར་མི་དམངས་ལ་ཕན་པ་དངོས་གནས་ཐོབ་ཡོད་མེད་དང་།མི་དམངས་ཀྱི་འཚོ་བ་དངོས་གནས་ལེགས་སུ་ཕྱིན་ཡོད་མེད་ལ་བལྟ་དགོས།འདི་ནི་སྤྱི་དོན་དུ་ཏང་འཛུགས་པ་དང་དམངས་དོན་དུ་སྲིད་སྐྱོང་བའི་ངོ་བོའི་བླང་བྱ་ཡིན་ཞིང་།ཏང་དང་མི་དམངས་ཀྱི་བྱ་གཞག་རྒྱུན་ཆད་མེད་པར་འཕེལ་རྒྱས་ཡོང་བའི་ཁག་ཐེག་གལ་ཆེན་ཡིན།...

མི་དམངས་ནི་ང་ཚོའི་ཏང་གིས་སྲིད་དབང་སྐྱོང་བའི་གདེང་ཚོད་ཆེ་ཤོས་དང་།ང་ཚོ་སྤྱི་མཐུན་རྒྱལ་ཁབ་ཀྱི་སྲ་ཞིང་བརྟན་པའི་རྨང་གཞི།ང་ཚོའི་ཏང་སྟོབས་ལྡན་དང་རྒྱལ་ཁབ་དར་རྒྱས་སུ་གཏོང་བའི་རྩ་བ་བཅས་ཡིན།...

མི་དམངས་ནི་ལོ་རྒྱུས་གསར་སྐྲུན་བྱེད་མཁན་ཡིན་ལ།མི་དམངས་ནི་དཔའ་བོ་ངོ་མ་ཡིན།བརྗིད་ཉམས་ལྡན་པའི་ཀྲུང་ཧྭ་མི་རིགས་ཀྱི་འཕེལ་རྒྱས་ལོ་རྒྱུས་དེབ་ཐེར་ནི་ཀྲུང་གོའི་མི་དམངས་ཀྱིས་བྲིས་པ་རེད་ཨང་།རྒྱ་ཆེ་ལ་གཏིང་ཟབ་པའི་ཀྲུང་ཧྭའི་ཤེས་དཔལ་ནི་ཀྲུང་གོའི་མི་དམངས་ཀྱིས་བསྐྲུན་པ་རེད་ཨང་།ཀྲུང་ཧྭ་མི་རིགས་ཀྱི་རྒྱུན་རིང་ཉམས་མེད་ཀྱི་སྙིང་སྟོབས་ནི་ཀྲུང་གོའི་མི་དམངས་ཀྱིས་བསྐྲུན་པ་རེད་ཨང་།ཀྲུང་ཧྭ་མི་རིགས་ཡར་ལངས་པ་དང་ཕྱུག་པོར་གྱུར་པ་ནས་སྟོབས་ལྡན་དུ་འགྱུར་བའི་འཕུར་མཆོང་རླབས་པོ་ཆེ་བསུ་རྒྱུ་བྱུང་བ་ནི་ཀྲུང་གོའི་མི་དམངས་ཀྱིས་འབད་འཐབ་བྱས་ནས་ཐོབ་པ་རེད།...

ང་ཚོའི་ཏང་གིས་གསར་བརྗེ་དང་།འཛུགས་སྐྲུན།བསྒྱུར་བཅོས་བཅས་ལོ་རྒྱུས་ཀྱི་དུས་སྐབས་ཁག་ཏུ་མི་དམངས་ལ་ཉེ་བར་བརྟེན་རྒྱུ་རྒྱུན་འཁྱོངས་བྱས་ཡོད་པ་རེད།བསྒྱུར་བཅོས་སྒོ་འབྱེད་བྱས་ནས་ལོ་ངོ༣༥རིང་གི་ལོ་རྒྱུས་ཀྱི་འཕེལ་རིམ་ལས་བསྒྱུར་བཅོས་རིགས་མང་པོ་ཞིག་ནི་གཞི་རིམ་མང་ཚོགས་ཀྱིས་རང་འགུལ་ངང་སྤེལ་བ་དང་།འོག་ནས་གོང་དུ་གྲུབ་པ་ཡིན་ཞིང་།རྒྱ་ཆེའི་མི་དམངས་མང་ཚོགས་ནི་བསྒྱུར་བཅོས་ལ་སྐུལ་འདེད་གཏོང་བའི་སྟོབས་ཤུགས་གལ་ཆེན་ཞིག་ཡིན་པ་བསྟན་ཡོད།ད་སྐབས་ང་ཚོས་ཕྱོགས་ཡོངས་ནས་བསྒྱུར་བཅོས་ཟབ་སྤེལ་བྱེད་པར་སྔར་བཞིན་མི་དམངས་ཀྱི་བྱེད་པོའི་ནུས་པ་འདོན་སྤེལ་གང་ལེགས་བྱེད་དགོས།མི་དམངས་ཀྱི་དོན་དུ་བསྒྱུར་བཅོས་བྱས་ན་ད་གཟོད་བསྒྱུར་བཅོས་ལ་དོན་སྙིང་ལྡན་པ་དང་།མི་དམངས་ལ་བརྟེན་ནས་བསྒྱུར་བཅོས་བྱས་ན་ད་གཟོད་བསྒྱུར་བཅོས་ལ་སྒུལ་ཤུགས་ཡོད་པ་ཡིན།...

མི་དམངས་མང་ཚོགས་ནི་ང་ཚོའི་སྟོབས་ཤུགས་ཀྱི་འབྱུང་ཁུངས་ཡིན།ང་ཚོས་གསལ་པོར་ཤེས་པ་ནི་མི་རེ་རེའི་སྟོབས་ཤུགས་ལ་ཚད་ཡོད་ཀྱང་།ང་ཚོ་མི་བརྒྱ་བློ་གཅིག་དང་དཔུང་པ་མཉམ་གཤིབ་བྱས་ན།ཁྱད་གསོད་བྱེད་མི་ཐུབ་པའི་དཀའ་ངལ་གང་ཡང་མེད།མི་རེ་རེའི་ལས་ཀའི་དུས་ཚོད་ལ་ཚད་ཡོད་ཀྱང་།བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་རྒྱུ་ནི་ཚད་མེད་ཅིག་རེད།འགན་འཁྲི་རི་ལས་ལྕི་བ་དང་ལས་དོན་སྒྲུབ་ཡུན་རིང་བས།ང་ཚོས་ངེས་པར་ཐོག་མཐའ་བར་གསུམ་དུ་མི་དམངས་དང་གཅིག་སེམས་གཅིག་གཏད་དང་།མི་དམངས་དང་བདེ་སྡུག་མཉམ་མྱོང་།མི་དམངས་དང་མཐུན་སྒྲིལ་འབད་འཐབ་བཅས་བྱས་ཏེ།ཉིན་མཚན་ལྟོས་མེད་དུ་བསྒྲུབ་བྱའི་ལས་དོན་ལ་གཞོལ་ནས་ལོ་རྒྱུས་དང་མི་དམངས་ལ་ཚད་གཞི་ལོངས་པའི་རྒྱུགས་འབྲས་ཤིག་སྤྲོད་དགོས།...

གུང་ཁྲན་ཏང་ནི་མི་དམངས་ལ་བྱ་བ་སྒྲུབ་མཁན་རང་ཡིན་པས།མི་དམངས་ཀྱི་འཚོ་བ་ཉིན་རེ་བཞིན་ཇེ་ལེགས་དང་ལོ་རེ་བཞིན་ཇེ་ལེགས་སུ་འགྲོ་བར་བྱེད་དགོས།...

འདི་འདྲའི་རྒྱལ་ཁབ་ཆེན་པོ་ཞིག་ཡིན་ཙ་ན།འགན་འཁྲི་ཧ་ཅང་ལྕི་ལ་ལས་དོན་ཧ་ཅང་དཀའ་ཚེགས་ཆེ་བ་རེད།བདག་འཛིན་རིང་དུ་སྤང་།དམངས་དོན་བདག་གིས་བྱ།ང་ལ“བདག་འཛིན”རིང་དུ་སྤང་ཏེ་ཀྲུང་གོའི་འཕེལ་རྒྱས་ལ་རང་ཉིད་ཀྱི་ཡོད་ཚད་སྐྱེས་སུ་འབུལ་འདོད་ཡོད།...

མི་ཡི་གནད་དོན་ནི་སྲིད་ཏང་ཞིག་དང་སྲིད་དབང་ཞིག་གི་ངོ་བོར་ཉམས་ཞིབ་བྱེད་ཐབས་ཐིག་པོ་ཞིག་ཡིན་པའི་རྒྱུ་མཚན་གང་ཡིན་ངེས་པར་དུ་ཏང་ཡོངས་ཀྱི་སེམས་ལ་འཇགས་དགོས།མི་དམངས་ལ་སྣེ་ཁྲིད་བྱས་ནས་དགའ་སྐྱིད་ལྡན་པའི་འཚོ་བ་གསར་སྐྲུན་བྱེད་པ་ནི་ང་ཚོའི་ཏང་གི་ནམ་ཡང་འགྱུར་མེད་ཀྱི་འབད་འཐབ་དམིགས་འབེན་ཡིན།ངེས་པར་དུ་མི་དམངས་ཀྱི་ཁེ་ཕན་ཐོག་མཐའ་བར་གསུམ་དུ་བླ་ན་མེད་པའི་གནས་སུ་འཇོག་པ་དང་།བསྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་སྔར་ལས་མང་བ་དང་སྔར་བས་དྲང་སྙོམས་ཀྱི་སྒོ་ནས་མི་དམངས་ཡོངས་རྫོགས་ལ་ཕན་པའི་གསོས་སུ་བསྒྲུབས་ཏེ།མི་དམངས་ཡོངས་རྫོགས་ཐུན་མོང་ཐོག་ཕྱུག་པོར་འགྱུར་བའི་ཕྱོགས་སུ་རྒྱུན་ཆད་མེད་སྐྱོད་དགོས།...

མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་ཉམས་ལེན་ཤུགས་ཆེན་བྱེད་དགོས།འདི་ནི་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པའི་ཐོག་ཐོག་མར་བཏོན་པ་ཡིན་ཞིང་།དེས་ང་ཚོའི་ཏང་གིས་བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བའི་རྩ་བའི་དམིགས་ཡུལ་མཚོན་པ་དང་།མི་དམངས་ནི་འཕེལ་རྒྱས་སྐུལ་འདེད་གཏོང་བའི་རྩ་བའི་སྟོབས་ཤུགས་ཡིན་པའི་དངོས་གཙོའི་ལོ་རྒྱུས་ལྟ་བ་མཚོན་ཡོད།...

བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་རྒྱུ་ནི་ང་ཚོའི་ཏང་གི་བྱ་སྤྱོད་མཐའ་དག་གི་གཞི་རྩར་གྱུར་པའི་ཀུན་སློང་དང་དམིགས་ཡུལ་ཡིན་པ་དང་།ང་ཚོའི་ཏང་ཉིད་སྲིད་ཏང་གཞན་དག་ཐམས་ཅད་དང་མི་འདྲ་བའི་རྩ་བའི་ཁྱད་རྟགས་ཡིན།ཏང་གི་ལས་དོན་ཡོད་ཚད་ཀྱི་ཚད་གཞི་མཐོ་ཤོས་ནི་ཆེས་རྒྱ་ཆེ་བའི་མི་དམངས་ཀྱི་རྩ་བའི་ཁེ་ཕན་ཡིན་དགོས་ངེས་རེད།ང་ཚོའི་ལས་ཀ་ཡོད་ཚད་ཀྱི་ཕན་འབྲས་ཞིབ་བཤེར་བྱེད་ན་མཐར་ཐུག་མི་དམངས་ལ་དངོས་འབྲེལ་ཁེ་བཟང་རག་ཡོད་མེད་དང་།མི་དམངས་ཀྱི་འཚོ་བ་དངོས་འབྲེལ་ལེགས་བཅོས་བྱུང་ཡོད་མེད།མི་དམངས་ཀྱི་ཁེ་དབང་དངོས་འབྲེལ་འགན་སྲུང་བྱུང་ཡོད་མེད་བཅས་ལ་ལྟ་དགོས།...

ང་ཚོའི་མི་དམངས་འཚོ་བར་དགའ་ཞེན་ཆེ་བ་དང་།ཁོང་ཚོས་སྔར་ལས་ལྷག་པའི་སློབ་གསོ་དང་།སྔར་ལས་བརྟན་པའི་ལས་ཀ།སྔར་ལས་བློ་ཡིད་ཚིམ་པའི་ཡོང་འབབ།སྔར་ལས་ཡིད་རྟོན་རུང་བའི་སྤྱི་ཚོགས་འགན་སྲུང་།སྔར་ལས་ཆུ་ཚད་མཐོ་བའི་སྨན་བཅོས་འཕྲོད་བསྟེན་གྱི་ཞབས་ཞུ།སྔར་ལས་སྐྱིད་པའི་གནས་སྡོད་ཀྱི་ཆ་རྐྱེན།སྔར་ལས་མཛེས་པའི་ཁོར་ཡུག་བཅས་ལ་རེ་སྨོན་བྱེད་ཀྱི་ཡོད་པ་དང་།བུ་ཕྲུག་རྣམས་འཚར་ལོངས་དེ་བས་ལེགས་པ་དང་།ལས་ཀ་དེ་བས་ལེགས་པ།འཚོ་བ་དེ་བས་བཟང་བ་བཅས་ཡོང་བའི་རེ་སྨོན་བྱེད་ཀྱི་ཡོད།མི་དམངས་ཀྱིས་རེ་སྨོན་བྱེད་པའི་དགའ་སྐྱིད་ཀྱི་འཚོ་བ་ནི་ང་ཚོའི་འབད་ཐབས་ཀྱི་དམིགས་འབེན་ཡིན།...

ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་བསྐྲུན་ཚར་བར་བྱེད་པའི་སྤྱིའི་ཐབས་ཇུས་ཀྱི་བཀོད་པ་གོམ་སྟབས་གཉིས་སུ་ཕྱེ་ནས་འགྲོ་རྒྱུ་ཡིན་པ་སྟེ།༢༠༢༠ལོ་ནས༢༠༣༥ལོའི་བར་དུ་སྤྱི་ཚོགས་རིང་ལུགས་དེང་རབས་ཅན་གཞི་རྩའི་ཆ་ནས་མངོན་འགྱུར་བྱ་རྒྱུ་དང་།༢༠༣༥ལོ་ནས་དུས་རབས་འདིའི་དུས་དཀྱིལ་བར་དུ་རང་རྒྱལ་འདི་ཉིད་འབྱོར་ཕྱུག་དང་།དམངས་གཙོ།ཤེས་དཔལ།ཞི་མཐུན།མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་དུ་བསྐྲུན་ཚར་བར་བྱ་རྒྱུ་ཡིན།...

ཀྲུང་གོ་གསར་པ་དབུ་བརྙེས་པ་དང་ལྷག་པར་དུ་བསྒྱུར་བཅོས་སྒོ་འབྱེད་བྱས་ཚུན་དུ་ཡུན་རིང་འཚོལ་ཞིབ་དང་ལག་ལེན་བྱས་པའི་རྨང་གཞིའི་ཐོགཚོགས་ཆེན་བཅོ་བརྒྱད་པའི་ཚུན་ལ་རིགས་པའི་གཞུང་ལུགས་དང་ལག་ལེན་ཐད་གསར་གཏོད་དང་ཐོད་བརྒལ་བྱུང་བ་བརྒྱུད་དེ།ང་ཚོའི་ཏང་གིས་ཀྲུང་གོའི་ལུགས་ཀྱི་དེང་རབས་ཅན་ལམ་ལྷོང་ངང་སྐུལ་འདེད་དང་རྒྱ་སྐྱེད་བཏང་ཡོད།...

དུས་བཀག་ལྟར་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་ཚར་བར་བྱེད་པ་དང་དབུལ་བྲལ་འགག་སྒྲོལ་གྱི་དམག་འཐབ་ལ་རྒྱལ་ཁ་བླངས་པ་དེས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་རྒྱུ་དེ་མདུན་དུ་གོམ་པ་གསར་པ་ཆེན་པོ་ཞིག་སྤོས་པ་དང་།དུས་རབས་ཀྱི་རྗེས་སུ་ཆེས་ཆེར་ལུས་པ་ནས་གོམ་ཞེང་ཆེན་པོས་དུས་རབས་ཀྱི་རྗེས་ཟིན་པའི་མཆོང་སྐྱོད་གསར་པ་མངོན་འགྱུར་བྱུང་བ་རེད།...